Matiu 28
28
Yesu tuwo hule
(Mrk. 16:1-8; Luk. 24:1-12; Yoh. 20:1-10)
1Kaliuna Alo Pengkarooangaa, hangko damani mesupa alo i alo Minggu, Maria Magdalena hai Maria au ntanina lao mampeita talumba iti. 2Unga pea ara linu mahile, lawi hadua malaekana Pue mendaulu hangko i suruga mai mololi watu popetuko talumba, hai mohuda i wongkona. 3Lenggena, mewangka nodo kila, hai hampina bula ntepuu. 4Surodado au mokampai inditi, langa mpuumohe, moradahe, hai madungkahe. Mewalihe nodo tauna au mate.
5Nauli malaeka i towawine iti, “Ineekau langa. Kuisa kamohaokimi Yesu au rapaku i kau mombehape. 6Barapi ara inde, tuwo hulemi nodo au Nauliangaamokau. Mai nipeita karadampaaNa. 7Mewali, laomokau hoholiga, niuliangaahe topeguruNa katuwona hulemi Yesu. Hai Ia moiorumi lao i tampo Galilea. Ia ina niita inditi. Nikatuinao apa au kuuliangaakau ide!”
8Hoholigahe towawine iti padu hangko i talumba. Langa mpuuhe, agaiana matana worihe. Melangkamohe lao i topeguruna Yesu lawi rapeinao mopahawe apa au mewali. 9Bila-bila Yesu hawemi i olonda towawine iti, hai Natabehe. Maimohe hungku-hungku, mokalapui bitiNa hai menomba Iria. 10Yesu mouliangaahe, “Ineekau langa! Laomokau niuliangaahe halaluNgku bona laohe i Galilea, lawi ina raitaNa indolou.”
Popahawenda surodado au mokampai talumbana Yesu
11I kapadunda towawine iti, bahangkia surodado au mokampai talumba laohe i lalu wanua mopahawe i kapala-kapala tadulako mpenomba ope-ope au mewali i talumba inona. 12Mohawamohe kapala-kapala tadulako mpenomba hai totosaenda to Yahudi au ntanina. Kabotuana lolitanda, agina moweihe surodado doi ngkaia rapopotuko humenda bona inee rapopololita. 13Rauli kapala-kapala tadulako mpenomba i surodado iti, “Niuliangaahe tauna node, ‘I tanga kaindi, topeguruna Yesu mai mopanangka wataNa tangangki leta.’ 14Ane lolitami iti nahadi Gubernur, ikami rai au mololita iria bona ineekau rapopoapa.” 15Surodado iti modokohe doi au raweihe, hai mopahawehe apa au roomohe rapaturoa. Duuna hawe ide-ide, tebambari liliu lolita iti i to Yahudi.
Yesu motuduhe topeguruNa mobambari Ngkora Marasa
16Topeguruna Yesu au hampulo hai hadua laohe i tampo Galilea. Laohe i bulu au natudungia amiamohe Yesu. 17Inditi, moita mpuumohe Yesu, hai menombahe Iria. Agaiana ara wori au bata-bata mani lalunda. 18Yesu mohungkuki topeguruNa, Nauliangaahe, “Ope-ope kuasa i suruga hai i dunia rahuhuamoNa. 19Mewali, laomokau i humalele dunia, nipopewalihe ope-ope tauna topeulaNgku, niriuhe i lalu hangana Uma hai Ana hai Inao Malelaha 20hai nipaturomohe bona mampeulaihe hinangkana au Kuhawaamokau. Hai bona niisa, ina Kuporangaikau duuna hawe i kahopoa dunia ide.”
Đang chọn:
Matiu 28: NPY
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
@LAI 2016