लूका 21
21
कंगाल रान्डी चो सत दान
1फेर हुन आँईक उठाऊन भाती सवकारमन के आपलो-आपलो दान भण्डार ने डालतोर दकलो। 2हुन गोटक कंगाल रान्डी के बले हुन थाने दुय दामड़ीमन डालतोर दकलो। 3तेबे हुन बल्लो, “मय तुमचो ले सते बलें सें कि ऐ कंगाल रान्डी सपाय ले बडुन भाती डालली से। 4कसनबल्लोने हुन सपाय झान आपलो-आपलो बाड़ती थाने ले दान ने खिन्डिक डालला से, मान्तर ऐ तो आपलो घटती ले आपलो सपाय जीवना डालली से।”
जुग चो आखरी चो चिना
5जिदलदाय कितलो लोग मंदिर चो बारे ने बलते रवत कि हुन कितलो सुन्दर पकनामन आउर भेट चो तीजमन ले सजाया गेली से, तेबे हुन बल्लो, 6“हुन दिन ऐये दे, जोन थाने ऐ सपाय जोन तुमी दकसास, हुनमन थानले ऐथा कोनी पकना उपरे पकना बले नी बाचे जोन घसराया नी जाये।”
7हुनमन हुनचो ले पचारला, “हे गुरू, ऐ सपाय केबे होये दे? आउर ऐ गोठमन जिदलदाय पुरा होतो ने होये दे, तेबे हुन समया चो काय चिना होये दे?” 8हुन बल्लो, “तिआर राहा कि भरमाया नी जाआ, कसनबल्लोने खुबे असन मोचो नाव ले ऐऊन भाती बोल दे, ‘मय हुनी आंय,’ आउर ऐ बले कि, ‘समया लगे अमरली से।’ तुमी हुनमन चो पाट-पाट नी जाआ। 9जिदलदाय तुमी लड़ीईमन आउर बदलतोर गोठमन सुना तेबे नी घबराहा, कसनबल्लोने ऐ मन चो पयले होतोर जरूरी आय; मान्तर हुन समया तुरते आखरी नी होये।”
10तेबे हुन हुनमन ले बल्लो, “जाति उपरे जाति आउर राज उपरे राज चड़ाई करे दे, 11आउर बड़े-बड़े भुईं डोल होये दे, आउर जगा-जगा अकाल आउर माहामारीमन पड़े दे, आउर बादरी ले भयंकर गोठमन आउर बड़े-बड़े चिना उजागर होये दे। 12मान्तर ऐ सपाय गोठमन ले पयले हुनमन मोचो नाव चो लागुन तुमके धर दे, आउर कन्दरा दे, आउर आराधना घरमन ने सोप दे, आउर जयलघर ने ढ़पादे, आउर राजामन आउर राजपालमन चो पुरे नेदे। 13मान्तर ऐ तुमचो काजे गोहई देतोर मवका होये दे। 14ऐईकाजे आपलो-आपलो मन ने बिचारून संगाहा कि आमी पयले ले जबाप देतोर चिन्ता नी करूं दे। 15कसनबल्लोने मय तुमके असन गोठ आउर अकल देयें दें कि तुमचो सपाय बिरूदी सामना नाहले खंडन नी करूक सक दे। 16तुमचो आया-बुआ, आउर भाई, आउर कुटुम, आउर मीत बले तुमके धराऊन देदे, ऐथा ले कि तुमचो थानले कितलो के मरा दे। 17मोचो नाव चो लागुन सपाय लोग तुमचो ले बईर कर दे। 18मान्तर तुमचो मुण्ड चो गोटक केश बले बाका नी होये दे। 19आपलो धीरज ले तुमी आपलो जीवमन के बचाऊन संगाआ से।
यरूशलेम चो नाश
20“जिदलदाय तुमी यरूशलेम के पलटनमन ले घिरलोर दका, तेबे जाना कि हुनचो उजरुन जातोर लगे आसे। 21तेबे जोन यहूदिया ने रदे हुनमन डोंगरीमन ने परा ओत; आउर जोन यरूशलेम चो भीतरे रदे हुनमन बाहरे निकरोत; आउर जोन गाँवमन ने रदे हुनमन हुन थाने नी जाओत। 22कसनबल्लोने ऐ पलटा धरतोर असन दिन होये दे, जोन थाने लिकलोर सपाय गोठमन पुरा होऊन जाये दे। 23हुन दिनमन ने जोन देंहबारी आउर गोरस खुआते रदे, हुनमन चो काजे हाय, हाय! कसनबल्लोने देश ने बड़े कलेश आउर ऐ लोगमन उपरे बड़े परकोप होये दे। 24हुनमन खंडा ले मर दे, आउर सपाय देशमन चो लोगमन ने बन्दी होऊन भाती अमराया जादे; आउर जिदलदाय ले दुसर जातिमन चो समय पुरा नी होये, हुदलदाय ले यरूशलेम दुसर जातिमन ले रोमदा जाये दे।
ईशु चो आपस ऐतोर सोयका
25“बेर, आउर जोन, आउर तारामन ने चिना दका देये दे; आउर धरतनी थाने राज-राज चो लोगमन के तकलीस होये दे, कसनबल्लोने हुनमन समुन्द चो गरजन आउर हरला चो कोलार ले घबरादे। 26डर चो कारन आउर संवसार ने ऐतो बिती घटनामन चो बाट दकते-दकते लोगमन चो जीव ने जीव नी रये, कसनबल्लोने बादरी चो शक्तिमन हलाया जाये दे। 27तेबे हुनमन माने चो बेटा के सामरत आउर बड़े महिमा चो संगे बादरी उपरे ऐतोर दक दे। 28जिदलदाय ऐ गोठमन होऊक मुरयाली, तेबे सीदा होऊन भाती आपलो मुण्ड उपरे उठाहा; कसनबल्लोने तुमचो छुटकारा लगे होये दे।”
माहापुरू चो राज लगे आसे
29हुन हुनमन ले गोटक कहनी बले बल्लो; “अंजीर चो रूक आउर सपाय रूकमन के दका। 30जसने ची हुनमन थाने पिलकानी पान निकरू आय, तेबे तुमी दकुन भाती खुद ची जानु आस कि जेठ लगे आसे। 31ऐई रीति ले जिदलदाय तुमी ऐ गोठमन होतोर दका, तेबे जाना कि माहापुरू चो राज लगे आसे। 32मय तुमचो ले सते बलें सें कि जिदलदाय ले ऐ सपाय गोठमन नी होओ, तेबे तक ऐ पीढ़ी चो केबीई आखरी नी होये। 33बादरी आउर धरतनी टलुन जादे, मान्तर मोचो गोठमन केबीई नी टले।
हरमेशा तिआर राहा
34“ऐईकाजे खबड़दार राआ, असन नी होओ कि तुमचो मन खुमार, आउर मतवारपन, आउर ऐ जीव चो चिन्तामन ले सुस्त होऊन जाओ, आउर हुन दिने तुमचो उपरे फान्दा चो असन उधापड़े ऐऊन पड़ो। 35कसनबल्लोने हुन सपाय धरतनी चो सपाय रऊ बितामन उपरे असने परकार ऐऊन पड़े दे। 36ऐईकाजे चेत ने राहा आउर हर समया पारथना करते राआ कि तुमी ऐ सपाय ऐतो बिती घटनामन ले बाचतोर आउर माने चो बेटा चो पुरे उबा होतोर लायक बना।”
37हुन दिन दाय मंदिर ने उपदेश करते रये, आउर राती दाय बाहरे जाऊन भाती जैतून नाव चो डोंगरी उपरे रते रये; 38आउर बड़े बिहाने झटके सपाय लोग हुनचो सुनतो काजे मंदिर ने हुनचो लगे ऐते रवत।
Đang chọn:
लूका 21: HLBNT
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Halbi Bible by The Love Fellowship is licensed under Creative Commons Attribution-ShareAlike 4.0 License.