मत्ती 19
19
तलाक गै बारै में यीसू गी सिक्सा
(मरकुस 10:1-12)
1ऐ बातां केगे यीसू गलील ऊं यहुदियां में यरदन नदी गै दूसरी पार उड़ग्यो। 2बठै एक भोत मोटी भीड़ लारै चाल पड़ी झिकी नै बण ठीक करी। 3बिनै परखण खातर केई बिंगै कनै आया अर केण लागग्या कै, “कोई आदमी कीं कारण ऊं आपगी लुगाई नै तलाक दे दैय के?” 4यीसू उतर दियो कै, “थे सासतर में इंया कोनी पढयो कै धरती बणाण आळै बानै लुगाई अर आदमी गै रूप में बणाया।”#उतपत्ती 1:27 5अर ओ केयो, “आपगै मां बाप नै छोडगे आदमी आपगी लुगाई सागै दो होंता बी एक सरीर होगे रेवैगा।#उतपत्ती 2:24 6ईंखातर बे दो कोनी, एक ई बणज्यै। ईंखातर झिका नै परमेसर जोडै़ है, बानै कोई बी आदमी न्यारा ना करै।” 7तो फरीसी बोल्या, “तो मूसा इंया क्यामी लिख्यो कै कोई आदमी आपगी लुगाई नै तलाक दे सकै। पण बिनै लिखगे देणो हो'सी।” 8यीसू बानै उतर दियो, “मूसा ओ नेम विधान थारै कठोर मन गै कारण दियो। पण सरू में आ रीत कोनी।” 9मैं थानै केऊं, “झिको आदमी आपगी लुगाई नै बेबीचार गै अलावा ओर कोई कारण ऊं तलाक देवै अर दूसरी लुगाई सागै ब्या करै तो बो बेबीचारी है।” 10ओ सुणगे चेला बोल्या, “जे कोई आदमी लुगाई गै बिचाळै कोई हिसी बात होवै तो ब्या ई नई करणो चईयै।” 11यीसू बोल्यो, “हर एक आदमी उपदेस नै मानै कोनी। इनै बस बे ई मानै झिका नै ईं बात गी समझ दैएड़ी होवै। 12कीं लोग मां गै पेट ऊं ई खुसरा जन्मै है अर कीं लोग आदमियां गै द्वारा खुसरा बणा दिया जावै अर कीं लोग सुरग गै राज खातर बांगा बरगा बणज्यै। झिका इनै सुणनो चावै बे सुणल्यै।”
टाबर अर यीसू
(मरकुस 10:13-16; लूका 18:15-17)
13फेर लोग केई टाबरां नै यीसू कनै ल्यागे केयो, “आंगै सिर पर हात रखगे आसिरवाद दैयो अर आं खातर पराथना करो।” पण चेला बानै ललकार दिया। 14ओ देखगे यीसू बोल्यो, “टाबरां नै अठै ई रेण दैयो। आनै रोको ना। मेरै कनै आण दैयो। क्यूंकै सुरग गो राज आं बरगो ई है।” 15जद बो बानै आसिरवाद देगे बठूं चाल पड़यो।
अमीर आदमी अर अनन्त जीवन
(मरकुस 10:17-31; लूका 18:18-30)
16बठै एक आदमी यीसू नै आ'गे केण लागग्यो, “गुरूजी मैं अनन्त जीवन पाण खातर के आच्छो काम करूं?” 17यीसू उतर दियो, “आच्छो काम के है? इंगै बारै में मनै क्यूं पूछै? क्यूंकै आच्छो काम तो एक ही है तूं अनन्त जीवन लेण खातर आग्या गो पालण कर।” 18बण पूछयो, “किसी आग्या?” यीसू केयो, “कतल ना करी, बेबीचार ना करी, झूठी गवाई ना देई अर चोरी ना करी। 19अर आपगै मां बाप गो आदर करी।#निरगमन 20:12-16; व्यवस्ता विवरण 5:16-20 जिंया तूं आपगै सरीर ऊं प्रेम करै बिंयाई आपगै आसै पासै रेण आळा ऊं प्रेम करी।”#लेवी 19:18 20जद बण आदमी केयो, “मैं आं सारी बातां नै मानूं। अब मेरै में के कमी है?” 21यीसू बोल्यो, “जे तूं पूरण बणणो चावै तो तेरो सारो धन माल बेचगे गरीबा नै बांट दे क्यूंकै तनै सुरग में मिलज्यैगो। फेर मेरै लारै होज्या।” 22ओ सुणगे बो भोत उदास होयो अर बठूं उड़ग्यो क्यूंकै बो भोत अमीर आदमी हो। 23यीसू आपगै चेला नै केयो, “मैं थानै साची केऊं, एक धनवान आदमी गो सुरग में जाणो भोत ओखो काम है। 24पण एक ऊंट गो सुई गै नाकै माखर निकळ जाणो सोरो है पण कोई बी धनवान आदमी गो सुरग गै राज में जाणो ओखो है।” 25चेला ओ सुणगे हेरान हो'ग्या अर पूछयो कै, “फेर किंगो उद्धार हो'सी।” 26यीसू बानै केयो, “आदमियां खातर तो ओ काम ओखो है पण परमेसर ईं काम नै कर सकै।” 27पतरस केयो, “देख, म्हे सारो कीं छोडगे तेरै लारै हो'ग्या। म्हानै के मिलसी?” 28यीसू बोल्यो, “मैं साची केऊं कै एक नुंअ जुग में जद मिनख गो बेटो आपगै न्याय गै सिंघासन पर बेठैगो तो थे झिका बिंगै लारै चालो बारा सिंघासनां पर बेठगे इसराएल गी बारा जातां गो न्याय करोगा। 29झिकै मेरै खातर आपगै घर परिवार नै छोड़यो है बिनै सौ गुणा फळ मिलैगो। अर सुरग गो अधिकारी बणैगो। 30पण भोतसा अब झिका आ'गै है बे लारै होज्यैगा अर झिका लारै है बे आ'गै होज्यैगा।”
Đang chọn:
मत्ती 19: BGQ
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2023 (Active), Wycliffe Bible Translators, Inc. All rights reserved. © WIn Publishing Trust