Luk 13
13
1Gw’egômbe mèzoṉo aṉag’awèwo w’awulinyi Yesu g’ômwanja wa mongi Galile, nt’alatizi Pilatu alatize ntyiṉi yaô na y’intyagô saô ta. 2Awiṉizô waô ne Yesu inè: Aṉwè tanga nè, mongi Galile mèwoṉo w’avegag’aṽe vyagaṉô na mongi mori wi Galile waôdu konde w’ayeṉ’azingô mèmoṉo? 3Mi bulinya ṉwè inè, nyawè. Ndô j’aṉw’aṉige nkôndi, gambèṉè aṉwè du aṉwè be jilizyô mbela mô. 4Ge igôm̃i ny’aṉaga n’aṉag’eṉanay mè, w’avôsunyô ne nagô y’adô gô Silôe, ko yô jôṉa waô, aṉwè tanga nè, w’avegag’ôgara vyagaṉô n’aṉag’am̃ori waôdu wi dwaṉa gô Yerusalèm? 5Mi bulinya ṉwè inè, nyawè. Ndô j’aṉw’aṉige nkôndi, gambèṉè, aṉwè du aṉwè be jilizyô mbela mô.
6N’agôvi yè kè nkôgô yiṉo inè: Avegag’ôma n’erere zi figi bèṉô pa gô ntyagi yè y’igoli. N’aṽyeṉi yè mbutag’ilônda gô zô, ndô e pa dènga du. 7Vovo awulinyi yè ôvenjavenji wi ntyaga y’igoli inè: Vôna, impum̃a yiṉo irarô mi pilavila gw’erere ziṉo zi figi gô but’ilônda, ndô mi pa dènga du. Ṽega zô, ntiṉa nde yi diṽiṉa zô ntye? 8Awiṉizô yè n’ôvenjavenji wi ntyaga inè: Rera, rô tigare zô ômpum̃a wiṉo kè, kaô my’atumb’ibelika vingô gô zô, awele wulu gô zô. 9Vendetwa gô bôsô zi be jaṉ’ilônda; ndô ja zi pa jaṉ’ilônda, ko vanga w’abega zô.
10Aṉènjagi Yesu gô nagô mori yi soṉo, gô ntyugu yi soṉo. 11Na vôna, avegagi vovo ômwantô w’avegagi n’iṉiṉa nyi ndèliṉi igôm̃i ny’impum̃a n’impum̃’eṉanay: n’avegagi yè puraṉa pa mbè, e pa jolye nyonyuṉ’ôkuṽi wè. 12Gw’ayenyô yè ne Yesu, aweyi yè, awulinyè inè: Ômwantô, w’apurunyô avila gô ndèliṉi yo. 13N’aralyè yè ago mè. Na v’igamba ny’agwaṉa anyonyui gôre, azum̃iny’Anyambyè. 14Ndô aṽendi ôvangiṉi wi nagô yi soṉo, konde Yesu aying’ijinga siṉo gô ntyugu yi soṉo, awulinyi yè aṉaga inè: Are ntyugu ôrôṽa si re kwèkwè gôr’aṉaga gô janjô; sambô yôgôṉi gô jingô gw’intyugu mèsoṉo, ndô aranga gô ntyugu yi soṉo. 15Ndô Rerè awiṉizi yè inè, aṉwè imbyagwaṉa! ôm’edu gôre ṉwè, gô ntyugu yi soṉo, e pa puruṉe nyare yè ge buru yè avila gô nagô ya yô, age jonja yô aṉingô? 16N’ômwantô wiṉo, mbamba nyantô y’Abraam, apegaga diryô pa ne Satan igôm̃i ny’impum̃a n’impum̃’eṉanay yiṉo, e ze n’inyanga nyi puruṉô avila g’ôgôrô wiṉo gô ntyugu yi soṉo? 17Gw’agambagi yè agamba miṉo, ilôvalôvi yè yôdu y’ayeṉi ntyoṉi, ndô aṉaga w’ayeṉi mbya gw’isam̃u yôdu yi mamô y’alendyô yè.
18Vovo arô bulyi yè inè: Iṉongo ny’Anyambyè nyi r’egolaṉi g’ande, na mi be kolaṉa nyô n’ezom̃a nde? 19Nyi r’egolaṉi g’intyo nyi mutardi, ny’awongyô n’ôma awala nyô gô ntyagi yè; avôm̃i nyô, arw’erere, n’inyoṉi s’igôṉô s’aṽatam̃iṉi gw’ampari ma zô.
20N’arô bulyi yè inè: Mi be kolaṉ’iṉongo ny’Anyambyè n’ezom̃a nde? 21Nyi r’egolaṉi ga levèn y’awongyô n’ômwantô awela yô gw’itôndô irarô yi mpèmba gô pange mpèmba yôdu gô panda.
22Avyagaṉi Yesu gw’inkal’impôlô n’inyangô, nènjaga ni nkèndaga gô Yerusalèm.
23Awulinyô yè n’ôm̃ori inè: Rera, ar’awèwo dadyè wi sungiṉô? N’awiṉizi yè waô inè: 24Lembareṉi gô jingiṉa gw’iguge nya zwa. Konde, mi bulinya ṉwè inè, awenge wi be buta gô jingiṉa, ko w’ayolya. 25Gô be diwô ôṉivi wi nagô aṉongwi aṉunj’iguge, ko ṉwè pakilya gô kum̃aṉa gw’igala, alôk’iguge, awulya inè: Rera, rera, ṉunguṉa zwè iguge! gambèṉè e be fwiṉiza ṉwè inè: Mi pa mye nkôṽa y’apilô ṉwè. 26Vovo be pakilya ṉwè gô bulya inè: Azwè anyeṉagi ayongaga na wè, awè kè w’aṉènji gw’agali mazô. 27Ndô e be fwiṉiza inè: Mi bulinya ṉwè inè, mi pa mye nkôṽa y’apilô ṉwè; lubwaṉi avila gôre myè, aṉwèdu iyanjisi y’ibe. 28Vovo be dwaṉ’edingô ni nkègèrè y’anô, gô be jeṉa ṉwè Abraam, n’Izaak, ni Yakob, n’ivogisi yôdu, gw’iṉongo ny’Anyambyè ko ṉwèmè falô gw’igala. 29Wi be bya avila gô nkôṽa yi tongwa ni nkômbe, n’avila gô nkôṽa yi kènda na yô, n’avila gô Nor, n’avila gô Sud, alwaṉa baru gw’iṉongo ny’Anyambyè. 30Na vôna, aṉum̃uṉa wi be dônga, n’alônga wi be num̃uṉa.
31Gô ntyugu mèyoṉo aṽyeṉ’ifarisi sinyèwo gô bulinyè inè: Lubwa avila vèṉo, ko kèndaga, konde Erod e bela gô jôṉo. 32Awiṉizi yè waô inè: Gèndaṉi, ko bulinyaṉi evengambwa mèzoṉo inè: Vôna, mi tômb’aṉiṉ’ambe, aying’inkaṉi ṉèṉo wiṉo ni mèṉè, ni ntyugu yi ntyarô, gambèṉè my’amaza. 33Ndô my’are ko kombiz’ôgèndo wam̃ ṉèṉo wiṉo, ni mèṉè, ni mbaṉi, konde ôvogisi ajôṉô kaô gô Yerusalèm.
34Yerusalèm, Yerusalèm, awè yi jôṉ’ivogisi avunga waô adô w’arôm̃yô gôre wè, inyongo sinyenge s’aṽeli myè gô datiz’awaṉi wo, ga nte datiz’ôbôtônjogoṉi awaṉi wè gw’ampavi mè, ko ṉwè ayivira! 35Vônaṉi, nagô yaṉi yi be tigaṉa gôre ṉwè; ndô mi bulinya ṉwè inè: Aṉwè ze jeṉe myè nyèṉè, kaô gw’egômbe zi be bulya ṉwè inè: Ôzaviṉô gôre yè yi bya gw’ina nya Rerè!
Đang chọn:
Luk 13: MYE
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Published by the British and Foreign Bible Society in 1927.