A Luk Sõng 23
23
A Zezi ne tẽnga soaalba
(Mt 27,2, 11-14; Mk 15,1-5; Zã 18,28-38)
1Bãmb fãa yikame n tall a Zezi n taa a Pilat taoore. 2La b sɩnga a Zezi rõadga: «Tõnd linga yãoo t'a rãmbd tẽngã n yet tɩ b tõdg noore, tɩ b ra yao Rom naaba yaood ye, la b baad tɩ yẽ meng la Krista-Dĩma.» 3A Pilat soka a Zezi: «Fo yaa Zʋɩf rãmb dĩma?» T'a Zezi leoke: «Foo n yeele.» 4A Pilat yeela maan-kʋʋdba kãsem-dãmb la zãma wã: «Mam pa ne nin kãnga sẽn beeg ne yell ning ye.» 5La bãmb da tara dɩdgre: «A rãmbda neba ne a karengã, tɩ b ra sak noor ye; la karengã maana Zɩɩde tõre, la sɩnga Galile n yaool n ta ka.» 6A Pilat sẽn wʋm dẽnna, a sokame tɩ daoã yaa Galile ned laa? 7La a sẽn bãng tɩ b yaa Erod soolem neda, a tʋm-b-la a Erod nengẽ tɩ yẽ me ra bee Zerizalɛɛm wakat kãnga.
A Erod taoore
8La a Erod sẽn yãe a Zezi, a sũur yɩɩ noog al wʋsgo, t'a ra tʋlla b yãeebo al daar zãra; a ra wʋma b yelle, la a ra tẽedame tɩ b na maan bõn-bãnd a ye t'a yãe. 9A sok-b-la bũmb wʋsgo la a Zezi pa leok ye. 10Maan-kʋʋdba la Seb-mitba ra bee be n dõt-b ne b pãng tɛka. 11La a Erod naaga tãb-biisã n paoog a Zezi, n yaal-ba, n yeelg-b naam fuug sẽn ya neer wʋsgo la a lebs-b-la a Pilat. 12Badaar tɛka, a Pilat ne a Erod sẽn da ya beema, lebga zoodo.
13A Pilat tigma maan-kʋʋdba kãsem-dãmba, ne gũudba nanamse la zãma wã n yeel-ba: 14«Yãmb talla nedã n wa kɩs maam n yeel t'a zẽkda neb zutu. Ade, mam sok-a la y nifẽ ka, la m pa yãe y sẽn ningda taal ne bũmb ningã, a sẽn sɩd maan ye. 15A Erod me pa yãe ye, tɩ b lebs-a t'a wa mam nengẽ. Nedã ka maan bũmb sẽn tog ne kũum ye. 16La sẽn ya woto wã, maan na n sɩbg-a lame n yaool n bas-a.» [ 17Pak kibs fãa a Pilat da yiisda nin-yend bi-beesa roogẽ.] 18La neba fãa lagma taab n kelem: «Bɩ f kʋ nin-kãnga la f yiis a Barabas n kõ-do.» 19B ra kẽesa a Barabas bi-bees roogẽ a sẽn kaoog zabr tẽng pʋgẽ la a sẽn kʋ ned yĩnga.
20A Pilat sẽn da rat n bas a Zezi wã le goma ne zãma wã. 21B fãa da kelemdame: «Ka-a pika! Ka-a pika!» 22T'a Pilat sok-ba, naoor a tãab soaba: «A maana bõe sẽn ya wẽnga? Mam yẽ pa yãe a sẽn maan yell ninga tɩ sek kũum ye. Dẽn yĩnga mam na n sɩbg-a lame n yaool n bas-a.» 23B ra wɩngda ne bʋʋre n kotẽ tɩ b ka a Zezi pika. Bʋʋra sɩd da yãngdame n paasdẽ.
24A Pilat kaoo bʋʋdã tɩ yɩ wala bãmb sẽn datã. 25A yiisa ned ning sẽn da rãmba tẽnga, n tol n kʋ ned tɩ b kẽes-a bi-bees roogã, a yiisa yẽndã roogo wala b sẽn da kote, n yaool n bas a Zezi tɩ b maan b sẽn date ne bãmba.
B kaada a Zezi pika
(Mt 27,15-26; Mk 15,6-15; Zã 18,39—19,16)
26B sẽn waa n tar a Zezi n dabda, b yõka Sirɛn daoa a yembre, a Simo, sẽn da kẽng weoogo n lɛɛg n watẽ la b zɩlg-a-la pika zɩɩbo, t'a Zezi be taoore t'a pʋgd poorẽ. 27Zãma kãseng meng n da tũudi. Pagb me n da naage n tar wiisgu la b pĩisd b yãoogo. 28A Zezi wẽneg n yeel-b lame: «Zerizalɛɛm pagba, da yãb-y maam ye, yãb-y y menga la yãb-y y kamba! 29Ade, daar n wate tɩ b na n yeele: Zu-noog rãmba la pig-kiiri la sẽn pa rog-ba, la sẽn pa yẽsem-b kamba! 30#Oz 10,8; Yp 6,16. Wakat kanga, b na n yeela tãmse: bɩ y lʋɩ n bʋʋg-do! La b yeel kunkuba bɩ y sirg n bus-du! 31B sẽn maan da-maasr woto, na n yɩla a wãna ne ra-koeenga?» 32B talla bi-bees a yiib me n na tɩ lagem a Zezi n kʋ.
33B sẽn ta zĩig ning sẽn boond tɩ zu-wanga, b kaa a Zezi pika; b kaa bi-bees a yiiba me, a yembre, b rɩtgo, a yembre, b goabga. 34#Yɩ 22,19. A Zezi yeelame: «M Ba, kõ-y b sugri tɩ b ka mi b sẽn maand ye.» Tãb-biisa rɩka a Zezi futã n poees n pʋɩ taaba.
35 #
Yɩ 22,8. Zãma wã ra yɛsa be n getẽ. Tẽnga kãsem-dãmba ra laad-b lame n yetẽ: «A fãaga a taaba, bɩ a fãag a menga, a sã n ya Krista, Wẽnd sẽn tũus a soaba.» 36#Yɩ 69,22. Tãb-biisa me ra laad-b lame; b kolgame n kõ-b rã-miisga la b maandẽ: 37«Fo sã n ya Zʋɩf rãmb dĩma bɩ f fãag f meng f toore!» 38Walg a ye n da be b zugẽ tɩ b ra gʋls woto: «Yãoo yaa Zʋɩf rãmb dĩma.»
Wagdr a ye paamda kãab-noogo
39Bi-bɛɛg a ye sẽn da luund pika, da tara a Zezi tʋʋr n yetẽ: «Fo ka Krista laa? Fãag f menga, la f fãag-do!» 40Tɩ bi-bɛɛg a to wã zab-a n yeele: «Fo me ka zoet Wẽnd laa? Ges tɩ f paama sɩbgr wa bãmba. 41Sã n ya tõndo, zemsame, tɩ d paama sɩbgr ninga sẽn tog ne d yel-manesem; la bãmba, b pa tar b toorẽ yell ye.» 42La a yeelame: «Zezi, tẽeg-y m yelle, yãmb sã n lɛɛg n wa n na n dɩ y naama.» 43A Zezi leok-a lame: «Sɩd-sɩda, mam yeta foom, rũnda bala, fo na n zĩnda arzãnẽ ne maam.»
A Zezi kũum
(Mt 27,45-56; Mk 15,33-41; Zã 19,28-30)
44Da zemsa wĩnto-sʋka, la zĩig fãa lebga lik tẽng zugu, n tãag zafare. 45#Ey 26,31-33. Wẽnd dooga peen-lillã kẽega a tẽnsʋka. 46#Yɩ 31,6. A Zezi moona ne b koɛɛg pãnga: «M Ba, m lebsda m vɩɩsma yãmba.» B sẽn yeel woto, b kiime.
47Tãnsoaba yãe yɛla fãa sẽn maana, a pẽga Wẽnnaam la a yeelame: «No-koeemd ka ye, raoã da yaa nin-sõngo!» 48Kʋʋnga me sẽn da tigim n na n gesã, yãenda yella sẽn baas to-to, tɩ b na n lɛɛg la b tood b yãoogo. 49#Lk 8,2-3. La a Zezi zo-rãmbã, la pagb niyns sẽn yãag-b al Galile, bãmb fãa ra yɛsa yɩɩg n getẽ.
A Zezi mumbu
(Mt 27,57-61; Mk 15,42-47)
50Tẽng kãsem-dãmba sʋka, dao a ye n da be n boond t'a Zozɛf. A ra yaa nin-sõngo, nin-tɩrga, 51a ra pa lob a toog bʋʋda kaoobẽ, la a taaba manesmẽ ye; a ba yir da yaa Arimati, Zʋɩf rãmba tẽng a yembre, la a ra gũuda Wẽnd Rĩung waoongo. 52A bʋʋga a Pilat n tɩ kos a Zezi yĩnga. 53A sik-b la pika zugu n pil-b ne peende, n tɩ gãneg-b yaoog a ye sẽn kɩbg pĩigẽ tɩ b ra nan pa mum ned a pʋgẽ ye. 54Da yaa pak kibsa seglgo daare, sibr sẽn nan sɩngde.
55Pagb niyns sẽn yi Galile n wa ne a Zezi wã, yãaga a Zozɛf n tɩ bãng yaooga zĩiga, la b sẽn mum a Zezi to-to, 56#Ey 20,10; Yao 5,14. la b lɛɛg n tɩ segla yũ-nooda kaam la tɩdarã. La Sibra daare, bãmb vʋʋsame wala noora sẽn date.
Đang chọn:
A Luk Sõng 23: SSDC98
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
SEBR SÕNGO © Alliance Biblique du Burkina Faso, 1998.