T. LŪKÖS 22
22
Chöh Talöökö Tīre Tö Yēsū
(Mt 26.1-5; Mk 14.1-2; Jn 11.45-53)
1Ngaich röhta ap paratīn Tö-taföhlöng Ròtī, ap tö Paska invëka. 2Ngaich yik mākūö kūönṙô, yik kamūich inrē, nö chöh inlahen tīre nö kumpahangvah Ò; pò cha nö pa-ekūö tö yik tarik.
Hōḵ Yūtā Nö Kēḵngen Yēsū
(Mt 26.14-16; Mk 14.10-11)
3Kuhēthötre ngaich Sātān nö in Yūtā, ök tö Iskaryôt invëka, ök mi-i yik tö nët sīön taka. 4Kiröönngöre anga-aṅ ngaich nö ve-ekūö yik mākūö kūönṙô, yik yöngṙen inrē, tö inlahentī ò nö kēten Ò nö in cha. 5Ngaich ṙāmölōn cha-a, ngaich kilēḵngôre nö kē-ĕkūö ò tö rupīö. 6Ngaich hōḵ anga-aṅ; ngaich ngëichkö hēre anga-aṅ, nö kēten Ò nö in cha, i ranö-ö yik tömaṙôngö.
Halēnkö Nyinā-aṅ Ngam Pāska Ang Yēsū
(Mt 26.17-25; Mk 14.12-21; Jn 13.21-30)
7Chalôḵ ngaich ngam sakāmö, ngam Töt-aföhlöng Ròtī, ngam hē ngam paska nö fëli. 8Tīnhang Anga-aṅ ngaich, tö nāṅ Pītör, nāṅ Yôhan; nö ngö ṙô, Kuṙòh; halēnken hī nan tö ngam paska; hòṅ hī öi nyā-aṅvkūö. 9Ngaich ngö ṙô cha-a tö Ò, Isuh lōn Öm, tö ai halēna.
10Ngaich ngö ṙô Anga-aṅ tö cha, Yĕh meuk; yē nā kuhēthötre im panam; asahah min nā-aṅ tö tarik, kameun chūök mak tömrit ò panchö; chuh ël ap patī i kū-ö ò nö kiröönngöre. 11Ngaich ngö ṙô panchö töp tarik ap töpatī-ivö, Ngö ṙô ap Mahaköphöti tö meh, Isuh ap urôhò, ap chūök Chu min Öich nyā ngih paska, Öich holtö vē mahaköp? 12Ngaich anga-aṅ min nö hameukhömat nā töp töpōyö urôhò lātulöng, tölēnen. 13Kiröönngöre cha-a ngaich; ngaich kôtökūö nöng sā ṙô Ò tö cha; ngaich halēnken ngam paska cha-a.
Töhet Inmūlkūö
(Mt 26.26-30; Mk 14.22-26; 1 Kòr 11.23-25)
14Chalôḵ ngaich ngam ṙētaka; ūichngöre Anga-aṅ ngaich, nö holtö yik tanīnöṙô. 15Ngaich ngö ṙô Anga-aṅ tö cha, Hòṅ hōlukūö takô Chin tö yīö, Öich nyā ngih paska, urēhĕkūö kanihngen Chu. 16Tön ngö ṙô Chin tö yīö, Rö-ö Chin min nyā-aṅ e, hanöng saha kinheūṅtngen e nö im pūlngö ngam Tēv. 17Kētam Anga-aṅ tök kulah, keuheūthë ṙô Anga-aṅ nö ha-öiny ngam Tēv; ngaich ngö ṙô Anga-aṅ, Kēḵ ngih yin, katölhökūöre. 18Tön ngö ṙô Chin tö yīö, Rö-ö Chin min òk ṙòng angkūr töngamuhangen, hanöng saha yanihih ngam pūlngö ngam Tēv min.
19Kētam Anga-aṅ tö ròtī, keuheūthë ṙô Anga-aṅ nö ha-öiny ngam Tēv, fòkhang tö e, ngaich kē-ĕkūö cha, nö ngö ṙô Alaha Chu ön ngih, nö tö kētuvö nö in yīö. Ngati tī pöichö, haköpkölōnre tö Chu. 20Ngati tī Anga-aṅ tök kulah, tö kinheūṅten nyinā-aṅ nö ngö ṙô, Ngih ön kulah tufömngöre kinlēḵngô nö i Mahām Chu, ngam tökitaktuvö töpòkūö yīö. 21Yĕh meuk, eltī ngam kame-eṅ Chu nö holtī Chu nö el ngih mīs. 22Tökô ön ngòh Kūön Tarik nö kumröönngöre, sā e nö ngaich nö töngatī; tötkôlò pöri ngòh tarik, ngam lökngen Ò nö kē-ĕyö.
23Ngaich cha-a nö hatönö höö tö öp töngatī la-en tö cha.
Kilöön Ṙô Re Tap Tö Pōyö
24Ngaich kilö höö cha-a tö öp töpōyö min tö cha. 25Ngaich ngö ṙô Anga-aṅ tö cha, Hakeū chöngöre yin vē rācha vē tahëng mihëṅṙö tarik nö in cha, ngaich yip yöngṙen cha nö tökôlòlōn invëka. 26Rö-ö pöri yī-ö min ngatī; ngòh töpōyö pöri tö yīö, hökngen ò nö hakūönngöre; ngòh yöngṙen yīö, hökngen ò nö sā mahalanṙen. 27Achīö ṙöng ap töpōyö ngam amūichhak nö nyā, ngam mameukṙen ò ṙöng? Röh ang nö ngam amūichhak nö nyā? El ṙôngö yīö pöri Chū-ö Öich höng sā mameukṙen.
28Yī-ö yin töng ngöhöre hol Chu, i nup kanihngen Chu. 29Halēnngen yīö Chin tö ngam pūlngö, sā tī ngam Yöng Chu nö halēnngen Chu; 30Hòṅ yīö min nyā, òk inrē el ap mīs Chu im pūlngö Chu; hòṅ yīö min ūichhaka el kantēra, öi kahòkken yip tö nët sīön miyöngö Israĕl.
Vë-eny Nang Pītör Ang Yēsū Tö Ò Min Nö Mahngen Ò.
(Mt 26.31-35; Mk 14.27-31; Jn 13.36-38)
31Sīmōn, Sīmōn; yĕh meukö, Sātān nö hòṅ kichāṅngö meh, nö sā tīre tö sāiny. 32Vë-elkui meh pöri Chū-ö, hòṅ ngam mikah meh nö öt keuheūt. Hangëken yip holre pömchö; yē meh öm havöötö ellōnre hēk. 33Ngaich ngö ṙô anga-aṅ, tö Ò, Mā lēnen chin hol Meh, chuh el kinlōngö, im kinpaha inrē. 34Ngaich ngö ṙô Anga-aṅ, Pītör, ve-eny nang meh Chin; ölnyi ṙô min hayöm nö takeūk i ngih hatööm, hanöng saha ṙô meh, lūöi heuh mahangre öt akahakūö tö chu.
Chūökrupiö, Inyul Töm Sanëṅt
35Ngaich ngö ṙô Anga-aṅ tö cha, Hē Chu tīnngen yīö höng öt rupīöṙu, öt inyūlu, öt kunröpu; hanāṅtuṙen öi? Ngaich ngö ṙô cha-a, Hö-ö. 36Ngaich ngö ṙô Anga-aṅ tö cha, Ngòh törupīöṙu pöri töngamuh, hökngen ò nö kē-ĕ e; ngatī tö inyul inrē. Ngòh töt aṅhaṅv-in, hökngen ò nö inyihngö ngam tökiröng inyutre, ngaich havah fël. 37Ngö ṙô Chin tö yīö, Tö ngih tökūichiyö nö keuheūtiṙen, nö in Chu, ngih töngö, Kaheuktu Anga-aṅ nö hol yip töchōich. Ngaich nun në vine-eny inlahen Chu nö hòṅ keuheūten. Ngö ṙô cha-a,
38Mā yĕh meuk; nët nòng nun në fël ihih. Ngaich ngö ṙô Anga-aṅ tö cha, Ngaichchö.
Vë-ekūötēv Ang Yēsū Nö I Kūi Ṙôngö Ôliv
(Mt 26.36-46; Mk 14.32-42)
39Kunyī-inyre Anga-aṅ, ngaich chuh ik Rôngö Òliv, nö sāre. Tömrit Ò inrē yik mahaköp, 40Chalôḵ Anga-aṅ ngaich nö in e; ngö ṙô Anga-aṅ tö cha, Ve-ekūötēv yin, hòṅ yīö öt im kanihngen. 41Harēvngöre ngaich Anga-aṅ nö ṙangen cha, sā rôvat kunlehngö ihong; livngöre Anga-aṅ ngaich, ngaich ve-ekūötēv, 42Nö ngö ṙô, Kayöngö, yē Meh hōḵolōn, kēḵngö ngih kulah, nö ṙā-ang in Chu. Ngaich pöri yēḵ un sā lōn Chu, ngam lōn Meh pöri. 43Ngaich hĕngtak ök ma-ahānga tö meūkö tö Ò, ṙamā-ang el halīöngö; nö hangëken Ò. 44Rūönyöṙôre Anga-aṅ nö ve-ekūötēv, kūö Ò nö kihngen ellōn, ngaich nuk vang Ò nö sā töpōyen kintaktö mahām, nö el tumlat.
45Ngaich hē chanôhòl Ò nö ṙā-ang im vine-eṅkūötēv, yihtöre Anga-aṅ ngaich nö i yik mahaköp; ngaich kôtökūö tö cha nö haṙòh, kūö miṙivlōnre. 46Ngaich ngö ṙô Anga-aṅ tö cha. Kūöyòh öi haṙòh, choholre yin ve-ekūötēv, hòṅ yīö öt im kanihngen.
Kinë-eṅ Yēsū
(Mt 26.47-56; Mk 14.43-50; Jn 18.3-11)
47Ṙònghöichṙô Anga-aṅ, ngaich yik tömaṙôngö, anga-aṅ inrē ök tö Yūtā invëka, töhĕng tak aṅ i yik tö nët sīön taka, nö urēhĕkūö cha; ngaich ṙūötöre anga-aṅ nö in Yēsū, nö hāmkūö Ò. 48Ngaich ngö ṙô Yēsū tö ò, Kēḵngö ngòh Kūön Tārik öm me-eṅ, öm aṅtī tö hināmö kūö?
49Ngaich yik hol Ò nö meuk lāinyngen Ò, ngaich ngö ṙô cha-a, Fāngö cha öi kòh, aṅtī tö fël? 50Ngaich hĕng taka ök mi-in cha, famang ök kūön ök mākūö kūönṙô; ngaich fangngö ök lahāmö nang ò. 51Ngaich ngö ṙô ang Yēsū, Hökngen Chu yin. Ngaich lūölkö nang ò Anga-aṅ, ngaich halanken ò.
52Ngaich ngö ṙô ang Yēsū tö yik mākūö kūönṙô, yik amahtö ngam töhet chūök, yik yöngṙen inrē, yamihtöre nö in Ò, Yihtöre öi yī-ö ihih, sāre yĕi lā-al mu-ulāya; öi fëluvö, tinkūnguvö inrē. 53Hē Chu örheūheu hol yīö el ngam töhet chūök; ngaich rö-ö yī-ö hateutnyö këlre öi in Chu. Ngih pöngri ṙētak yīö, ane inrē kanô-òṅ ngam sinngūlö.
Mahngen Yēsū Ang Pītör
(Mt 26.57-58,69-75; Mk 14.53-54,66-72; Jn 18.12-18,25-27)
54Ngaich cha-a nö kēḵ An, ngaich tūökngen Ò nö kēten Ò nö i patī ök mākūö kūönṙô, Tömörit tö Pītör nöng maṙôvat. 55Ngaich hē cha nö hameui tameūyö, nö ellōn ök patī; ngaich ūichngöre nö hĕngre chūök; ūichngöre Pītör inrē nö el ṙôngö cha. 56Ngaich hĕng taka ök kikānö mameūkan, hē ò nö ūichhaka nö el yangkūö ök tameūyö, ngaich haköpmatre nö ngëichken ò; nö ngö ṙô, Ngòh ang yih inrē tarik hol Ò. 57Māhangre pöri anga-aṅ nö ngö ṙô, Me-eṅ kikānö; rö-ö chin akahakūö tö Ò. 58Rahëichtöreṙen ök tahëng nö meūkan, ngaich ngö ṙô, Me-eṅ man inrē hol cha. Ngö ṙô pöri Pītör, Me-eṅ tarik; rö-ö chin chū-ö. 59Unôichrit tö hĕng köṅny ṙô ök tahëng taka tökô-ò ṙô, nö ngö ṙô, Kô ön ngòh tarik ngòh nö hol Ò; tön aṅ Kelelī an. 60Ngö ṙô pöri Pītör, Rö-ö chin akahalōn tö ṙô meh.
61Ṙònghöichṙô anga-aṅ, ilööṙen ngaich nö takeūk hayōm. Havöötökūöre ngam Mā, ngaich ngëichken Pītör; ngaich fē-ĕlre ang Pītör tö ṙô ngam Mā, nö ngö ṙô tö ò, Urēhĕkūö ṙô hayöm, i ngih hatööm, lūöi tum heuh min me-eṅ mahangre öt akahakūö tö Chu. 62Kunyī-inyre anga-aṅ ngaich peuiny miṙivlōnre.
Hayë-e, Fōhō Inrē Ang Yēsū
(Mt 26.67-68; Mk 14.65)
63Ngaich yik tarik, yik kamëken Yēsū, nö hayëḵngen Ò; fohan inrē; 64Ngaich cha-a nö nyëkngömat Ò, ngaich hatönan, nö ngö ṙô, Ve-eny Man yĕh, achīö ap anga-aṅ famôhòh Meh? 65Ṙōlkangen ṙô cha-a inrē nö ötlēkôre tö ò.
Kētu Yēsū Nö I Kūö Kamhôka
(Mt 26.59-66; Mk 14.55-64; Jn 18.19-24)
66Peuheū-eulre ngam peuheū, ngaich yik tömaṙôngö yöngṙen yik tarik nö hamūlöre, yik mākūö kūönṙô inrē, tö yik kamūich; ngaich cha-a nö kēḵngen Ò nö i yik kamhôṅka; 67Nö ngö ṙô, Ve-eny nang ih Man, yē Meh Öm Me-eṅ Kristū. Ngö ṙô pöri Anga-aṅ tö cha, Rö-ö yin yih min ṙātö ellōnre, yē Chu ve-eny nang yīö. 68Öt sapṙô Chu inrē, yē Chu hatönö yīö. 69Töngamuhöten ön min ngòh Kūön Tarik nö ha-ūchiyö nö lahāmö kanôlò ngam Tēv. 70Ngaich ngö ṙô cha-a nö ṙòkhöre, Öm Kūön ngam Tēv, Öm Me-eṅ? Ngaich ngö ṙô Anga-aṅ tö cha, Chū-ö Chin ṙô yīö. 71Ngaich ngö ṙô cha-a, Asuh töre ap lōn tö mahameukhöti? Tö hī ayī-ö ngaich hang lamöknyö el vāng Ò.
Đang chọn:
T. LŪKÖS 22: CANIBSI
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.