मत्ती 17
17
यीसू गो रूप बदळणो
(मरकुस 9:2-13; लूका 9:28-36)
1छ दिनां गै बाद यीसू पतरस, याकूब अर यूहना नै लेगे प्हाड़ पर गेयो। 2बठै बांगै सामै यीसू गो रूप बदळ ग्यो। अर बिंगो मूं सूरज गी तरियां चमकण लागग्यो अर बिंगा गाबा जोती गै समान धोळा हो'ग्या। 3फेर एकदम मूसा अर एलियाह बठै परगट होया अर यीसू ऊं बातां करण लागग्या। 4ओ देखगे पतरस यीसू नै बोल्यो, “प्रभु आच्छी बात है कै आपां अठै हां। जे थे चावो तो म्हे अठै तीन तंबु बणा दैयां, थारै तीनां खातर।” 5पतरस जद ऐ बातां बोलण लागरयो, एक चमकतो बादळ आ'गे बानै घेर लियो अर बादळ मू आकासबाणी होयी कै ओ मेरो लाडलो बेटो है। मैं इंऊं भोत खुस हूं अर थे इंगी सुणो। 6जद चेला ओ सुण्यो तो भोत डरग्या अर धरती पर मूंदा पड़ग्या। 7जद यीसू बानै हात लगागे केयो, “डरो ना, खड़या होज्यो।” 8जद बां उठगे देख्यो तो बठै कोई कोनी एकलो यीसू दिख्यो। 9जद बे प्हाड़ ऊं उतरया तो बण बानै केयो कै झिको कीं थे देख्यो किनैई बताईयो ना। जद तांई मिनख गो बेटो मरगे पाछो जींवंतो ना होज्यै। 10जद चेला पूछयो, “फेर यहुदी नेम सिखाण आळा क्यामी केवै कै एलियाह सारा ऊं पेली आसी।” 11बण उतर दियो कै, “एलियाह आण लागरयो है। बो रा नै सई तरियां तैयार करैगो। 12पण मैं थानै केऊं एलियाह तो अब तांई आ'ग्यो। पण लोगां बिनै पिछाण्यो कोनी। बिंगै सागै जिंया बां चायो बिंयाई करयो। बिंयाई मिनख गै बेटै नै बी सतावैगा।” 13जद चेला समझ गया कै बो बतिस्मो देण आळै यूहना गै बारै में केवै।
ओपरी बडे़ड़ै छोरै नै ठीक करणो
14जद यीसू भीड़ में पाछो आयो तो एक आदमी बिं कनै आयो बण बिनै निमस्कार कर'गे केयो, 15“हे प्रभु मेरै बेटै पर दया कर। बिनै मिरगी आवै। बो भोती ओखो होवै, बो कदी तो पाणी अर कदी आग में पड़ज्यै। 16मैं बिनै तेरै चेला कनै ल्यायो पण बे बिनै ठीक कोनी कर सक्या।” 17यीसू बानै उतर दियो, “जिदी अर कमजोर बिस्वास गा लोगों, मैं थारै सागै किता दिन रेऊंगा अर मैं किता दिन थानै सेण करतो रेवूंगा। बिनै मेरै कनै ल्यावो।” 18फेर यीसू बिं ओपरी नै बारै निकळण गो हुक्म दियो अर बा बारै निकळगी। बो छोरो हातो हात ई ठीक हो'ग्यो। 19फेर बिंगै चेला बिनै एकलै नै पूछयो, “म्हे ईं ओपरी नै क्यूं बारै कोनी काड़ सक्या?” 20यीसू बोल्यो, “थारो बिस्वास कमजोर है। मैं थानै साची केऊं, जे थारै में राई गै दाणै जितो बिस्वास होवै तो थे ईं प्हाड़ नै चालगे बठै जाण गो केदैयो। बो थारो केणो मानल्यैगो। थारै खातर कोई बी काम ओखो कोनी हो'सी।” 21जद यीसू गा चेला बिनै गलील में आ'गे मिल्या तो बण बानै केयो, “मिनख गो बेटो मिनखां गै हात में पकडि़जण आळो है।”
आपगी मोत गै बारै में यीसू गी दुसरी बात
(मरकुस 9:14-29; लूका 9:37-43)
22बे बिनै मार देवैगा अर बो तीसरै दिन पाछो जींवंतो होज्यैगो। 23ओ सुणगे चेला भोत दुखी होया।
24जद यीसू अर बिंगा चेला कफरनहूम में आया तो मिन्दर गो कर लेण आळो पतरस कनै आयो अर बोल्यो, “तेरो गुरू मिन्दर गो कर कोनी दैय के?” 25बो बोल्यो, “हां देवै। इतो केगे घर में आ'ग्यो।” बिंगै बोलण ऊं पेलां यीसू बोल्यो, “पतरस, तेरो के केणो है। धरती गो राजा किऊं कर लेवै? आपगै लोगां ऊं या दूसरां लोगां ऊं।” 26पतरस उतर दियो, “दूसरै लोगां ऊं,” जद यीसू केयो, “आपगै लोगां नै छूट होवै। 27पण आपां बां लोगां नै नाराज कोनी करां। ईंखातर झील पर जा अर कुंडी पाणी में फेंक अर झिकी पेली मछली पकड़िजै, बिंगै मूं में एक रिपियो मिलैगो, बो बानै ल्यागे मेरै अर थारै कर खातर दे दैयो।”
Đang chọn:
मत्ती 17: BGQ
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2023 (Active), Wycliffe Bible Translators, Inc. All rights reserved. © WIn Publishing Trust