Bagri

ऐ बातां केगे यीसू गलील ऊं यहुदियां में यरदन नदी गै दूसरी पार उड़ग्यो। बठै एक भोत मोटी भीड़ लारै चाल पड़ी झिकी नै बण ठीक करी। बिनै परखण खातर केई बिंगै कनै आया अर केण लागग्या कै, “कोई आदमी कीं कारण ऊं आपगी लुगाई नै तलाक दे दैय के?” यीसू उतर दियो कै, “थे सासतर में इंया कोनी पढयो कै धरती बणाण आळै बानै लुगाई अर आदमी गै रूप में बणाया।” अर ओ केयो, “आपगै मां बाप नै छोडगे आदमी आपगी लुगाई सागै दो होंता बी एक सरीर होगे रेवैगा। ईंखातर बे दो कोनी, एक ई बणज्यै। ईंखातर झिका नै परमेसर जोडै़ है, बानै कोई बी आदमी न्यारा ना करै।” तो फरीसी बोल्या, “तो मूसा इंया क्यामी लिख्यो कै कोई आदमी आपगी लुगाई नै तलाक दे सकै। पण बिनै लिखगे देणो हो'सी।” यीसू बानै उतर दियो, “मूसा ओ नेम विधान थारै कठोर मन गै कारण दियो। पण सरू में आ रीत कोनी।” मैं थानै केऊं, “झिको आदमी आपगी लुगाई नै बेबीचार गै अलावा ओर कोई कारण ऊं तलाक देवै अर दूसरी लुगाई सागै ब्या करै तो बो बेबीचारी है।” ओ सुणगे चेला बोल्या, “जे कोई आदमी लुगाई गै बिचाळै कोई हिसी बात होवै तो ब्या ई नई करणो चईयै।” यीसू बोल्यो, “हर एक आदमी उपदेस नै मानै कोनी। इनै बस बे ई मानै झिका नै ईं बात गी समझ दैएड़ी होवै। कीं लोग मां गै पेट ऊं ई खुसरा जन्मै है अर कीं लोग आदमियां गै द्वारा खुसरा बणा दिया जावै अर कीं लोग सुरग गै राज खातर बांगा बरगा बणज्यै। झिका इनै सुणनो चावै बे सुणल्यै।”


फेर लोग केई टाबरां नै यीसू कनै ल्यागे केयो, “आंगै सिर पर हात रखगे आसिरवाद दैयो अर आं खातर पराथना करो।” पण चेला बानै ललकार दिया। ओ देखगे यीसू बोल्यो, “टाबरां नै अठै ई रेण दैयो। आनै रोको ना। मेरै कनै आण दैयो। क्यूंकै सुरग गो राज आं बरगो ई है।” जद बो बानै आसिरवाद देगे बठूं चाल पड़यो।


बठै एक आदमी यीसू नै आ'गे केण लागग्यो, “गुरूजी मैं अनन्त जीवन पाण खातर के आच्छो काम करूं?” यीसू उतर दियो, “आच्छो काम के है? इंगै बारै में मनै क्यूं पूछै? क्यूंकै आच्छो काम तो एक ही है तूं अनन्त जीवन लेण खातर आग्या गो पालण कर।” बण पूछयो, “किसी आग्या?” यीसू केयो, “कतल ना करी, बेबीचार ना करी, झूठी गवाई ना देई अर चोरी ना करी। अर आपगै मां बाप गो आदर करी। जिंया तूं आपगै सरीर ऊं प्रेम करै बिंयाई आपगै आसै पासै रेण आळा ऊं प्रेम करी।” जद बण आदमी केयो, “मैं आं सारी बातां नै मानूं। अब मेरै में के कमी है?” यीसू बोल्यो, “जे तूं पूरण बणणो चावै तो तेरो सारो धन माल बेचगे गरीबा नै बांट दे क्यूंकै तनै सुरग में मिलज्यैगो। फेर मेरै लारै होज्या।” ओ सुणगे बो भोत उदास होयो अर बठूं उड़ग्यो क्यूंकै बो भोत अमीर आदमी हो। यीसू आपगै चेला नै केयो, “मैं थानै साची केऊं, एक धनवान आदमी गो सुरग में जाणो भोत ओखो काम है। पण एक ऊंट गो सुई गै नाकै माखर निकळ जाणो सोरो है पण कोई बी धनवान आदमी गो सुरग गै राज में जाणो ओखो है।” चेला ओ सुणगे हेरान हो'ग्या अर पूछयो कै, “फेर किंगो उद्धार हो'सी।” यीसू बानै केयो, “आदमियां खातर तो ओ काम ओखो है पण परमेसर ईं काम नै कर सकै।” पतरस केयो, “देख, म्हे सारो कीं छोडगे तेरै लारै हो'ग्या। म्हानै के मिलसी?” यीसू बोल्यो, “मैं साची केऊं कै एक नुंअ जुग में जद मिनख गो बेटो आपगै न्याय गै सिंघासन पर बेठैगो तो थे झिका बिंगै लारै चालो बारा सिंघासनां पर बेठगे इसराएल गी बारा जातां गो न्याय करोगा। झिकै मेरै खातर आपगै घर परिवार नै छोड़यो है बिनै सौ गुणा फळ मिलैगो। अर सुरग गो अधिकारी बणैगो। पण भोतसा अब झिका आ'गै है बे लारै होज्यैगा अर झिका लारै है बे आ'गै होज्यैगा।”

Nghe मत्ती 19