मत्ती 14
14
बतिस्मो देण आळै यूहना गी मोत
(मरकुस 6:14-29; लूका 9:7-9)
1बिं टेम गलील देस गै राजा हेरोदेस यीसू गै बारै में सुण्यो तो आपगै सेवकां नै केयो। 2ओ बतिस्मो देण आळो यूहना है झिको मरेड़ा ऊं जीग्यो है। ईंखातर ऐ सक्तियां इमै काम करै झिकी ऊं चमत्कार करै है।
3ओ बो हेरोदि है झिकै यूहना नै सांकळा ऊं बांदगे जेळ में बंद करयो। ओ बण हेरोदियास गै केण ऊं करयो झिकी बिंगै भाई फिलिप्पुस गी घराळी ही। 4यूहना सदां ई हेरोदेस नै केवंतो कै हेरोदियास सागै ब्या करणो नेम विधान गै खिलाफ है। 5ईंखातर हेरोदेस बिनै मारणो चावै हो पण लोगां ऊं डरतो हो क्यूंकै लोग यूहना नै परमेसर गी बात बताण आळो मानता।
6जद हेरोदेस गो जन्म दिन आयो तो हेरोदियास गी बेटी, हेरोदेस अर बिंगै रिस्तेदारां नै नाच'गे राजी कर दिया हा। 7ईं पर बण सोगन खा'गे बचन दियो कै झिको कीं तूं मांगैगी मैं तनै देऊंगा। 8जद बण आपगी मां गै केणै पर आ'गे केयो, मनै थाळी में यूहना गो सिर चईयै। 9राजा भोत दुखी होयो। पण आपगै रिस्तेदारां गै सामै खाएड़ी सोगन नै पूरी करण खातर हुकम दे दियो। 10बण जेळ में यूहना गो सिर बाडण खातर आदमी भेज दिया। 11अर सिर बाडगे थाळी में लेगे आया अर बिं छोरी नै दे दियो। अर बा आपगी मां कनै लेगी। 12जद यूहना नै मानण आळा लोग आया अर बिंगै सरीर नै माटी देगे आ बात आ'गे यीसू नै बताई।
पांच हजार जणा नै रोटी जिमाणी
(मरकुस 6:30-44; लूका 9:10-17; यूहना 6:1-14)
13जद यीसू आ बात सुणी तो एकलो किस्ती पर चडगे ऐकांत जिग्यां में उड़ग्यो। जद भीड़ नै ठा लागग्यो तो बे लोग पगां ई बिंगै लारै चाल पड़या। 14जद यीसू उतर गे किनारै पर आयो तो लोगां गी भीड़ देखी। बिनै बां पर दया आयी। जद बण बांगै माऊं बीमार लोगां नै ठीक करया। 15जद आथण हो'ग्यो तो बिंगै चेला केयो, “आ सुनसाण जिग्यां है। आं लोगां नै जाण दैयो। मोड़ो भोत हो'ग्यो। जा'गे आपगै खाण पीण गो बंदोवस्त करसी।” 16पण यीसू बानै केयो, “आनै जाण गी लोड़ कोनी। थे ई आनै खाण नै दे दैयो।” 17बां केयो, “म्हारै कनै तो पांच रोटी अर दो ई मछली है।” 18यीसू बानै केयो, “बानै मेरै कनै ल्यायो।” 19फेर बण लोगां नै घास पर बेठण खातर केयो। फेर बण रोटी अर मछली लेगे सुरग कानी देख्यो अर परमेसर गो धन्यवाद करयो अर रोटियां गा टुकड़ा तोड़गे आपगै चेला नै दिया अर बे आ'गै बांटता रेया। 20सारा पेट भरगे रोटी खाई। बाकी बचेड़ा टुकड़ां गी बारा टोकरी भरली। 21बठै लुगाईयां अर टाबरां नै छोड़गे बठै सारा पांच हजार आदमी हा।
यीसू गो पाणी पर चालणो
(मरकुस 6:45-52; लूका 6:15-21)
22इंगै बाद यीसू आपगै चेला नै किस्ती पर चढाया अर लोगां नै विदा करण ऊं पेलां ई गलील झील गै परली पार जाण खातर केयो। 23भीड़ नै विदा कर'गे बो एकलो प्हाड़ पर पराथना करण उड़ग्यो। आथण तांई बठै एकलो ई हो। 24जद तांई किस्ती बोळी दूर उड़गी अर लहरा ऊं डगमगावैई। क्यूंकै हवा सामली ही। 25दिन उगग्ण आळो हो, यीसू पाणी पर चालगे बांगै सामै आयो। 26बिंगै चेला बिनै पाणी पर चालता देख्यो अर डरग्या। तो बे आपसरी में केण लागग्या ओ तो कोई भूत है। बे डरगे रोळो मचाण लागग्या। 27यीसू बानै केयो, डरो ना। हिम्मत राखो, ओ मैं ई हूं। 28जद पतरस केयो, “प्रभु जे तूं है तो मनै बी पाणी पर चालगे तेरै कनै आण खातर के।” 29तो यीसू केयो, “आ'ज्या।” जद बो किस्ती पर उतरगे बिंगै कानी चाल पड़यो। 30जद बण जोर गी हवा देखी तो डर ग्यो। अर बो डूबण लागग्यो जद रोळो मचायो कै प्रभु मनै संभाळ। 31यीसू दबादब बिंगो हात पकड़ लियो अर केयो, “हे कमजोर बिस्वासी, तूं मन में बेम क्यामी करयो?” 32बे किस्ती पर चडग्या अर हवा रुकगी। 33झिका लोग किस्ती पर बेठया बां सारा यीसू नै झुकगे निवण कर'गे केयो कै थे साची परमेसर गा बेटा हो।
गनेसरत में रोगियां नै ठीक करणा
(मरकुस 6:53-56)
34झील पार कर'गे बे गनेसरत गै किनारै उतरया। 35जद बठै गा लोगां बिनै पिछाण लियो, बां बिंगै आण गो समाचार सारी जिग्यां भेज दियो कै झिका लोग रोगी है बे सारा बठै आ'ज्यै। 36अर बे बिंऊं बिनती करण लागग्या कै बो बानै आपगै पलै गै हात लगा लेण दैय जद झिका हात लगावा बे सारा ठीक हो'ग्या।
Đang chọn:
मत्ती 14: BGQ
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2023 (Active), Wycliffe Bible Translators, Inc. All rights reserved. © WIn Publishing Trust