METHIU 4
4
Umlae ing Jesu Abatheem
(Mk 1.12-13; Luk 4.1-13)
1 #
Hib 2.18; 4.15 Amanache Jesu chu umlae ing batheemnii khaena paamfhuw ting laetha inche aruwpa. 2Amana Jesu ing inii nisommanrii, jaen sommanrii maaru atong aanuwna aven chaamsa. 3Changlaenche umlae inche thengka Jesu ningna ariir, “Nang Thangnang sapa vataniive, hava rung ae i tar uurnii khaena nachong bathahra.”
4Changvakonchu Jesu ing abasang, “Ynziihka omna, ‘Tar pang ing mee iring mahva, changvakonchu Thangnang nertanii hungsuwh chongsae chaap inche ringvaata.’ ”
5Aanuwnache umlae ing Jesu chu ynthiing khuwruung Jerusalem ting ruwka rumniieen basuwr yngkaangpak tingche mangkarka 6amana aningna ariir, “Nang Thangnang sapa vataniive jungkhuwngla, akhaechuve ynziihka omna,
‘Nakhi rapkho rung ing nasuhniimah khaena,
Thangnang ing avaarmee ae ningna riirnaka engkik ing nangchu ihengadom vaatae.’ ”
7Jesu ing abasang, “Jinge ynziihka omna, nang ing Naafhuw Thangnang chu batheemmahva nachiiva.” 8Athar umlae ing Jesu chu bung yngkaangpak ting ruwreehka iruwngpaam aang-kheng alaar isa vakhaechu amansiipa; 9amana umlae ing Jesu ningna ariir, “Nang ing ki irum taniive, havana aangkheng i pivakachii.”
10Jesu ing umlae ningna ariir, “Ongmahra, Umlae! Ynziihka omna, ‘Nang ing Naafhuw Thangnang chu rumva nachiiva vokhehkho ama chupang rukuum tuva nachiiva.’ ” 11Umlae inche Jesu chu abathenpa amana enruw, vaarmee ae juwng aeka Jesu chu rukuum entupa.
Galili na Jesu ing nong Abasen
(Mk 1.14-15; Luk 4.14-15)
12 #
Met 14.3; Mk 6.17; Luk 3.19,20 Atii Jesu ing Johon chu kaeshum ting ensiihpa ichii chong asiitah nache Galili ting ympeensa. 13#Jhn 2.12Amana Nazaret jeraenka Jebulun re Naptali paam ruwrakna Galili chifhuw kuurna om Kaparnaum nache ongsa, 14havi Jaephar Isaia ing ariir vasah chongchu ahungchumnii khaenava.
15“Jebulun paam vokhehkho Naptali paam,
Jordon laar chifhuw yntongna ong ae,
reentaang mee ae paam Galili!
16ynthimna ong mee aeng irengchu muvaatae amanche ynthim vokhehkho ithiinii paamna ong mee ae taklina iruungpak ireng inche aenvaata.”
17 #
Met 3.2
Changlaenche Jesu ing isa thamin itong basenka ariir, “Nenbarungriir huungruw, akhaechuve thangbaen paam ynneengsa!”
Ngaklah mee manrii A-een raennii
(Mk 1.16-20; Luk 5.1-11)
18Jesu ing Galili chifhuw kuurna ahungsirae ngaklah mee Pitar ichii Simon re anaepa Andru ing chifhuwna ichak endeengchu amupa. 19Amana Jesu ing eningna ariir, “Kaanuw ijiiruw, ki ing nenuwchu meesuwr mansuwhva kachuw.” 20Enuw ing engachakchu bathen aeka Jesu aanuwchu enjiipa.
21Amana topoh yndahhak ing eng-hungsirae unae reentaang ynniimeh Jebedi sapa Jems re anaepa Johon ruwkuwng sungna empa Jebedi thoh engachak engaphuwhchu Jesu ing muka a-eenpae. 22Amana enuw ing enruwkuwng re empachu bathen aeka Jesu aanuwchu enjiipa.
Jesu ing mee inempak Amandam
(Luk 6.17-19)
23 #
Met 9.35; Mk 1.39 Jesu ing Galili paam aangkhengna sika meekongnii chaapna mee manchuwka vokhehkho thangbaen paam khaenache isa chong thamin tongka iki ina aajaeh amandam vokhehkho isuur imaang mee aajaeh chukho amandampa. 24Atii Jesu ajaechu Siria paam aangkhengna thangsa, chukhaenache enuw ing reentaang reentaang laena ing ina chaap vokhehkho ijachaam emphanii, umlae ichuwng ae, imur, hakchaang ithiipoh mee vakhae enveruwchu Jesu ing amandampae. 25Chutahnache Galili, Dekapolis, Jerusalem, Judia vokhehkho Jordan laartanii mee inempak ing Jesu aanuwchu enjiipa.
Đang chọn:
METHIU 4: MOYO
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.