यूहन्ना 4
4
यीशु कने सामरी जनाना
1फेरी ताहली जे यीशुये जो पता लगया भई फरीसियें सुणया भई यीशु यूहन्ने ते जादा लोकां जो चेले बणाईराँ कने तिन्हांजो बपतिस्मा देई कराँ। 2यीशु खुद बपतिस्मा नीं देई करां था बल्कि ये काम्म तिसरे चेले करी रां थे, 3तां सै यहूदिया प्रदेशा जो छड्डिने बापस अपणयां चेलयां सौगी गलील प्रदेशा जो चलिग्या, 4इस बार तिस्सो सामरिया प्रदेशा चींये जाणे पैया। 5इस खातर सै सामरिया प्रदेशा रे इक नगर सूखार नगरा तक आया, ये नगर तिसा धरतिया ले था सै जे याकूबे अपणे मुण्डुये यूसुफा जो दित्तिरी थी; 6कने याकूबे सै जे खूह बणाया था सै हुण तक तिसा इ जगह पर था। यीशु पैदल चली-चलीने थक्की गरा था इस खातर सै आईने खूआ ले इयां इ बैठिग्या। ये तिस बेले री गल्ल इ ताहली जे तकरीवन दपैहर हुई चुक्कीरे थे।
7इतणे वगता च इक सामरी जनाना पाणी भरने आई। यीशुये तिसाजो गलाया, “मिन्जो पीणे जो किछ पाणी दे।” 8काँह्भई तिसरे चेले तिस वगत नगरा च रोटी ल्यौणे गए थे। 9तिसे सामरी जनाने तिस्सो हैरान हुईने गलाया, “तू त इक यहूदी आ, फेरी बी मांज सामरी जनाना ते पीणे खातर पाणी काँह मंगया दा?” काँह्भई यहूदी त सामरियां ने कोई बी सलबन्ध नीं रखदे। 10यीशुये जबाब दित्या, “तू नीं जाणदी भई परमेशर तिज्जो क्या देणा चांह, कने तू नीं जाणदी भई कुण तेरते पाणी मंगया रां। जे तू जाणदी, तां तू माहते इस्सो मंगदी कने हऊँ तिज्जो जीवन देणे औल़ा पाणी#4:10 जीवन देणे औल़ा पाणी ये पवित्र आत्मा कने यीशु मसीह री शिक्षां रा प्रतीक आ सै जे लोकां जो अनन्त जीवन देआं। देन्दा।” 11जनाने तिसजो गलाया, “प्रभु जी, तेरले त पाणी निकाल़णे जो कोई बी बर्तण निआं, कने खूह बड़ा डुग्गा, तां फेरी सै जीवन देणे औल़ा पाणी तेरेले किती ते आया? 12तू अहांरे पूर्वज याकूब ते महान नीं हुई सकदा, तिने जे अहांजो ये खूह दित्या; कने तिने अपणे बच्चयां कने डंगरां सौगी खुद अप्पूँ बी इसरा पाणी पित्या?” 13यीशुये तिसाजो जबाब दित्या, “हर कोई तिस जे इस खूआ रा पाणी पीणा, तिसरी कदीं प्यास नीं बुझणी, 14पर सै जे कोई तिस पाणिये जो पींगे, सै जे माह तिस्सो देणा, तिस फेरी कदीं प्यासे नीं रैहणां; बल्कि सै पाणी जे हऊँ तिस्सो देंगा, सै तिसच इक पाणिये रा सोता बणी जाणा सै जे तिस्सो अनन्त जीवन देंगा।” 15फेरी तिसे जनाने तिसने गलाया, “प्रभु जी, सै जल मिन्जो दे ताकि हऊँ फेरी कदीं प्यासी नीं रऊँ कने नांई मिन्जो इतणे दूर पाणी भरने जो औणे पौ।”
16इस पर यीशुये तिसाजो गलाया, “जा अपणे घरा-औल़े जो सद्दीने इत्थी लीऔ।” 17जनाने जबाब दित्या, “मेरा कोई घरा-औल़ा निआं।” यीशुये तिसाजो गलाया, “तां जे तू गलाया राईं भई तेरा कोई घरा-औल़ा निआं, तां तू ठीक इ बोल्या दी। 18तेरे पांज्ज घरा-औल़े थे, कने हुण तू जिस माहणुये सौगी रैईं सै बी तेरा घरा-औल़ा निआं; इस खातर तैं सै जे गलाया, ठीक इ गलाया।” 19इस पर जनाने तिसने गलाया, “प्रभु जी, हऊँ समझी सक्कां इ भई तू इक भविष्यवक्ता। 20अहांरे पूर्वज इस पहाड़ा पर अराधना करां थे, पर तुहें यहूदी लोक बोलां ये भई यरूशलेम नगरा च अराधना करनी चाहिन्दी।” 21यीशुये तिसाजो गलाया, “ओ नारी, मेरिया गल्ला पर विश्वास कर भई सै बगत आईरां ताहली जे तुहां पिता री अराधना नांत इस पहाड़ा पर करनी, कने नांई यरूशलेम च करनी। 22तुहें सामरी लोक तिस्सो जे नीं जाणदे, तिसरी अराधना करां ए; कने अहें यहूदी लोक तिस्सो जे जाणां ए तिसरी अराधना करां ए; काँह्भई छुटकारा यहूदियां चते आ।#4:22 काँह्भई छुटकारा यहूदियां चते आ। काँह्भई परमेशरे लोकां जो छुटकारा देणे री योजना यहूदियां तेई शुरु कित्ती 23पर सै वगत आई चुक्कीरा, ताहली जे सच्चे भगत अहांरे पिता परमेशरा री अराधना आत्मा रिया अगुवाईया च सच्चाईया ने करगे, काँह्भई अहांरे पिता अपणे खातर येढ़े इ भगतां जो टोल़ां ये। 24परमेशर आत्मा इ, इस खातर जरूरी आ भई तिसरी अराधना करने औल़े आत्मा कने सच्चाईया ने अराधना करो।” 25जनाने तिसने गलाया, “हऊँ जाणाँ इ भई मसीह सै जे परमेशरा रा अभिषिक्त माहणु कहलाया जां, औणे औल़ा; ताहली जे सै औंगा, तां तिस अहां जो सारियां गल्लां दसणियां।” 26यीशुये तिसाने गलाया, “हऊँ जे तेरने गल्ल करी रां, हऊँ सैई हाया।”
चेलयां री वापसी
27इतणे च तिसरे चेले आई पुज्जे, कने तिन्हांजो ये देखीने सच्ची जो बौहत हैरानी हुई भई सै इक जनाना ने गल्ल-बात करी रां; पर किन्हिये बी तिसते किछ नीं पुच्छया, भई “तू क्या चाँह यनि किस खातर इसाने गलाईरां?” 28फेरी सै जनाना अपणा घड़ा तिसा जगह छड्डिने गाँवां जो बापस चलीगी, कने लोकां ने बोलणे लगी, 29“आईने, इक्की येढ़े माहणुये जो देक्खा, तिने मेरे बारे च बौहत सारियां गल्लां दस्सीत्या सै जे मैं किति रियां थी। किति येई मसीह त निआं?” 30इस पर लोक नगरा ते निकल़ीने यीशुये जो देखणे औणे लगे। 31इस बिच तिसरे चेले तिसते बिनती करने लगे, “गुरू जी, किछ खाई लैं।” 32पर यीशुये तिन्हांते गलाया, “खाणे रे खातर मेरेले सै रोटी, तिसरे बारे च जे तुहें नीं जाणदे।” 33इस पर तिसरे चेले अप्पूँ बाटियें इक दुज्जे ते पुछणे लगे, “क्या किन्हिये तिसजो खाणे खातर किछ लन्दीरा?” 34यीशुये तिन्हांजो गलाया, “मेरा खाणा तिस परमेशरा रिया इच्छा रा पालन करना हया तिने जे मिन्जो भेज्जिरा, कने तिसरे कम्मा जो पूरा करना सै जे तिने मिन्जो सौंपीरा। 35तुहें अक्सर बोलां ये, ‘बढाईया जो हल्तियें बी चार महीने पैईरे?’ देक्खा हऊँ तुहांजो बोलां, ध्यान देईने खेतां जो देक्खा, भई तियां जे खेतां च पक्कीरी फसल बढाईया रे खातर त्यार हुआं इ, तियां इ माहणु मेरा सन्देश ग्रहण करने खातर त्यार आ। 36बढाई करने औल़ा अपणी मजदूरी पां, कने अनन्त जीवना खातर फसल कठेराँ, ताकि फसल बाहणे औल़ा कने बढणे औल़ा ये दोन्नों मिलीने मौज करो। 37काँह्भई इत्थी ये कहावत ठीक बैठीराँ ई: बाहणे औल़ा कोई होर आ कने बढणे औल़ा कोई होर। 38तिज्जो मैं तिस खेता रिया फसला बढणे जो भेज्या, तिसच जे तैं मेहणत नीं कित्तिरी : होरीं तिसच मेहणत कित्ती कने तुहें तिसरिया मेहणता रे फल़ा च हिस्सेदार हुये।”
सामरियां रा विश्वास करना
39तिस नगरा रे कई सामरियें तिसा जनाना रे गलाणे पर यीशुये पर विश्वास कित्या, तिसे ये गवाही दित्ति थी, भई तिने मेरिया जिन्दगिया रे बारे च बौहत सारियां गल्लां दस्सी तियां जो किछ मैं कित्तिरा था। 40फेरी ताहली जे ये सामरी तिसले आये, तां तिन्हे तिसते रुकणे खातर बिनती किति, कने सै तिन्हाले दो दिन तक रुकया। 41कने तिसरयां बचनां ते प्रभावित हुईने होर मतयां सारयां लोकें तिस पर विश्वास कित्या, 42तिन्हे तिसा जनाना ने गलाया, “हुण अहें सिर्फ तेरे बोलणे तेई विश्वास नीं करदे; काँह्भई अहें अप्पूँ इ तिस्सो सुणील्या कने हुण अहें ये जाणीगे भई सच्ची जो येई हाया सै जे संसारा रा छुटकारा करने औल़ा।” 43फेरी दो दिन बाद सै ऊत्थीते निकल़ीने गलील जो चलीप्या; 44काँह्भई यीशुये खुद गवाही दित्ति भई भविष्यवक्ते जो अपणे लाके च आदर नीं मिलदा। 45ताहली जे सै गलील च आया, तां गलील रे लोकें बड़िया मौज्जा ने तिसरा स्वागत कित्या; काँह्भई जितने काम्म तिने त्योहारा रे बगत यरूशलेम च कित्ते थे, सै सब तिन्हे देक्खे थे, काँह्भई सै बी तिस त्योहारा च शामल थे।
राज कर्मचारिये रे पुत्रा जो चंगा करना
46फेरी सै भीं ते गलील रे काना नगरा च गया, तित्थी जे तिने पाणिये जो दाखरस बणाया था। इस बार तित्थी राजे रा इक कर्मचारी था तिसरा मुण्डु जे कफरनहूम नगरा च बमार था। 47सै ये सुणीने भई यीशु यहूदिया जिले ते गलील जिले च बापस आईगरा, सै तिसले काना नगरा च गया कने बिनती करने लगया भई चल्लीने मेरे मुण्डुये जो ठीक करी दे : काँह्भई सै मरने जो हुईगरा था। 48यीशुये तिसने गलाया, “तदुआं तक जे तुहें चमत्कारा रे काम्म नीं देक्खी लेंगे ताहलुआं तक तुहां विश्वास नीं करना।” 49राजे रे नोकरे तिसने गलाया, “प्रभु जी, इसते पैहले भई मेरा मुण्डु मरी जाओ, तुहें मेरे सौगी चला।” 50यीशुये तिसजो गलाया, “तू जा तेरा मुण्डु जिऊंदा रैहणा।” तिने माहणुये यीशुये री गलाई रियां गल्लां पर विश्वास कित्या कने घरा जो चलीप्या। 51सै घरा जान्दे हुये हल्तियें रस्ते ची था ताहली तिसरे दास तिस्सो मिले कने तिसजो ये खुशखबरी दित्ति भई हुण “तेरा मुण्डु ठीक आ।” 52तिने तिन्हांते पुच्छया, “किस वगत सै ठीक हुणे लगया?” तिन्हे जबाब दित्या, “पिछले कल दपैहरयां तकरीवन इक बजे तिसरा बुखार उतरीगरा।” 53फेरी मुण्डुये रा पिता जाणिग्या भई ये ठीक तिस बगता री गल्ल इ ताहली जे यीशुये तिसने गलाया था भई, “तेरा मुण्डु जिऊंदा रैहणा,” तिसते बाद तिने अपणे पूरे परिवारा सौगी विश्वास कित्या। 54ये दुज्जा चमत्कारी नशाण था सै जे यीशुये यहूदिया प्रदेशा ते आईने गलील नगरा च कित्या।
Đang chọn:
यूहन्ना 4: KFSNT
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
This work is licensed under Creative Commons Attribution-ShareAlike 4.0 License.