Yʉanes 12
12
Yesʉs lé elœmɔ mulo Betani
(Mataos 26.6; Markus 14.3)
1Yé a be ó, ebʉʼ e Paska, lé osi liʼ lé esyɛɛ e molu tobo. Yesʉs ze to Betani, kwar mo Lazar, mʉr nye a pɛ̀h é foo e. 2Bé ze cyel dina é die mo Yesʉs. Marta a be ó lé eka bʉr mode. Lazar bé e Yesʉs, bé a be ó é sama bʉr o b'a be ondindil lé ede e. 3Maaria ze nʉa ma ntaʼ labina yé a be é mbɨa monumo e#12.3 «Labina», yé a be é ntaʼ yaa ɛ, yé a be ó kwoʼ be 0,325 kilo.. Yé a be ó é lele tɔɔ, sɛa e mpaŋ nard! Nye ze lœm mokʉ mo Yesʉs ya, ze pim me e mpuo lʉ we. Mbɛr wiwɛh ze loŋlo e monumo maa. 4Yé a be ó e nuu mpʉn we, die Yʉdas Iskariot. (Nye waa ó b'a be ó, nye ókɛha Yesʉs ɨ.) 5Nye ze lɛɛ ó: «Yé kʉ jala ó, bɛma labina bɛma bɛma é tɔɔ mɨsaŋ mɨ odenie mɨnter mɨlɛl, ntɔʼ dwe baanteʼenteʼe! Ebe yé yé baasaŋɔ no e?» 6(Nye a baalɛɛ no ebe nkʉnkoo nye a joʼo baanteʼenteʼe e. Nye a kʉ ka lwib no ó njɨ, ebe, nye a be ó ndiblʉ. Nye ó b'a baʼle ekuro lɔɔ, lé edíbe-díbe sa bʉr, bé a gba-gba tɨʼ ɨ, cyel é we mpɨʼ.) 7Yesʉs, nye e nye ó: «Antɨʼ ga nye. Nye esa syɛɛla nɨ ó, tiibe e moho dɨla yam. 8Bɨn e baanteʼenteʼe ó ndɨ é jɔʼ yiyɛh. Bɨna bɛɛ, bé ákwoʼ di ga jɔʼ yiyɛh.»
Bʉm ejʉŋɔ Lazar
9Buobuo oYʉden ntɔʼ joʼo ó, Yesʉs a be ó Betani. Bé a baaka to gʉʼ njɨ é l'efu le ebee Yesʉs. Yé a be nteme ó, é l'efu ó, bé paʼ kʉ to beɔ Lazar e mih, nyɛɛ mʉr Yesʉs a pɛ̀h é foo e. 10Ojwɨɨ be opara, bé a ka bà jwɨʼ ó, mpʉ bé lé ejala le ejʉ nteme Lazar ɨ, 11ebe, é lɔb we ó, buobuo oYʉden, bé a bɔʼa e be#12.11 Bé a baaka bee Yesʉs mpʉ ojwɨɨ be opara, bé a bee nye e. Bɛɛ, bé a baadwe nye kum a jala e nye e., ka jyɛʼ taa buʼo yɔɔ boo Yesʉs ɨ.
Epyal mo Yesʉs: Nyaʼ-nɔn, nye ó odumo o Yerʉsalɛm!
(Mataos 21.1; Markus 11.1; Lʉkas 19.28)
12É mɛn tɨ, buobuo bʉr o b'a fwal é l'ebʉʼ ɨ, mpʉ bé a joʼo ó, Yesʉs lwanbe pyal ɨ Yerʉsalɛm ɨ, 13bé ze nʉa mobo molen, ze toŋɔ, to bɔmɔ e nye, le elɛɔ ó: «Kɛɛɛɛɛɛ#12.13 Ekan e «Kɛɛɛɛɛɛ», lé edwir ekan e grɛk ó: «Hosana». Ekan laa, lé elɛɛ ó: «Zyɛm mana, tiʼɨ bɨh.» Sa gwar, é mopihe, lé a jaa ka fuʼla ó, njɨ yaŋa bɨsʉhʉ.!» «Mocyɛʼ mo mpom, mé swɨŋɨ é waa lé eze e die mo Da nwa ɔɔ!» «Seʼla ga njwɨɨbʉr lal Ɨzraɛl!»
14Yesʉs ze kœb ma jakah, ze kable nye é koo, lé esa syɛɛla yé a be tila é Kalara Zyɛm ɨ. Yé ó tila ó:
15«Bʉr o nkana Sion#12.15 Sion, yé ó die e nkana Yerʉsalɛm. , ajoʼo ga bʉa.
Mbe njwɨɨbʉr go lé eze e?
Nye ó ndindil é ma jakah kʉ.»
16Ompʉn be, bé a baataare joʼo peh Kalara Zyɛm yaa. Bé a ka ze gʉa ye ó, pie jɔʼ Yesʉs a bula bi kum we e. É dobo laa ó bé a taare lé egʉa ó, mpa ogwiha o mɨlɔb, bé a tile-tile bɨsa bɨnɨ bibyɛh ó, tiibe e nye! Bé a ze gʉa nteme ó, bé bʉr o tɨ, bé a sa nye bɨsyɛɛla bɨnɨ ó, kʉ be mpʉ byé a bɛa be mɨtila é Kalara Zyɛm ɨ.
17Bʉr bɨbɛh, bé a be gumo Yesʉs a behe Lazar, pɛ̀h nye é foo e, ze to le etaŋle sa yiyɛh bé a bee e. 18Ebe no ó mpampaʼ bʉr, bé a si mʉa ɨ Yerʉsalɛm, to bɔma e nye é Betani ɨ, ebe, bé a si joʼo tɔɔlʉ lé etiibe e dweʼle nkul nye a sa ɛ.
19OFarizyɛŋ ze taare lé elwibla paʼra wɔɔ. Bé ó: «Mbe ga: bɨna bé aŋa koʼo ga nye! Bʉr bɨbɛh mu kʉ ka du mʉr ó njɨ nye!»
Bʉr o Grɛs, bé esaa Yesʉs
20Yé a be ó e ntuntuma bʉr yé a to Yerʉsalɛm ɨ. Bʉʉ bʉr o tɨ, bé a be ó bʉr o Grɛs. Bɨbɛh, bé a ze ó, é l'ebʉʼ, lé eze dwiibɨ Zyɛm. 21Bé ze dihle kunokuno e Filip, mʉr Betsɛda ɨ Galɨle. Bé e nye ó: «Da, bɨh bé egwɨm bee Yesʉs.»
22Filip, nyi laa, to lɛɛ Andreas, bɨbɛh oba ze to lɛɔ Yesʉs. 23Yesʉs, nye e be ó: «Banana, jɔʼ Mwan mo Mʉr lé ekʉ jala le ebi kum we e, yé mu ó si pyal! 24Me elɛɛ bɨn cyecye ó nɛɛ: bumo di gwar ó, cye yiyɛh yé l'apa bèŋɔ é bɨbwah ɨ. ǃƗ bumo si bèŋɔ é bɨbwah, pah nɛʼɛ, yé ógumo mpumo é buobuo. 25Mʉr nyiwɛh lé ekpɛl njɨ tiʼ ye e, nye ódimle ye. Mʉr lé enwim tiʼ ye é mbi jɔʼ yiʼ ɨ, nye ókʉ baʼle ye ndwe le ebi tiʼ molu mo mpoʼ mɨmɛh. 26ǃƗ mʉr si gwɨm sea e me nɛʼɛ, yé ekʉ jala ó, nye duʼo me. Gumo me ndɨ ɨ, gumo yaa ó syɛl mosa wam nteme, nye ódi ɨ. Waa nyiwɛh ósea e me e, Sɔŋ wam ókʉ seʼle nye.»
Mwan mo Mʉr óbɨnɔ kʉ
27«Banana, leme wam, wé ó me é mo é zaaama. No ó, me lɛŋɨ é yé? Zê me lɛŋɨ Sɔŋ wam ó, nye pɛʼɛ me é sa muno ze pyal me é bananaʼ yiʼ ɛ? Kar! Ebe sa nɨ ó me a ze e, ó me bɔma é jɔʼ mɨtuu. 28Me ókʉ ka lɛɛ ó njɨ “Da, dweʼ die lo kum é buobuo!”» Twii ze duho é jobo kʉ ó: «Me a si taare dwe le kum. No ó, me óbâʼle dwe le kum é buobuo.» 29Ntuntuma bʉr yé a be tɨʼ ɨ, yé a be ó si joʼo twii a duho é jobo kʉ ɨ. Baʼ bʉr, bé ntɔʼ lɛɛ ó: «Mpâm nkɛl-jobo ó nɨ!» Bʉʉ bɛɛ ze lɛɔ ó: «Hɨʼɨ, engles, nyi lwib e nye!» 30Yesʉs nyɛɛ ze nʉa lwib, lɛɛ e be ó: «Twii nɨ baajwɨ̂ʼ ebe me. Nye be lé ejwɨ̂ʼ ó, ebe bɨn! 31Bananaʼ mu ó jɔʼ bʉr o ndɨ egumo e si nwaʼ ɛ, muno ze dweŋɔ mobe e! Banana, Njwɨɨ mbi jɔʼ yiʼ muno ze foŋɔ! 32No ó, é wam paʼ, é jɔʼ me ópɛʼɔ é si nwa, bɨnɔ kʉ ɨ, me ódulo bʉr bɨbɛh nko me óbe e.»
33(Ekan enɨ, lé a be ó lé elɛʼle mbi efie nye ódwè e.) 34Ntuntuma bʉr, yé e nye ó: «Bɨh bé a si joʼo bab lé eláa é motie mo Zyɛm ó, Lœma mulo mo Zyɛm ódi njʉmdia e njʉmdia. Go ka lɛɛ ó, yé ekʉ jala ó, Mwan mo Mʉr, nye bɨnɔ kʉ. Go lɛɛ no é yé? Zé nyɛɛ ndɨ Mwan mo Mʉr waa ɛ?»
35Yesʉs, nye e be ó: «Njʉl, wé dina ó, lé epɛn myɛn bɨn ye tɔɔ ma jɔʼ. Kœʼœ ga é jɔʼ njʉl waa dina lé epɛn myɛn ɨ, ebe, edurʉ, lé amu jaa mara bɨn, ebe, mʉr lé eto le entime é l'edurʉ ɨ, nye agʉa nko nye lé eto e. 36Jyɛʼɛ ga taa buʼo yin boo me, mʉr ndɨ mpaŋ njʉl ɨ, cye njʉl wam, wé dina lé epɛn myɛn ɨ. Ebe no ó bɨn bé ófuʼla bʉr o myɛn ɨ.»
É jɔʼ Yesʉs a sil lwib no e, nye ze laa, to fwab be.
OYʉden, bé ajyɛʼ taa buʼo yɔɔ boo Yesʉs
37Dam be ó Yesʉs a si bul sa bɨdweʼle bɨ nkul we é mih mɔɔ, oYʉden, bé a baajyɛʼ taa buʼo yɔɔ boo nye. 38Yé a syɛɛlɨ no ó, lé edira lɔɔ Da a bɛa lɛɛ é nʉm mo ngwiha mɨlɔb we Ezayi ó: «Da, zé a buʼla lɔɔ wih? Zé a bee é jɔʼ Da a lɛʼle be nkul we e?» 39Ebe no ó bé a be, abe e nkul ebuʼla ɛ, lé eduho é sa Ezayi a lɛɛ ɛ. Nye a lɛɛ ó: 40«Zyɛm a be ó si liŋ be ontim le elɨl be mɨleme, ó bé l'ayi ka bee e mih mɔɔ, nkʉ gʉa é kpɛhla, lé ebene ó, bé amu jaa dwibra, to nko nye ndɨ ɨ, ó nye joma be.» 41Ezayi a lwib no ó, é jɔʼ nye a bee moncɛnba mo Lœma mulo mo Zyɛm ɨ#12.41 Dwɛʼa Ezayi 6.1-5. «Mih mam, mɨ bee njwɨʼa nɨnɨ, Yahweh, Zyɛm Nkul nyiwɛh!» (Ezayi 6.5). No ó nye a lwib-lwib é lɔb we e.
42Dam be no, bʉʉ otamabʉr é kul oYʉden é buobuo, bé a be ó lé ekʉ jyɛʼ taa buʼo yɔɔ boo Yesʉs. Sa gwar, bé a baalɛɛ bʉr no. Bé a be ó lé ekpɛɛ oFarizyɛŋ, ebe, bé amu cyelɔ é pɨŋ, aka to é mompah mɨnjwɨʼla mɔɔ. 43Baanya-bʉa onɨ, bé a si sa no, ebe, bé a kpɛl-kpɛl ó, bʉr seʼla be, laa ó, Zyɛm seʼla be.
Yesʉs ó lé etiʼe mɨlɔb
44Yesʉs ze tuno ó: «Mʉr lé ejyɛʼ taa buʼo ye boo me e, nye ajyɛʼ ye njɨ boo me ɔɔ! Nye ejyɛʼ ye nteme ó boo mʉr a ntɨh me nwa ɔɔ! 45Mʉr lé ebee me e, nye ebee nteme mʉr a ntɨh me nwa ɔɔ! 46Me a ze kaʼ é si nwaʼ ó, me pɛnɨ bʉr myɛn, ó mʉr nyiwɛh lé ejyɛʼ taa buʼo ye boo me e, nkʉʼ duho é l'edurʉ, to é myɛn ɔɔ!»
47Nye ze lɛɛ ó: «ǃƗ mʉr si joʼo sikʉlʉ yam, abaʼle ye nɛʼɛ, nye e mobe. Sa gwar, ntʉʼ me ódwe nye ma, ebe, me a ze kaʼ é si nwaʼ ó, lé eze tiʼ bʉr, abe lé eze dwe bʉr o tɨʼ mobe. 48Mʉr nyiwɛh lé ecyɛl me, anʉa mokan mam e duu ɨ, nyiha, nye e mʉr ódwe nye mobe tɨʼ ɨ. Sikʉlʉ me mu si dwe bɨn ɨ, yé ó ngo dwe nye mobe é moho epihe, ntible-bɨkaŋa! 49Nye óbe ó e mobe, ebe, me a baalwib yʉʉ sɔʼɔ e me mʉr tɨ. Sɔŋ wam, mʉr a ntɨh me e, ó b'a tiile me mɨtiila dumo e sa me lé ekʉ jala le elɛɛ bɨn ɨ. 50Ndwe nteme, me egʉa ó, mɨtiila nye lé etiile e, myé ó ndɨ edwe bʉr tiʼ molu mo mpoʼ mɨmɛh. No ó, sa me lé elɛɛ ɛ, yé ó mpʉ Sɔŋ wam a lɛɛ me ya ɛ.»
Đang chọn:
Yʉanes 12: ozmBad
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2002, Wycliffe Bible Translators, Inc. All rights reserved.