Ɉaan 18
18
Jesus hon mɛ̨nį
(Matie 26.47-56; Markə 14.43-50; Lukə 22.47-53)
1Jesus ə kpɛɛ lɔ a nwoo tii ɓoɔ, da nwɔ kalan nɛai də li Sedrɔn ya pulu pələ. Nɔw yɛa ta ə kɛ laa, də li ɉu. 2Ɉudasə ŋɛ̨i Jesus lɔwɔ́tɔɔ, ə kɛ a gɛɛnąąi tii kɔ́lɔn ŋąą, mąąhɔlɔɓo, Jesus da nwɔ kalan nɛai di kɛi li laa kɛlɛ-kɛlɛ. 3Ɉudasə ə tɔɔ holahi kpulu ɲɛ̨i tɔwɔ da galidəɠaai, ɉaláá laa həli nuą kpɛa-kpɛa da Farisiɛ̨ɠaa ɓə di tɔɔ tii, da diɛni də li nɔw yɛa tii ɓa. Kpalan di ɓo di yəi, labon, ɛlɛɛ, da kwɛli hɛnŋąą. 4Mɛ̨nį kɛi pa həli Jesus ɓa, kɛi ə mo a gɔlɔn ŋąąi, ə mąą lɛɠɛ diɛ, yɛ diɛ: «'Gbɛɛ ɓə ka káá gwɛli?»
5Di nwoo pulu pənə diɛ mą: «Jesus Nazarɛtə mun mə.»
Jesus yɛ diɛ: «Ɲą́ą́ ka.»
Yaan, Ɉudasə ŋɛ̨i nɔwɔtɔɔ ə kɛ nu kpului tii pɔ. 6Yii lɔ Jesus ə kɛ diɛ: «Ɲą́ą́ ka!» Di kəlee di li di pulu di too nɔi ɓa.
7Jesus ə pənə ə di mąąni kɛ a nįnɛ̨ yɛ diɛ: «'Gbɛɛ ɓə ka káá gwɛli?»
Di nwoo pulu pənə diɛ mą: «Jesus Nazarɛtə mun mə.»
8Jesus ə mo diɛ, yɛ diɛ: «Ŋą́ kɛ kpɔ kaa, ɲą́ą́ ka. Akɛ ɲą́ą́ ɓə ka káá gwɛ́lii, ka yiiɠaa lɛɛ laa dəi li.»
9Nwooi Jesus ə mo yɛ kɛ mą: «Nuąi ə́ di tɛɛ bɔ́, dɔ̨nɔ̨ kpɛli nwun na hvo pili li» bɔ mɛ̨nį ə kɛ. 10Nąąlɔwai, ɓɔwa kwɛa ə kɛ Simɔn Piɛrə yəi, ə gulɔ daa hu, ə bili ɉaláá laa həli mun gɛnɛ̨ɛ̨ nwɔ kólo kɛmun ma, ə mamįiyee wəli tee mą. Góló kɛmun laa ɓa kɛ Malkusə.
11Jesus yɛ Piɛrə ɓa: «Ə́ wɔ ɓɔwai lɔ daai. Gbələ kɔ́wɔi Ną́n ə dɛɛ bɔ́, yɛ́ və́ gbə́lə la?.»
Di li a Jesus ɉaláá laa həli mun gɛnɛ̨ɛ̨ lííla
12Ɉolahiɠaa da di ɲɛ̨i tɔwɔmun, ə mą kɛ Ɉuifəɠaa di wɔ galidəɠaa, di Jesus hon, di ɲili. 13Di li tɔlɔɔ a Jesus Hanə lííla. Hanə mɔlɔ Kaifə ɓə kɛ a ɉaláá laa həli nuą nwun nąmu kwɛlan tii yee mu. 14Kaifə tii aa gbɛa kɛ mo Ɉuifəɠaa diɛ, yɛ kɛ diɛ: «Yii viɛlaɓoɔ ya ɓaa, nu tɔ̨nɔ̨ ə haa nɔi nuą kəlee mąą mɛ̨nį ɓa.»
Piɛrə ə lənə Jesus ɓa
(Matie 26.69-70; Markə 14.66-68; Lukə 22.55-57)
15Simɔn Piɛrə da galan non dɔ̨nɔ̨ di hvilɛn Jesus pulu. Ɉaláá laa həli mun gɛnɛ̨ ə kɛ galan non tii kɔ́lɔn, ə lɛɛ Jesus pɔ di lɔ ɉaláá laa həli mun gɛnɛ̨ yəi gwəlii. 16Piɛrə ə lɛɛ tɔɔni ɲɛnɛ̨ɛ̨ gala laaləi. Galan non tii ɉaláá laa həli mun ə kɛ a gɔlɔn ŋąą, ə kulɔ, ə mo gala laaləi mąąkpɛ nɛ̨ɛ̨nui ɓa yɛ mą: Piɛrə lɛɛ laa ə lɔ. 17Nɛ̨ɛ̨nui tii yɛ Piɛrə ɓa: «Yɛ́ kpɛli, kɛlɛi ə́ kaa yɛ ɉulɔnui ŋɛ̨i nwɔ kalan non ta?»
Piɛrə yɛ mą: «Da hvaa ɲą́ą́.»
18Góló kɛ nuą da galidəɠaa di nwɔ̨n ɉee gwəli hąą diɛ di kɔ́lɔɓo ma, mąąhɔlɔɓo, kwɛlɛ ə kɛi pa. Piɛrə yaa kpɛli ə hee laa yɛ gɔlɔɓo.
Ɉaláá laa həli mun gɛnɛ̨ ə Jesus mąąni kɛ
(Matie 26.59-66; Markə 14.55-64; Lukə 22.66-71)
19Ɉaláá laa həli mun gɛnɛ̨ ə Jesus mąąni kɛ yɛ hvilɛn na nwɔ kalan nɛai da nwɔ kalan gɛ pələ ɓa. 20Jesus ə nwoo pulu pənə yɛ mą: «Ŋą́ kɛi mɛ̨nį ɓo nuą diɛ kpɔn ɉu. Hvóló kəlee, ŋį́ kɛi nuą mąąkwɛli Yálá hvɛli pɛlɛ́ɠaa mu, da Yálá hee pɛlɛ́ mu ɓɛi Ɉuifəɠaa da di ŋąąkpɔn naa, və́ kɛ mɛ̨nį ta ɓo li loo hu. 21Ə kaa mą́ą́nin kɛi lə mɛ̨nį ɓa? Nuąi kɛi nwóó mɛ̨n, di mąąni kɛ, mɛ̨nįɠaai ŋą́ kɛi mo, diɛ ɓə gɔlɔn.»
22Moi Jesus ə mo tii, galidə tɔ̨nɔ̨ ə nwun nowa, yɛ mą: «Bələ ɓə ya ɉaláá laa həli mun gɛnɛ̨ woo pulu pənə la?»
23Jesus ə nwoo pulu pənə yɛ mą: «Mɛ̨nį ŋɛ̨i ŋį́ mo, nɛlɛ ɓə ɉu a woo ɲɔ̨n? Yili lɛ mą́ą́. Akɛ və́ woo ɲɔ̨n mo li, lə mɛ̨nį ɓa ə́ gɛ́lɛi?»
24Ə kɛ lɔ tii, Hanə ə nɛɛ ɲili hu, ə dɛɛ diɛ li la ɉaláá laa həli mun gɛnɛ̨ Kaifə pɔ.
Piɛrə ə lənə nwɔ̨nɔ̨ Jesus ɓa
(Matie 26.71-75; Markə 14.69-72; Lukə 22.58-62)
25Nąąlɔwai tii hu, Simɔn Piɛrə ə kɛ laa, yɛ gɔlɔɓo. Di mąąni kɛ diɛ mą: «Akɛti, yɛ kpɛli nwɔ kalan non ta hvaa a yɛ́?»
Piɛrə ə lənə mą yɛ diɛ: «Da hvaa a ɲą́ą́.»
26Ɉaláá laa həli mun gɛnɛ̨ nwɔ tímun dɔ̨nɔ̨, ə ɓo a ɉulɔnui tii Piɛrə ə nwəli tee mą nąn nonnii ta, yɛ Piɛrə ɓa: «Kɛlɛi ka diɛni ɓə kɛ ɓɛli nɔw ɲɛa?»
27Piɛrə ə lənə nwɔ̨nɔ̨ mą a nįnɛ̨. Nąąlɔwai tii tɛ́ɛ́ tɔlɔɔ ə nwoo pili.
Di li a Jesus Pilatə lííla
(Matie 27.1-2,11,14; Markə 15.1-15; Lukə 23.1-5)
28Yili pulu di həɠə a Jesus Kaifə pɔɔli, di li la gbahalanamą yəi gwəli, yələ ɓoɔ li kɛa kɛ. Di hvo gɛ di hvo lɔ, ə gɛ, di mąą hvo pa liɓi pakə kɔ̨nɔ̨n mį́i mɛ̨nį ɓa. 29Pilatə ə kulɔ ə di kaa tɔɔni gala pulu pələ yɛ diɛ: «Lə ɓə ɉulɔnui ŋɛ̨i ə gɛ?»
30Di nwoo ŋąą pənə diɛ mą: «Akɛ kɛ nui ŋɛ̨i hvo mɛ̨nį ɲɔ̨n gɛ li, ku hvə li paa la ə́ pɔ.»
31Pilatə ə mo diɛ yɛ diɛ: «Ka li la ka gití tee yɛ pələi ka wɔ tɔ́n gaa la.»
Ɉuifəɠaa di mo diɛ mą: «Kuɔ tɔ́n yɛ ku hvo nu paa.»
32Nwooi ŋɛ̨i Jesus ə mo yɛ hvilɛn na ɉaa mɛ̨nį ɓa, ə gɛ, bɔ mɛ̨nį ə kɛ. 33Pilatə ə li ə hee ɲəi dɔɔ kpəlin ɉu, ə Jesus təli ə mąąni kɛ, yɛ mą: «Ɉuifəɠaa di wɔ tɔɔmun ɓaa yɛ́?»
34Jesus ə nwoo pulu pənə yɛ mą: «Nwoo ŋɛ̨i ə kaa moi ə́ kpɔɔ woo li, a wala kɛ tii, nu ta ɓə mą́ą́ mɛ̨nį ɓo yɛ?»
35Pilatə ə nwoo pulu pənə yɛ mą: «Gaa ə́ kwəi, Ɉuifə ɓa ɲą́ą́? Ə pɔ lɔi haláá laa həli nuą kpɛa-kpɛa ɓə ə́ tɛɛ bɔ́, lə ɓə ə́ gɛ?»
36Jesus ə nwoo pulu pənə yɛ mą: «Ŋɔ́ tɔɔlaai hvo a yɛnɛ̨ɛ̨ ɓɛ tɔɔlaa, a kɛ kɛ a yɛnɛ̨ɛ̨ ɓɛ tɔɔlaa yɛ nwɔ́ holahiɠaai də li mą́ą́kɔ̨nwɔ̨, ə gɛ, Ɉuifəɠaa di hvo pa kɛ Ɉón. Kɛlaa, nwɔ́ tɔɔlaai hvo a yɛnɛ̨ɛ̨ ɓɛ tɔɔlaa.»
37Pilatə ə mo mą yɛ mą: «Akɛti, tɔɔmun mąą yɛ́?»
Jesus ə nwoo pulu pənə yɛ mą: «Yɛ́ lɔ ɓə mo: gáá a tɔɔmun. Ŋą́ pa lɔi mɛ̨i di gáá a lon, ə gɛ, ŋą tɛ̨ą mąą kɛla hvaa ɓo. Nui lɔpee gaa tɛ̨ą pələ mɛ̨i, a nwəli tɔɔ nwóó ɓa.»
38Pilatə ə mo mą yɛ mą: «Tɛ̨ą ɓaa lə?»
Nu kəlee di hvaa Jesus paa mɛ̨nį ɓa
(Matie 27.15-31; Markə 15.6-20; Lukə 23.13-25)
Ɓɛlɔwai Jesus ə nwooi tii ɓo la, Pilatə ə kulɔ nwɔ̨nɔ̨ gala pulu pələ ə li yɛ Ɉuifəɠaa diɛ: «Nwɛ́i, və́ hɔn nɔpee ta kaa li ɉulɔnui ŋɛ̨i ɓa. 39Kɛlaa, yɛ pələi gwa gɛ la a bɔlɔ, pakə həli pələ tɛitɛi kəlee, gaho nąmu yii ka kɛ bɔ ŋį́ nwun mąąɓo, ka káá bɔ ŋį́ Ɉuifəɠaa di wɔ tɔɔmun ŋɛ̨i nwun mąąɓo?»
40Di kəlee di tómą kpɔ a di woo kɛnɛ̨ɛ̨ diɛ mą: «Kpaa! Ya hvəə ku kaa bɔ. Barabasə ɓə ku kaa bɔ.»
Yaan, Barabasə ŋɛ̨i di kɛi vaa ɓo, ə kɛ a too mɛ̨i kɛmun.
Đang chọn:
Ɉaan 18: BKPDCG
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập