যোহন 2
2
কান্না আদামর্ মেলা হানা
1ইয়েনর্ দ্বিদিন পরে গালীলর্ কান্না আদামত্ এক্কান্ মেলা ওইয়্যে। যীশু মাবো সিয়েনত্ এলঅ। 2সে মেলাত্ যীশু আর তা শিচ্চ্যগুনেয়ো বাত্যেয়োন। 3পরেদি যেক্কে বেক্ আঙ্গুর-রচ্চান্ ফুরেই গেল সেক্কে যীশু মাবো যীশুরে কলঅ, “ইগুনোর্ আঙ্গুর-রচ্ নেই।”
4যীশু তা মারে কলঅ, “এ পৌইদ্যেনে তর্ কি মাঢা ঘামানা? মঅ সময়ান্ এজঅ ন-অয়।”
5তা মা সেক্কে চাগরুনোরে কলঅ, “তে তমারে যিয়েনি গুরিবাত্তে কয় সিয়েনি গরঅ।”
6যিহূদী ধর্মর্ সুদোম্ মজিম্ সিজি অবাত্যে সে জাগানত্ পাত্তরর্ ছোবুয়ো চাড়ি বোজেয়্যে এলঅ। সিগুনোর্ পত্তি চাড়িত্ কমেদি পাচ্চল্লিশ লিটার গুরি পানি আঢ্ত। 7যীশু সে চাগরুনোরে কলঅ, এ চাড়িগুনোত্ পানি ভোরেই দুয়ো। চাগরুনে সেক্কে চাড়িগুনোত্ পেলেং পেলেং গুরি পানি ভোরেই দিলাক্। 8সে পরেদি যীশু তারারে কলঅ, “এবেরা সিয়োত্তুন এক্কেনা তুলিনে মেলা গুরিয়্যে গিরোজ্সো ইধু নেযঅ।” চাগরুনে সিয়েনই গুরিলাক্।
9সেই আংগুর-রস, যিয়েন্ পানিত্তুন্ ওইয়্যে, হানা গিরোজ্সো সিয়েন হেই চেলঅ। মাত্তর্ সে রচ্সান্ কুত্তুন্ এলঅ সিয়েন্ তে কোই ন-পারিদো; মাত্তর্ যে চাগরুনে পানি তুল্ল্যন্ তারা হবর্ পেদাক্। সেনত্তে হানা গিরোজ্সো জামেবোরে ডাগিনে কলঅ, 10“পত্তমে বেক্কুনে গম্ আংগুর-রচ্ হেবাত্তে দুয়োন্। সে পরেদি যেক্কে মানুচ্চুনোর্ ঈল্ অয় সং হানা থুম্ অয় সেক্কে যে রচ্সান দুয়োন্ সিয়েন আগত্তুন্ এক্কেনা হাদে পান্জা। মাত্তর্ তুই গম্ আংগুর-রচ্ এজঅ সং রাগেয়োচ্।”
11যীশু গালীল রেজ্যর্ কান্না আদামত্ চিহ্নো ইজেবে এই পত্তম আমক্ অবার্ কামান্ গুরিনে নিজোর মহিমাগান্ ফগদাং গুরিলো। ইয়েন্দোই তা শিচ্চ্যগুনে তা উগুরে বিশ্বেজ্ গুরিলাক্।
12সে পরেদি যীশু, তার্ মা, তা ভেইয়ুনে আর তা শিচ্চ্যগুনে কফরনাহূম শঅরত্ গেলাক্, মাত্তর্ তারা ভালোক্ দিন সং সিধু ন-থেলাক্।
যিরূশালেমর্ উবোসনা-ঘরত্ প্রভু যীশু
13যিহূদীগুনোর্ উদ্ধোর-পরব সময় এলে পরেদি যীশু যিরূশালেমত্ গেলঅ। 14তে সিধু দেগিলো, মানুচ্চুনে উবোসনা-ঘরঅ ভিদিরে গোরু, ভেড়া আর কোদোর্ বেজদন্ আহ্ টেঙা বুদুলি দোন্দে মানুচ্চুনেয়ো বৈই আগন্। 15ইয়েনি দেগিনে তে দুড়িলোই এক্কান্ চাবুক্ বানেল, আর সিয়েন্দোই বেক্ গোরুগুনোরে, ভেড়াগুনোরে আর মানুচ্চুনোরেয়ো সিয়োত্তুন ধাবেই দিলো। টেঙা বুদুলি দোন্দে মানুচ্চুনোর্ টেঙা-পৌইজ্যেগুন্ ছিদি দিইনে তে তারার্ টেবিলানি উল্লেই দিলো।
16যিগুনে কোদোর্ বেজদন্ যীশু তারারে কলঅ, “এ জাগানত্তুন্ ইগুন বেক্কুন্ নেযগোই। মঅ বাব ঘরান্ বেবসা ঘর্ ন-বানেয়ো।” 17সেক্কে পবিত্র বোইবোত্ লেগা এ কধাগান্ তা শিচ্চ্যগুনোর্ ইদোত্ উদিলো:
তঅ ঘরানত্যে মর্ যে অমকদ কোচ্পানা,
সে কোচ্পানাগানই মঅ মনানরে জ্বালেই তুলিবো।
18সেক্কে যিহূদী নেতাগুনে যীশুরে পুযোর্ গুরিলাক্, “মাত্তর্ এ বেক্কানি গুরিবার্ অধিকারান্ যে তর্ ঘেচ্চেক্গুরি আঘে সিয়েনর্ প্রমাণ তুই কি আমারে দেগেই পারচ্?”
19জোবত্ যীশু তারারে কলঅ, “গোজেন ঘরান্ তুমি ভাঙি ফেলঅ, তিন দিনো ভিদিরে আরঅ মুই সিয়েন তুলিম্।”
20এ কধাগান্ শুনিনে যিহূদী নেতাগুনে তারে কলাক্, “এ উবোসনা-ঘরান্ বানাদে ছয়চল্লিশ বজর্ লাক্ক্যে, আর তুই কি তিন দিনো ভিদিরে ইয়েন তুলিবে?”
21মাত্তর্ যীশু গোজেন ঘর্ কধে নিজো কিয়্যেগান কধা কোইয়্যে। 22সেনত্তে যীশু মরণত্তুন্ জেদা ওই উদোনার্ পরেদি তা শিচ্চ্যগুনোর্ ইদোত্ উদিলো যে, তে সে কধাগান্ কোইয়্যে। সেক্কে শিচ্চ্যগুনে পবিত্র বোইবোর্ কধালোই আর যীশু যে কধানি কোইয়্যে সিয়েনি বিশ্বেজ্ গুরিলাক্।
23উদ্ধোর্-পরব সময় যীশু যিরূশালেমত্ থেইনে যেদক্কানি আমক্ অবার্ কাম্ গোজ্যে সিয়েনি দেগিনে ভালোক্ জনে তা উগুরে বিশ্বেজ্ গুরিলাক্। 24মাত্তর্ যীশু তারা ইধু নিজোরে ধরা ন-দিলো, কিয়া তে বেক্ মানুচ্চুনোরে হবর্ পেদঅ। 25মান্জ্য পৌইদ্যেনে কারঅ সাক্ষির দরকার্অ তার ন-এলঅ, কিয়া মান্জ্য মনত্ যিয়েনি আঘে সিয়েনি তার্ জানা এলঅ।
Đang chọn:
যোহন 2: CBT
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Copyright © 2021 Bangladesh Bible Society