Génesis 3
3
Pa Adán shi' lhpa Eva ti ninanc'ashamem pa Dios
1Pa tos*xl* yitô'yish ti vancatejshiin yashc'oya lhacôm'a pav'elh yaquisetes pavan yisnatesh pa Dios, pa niy'ôs lhpa nivacche:
—¿Pa' yit'esha ja Dios ca ya aj ca atuj lhpa ca ve'lhaa nava lhay nava aacjuy na vatcôvjiyanjavat?
2Lhpa nivacche pa yicuulh:
—Isjop ca jatujelh lhacôm'a nava lhay nava aacjuy, 3taj vooy lha aacjiyuc lhcachivatshi na vatcôvjiyanjavat tan jayu. Ja Dios yit'eshelhyi ca ya aj ca tujeelh, ya aj ca yajayelha shta lhpa lha' anôque aacjiyuc, lhayaash ca lhech yifanishtajeeshelh pa javafelh jayu.
4Pa tos pa yit'esha lhpa nivacche:
—Yôôlhjôn'in. Tanca navômjatelh jayu. 5Ja Dios yitô'ya jô avaatsheelh ca atujtajelh lhpa lha' anôque aacjiyuc, pa natôyelha jayu pa tô'lha pa isch'e shi' pa tô'lha pa niysa', pa lhecheesh pa ajunasheelhjulh jayu ja Dios.
6Lhpa nivacche lhechesh pa yaychavalha lhpa lha' lhpa aacjiyuc ti uj ti is, pa lhechesh pa nicu'a ca nituj, ca jaspa nicaajem pa lhcajôysha. Pa lhechesh pa namat'e lhpa ve'lha lha', pa tuj, pa yijutey shta pa lhjaya, pa tuj vitsha.*xm* 7Pa lhech t'aplhuqu'e' ti chinc'at'emey pava lhtôsjey papi napu' pa yitô'ya shta ti tsishavatsham'in. Pa lhechesh pa yu'vatjulh pava lhsashay lhpa higoyuc pa vatclôpjalhesh ts'ivee.
8Pa nivacle shi' lhpa lhjaya ti yipe'ya ts'ivee pa Lhcaanvacle Dios ti t'ôtaych'e pa vatcôvjiyanjavat caaj shta pa lhaviim iseshch'e ti nuut, pa lhechesh pa vant'ôfiichtajc'oya ts'ivee, yuy'ôcji pava aacjuy yie' pa vatcôvjiyanjavat. 9Pa Lhcaanvacle Dios pa tôney pa nivacle, pa niy'ôsey:
—¿Ta lhôv'e'?
10Pa nivacle yicuulh:
—C'apeya ti lht'ôtaych'e na vatcôvjiyanjavat pa ts'ijovay'in, teya ti yatsi'shaan; lhe'naa ti javônt'ôfich.
11Pa lhechesh pa niy'ôs pa Dios:
—¿She papi nifac'am ti atsi'shaan? ¿Lhtuj lhpa lha' lhja aacjiyuc lhjan jayeetajesh'a ca ya aj ca atuj?
12Pa nivacle ti yicuulh:
—Lha nivacche, lhan lhanjutyam ca jôveelhvaycop nijutyi lhca lha' lhja aacjiyuc, pa jatuj.
13Pa lhechesh pa niy'ôs pa Lhcaanvacle Dios lhpa nivacche:
—¿Ta t'e lhayaash ti lhasnatesh côque?
Lhpa lhech pa yicuulh:
—Ja tos tsicôjôsjatesh,*xn* lhe'naa ti jatuj lhca aacjiyuc lha'.
14Pa lhechesh pa yit'esha pa Lhcaanvacle Dios pa tos:
—Côque ti lhasnatesh, nav'ojinat jayu lhacôm'a nav'elh yaquisetes. Vooy nôqueesh shi' yinjôt jayu lht'ôtayesh jayu na oot pa atuj jayu na cotsjaat. 15Jasnatshelh'am jayu avaatsha shi' lha nivacche ca niac'utsfaeeshelh, shi' shta pava acleselh pa shi' papi lhcles.*xñ* Papi lhcles yiclônsham jayu ashatech, pa lhjuuj lhpic'o jayu.
16Pa yit'esha lhpa nivacche:
—Janôyôj'eam jayu pa t'ôôvte ca nicaajtaj'am papi acles, nôque t'ôôvte jayu ca ancavat'ajtaj. Vooy na lhentaj yichaj'ac'oya jayu na ajaya, pa lhavaatsha yaash'ac'oya jayu.
17Pa nivacle pa yit'esha:
—Ti lhasnatshem ca yit'esh lha ajaya, ti lhtuj lhca lha' lha aacjiyuc lhan janfactajelh'am ca ya aj ca atujelh. Vooy nôqueesh yie' jayu na cotsjaat pa uj sasch'e tôlha'ajop; pa caclec jayu pa acumjayash pan lht'ôôlhsha jayu pa ôc yiey pan lhavôôj pa amônlhajayash. 18Na cotsjaat yie' jayu pava c'utjanis shi' pa t'aclôcchat,*xo* pa atuj jayu pava yalha yich'e'in nichincôvjiyan. 19Jaspa caaj jayu pa ôc ca navcujuntajop, pa lhamjey jayu ca mapectaja na cotsjaat nan lhtô'lha, eem ti acotsjat'esh yiey nôque cotsjaat lhapecsham jayu.
20Pa nivacle yeyiyanesh lhpa lhjaya Eva, (nôque yich'e' vancamônlhanit) lhpa lhech lhamimi lhacôm'a napi mônlhasha'ne. 21Pa Lhcaanvacle Dios yisnatesh pava t'ojechey pava yaquisetes pa vat'uyjatshiyesesh, ca jaspa nuych'e pa nivacle shi' lhpa nivacche, 22pa yit'esh: “Vooy nôqueesh na nivacle pa yama ti casjunashjulh casvaatsha papi ve'lha, teya ti yitô'ya pa tô'lha pa isch'e shi' pa tô'lha pa niysa'. Ca ya aj ca natcum'e shta lhpa lha' lha aacjiyuc tô'lha pa vatmônlhajayash ca nituj,*xp* shi' ca mônlhaa yinjôt.”
23Lhe'naa pa Lhcaanvacle Dios ti yayjatshi pa nivacle pa vatcôvjiyanjavat yiey pa Edên, pa yijutem pa lhcumjayash yiey na cotsjaat nan tô'lha ti chiyisnatesh. 24Pa yayjatshi pa lhum'ôcjinucjulh pa Edên lhech yan'e papi isis lhcavos pa ve'lha shta pa clesataj ya'mamamshi na yaclôjqu'eshi lhacôm'a pava lhcaavjuc, nichavat'esha papu ca namey lhpa aacjiyuc tô'lha pa vatmônlhajayash.
Đang chọn:
Génesis 3: NIVA
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Nivacle Bible © Sociedades Bíblicas Unidas, 1994.