HECHOS QALLTA ARUNAKA
QALLTA ARUNAKA
Aka qillqatan qalltir arunakapampi (1.1), Lucas qillqatampi mayachthapisinxa, amuyatarjamax Apostolunakan Luräwinakapa sat qillqatax Lucas qillqatan tukuyäwi arunakapätapjamawa. Chiqpachansa aka qillqat sum qalltañatakix wasitampiw Lucas qillqatan qhip qhipa arunakapar kutti, Jesusan alaxpachar sarxatapampi. Apostolunakan Luräwinakapa sat qillqatax, kunjämtix Jesusan nayrïr arkirinakapax Qullan Ajayun irpat qhispiyasiñ arunak yatiyapkän ukxat parli, Jerusalenat qalltasina, Judea uraqpachana, Samariana, ukatsti jan judío uraqinakar mantasa, Siria uraqinkir Antioquía markana. Uka qhipxarusti, Pablon taqi chiqar saratapampix, Criston qhispiyasiñ arunakapax Asia Menor uksaruw purt'arakïna, nayraqatax Grecia markaru, ukxarusti Roma markaruraki. Chiqpachansa, aka qillqatax nayrïr iyawsirinakan sartäwipat parli, ukatsti jupanak tuqiw Criston qhispiyasiñ arunakapax aka uraqpachar purt'awayi.
Aka qillqatansti Pedro, Pablo apostolunakan luräwinakapat qhanstayi. Jupanakarusti Qullan Ajayuw ch'am churäna, irparakïna; ukhamat Criston Iglesiapan aka uraqin utt'asiñapataki, iglesian wiñay qalltasïwipasti pachpa Cristowa. Niya patak phisqa tunk kutiw Qullan Ajayut aka qillqatan parlasi. Qullan Ajayux Pentecostés urun iyawsirinakxar ch'amamp saraqtanïna, Jerusalén markana; ukürut Criston iglesiaparusa, irpirinakaparus Qullan Ajayux jan qarjasis sarayaski, sapürunjam ch'amañchaskaraki. Diosan suma yatiyäwi arunakapax jichhürun yatiyasiskaraki, uka arunakasti aka qillqatan qhanañchataparjamax ch'amaniwa, sapa mayni iyawsirinakan jakäwipan sumäñapataki, markapatakis askïñapataki.
Apostolunakan Luräwinakapa sat qillqatax kimsar jaljatäspawa:
1. Jesusan alaxpachar makhatxatapata, qhip qhipa iwxäwipa, arsüwip jaytatap qhipata (1.1-14); Jerusalén markan nayrïr iyawsirinakan sartäwipata (1.15—8.3).
2. Criston qhispiyasiñ arunakapan Palestina jaya chiqanakar puritapata (8.4—12.25).
3. Mediterráneo quta uksa tuqinakaru, Roma markakama: Pablon nayrïr saräwipata (13.1—14.28), Jerusalenan apostolunakampi, jilïrinakampi tantachäwipata (15.1-35), Pablon payïr saräwipata (15.36—18.22), Pablon kimsïr saräwipata (18.23—21.16) ukatsti Pablon Jerusalén markana, Cesarea markana, qhiparusti Roma markan katuntata uñjasitapa (21.17—28.31).
Đang chọn:
HECHOS QALLTA ARUNAKA: AYOPD
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996