Yʉanes 14
14
Mʉr lé egwɨm to boo Zyɛm ɨ, nye ekumo tɨʼ cwɨɨ é Yesʉs
1Yesʉs, nye e be ó: «Asyɛl ga ba. Bɨn bɨ jyɛʼ taa buʼo yin boo Zyɛm#14.1 Nkʉ «Jyɛʼɛ ga taa buʼo yin boo Zyɛm.». Jyɛʼɛ ga nteme ye boo me. 2Me paʼ to komlo bɨn modia gumo bɨn bé óto di ɨ. Mbɛr mo Sɔŋ wam, wé ó, é buo modia. Nkʉ yé a be ó be, abe no nɛʼɛ, mpa me a baalɛɛ e bɨn ó, me óto komlo bɨn modia gʉ. 3É jɔʼ me óbe si to, sil to komlo bɨn modia maa ɛ, me óbula ze nʉa bɨn é l'efu ó, bɨn toʼ, to di gumo me ódi ɨ. 4Bɨn bé egʉa zi lé eto nko me lé eto e.»
5Tomas, nye e nye ó: «Da, bɨh bé agʉa nko go muno to e. A bɨh bɛɛ, bé ódweʼe zi waa nyá ɛ?»
6Yesʉs, nye e nye ó: «Me ó ndɨ zi. Me ó ndɨ é l'ocyecye. Me ó ndɨ Etin e tiʼ. Mʉr, nye abe e nkul eto nko Sɔŋ wam ndɨ ɨ, cwɨɨ é nuu zi fih, nkʉ yé abe é me. 7Nkʉ bɨn bé a be ó be, gʉa me nɛʼɛ, mpa bɨn bɨ bɛa gʉa nteme Sɔŋ wam#14.7 Dwɛʼa nteme Yʉanes 8.19.. Taare é banana, bɨn mu ó si gʉa nye. Bɨn nteme bɨ bee nye!»
8Filip, nye e nye ó: «Da, lɛʼla bɨh Sɔŋ go. Bim yaa jala e bɨh.»
9Yesʉs ze bɨha e nye ó: «A bɛa bɨna bɨ di ga! No ó, Filip, go dina ó apa gʉa me? Mʉr mu si bee me e, nyi bee nteme Sɔŋ wam. A, ebe yé go lɛɛ ó: “Lɛʼla bɨh Sɔŋ go” e? 10Zê go abuʼla ó, me ó é zyɛŋa wih boo Sɔŋ wam ɛ? Sɔŋ wam, nye etiʼe ó, é me. Lwib me lé elwib e bɨn bɨbɛh ɛ, me alwib ye njɨ é nkul wam me mʉr tɨ. Sɔŋ wam, mʉr bɨh e nɔɔ lé edi ɨ, nye ó ndɨ eloŋlo bɨsyɛɛla bye. 11Buʼla ga me é jɔʼ me lé elɛɛ ó: “Me ó é zyɛŋa wih boo Sɔŋ wam; Sɔŋ wam, nye etiʼe ó, é me” e. Yé be ó, bɨn bé abuʼla lɔɔ wam waa nɛʼɛ, buʼla ga be ebe bɨsyɛɛla byam.
12«Me elɛɛ bɨn cyecye ó nɛɛ: mʉr lé ejyɛʼ taa buʼo ye boo me e, nye ósa nteme bɨsyɛɛla me lé esa ɛ. Nye nteme ósa byaa ndɨ é laŋle bwaʼ ɛ, ebe, me ebula, to gumo Sɔŋ wam ndɨ ɨ. 13Me óntɨh bɨn sa yiyɛh bɨn bé ódî le ejaʼ Sɔŋ wam, pere e die lam ɨ. É mbi waa ó bʉr, bé ógumlo Zyɛm Sɔŋ ebe Mwan mo Zyɛm ɨ. 14ǃBɨn si jaʼ sɔʼɔ, pere e die lam nɛʼɛ, me ódwe bɨn ya.»
Zea Mbɨambɨa Sisim
15«ǃBɨn si kpɛl me nɛʼɛ, bɨn nteme, bé ódu mɨtiila me lé etiile bɨn ɨ. 16Me ódî Sɔŋ wam ó, nye ntɨhɨ bɨn nuu mʉr ókamle e bɨn mpʉ mo me e. Nye óze di e bɨn é jɔʼ yiyɛh. 17Nye ó ndɨ Sisim Ocyecye. Bʉr o ndɨ egumo e si nwaʼ ɛ, bé abe e nkul enʉa nye é monyʉl mɔɔ, ebe, bé abe e nkul ebee nye, nkʉ gʉa nye. Bɨn ó ndɨ egʉa nye, ebe, nye edi ó, bɨn e boo nɔɔ. Nye nteme, nye ó é l'esama lɨn.
18«Me ákwoʼ liʼe bɨn bwɔɔnul. Me óbula ze kœb bɨn 19Yi liʼ ba titia: bʉr o ndɨ egumo e si nwaʼ ɛ, bé aŋa ka bee me. Sa gwar, bɨn bɛɛ, bé ókʉ bee me. Bɨn nteme, bé óbi tiʼ molu mo mpoʼ mɨmɛh ebe tiʼ me ndɨ e ye e. 20Dobo laa, bɨn bé ógʉa ó, me ó ɨ Sɔŋ wam, ndwe nteme, bɨn bé ó ɨ me, mɛm ɨ bɨn.
21«Mʉr lé ebaʼle mɨtiila myam le edu mye e, nye ó ndɨ ekpɛl me. Waa nyiwɛh ndɨ ekpɛl me e, nye ó waa Sɔŋ wam ókpɛl ɨ. Me nteme ókpɛl nye. Me ópyal boo nye.» 22Yʉd (abe yɛɛ Yʉdas yaa Iskariot), nye e nye ó: «Da, ebe yé go ópyal njɨ boo bɨh, aka pyal boo bʉr o si nwaʼ ɛ?» 23Yesʉs ze bɨha e nye ó: «Mʉr lé ekpɛl me e, nye óbaʼle sikʉlʉ me a dwe bɨn ɨ, ndwe le edu ye. Sɔŋ wam ókpɛl nye. No ó, bɨh e Sɔŋ wam, bé óze boo nye, ze komlo odia wih tɨ. 24Mʉr ndɨ akpɛl me e, nye adu mokan me lé elɛɛ ɛ. Sa bɨn lé ejoʼo me lé elɛɛ nɨ, yé abe lɔɔ wam. Yé eduho ó boo Sɔŋ wam, mʉr a ntɨh me e.
25«Me elɛɛ bɨn bɨsa bɨnɨ ó, é jɔʼ bɨna ga dina ɛ. 26Mʉr ndɨ ekamle e bɨn ɨ, nye ó Mbɨambɨa Sisim. Sɔŋ wam ólomlo bɨn wa ó, é die lam. Nye óyeʼle bɨn sa yiyɛh, lé ejɨm bɨn bɨtoŋla é lɔb sa yiyɛh me a lɛɛ-lɛɛ bɨn ɨ.
27«Motala ó me lé eliʼe bɨn e ma ma. Motala mam ó me lé edwe bɨn ma. Me adwe bɨn motala mam mpʉ bʉr o si nwaʼ lé edweela bɨsɔʼɔ, ka bula dɛn bye e. Asyɛl ga ba. Ajoʼo ga bʉa.
28«Bɨn bé a be ó si joʼo mpʉ me a lɛɛ e bɨn ó: “Me muno ze fiʼ. Me óbula ze, ze pyal gumo bɨn bé óbe e.” Nkʉ bɨn bé a be ó be, kpɛl me cyecye nɛʼɛ, mpa bɨn mu ó lé esoho, le egʉa ó, me efiʼ ó, to boo Sɔŋ wam, ebe, Sɔŋ wam ó lé elaa me. 29Me elɛɛ bɨn bɨsa bɨnɨ, byé l'apa syɛɛ ó, bɨn gʉŋa. ǃByé óbe si syɛɛ nɛʼɛ, bɨn bé óbuʼla é jɔʼ yaa. 30Me aŋa ka bâʼle bul lwib e bɨn, ebe, “njwɨɨ mbi jɔʼ yi”, nye mu ó lé eze. Nye abe e nkul ejwɨɨ yɛɛ e mɛm. 31No ó, yé ekʉ jala ó, bʉr bɨbɛh, bé gʉŋa ó, me ekpɛl Sɔŋ wam, le nteme ó, me esa ó, njɨ mpʉ nye a tiile me motie e. Mʉŋa ga si, bɨna pʉʼa ga wâ.»
Đang chọn:
Yʉanes 14: ozmBad
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2002, Wycliffe Bible Translators, Inc. All rights reserved.