Jenesis 3
3
Aadam ano Iiw Anutuwaanoŋ qaa qotogoŋ kamaaŋ ururo.
1 #
Isa 12.9; 20.2 Poŋ Anutunoŋ namowaa oro laaligogiawo kuuya mokolooŋ oŋonoti, iyoŋoo batugianoŋ mokolenoŋ osoŋkakale momonoŋ oro kuuya uŋuuguŋ uro. Kaeŋ uma emba kokaeŋ ijoro: “Oyaŋboyaŋ gawonoŋ gere kuuya nama kenjuti, iyoŋoo hoŋgia moŋ mende newaotiwaajoŋ Anutunoŋ oŋanoŋ jeŋ kotoŋ orono me qaago?”
2Kaeŋ ijoro embanoŋ meleema mokoleŋ kokaeŋ ijoro: “Oyaŋboyaŋ gawonoŋ gere tosia nama kenjuti, iyoŋoo hoŋgia ii saanoŋ newotiwaajoŋ jero. 3Jeroto, gawoŋ biiwianoŋ gere moŋ nanji, iikawaa hoŋa ii neŋ komuwobotiwaajoŋ mono kokaeŋ jero: ‘Ii mono mende newao. Ii mende oosiriwao.’ Kaeŋ jeŋ kotoŋ norono laligojo.”
4Kaeŋ meleema jero mokolenoŋ emba kokaeŋ ijoro: “Ii awawi totooŋ! Oro mende komuwaota. 5Kaento, gere iikawaa hoŋa neri weemboria iikanondeeŋ mono jaagaranoŋ tooro Anutu kaaŋa kolooŋ awaawaa kania ano bologaa kania moma kotowaota. Anutunoŋ kaeŋ koloowabotiwaajoŋ moma qaa kaeŋ jero.”
6Kaeŋ ijoro embanoŋ gere ii uuŋ iigigiiro hoŋa awaa nenetaa so kolooro. “Ii iima-aiŋaiŋawo nano momakooto somata afaaŋkota nombaa,” kaeŋ romoŋgoŋ hoŋa moŋ metogoŋ nero. Neŋ loya iwo laligoroti, ii kaaŋiadeeŋ muro nero. 7Nero jaagaranoŋ mono iikanondeeŋ tooro bombolaŋ laligoriti, ii iima kotoŋ aori. Kaeŋ iima kotoŋ aoŋ nama fig gerewaa seŋa memburatiŋ opo suru kaaŋa uuŋ lama rari.
8Rari weeŋ jaaya kemero gomaŋ gooriro Poŋ Anutunoŋ oyaŋboyaŋ gawonoŋ riiŋ karo kana otoŋa mori. Ii moma loemba yoronoŋ Poŋ Anutuwaa jaasewaŋanoŋga kokomomola meŋ oyaŋboyaŋ gawombaa gere uugianoŋ kema asaŋgori. 9Asaŋgorito, Poŋ Anutunoŋ Aadambaajoŋ kokaeŋ qaro, “Gii dakanoŋ laligojaŋ?”
10Kaeŋ qaro kokaeŋ meleeno: “Gii oyaŋboyaŋ gawoŋ uutanoŋ riiŋ kana goo kana otoŋga moma selena bombolaŋ rajeŋiwaajoŋ toroko mojeŋ. Kawaajoŋ kokomomola meŋ asaŋgojeŋ.”
11Kaeŋ meleeno kokaeŋ ijoro: “Gii bombolaŋ laligojaŋi, ii moronoŋ gijoro mojaŋ? Nii gere mombaa kota newabotiwaa soŋgo ama gombeti, gii iikanoŋa moŋ nejaŋa me qaago?”
12Kaeŋ ijoro ejanoŋ jero: “Emba niwo laligowaatiwaajoŋ nonati, iinoŋ gere iikawaa kota nono nejeŋa.”
13 #
2 Kor 11.3; 1 Tim 2.14 Kaeŋ ijoro Poŋ Anutunoŋ emba kokaeŋ qisiŋ muro: “Gii mono naambaajoŋa kaeŋ anjaŋa?” Qisiŋ muro kokaeŋ meleeno: “Mokolenoŋ niijoŋgoro nejeŋa.”
Anutunoŋ iroŋa meleema oŋombaatiwaajoŋ jero.
14Kaeŋ meleeno Poŋ Anutunoŋ mokoleŋ kokaeŋ jeŋ muro: “Kaeŋ anjaŋiwaajoŋ ama gii mono miriwaa oro kuuya ano duuyaa oro kuuya yoŋoo batugianoŋ kokaeŋ jeŋ qasuaaŋ gombe laligowa: Gii mono namonoŋ laligowagatiwaa so baganoŋ kondondoŋgoŋ kema kaŋ sububuŋ uutanoŋ laligoŋ kikisi iwoi neŋkeba. 15#Isa 12.17 Kaeŋ neŋ embawo batugaranoŋ kere ama orombe ii moma laligowaga. Kere ii goo gbiliuruga ano iwaa gbiliuruta yoŋoo batugianoŋ toroqeŋ eŋ uro kokaeŋ koloowaa: Yoŋoonoŋga eja moŋnoŋ goo waŋga rinjaŋgoro gii iwaa kana gbakoyanoŋ kiŋkebaga.”
16Toroqeŋ emba kokaeŋ jeŋ muro: “Gii koro ama laligona masu guro siimbobolo somata gombe ii moma merabora oŋomakebaga. Ii kileŋ naaŋga mono logaageŋ eŋ gono iinoŋ galeŋga kolooŋ laligowaa.”
17 #
Hib 6.8
Toroqeŋ eja kokaeŋ jeŋ muro: “Nii gere mombaa hoŋa newabotiwaajoŋ ‘Ii mende newa,’ jeŋ soŋgo ama gombeto, giinoŋ kileŋ embagaanoŋ qaa otaaŋ nejaŋa. Kawaajoŋ nii namo ii goojoŋ ama seigowe ewaa. Kaeŋ ero gii namonoŋ laligowagatiwaa so mono ureŋ aoŋ siimbobolo moma gawoŋ mamaga meŋ nenega mokolooŋ laligowa. 18Gawoŋ meŋ laligona goo nene gawonoŋ joŋ kowororo iwoi ii kouro duuyaa logoya iwoi neŋ laligowa. 19Kaeŋ laligoŋ nogo ariŋ gawoŋ mena gbamo yakaga hoŋa kolooro neŋ laligowa. Kaeŋ laligowagato, namonoŋ meŋ gombetiwaajoŋ namo iikanondeeŋ mombo eleema kemeba. Selega sububunonoŋ meŋ gombeta laligoŋ umago mono mombo sububuŋ koloowaga.” Kaeŋ jeŋ muro.
20Ejanoŋ embia iwoi kuuya laaligogiawo laligojuti, iyoŋoo nemuŋgia kolooro ejanoŋ qata Iiw (Eewa) qaro. #3.20 Iiw: qaa iikawaa kania ii ‘Jaawo laligojuti, iyoŋoo nemuŋgia.’ 21Poŋ Anutunoŋ oro selianoŋ opo suru meŋ Aadam embiawo lama orono laligori.
Anutunoŋ Aadam Iiw Eeden joloŋtowonoŋa konjoma orono.
22 #
Ais 22.14
Kaaŋa laligori Poŋ Anutunoŋ kokaeŋ jero: “Yai! Ejemba ii nonoonoŋga mombaa so kolooŋ awagaa kania ano bologaa kania mendeema orombaotiwaajoŋ mojao. Kaeŋ kolooro laaligo kotigaa gere kota mende newaotiwaajoŋ soŋgo ambeto, yoronoŋ kambaŋ kokaamba toroqeŋ borogara boraama ii kaaŋagadeeŋ meŋ neŋ iikaaŋanoŋ mende komuŋ tetegoya qaa kotiiŋ laligoŋ ubaobo.” 23Kaeŋ jeŋ kawaajoŋ oyaŋboyaŋ gawoŋ Eeden iikanoŋa konjoma oroma namonoŋa meŋ oronoti, mono namo iikanoŋadeeŋ komakoomo gawoŋ mewaotiwaajoŋ wasiŋ orono seleeŋgeŋ kemeŋ keni. 24Ejemba kaeŋ konjoma oroma oyaŋboyaŋ gawoŋ Eedembaa leegeŋanoŋ weeŋ koukoutanoŋ baageŋ zerubim gajoba tosaaŋa kuuŋ oŋono laaligo kotigaa gere iikawaa kania utuŋ galeŋ koŋgi. Yoŋoo borogianoŋ manjawaa sooya somata ano iikanoŋ gere bolaŋ kaaŋa bilibiliawo jeŋ batanoŋ gematanoŋ liligoŋ bilisikwaa so kolooro nama galeŋ koma laligogi. Kiaŋ.
Đang chọn:
Jenesis 3: ksr
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2011, Wycliffe Bible Translators, Inc. All rights reserved.