Matiu 22
22
Tadulako agama Yahudi rapandiri nodo tauna au lohehe lao i posusa
(Luk. 14:15-24)
1Mololita mbulimi Yesu i tadulako agama Yahudi, Napahaweahe ngkora pandiri ide, Nauli, 2“Pue Ala nodo datu i lalu lolita ide: hadua datu mobabehi susa i petaunana anana. 3Napohawaa hawina lao mokakio tauna node: ‘Laomoke maande i posusaa petauna!’ Agaiana ope-opehe au rakakio, barahe mau lao. 4Ido hai natudu mbulimohe hawina au ntanina, nauliangaahe: ‘Nipahawe i tauna au rakakio: japi rasambalemi, paande lehami, masilolongami ope-ope. Laomoke i posusaa petauna!’ 5Agaiana ope-ope tauna au rakakio barahe mohaile pekakio iti. Hadua-hadua, laohe i bagonda. Arahe au lao i bondenda, arahe au lao i bagonda ntanina. 6Ara worihe au mohaka hawina datu iti, rapapahai hai rapapate. 7Kanahadina datu apa au mewali, rumihi mpuu karumpuna. Natudumohe surodadona lao mopapate topepapate iti hai mohuwe boeanda.
8Roo indo, nakakio mbulimohe hawina, nauliangaahe: ‘Posusa petauna masilolongami, agaiana tauna au kukakiomi, barahe hintoto. 9Mewali, laomokau i penga-penga rara, hai hema pea au nipohidupaa, niwawahamohe mai mesua i posusa petauna.’ 10Lao mpuumohe hawi iti i penga-penga rara, mokakio ope-ope tauna au moliu, bara rapopontani au maroa babehianda ba au kadake. Kahopoana, buke mpuumi sou petaunaa hai torare.
11Mesuami datu mokamata torare, Naita i olonda, ara hadua au bara mehampi posusa. 12Nauli datu: ‘Ene, moapari hai maiko i posusaa barako mehampi posusa?’ Bara mehana. 13Hangko indo, datu iti motuduhe hawina, nauli: ‘Nihilu bitina hai taiena, hai nitende i raoa i lalu kakaindiana! Inditi, ia ina moteria hai mantodiha.’ ” 14Napahopo Yesu ngkora pandiriNa hai lolita ide, “Bosa mpuu tauna au nakakio Pue Ala, agaiana haodi peahe au Napilei mewali taunaNa i lalu poparentaNa.”
Toparisi mekune i Yesu ba hintotoke mobaiari asele i Kaisar
(Mrk. 12:13-17; Luk. 20:20-26)
15Roo indo, padumohe toParisi hangko i Souna Pue Ala. Mohaokihe akalanda lawi rapeinao molambi kamasalana lolitana Yesu hai pampekunenda. 16Ido hai rapohawaamohe bahangkia topegurunda hai bahangkia taunana Datu Herode lao i Yesu. Kahawenda, rauliangaa, “Guru, kiisami kaOiona tauna au manoto. MepaturoKo i katou-touana moula peundeana Pue Ala. Bara Nupeulai pampekirinda hema pea, lawi baraKo mampopontani tauna. 17Guru, ido hai kiperapi bona Nuuliangaangkai, noumba pelambiaMu: moula atura agamanta, ba hangangaa mobaiarike asele i Kaisar,#22:17 Kaisar iami datunda to Roma. I tempona Yesu tuwo i dunia, to Roma mokamumu tamponda to Yahudi. ba bara?”
18Naisami Yesu tunggaiana lalunda au kadake, ido hai Nauliangaahe, “Modongko mpuukau! Moapa hai nihaoki kamasalana lolitaNgku? 19NitudungiaNa mai doi au biasa nipopobaiari asele.” Rahuhua hampeka doi pera. 20Mekune Yesu, “Lenggena hema hai hangana hema au ara i doi ide?”
21Rahanai, “Lenggena hai hangana Kaisar.”
Nauli Yesu, “Ane nodo, niwei Kaisar apa au hintoto rawei Kaisar, hai niwei Pue Ala apa au hintoto rawei Pue Ala.” 22Karahadina pehanaNa, tingkarahe, hai padumohe mopalehi Yesu.
Tosaduki mekunehe i Yesu kana i katuwonda hule tomate
(Mrk. 12:18-27; Luk. 20:27-40)
23I alo iti wori, arahe bahangkia toSaduki au hawe i Yesu. Tosaduki iti, iami tadulako agama Yahudi au manguli tauna au mate bara ina rapatuwo hule. 24Kahawenda toSaduki iti, mohaokihe kanawoana Yesu, rauliangaa, “Guru, nabi Musa mepaturo node: ane hadua tobalilo mate agaiana bara mani ara anana, halaluna hangangaa mampotambia bembana bona tauna iti ara pea pemuleana. 25Mewali, arahe pitu topohalalu, ope-opehe tobalilo. Au towutu, motambi. Bara mani wohiraia moana, matemi tobalilo iti. Bembana naposamboko adina. 26Bara mani worihe moana, matemi. Nodo wori au mewali i kataluna duuna hawe i kapituna. 27Kahopoana, mate worimi towawine iti. 28Mewali i alo pearonda tomate, ane tou-tou mpuu tomate tuwo hulehe, hemami ampuna towawine iti? Lawi pitumohe au mampotambia.”
29Nahanai Yesu, “Sala ntepuu pekirimi, lawi bara niisa ihi Sura Malelaha, bara wori niisa kuasana Pue Ala. 30Lawi i pearonda hule tomate, katuwonda nodomi katuwo malaeka i lalu suruga, barapohe motambi ba rapopotambi. 31Kutudungiakau lolita au ara i lalu Sura Malelaha au mopakanoto pearonda tomate. Ara lolitana Pue Ala hangkoia au mouliangaakau node: 32‘Ikomi Pue Ala au rapenombai Burahima, Isaki, hai Yako.’ Lempona, nauri matehe Burahima, Isaki hai Yako, batena tuwohe, lawi tauna au menomba i Pue Ala, batena pea tauna au tuwo.” 33Karahadina tauna bosa paturona Yesu iti, tingkara mpuuhe.
Toparisi mekunehe i Yesu kana i parenta au meliu kamahilena
(Mrk. 12:28-34; Luk. 10:25-28)
34Tosaduki iti, barapi rabuku mohanai Yesu. Ido hai toParisi, teruhu mbulimohe mohaoki rara moakalangi Yesu. 35Ara hadua guru agama hangko i olonda au mohaoki kamasalana lolitana Yesu hai pampekunena, nauli, 36“Guru, hangko i ope-ope parenta i lalu Aturana Musa, parenta umba au mahile ntepuu?”
37Nahanai Yesu, “Teuki node: ‘Nipokaahi Pue Ala, Ampumi, hangko i kabulana lalumi, i sukana pekirimi hai i sukana kapandemi.’ 38Itimi parenta au mahile, hai au kaisa. 39Hai parenta karompakana au himbela hai au kaisa iami: ‘Nipokaahi hangka rangami nodo pampokaahimi watami haduduami.’ 40Parenta rompaka itimi au mewali patoa hangko i ope-ope Aturana Musa hai paturonda nabi.”
Yesu mekune i toParisi kahemana Datu Topehompo
(Mrk. 12:35-37; Luk. 20:41-44)
41Tanganda mani toParisi mogulu inditi, Yesu mekune irihira, Nauli, 42“Noumba pelambiami: hema Datu Topehompo au nadandi Pue Ala hangkoia? Pemuleana hema?”
Rahanai, “Pemuleana Datu Daudi.”
43Nauli Yesu, “Mewali, moapari pane nauli Daudi pemuleana iami Pue au napenombai? Lawi hangkoia anti peninina Inao Malelaha, Daudi manguli:
44Pue mongkora i Ampuku au kupenombai, Nauli,
‘MohudamoKo ntanda i koanaNgku,
duuna Kupopengkoruhe ope-ope iwaliMu Irio.’#Pta. 110:1
45Mewali, ane Datu Topehompo iami pemuleana Daudi, moapa hai nauli Daudi, Ia Pue au napenombai?” 46Bara ara hadua au mohanai. Mepongka i alo iti, barapi ara hadua au bai mekune ba apa-apa i Yesu.
Đang chọn:
Matiu 22: NPY
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
@LAI 2016