यूहन्ना 13
13
परबु भोज
1फसह चो परब ले पयले, जिदलदाय ईशु जानलो कि मोचो हुन घड़ी ऐऊन अमरली से कि जगत छांडुन भाती बुआ चो लगे जायें दें, तेबे आपलो लोगमन ले जोन जगत ने रवत जसन मया हुन संगाते रये, आखरी ले असने ची मया संगाते रलो। 2जिदलदाय शयतान शिमोन चो बेटा यहूदा इस्करियोती चो मन ने ऐ डालुन चुकुन रये कि हुनके धराओ, तेबे भोजन चो समया 3ईशु, ऐ जानुन भाती कि बुआ सपाय काई मोचो हाथ ने करून दिलो से आउर मय माहापुरू चो लगे ले ईले से आउर माहापुरू चो लगे जायें दें, 4भोज थानले उठून भाती आपलो उपर चो फटीई हिटाऊन दिलो, आउर ओंगची धरून भाती आपलो करांड बान्दलो।
ईशु चेलामन चो पाँय धोहतोर
5तेबे बरतन ने पानी भरून भाती चेलामन चो पाँय धोहतोर आउर जोन ओंगची ले हुनचो करांड बान्दलोर रली हुनी थाने फुछुक मुरयालो। 6जिदलदाय हुन शिमोन पतरस चो लगे ईलो, तेबे पतरस हुनचो ले बल्लो, “हे परबु, काय तुय मोचो पाँय धोये सीस?” 7ईशु हुनमन के जबाप दिलो, “जोन मय करें से, तुय हुनके ऐबे नी जानीस, मान्तर ऐचो पाचे समज से।” 8पतरस हुनचो ले बल्लो, “तुय मोचो पाँय केबीई नी धोऊक सकसे!” ऐ सुनुन भाती ईशु हुनचो ले बल्लो, “अगर मय तुके नी धोयें दें, तो मोचो संगे तुचो काई बले मेल निआय।” 9शिमोन पतरस हुनचो ले बल्लो, “हे परबु, तो मोचो पाँय ची नाई, मान्तर हाथ आउर मुण्ड बले धोऊन देस।” 10ईशु हुनचो ले बल्लो, “जोन नहाऊन चुकलो से हुनचो पाँय के छांडुन आउर काई धोहतोर जरूरत निआय, मान्तर हुन बिलकुल शुद्ध आसे; आउर तुमी शुद्ध आसास, मान्तर सपाय चो सपाय नाई।” 11हुन तो आपलो धरातो बिता के जानते रलो ऐईकाजे हुन बल्लो, “तुमी सपाय चो सपाय शुद्ध निआस।”
पाँय धोहतोर अरत
12जिदलदाय हुन हुनमन चो पाँय धोऊन चुकलो, आउर आपलो फटीई पिन्दुन भाती फेर बसलो, तेबे हुन बोलुक मुरयालो, “काय तुमी समजलास कि मय तुमचो संगे काय करले? 13तुमी मोके गुरू आउर परबु बोलु आस, आउर ठीक ची बोलु आस, कसनबल्लोने मय हुनी आंय। 14अगर मय परबु आउर गुरू होऊन भाती तुमचो पाँय धोहले, तो तुमके बले गोटक दुसर चो पाँय धोहतोर जरूरी आय। 15कसनबल्लोने मय तुमके नमूना दकाऊन दिले से कि जसन मय तुमचो संगे करले से, तुमी बले असने ची करते राआ। 16मय तुमके सत-सत बलें सें, दास आपलो मालिक ले बड़े नुआय, आउर ना पठालोबिता आपलो पठालोबिता ले। 17तुमी ऐ गोठमन जानेसास, आउर अगर हुन थाने चला से तो धन्य आस।
18“मय तुमी सपाय चो बारे ने नी बोलें; जोन के मय चुनले से, हुनमन के मय जाने; मान्तर ऐ ऐईकाजे आय कि पवितर शास्त्र चो बचन पुरा होओ, ‘जोन मोचो रोटी खाऊ आय, हुन मोचो थाने लात उठालो।’ 19अदायं मय हुनचो होतोर ले पयले तुमके जनाऊन देंयें से कि जिदलदाय ऐ होऊन जाये दे तेबे तुमी बिश्वास करा कि मय हुनी आंय। 20मय तुमके सत-सत बलें सें कि जोन मोचो पठालोबिता के गरहन करू आय, हुन मोके गरहन करू आय; आउर जोन मोके गरहन करू आय हुन मोचो पठालोबिता के गरहन करू आय।”
बिश्वासघात चो बाटे ईसारा
21ऐ गोठमन बोलुन भाती ईशु आत्मा ने बाय-बिकाल होलो आउर ऐ गोहई दिलो, “मय तुमके सत-सत बलें सें कि तुमनमन ले गोटक मोके धराये दे।” 22चेलामन संका ले, कि हुन कोचो बारे ने बलें सें, गोटक दुसर चो बाटे दकुक मुरयाला। 23हुनचो चेलामन थानले गोटक जेके ईशु मया संगाते रलो, ईशु चो छाती बाटे लोऊन भाती बसुन रये। 24शिमोन पतरस हुनचो बाटे ईसारा करून हुनके पचारलो, “सांगतो, हुन काचो बारे ने बले से?” 25तेबे हुन-हुनचेई असन ईशु चो छाती बाटे लोऊन भाती हुनके पचारलो, “हे परबु, हुन कोन आय?” 26ईशु जबाप दिलो, “जेके मय ऐ रोटी चो गोंदा बुड़ाऊन भाती देयें दें हुनी आय।” आउर हुन गोंदा बुड़ाऊन भाती शिमोन इस्करियोती चो बेटा यहूदा के दिलो। 27गोंदा धरते ची खन शयतान हुनचो थाने समाऊन गेलो। तेबे ईशु हुनचो ले बल्लो, “जोन तुय करे सीस, तुरते कर।” 28मान्तर बसलो बितामन थानले कोनी नी जानला कि हुन ऐ गोठ हुनचो ले काय काजे बल्लो। 29यहूदा चो लगे थयली रते रली, ऐईकाजे कोनी-कोनी समजला कि ईशु हुनचो ले बलें सें कि जोन काई आमके परब काजे जरूरत आसे हुन घेनुन धरो, नाहले ऐ कि कंगालमन के काई देओ। 30आउर हुन गोंदा धरून भाती तुरते बाहरे जाते गेलो; आउर ऐ राती चो समया रये।
गोटक नवा हुकुम
31जिदलदाय हुन बाहरे जाते गेलो तेबे ईशु बल्लो, “अदायं माने चो बेटा चो महिमा होली से, आउर माहापुरू चो महिमा हुनचो थाने होली से; 32अगर हुनचो थाने माहापुरू चो महिमा होली से, तेबे माहापुरू बले आपलो थाने हुनचो महिमा करे दे आउर तुरते करें दें। 33ऐ पिलामन, मय आउर थोड़े समया तुमचो लगे आंसे: फेर तुमी मोके डगराहा से, आउर जसन मय यहूदीमन ले बल्ले, ‘जोन थाने मय जाऊँ आंय, हुता तुमी नी ऐऊक सकास,’ असने ची मय अदायं तुमचो ले बले बलें सें। 34मय तुमके गोटक नवा हुकुम देंयें से कि गोटक दुसर ले मया संगाहा; जसन मय तुमचो ले मया संगाले से, असने ची तुमी बले गोटक दुसर ले मया संगाहा। 35अगर आपस ने मया संगाहा से, तेबे ऐचीई ले सपाय जान दे कि तुमी मोचो चेलामन आस।”
ईशु बाटले पतरस चो इन्कार चो अगम गोठ
36शिमोन पतरस हुनचो ले बल्लो, “हे परबु, तुय काहां जाय सीस?” ईशु जबाप दिलो, “जोन थाने मय जायें से हुता तुय ऐबे मचो पाटे ऐऊक नी सकीस; मान्तर ऐचो पाचे मोचो पाटे ऐ से।” 37पतरस हुनचो ले बल्लो, “हे परबु, ऐबे मय तुचो पाट-पाट केंव ऐऊक नी सकें? मय तो तुचो काजे आपलो जीव के बले देयें दें।” 38ईशु जबाप दिलो, “काय तुय मोचो काजे आपलो जीव के दे से? मय तुचो ले सत-सत बलें सें कि कुकड़ा बासुन नी रये दे जिदलदाय ले तुय तीन हार मोचो इन्कार नी कर से।”
Đang chọn:
यूहन्ना 13: HLBNT
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Halbi Bible by The Love Fellowship is licensed under Creative Commons Attribution-ShareAlike 4.0 License.