मत्ती 14
14
हेरोदेस रा यीशुये रे बारे च सुणना
(मरकुस 6:14-29; लूका 9:7-9)
1तिस बगत गलील रे राजा हेरोदेसे यीशुये रे कित्तिरे चमत्काराँ रे बारे च सुणया, 2तां तिने अपणे सेबकां ने गलाया, “ये बपतिस्मा देणे औल़ा यूहन्ना! सै जे मूईरयां ते जिऊंदा हुईग्या, इस खातर तिसले ये परमेशरा री शक्ति तिसा वजह ने जे सै सामर्था रे काम्म करया राँ।”
यूहन्ने री हत्या
3-4हेरोदेस रे सोचणे री वजह ये थी काँह्भई तिने अपणे भाई फिलिप्पुस रे जिऊंदा हुन्दे हुये तिसरी जनाना हेरोदियासा ने ब्याह रचाया था। काँह्भई यूहन्ना तिसने बोलां था, भई तैं जो किछ कित्या सै परमेशरा रिया व्यवस्था रे खिलाफ आ! फेरी हेरोदियासा जो खुश करने रे खातर हेरोदेसे यूहन्ने जो पकड़ने जो सिपाईयां जो बोल्या। तिन्हें यूहन्ने जो पकड़ीने बन्हया कने जेल्ला च पाईत्या। 5हेरोदेस तिस्सो मारना चाँह था, पर सै लोकां ते डराँ था काँह्भई लोक यूहन्ने जो भविष्यवक्ता मन्नां थे। 6पर ताहली जे हेरोदेस रा जन्म दिन आया, तां हेरोदियास रिये कुड़िये हेरोदेस कने तिसरे मेहमान्नां रे सामणे नच्ची ने इतणा खुश कित्या। 7भई इस पर तिने सगन्द खाई ने बचन दित्या, “जो किछ तू मंगगी, माह तिज्जो देणा।” 8तिसे अपणिया मौआ रे बैहकावे च आईने गलाया, “मिन्जो थालिया च रखीने यूहन्ना बपतिस्मा देणे औल़े रा सिर दे।” 9राजा बड़ा दुखी हुया, पर अपणी कसम मेहमान्नां रिया वजह ते तिने तिसारी मांग पूरी करने रा हुक्म देईत्या। 10तिने जेल्ला च यूहन्ने रा सिर कटणे खातर माहणु भेज्जे; 11इस करीने यूहन्ने रा सिर थालिया च पाईने लन्दया कने तिसा लड़किया जो देईत्या, सै तिस्सो अपणिया मौआ ले लेईगी। 12फेरी यूहन्ने रे चेले आये कने तिन्हे तिसरा धड़ लेईने दफनाईत्या, कने फेरी तिन्हे आई ने यीशुये जो दस्या।
यीशुये रा पांज्ज हजार ते जादयां जो रोटी ख्वाणा
(मरकुस 6:30-44; लूका 9:10-17; यूहन्ना 6:1-14)
13ताहली जे यीशुये इसरी चर्चा सुणी, तां सै तित्थी ते किश्तिया पर किसी सुनसान जगह च चलिग्या; पर ताहली जे लोकां जो इसरा पता चलया, तां सै अपणे-अपणे शहर कने गाँवां ते निकल़ीने तिसरे पिच्छे चलीपे। 14यीशु ताहली जे किश्तिया चाते उतरी ने कनारे पर आया, तां तिने बौहत लोकां री भीड़ कट्ठी हुईरी देक्खी, तिस्सो तिन्हां पर तरस आया कने तिने बमार लोकां जो ठीक कित्या। 15ताहली जे रात हुई, तां तिसरे चेलयां तिसले आईने गलाया, “ये सुनसान जगह इ तित्थी जे कोई माहणु नीं रैहन्दे कने बौहत देर बी हुई चुक्कीरी; इस खातर लोकां जो भेज ताकि ये गाँवां च जाईने किछ अपणे खातर खाणे जो खरीदी लो।” 16पर यीशुये तिन्हांजो गलाया, “इन्हांरा जाणा जरूरी निआं! तुहें इ इन्हांजो किछ खाणे जो देआ।” 17तिन्हे तिसने गलाया, “अहांले पांज्ज रोटियां कने दो मच्छियां जो छड्डिने होर किछ निआं।” 18यीशुये गलाया, “तिन्हांजो मेरले ली औआ।” 19तिने लोकां जो गलाया भई तुहें घा पर बैठी जावा, फेरी तिने सै पांज्ज रोटियां कने दो मच्छियां लेईने स्वर्गा खौ देख्या कने रोटिया खातर परमेशरा रा धन्यवाद कित्या फेरी रोटिया रे दो-दो टुकड़े करीने सै अपणे चेलयां ले लोकां जो बंडणे जो दित्ते। 20ताहली जे सब खाईने रज्जीगे, इसते बाद बचीरे टुकड़यां ने तिसरयां चेलयां बारा टोकरियां भरियां। 21जनानां कने बच्चयां जो छड्डिने तिसा जगह खाणे औल़े तकरीवन पांज्ज हजार माहणु थे।
यीशुये रा पाणिये पर चलना
(मरकुस 6:45-52; यूहन्ना 6:15-21)
22इसरे फौरन बाद यीशुये अपणयां चेलयां जो किश्तिया च बैठणे जो गलाया भई तुहें माहते पैहले दरयावा पार चली जावा, तदुआं तक हऊँ इन्हांजो भेज्जां। 23लोकां जो भेज्जीने, सै कल्हा प्राथना करने जो पहाड़ा पर चलिग्या; कने सन्झा तक सै ऊत्थी कल्हा इ था। 24तिस वगत किश्ती पाणिये रियां छालियां च थपेड़े खान्दी डगमगाई राँ थी, काँह्भई सामणे ते हवा चलीरी थी। 25कने सै राति रे चौथे पैहर यनि तिन्न कने छे बजे रे बिच पाणिया पर चलदे हुये तिन्हांले आया। 26ताहली जे तिसरे चेलयां तिस्सो समुद्रा पर चलदे हुये देख्या, तां सै घबरान्दे हुये अप्पूँ चियें गलाणे लगे, “येत कोई भूत आ!” सै डरा रे मारे चिखणे लगे। 27यीशुये फौरन तिन्हांने गल्ल करदे हुये गलाया, “हौंसला रखा! ये हऊँ आ, मता डरदे!” 28पतरसे तिस्सो जबाब दित्या, “प्रभु जी, जे ये तुहें इ हाये तां मिन्जो पाणिये पर चल्लीने अप्पूँ ले औणे रा हुक्म दे।” 29तिने बोल्या, “चल आई जा!” पतरस किश्तिया चते उतरी ने पाणिये पर यीशुये खौ चलीप्या। 30तिने ताहली जे तेज हवा च पाणिये रियां छालियां जो अपणे चऊँ पासयां उठदे हुये देख्या, तां सै घबराईग्या, कने तां जे डुबणे लगया ताहली सै चिल्लान्दे हुये बोलणे लगया, “प्रभु, मिन्जो बचा!” 31यीशु फौरन तिसले पुज्जया कने तिसजो सम्भाल़ी ने बोल्या, “अरे कमजोर विश्वासी, तैं शक कजो कित्या?” 32कने सै किश्तिया पर चढ़ीगे, हवा रुकीगी। 33किश्तिया परा रे लोकें यीशुये री अराधना करीने बोल्या, “तू सच्ची जो परमेशरा रा पुत्र आ।”
गन्नेसरत च रोगियां जो चंगा करना
(मरकुस 6:53-56)
34सै नदी पार करीने गन्नेसरत नगरा रे इलाके च पुज्जे। 35ताहली जे तित्थीरे लोकें तिस्सो इकदम पछयाणी लया, सै नेड़े-तेड़े रे सारयां लाकयां च दौड़ीने गए कने ये समाचार फैलाईत्या। सै बमाराँ जो मंजोलिया पर रखीने तिसा जगह पर ल्याओ, 36कने तिसने अरज करने लगे भई सै तिन्हांजो अपणे कपड़यां रिया कनारिया नेई छोणे देओ; कने जितने जे तिसने छोये, सै सब जणे ठीक हुईगे।
Đang chọn:
मत्ती 14: KFSNT
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
This work is licensed under Creative Commons Attribution-ShareAlike 4.0 License.