लुका 14
14
सब्बातोन दाहळे वारू करनो
1ओवतेन येसु शब्बाथोन दाहळे फरुशीन सरदार मायलु काहनास एकान घोर रूट खाणे गोयू; एने चे तीना पोर डाव धोर रोया होता. 2चा एक माणूस तेरे सामने होतु, जीनाक पानझेलान बिमारी होती. 3इनापोरसी येसु शास्त्रध्यापक एने फरुशी काजे कोयू, “काय शब्बाथोन दाहळे वारू कोरणे वारू छे कि नि होय?” 4बाकीन चे हुगात रोया तेत्यार चू तीनाक छिमीन वारू कोऱ्यु एने जाने देदू, 5एने तीनु काजे कोयू, “तुमरेमा ओसू कुन छे, जेरो गोदळो नीती बुल कुवामा पोळ जाय एने चु शब्बाथोन दाहळे तीनाक तेत्यारुत बारथे नी नीकावे?” 6चे इनी वातोन काहीन जोवाब नी आप सोक्या नंम्रता एने पाहांतऱ्यान सन्मान.
पाहांतऱ्यान स्वागत
7जेतार चू देख्यू कि नेवतामा आवला माणसे कोसा मोटा-मोटा जागा नेवाळ लेतला ती एक दाखलु आपीन तीनु काजे कोयू, 8“जेतार कुदू तुसेक वीयावमा बुलावे, ती मोटली जागा पोर झुन बोसतू, कोबी ओसो नी होये कि चू तार गोथा बी मोटला काजे नेवतो आप रोयू होसे, 9एने चू तुसेक एने तीनाक दुयो काजे बी नेवतो आपलु छे, आवीन तुसेक कोयसे, ‘इना काजे जागू आप,’ एने तेत्यार तुसेक लाजवायीन आखान नेचला जागामा बोसणो पोळती. 10बाकीन जेतार तुसेक बुलावे ती आखान नेचला जागामा जायीन बोस कि जेतार चू, जु तुसेक नेवतो आपलु छे आवे, एने तुसेक कोये, ‘हे दुस्ता, ओगोव जायीन बोस,’ तेत्यार तारे साते बोसने वावान सामने तारी महिमा होयसे. 11काहाकि जू कुदू खुदो काजे मोटू बोनावसे, चु नाणू कोराय जासे; एने जु कुदू खुदो काजे नाणू बोनावसे, चु मोटू कोराय जासे.”
वारला कामोन फोव
12तेत्यार येसु आपनुक नेवतो आपनेवावा काजे बी कोयू, “जेतार तू दिसून नि ती रातीन खाणो आपीस, ती आपना दुस्तीदार नीती भाशोन परिवार काजे नीती मालदार साते वावा काजे झुन बुलावे, कोबी ओसो नि होये कि चे बी तुसेक नेवतो आपे, एने तारू बोदलु होय जाय. 13बाकीन जेतार तू खाणो आपीस ती गोरीब, डुंडा, लेंगळा एने आंदवा काजे बुलाव. 14तेत्यार तू सोयावा होयीस, काहाकि तिंदरे जुव तुसेक बोदलु आपनेन कोरता काहीन नि होय, बाकीन तुसेक धोरमीन जीव उठने पोर एरू प्रतीफोव जोळसे.”
मोटाला खाणान दाखलू
(मत्ती 22:1-10)
15तेरे साते खाणो खाणे वावा मायलु एक जोनू ये वाते कोयीन सोमवीन येसु काजे कोयू, “सोयावा छे चे जे परमेश्वरोन राजोन रूट खासे.” 16येसु तीना जवाब आप्यू, “काहनुस एक माणूस एक पाहांतऱ्यान नेवतो आप्यू एने घोना सोवटाक बुलाव्यू.” 17जेतार खाणो तीयार होय गोयो ती चू आपना पावोरोन हाते नेवतो आपला माणसो काजे बुलावने मूकल्यु, “आवू, हीमी खाणो तीयार छे.” 18बाकीन चे आखान आखा माफी मांगणे बाज गोया पेहेलू तीनाक कोयू, “मे खेत मुले लेदलु छे, एने जोरुरी छे कि तीनाक देखो; मे तुसेक विनता कोरो कि, मेसेक माफ कोर दे.” 19दिसरू कोयू, “मे पाच जुळी बुले मुले लेदलु छे, एने तीनु काजे पारखने जाने बाज रोयू; मे तुसे काजे विनता कोरो, मेसेक माफ कोर.” 20एक ओवी दिसरू कोयू, “मे वीयाव कोरलु छे, इनान कोरता मी नि आव सोकतू.” 21चू पावोर आवीन आपना मालिक काजे कोयीन सोमवाळ्यु तेत्यार घोरोन मालिक रीसवायीन आपना पावोर काजे कोयू, “सोहोरोन हाटोमा एने गोव्यामा मामार जायीन गोरीब, डुंडा, लेंगळा एने आंदवा काजे न्या लीयाव.” 22पावोर ओवी कोयू, “मालिक, जोसू तू कोयलु होतु, तोसोत कोरायलो छे; एने ओवी जागा छे.” 23मालिक पावोर काजे कोयू, “सोयळोक पोर एने वाळाभूनी जा एने माणसो काजे इशारू कोरीन लीयाव काहाकि मारो घोर भोराय जाय.” 24काहाकि मे तुमु काजे कोयो कि तीनु नेवतो आपायला माणसो मायला काहना मारा खाणा काजे नि चाखे.
येसुन चेला बोननो
(मत्ती 10:37-38)
25जेतार मोटीत गोरदी तेरे साते जाती होती, ती चू पोछु फिरीन तीनु काजे कोयू, 26“अगर कुदू मारेंचा आवे, एने आपनु बास एने आश एने लाडी एने पुऱ्या एने भाश ने बहोनिश एने आपना जीव काजे मोंगावू नि जाणे, ती चू मारू चेलू नी बोन सोके;. 27एने जु कुदू आपनु ख्रुस नि हाकले, एने मार पोछोव नि आवे, चू बी मारू चेलू नि बोन सोके.”
28तुमरेमा कुन छे जू गोढ बांदनेन कोरे, एने पेहेले बोसीन खोरचू नी जुळे कि पुरो कोरनेन ताकत मारे पास होय कि नि होय? 29कोदि ओसो नि होये कि जेतार चू पायु घाल लेये बाकीन तीयार नि कोर सोके, ती आखा देखने वावा यो कोयीन तेरी मोजाक उळावणे बाज जाय, 30“यु माणूस बांदने ते बाज रोयू बाकीन तीयार नी कोर सोक्यू?” 31एने कुन ओसू राजा छे जु दिसरा राजा पुठी लोळाय कोरणे जातलु, एने पेहेले बोसीन विचार नि कोरे कि जे वीस होजार लीन मार पोर चोळीन आवतेलु काय मे दोस होजार लीन तेरु सामनु कोर सोकतलु, कि नी? 32नीती तेरेसी नांबे रोयतेत चु दुतो काजे मुकलीन मेवायने कोरणे देखसे. 33इना रितीसी तुमरे मायलु जू कुदू आपनो आखो काहीन छुळ नी, चू मारू चेलु नि होय सोकतलु.
बिना सोवादोन मीठ
(मत्ती 5:13; मरकुस 9:50)
34“मीठो ते वारलो छे, बाकीन अगर मीठान सोवाद बीगळी जाय ती चो काहना चीजोसी खोरलो कोरायसे. 35चो नि ते धोरतीन एने नी खाणेन काममा आवतेलो तीनाक ते माणसे बारथे नाख देतला जिंदरा सोमोवणेन कानटा छे चे सोमवी लेये.”
Đang chọn:
लुका 14: BFBNT
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.
