MATIEE 'BƆGƲ 25
25
Zezwi yɛ ngwlɩgbɔtɩ kugbïaa 'nine 'pa
1-Lagɔɔ nyininyinipɩ 'wʋɔ wɛlɩ-ɛ, sa ngwlɩgbɔtɩ kugbïa 'nɩ-ɛ la'a wa 'napö -su wa 'yɛ nglʋkwanyɔ 'yuo mö, -sɩbha ɩ -wʋ -bha. 2-Ma wa gla'a, -ngbï 'nɩ la 'nagö -ka, -ngbï-ï ka la-a 'nagö. 3-Wa 'nɩ-a 'nagö -ka 'libhï-a wa 'napö 'wʋ, wa'a ɩ 'möö 'nyu -su. 4-Wa ka-a 'nagö 'libhï-a -nɩ wa 'napö 'wʋ, wa -su -ma 'kplabhï 'mö ɩ 'nyu. 5Nglʋkwanyɔɔ jijibɩ -wʋ-a 'mö gwlɛ 'lee yɛ, wa -kʋnʋɔ-a -daan, 'jɩla-a bhlinʋa-a -ji, 'n wa ji-a ngɔmö. 6Dʋdʋnyɩdɩ, 'n nɩkpɛ -bhlʋ ji-a 'mö 'kpö, ɔ nɛ: Nglʋkwanyɔ-ɔ ji 'le, a -sɔ 'wʋ a 'kɔ 'yuo mö. 7Ngwlɩgbɔtɩ la'a -sɔ-a 'wʋ 'n wa ji-a wa 'napö ghayɩ 'pa. 8-Wa 'nɩ-ɛ la'a 'nagö -ka nɛ -bha -wa ka-a 'nagöö de naa: -Aa 'napö 'ngïmo 'le ɩ -wʋ -bha, a -sa -bha a 'napɛnyuo de a -kaya 'nyɛ. 9-Mʋa la'a nɛ naa: 'Bhëbhë, -a kaya 'nyɛ, -lu 'na-a -kaya -nɩ cɛ'ɛ tʋ-ʋ. A mö -ma -wa pʋ-a 'pɛlʋɔ 'bhɛyɩ a 'yɛ a -lu pɩ-a. 10Wa-a -ma ʋ pɩapɩabhɛyɩ, 'n nglʋkwanyɔ ji-a ji, 'n -wa -ngbï pöɔ la-a 'wʋ -nyɔɔ ji-e -ma 'bhlibhlibudu'u pla, 'n wa ji-e -bha -gba. 11'Bɩ gwlɛ-a 'mö, -mʋa -ngbï-ï mö la-a 'napɛnyu pɩaa wa ji-a, 'n wa ji-e -bha -buduo de bhɔtɔ. Wa nɛ: Nyininyɔ, Nyininyɔ, kalɩ -bha -a 'yɛ pla. 12-Mɔ la'a nɛ -bha wa de: 'Dɩɛ -dɩ n nyɛya-a sa'a naa, n 'nɩya -ji. 13Ɩ yɛ n gba-a naa: A pö ajɩ 'wʋ, -wʋʋ yɛ-a, la ɩ ji-a jinɩɛ a'a -bhaa zlɩ -yɛ -bhaa 'glie 'sɔ -ji.
Nɩkpa wa 'nyɛ-a mëni 'ye wa 'kɛ libho nʋnʋɔ 'nine
14Sa nɩkpɛ -wʋ-a lowlu'u möö ji 'le, 'n ɔ ji-a ɔ mëni ɔ nyɩgbajʋlʋɩ 'mö palɩ wa 'kɛ libho nʋnʋɔ yɛ, -sɩbha -Lagɔɔ nyininyinipɩɛ wɛlɩ ji-a -wʋɔ. 15Ɔ 'nyɛ taka -lɔ 'wli -ngbï 'ye, ɔ 'nyɛ 'sɔ -lɔ 'wli 'sɔ 'ye, 'n ɔ ji-a ta -lɔ 'wlu -bhlʋ 'ye 'nyɛ. Sa wa bhɛlɩ-a wa 'kɛ libho nʋnʋ -bhlʋ -bhlʋ, -sɩbha ɔ 'nyʋa-a 'ye 'n ɔ ji-a mö. 16Ɔ mö-a bhleemö, -ɔ ghlɩ la-a 'wli -ngbï, 'n ɔ jiɩ-a libho nʋnʋ kwla'a mö, 'n ɔ ji-a wli -mɩmɩ -ngbï -bha ɩ -gömö ghlɩ. 17-Ɔ ghlɩ la-a 'wli 'sɔ nʋnʋɩ 'yɛ-a -nɩ libho, ɔ ghlɩ -bha ɩ -gömö wli -mɩmɩ 'sɔ. 18-Ɔ ghlɩ la-a -nɩ 'wlu -bhlʋ mö-a, ɔ 'wlu-a glu 'n ɔ ji-e -ma mëni la'a ziza. 19'Bɩ gwlɛ-a 'mö, nyɩgbajʋlʋɩ la'aa 'bhitɩbha 'bhö-a lowlu'u ɔ ji-a, 'n ɔ jua-a wɔzɩ, sa wa köbhaköbhanɩ-a mëni 'mö wa 'kɩ -saa yɛ. 20-Ɔ la'a -ɔ ghlɩ la-a 'wli -ngbï nyini-e -bha ɔ dlɩ'ɩ-ɛ, ɔ -su wli -mɩmɩ -ngbï, ɔ nɛ: -Abhitɩbha 'wli -ngbï -n nyɛ'ɛ la-a 'ye n nʋnʋɩ-a libho, n ghlɩ -bha -gömö wli -mɩmɩ -ngbï mɩ-ɛ la'a. 21'Bhitɩbha nɛ: 'Ji ɩ nanɩ -bha, nyɩgbajʋlʋɔ -nyɩgbajʋlʋ -n glɩnɩ -bha. -Li 'kikie n -nyɛmö-a 'ye 'jinanɩswɩɩ -n zʋɩ-a 'ji, ɩ yɛ -li 'kadɩ n -jimö-a 'ye 'nyɛɛ -n 'kɩ 'ji zʋ. Ji -a 'yɛ 'mʋna li. 22-Mɔ ghlɩ la-a 'wli 'sɔ nyini-e -bha, ɔ nɛ: -Abhitɩbha, 'wli sɔ -n nyɛ'ɛ la-a 'ye n nʋnʋɩa-a libho -mɩmɩ 'sɔ n ghlɩ-ɛ -bha ɩ -gömö mɩ-ɛ la'a. 23'Bhitɩbha nɛ: 'Ji ɩ nanɩ -bha, nyɩgbajʋlʋɔ -nyɩgbajʋlʋ -n glɩnɩ -bha, -li 'kikie n -nyɛmö-a 'ye 'jinanɩswɩɩ -n zʋɩ-a 'ji, ɩ yɛ -li 'kadɩ n -jimö-a 'ye 'nyɛɛ -n 'kɩ 'ji zʋ. Ji -a 'yɛ 'mʋna li.
24-Mʋa la'a 'sɔ 'plɩ-a, -mɔ ghlɩ la-a 'wlu -bhlʋ nyini-e -bha, ɔ nɛ: -Abhitɩbha, n -ji sɛ naa, nyanɩnyɔ -n glɩnɩ -bha, la -nn -lɛ-a glʋ -bha -n dɩ -bha, la -nn -lɛ-a kwa -bha -n sa -bha. 25Ɩ yɛ nganɩmanɩ n nganɩmanɩ -bha, 'n n ji-e -na mëni -ma glu ziza, mɛ-ɛ la'a -n 'kɛ 'wʋ 'libhï. 26'Bhitɩbha nɛ: Nyɩgbajʋlʋ -zoko -ɔ 'ja-a, -n -ji la'a sɛ naa la n'n -lɛ-a glʋ -bha n dɩ -bha, la n'n -lɛ-a kwa -bha n sa -bha 'bhë-ë, 27'manɩɛ yɛ -nn-n 'mö-a na mëni mënie sɛzʋngwa 'ye 'nyɛ n -yɛ nimï ji n -kɛɛ -ma -sa kwla'a mö ɛ 'yɛ -gömö bhlinɩ 'nɩ? 28Ɔ gba-a sa'a 'bhë ɔ nɛ: A -sɔɔ 'mʋ 'wlu -bhlʋɔ 'bhë cɛ'ɛ a 'kʋ -ɔ ka-a -la 'wli kugbïa 'ye 'nyɛ. 29-Wʋʋ yɛ-a, -ɔ ka-a -bɛ, 'mɔ wa ji-a 'nyɛɛ ɔ -li 'yɛ zumanɩ. -Ɔ ka-a 'kikie, 'mɩ 'kikie 'bhë ɔ ka la-a, cɛ'ɛ wa jio-a -saa. 30Ɛ -yɛ nyɩgbajʋlʋ -zoko -mɔ -la glɩnɩ-ɛ, a 'pɔ -ma 'pɩ, -ma 'misikpoko 'mö, ma wiwie -yɛ glaa 'mölilie 'sɔ -wʋ-a.
Sa Zezwi ji-a 'pɩnɩkpa 'bhuoo -zijle 'mö tutunʋɔ
31-Zlɩ Nɩkpɛɛ 'Gu -yɛ jie ji-e, dʋdʋnyininyɔ 'kadɔɔ swɩ'ɩ ɔ ji-a jie, -Lagɔzuzuku -ganɩɔ, 'n ɔ 'yɛ-ɛ -bha ɔ nyininyinikpë 'kada -gömö sɛ glɩ-ɩ. 32-Bha ɔ dlɩ'ɩ dʋdʋkpata -gömöö nɩkpa ji-a 'wlu 'titanɩɛ, 'n ɔ 'kʋa-a yawʋ -sanɩ, sa wliaa ngokʋnyɔ 'nɩ-ɛ la'a 'bhlabhlɩ -yɛ wliawlia 'sɔ yawʋ -sanɩ. 33'Bhlabhlɩ ɔ ji-e -ma ɔ linɩkpɛsɔ pɩa 'bɩ sɛ zʋɔ, 'n ɔ 'yɛ-a wliawlia -ma ɔ kɔpɛsɔ pɩa 'bɩ sɛ zʋ.
34Ɔ -kʋa -sɩbha yawʋ -sanɩ 'bhë, 'n ɔ 'yɛ-a -wa tʋnʋ-ɔ -ma ɔ linɩkpɛsɔ pɩa 'bɩɛ de gba naa: Abha na -Tɩbha 'pa-a 'nyupalɩ a ji, ʋ -la-a 'pɩ yɛ 'bhle ʋ -sa la-a -bha a yɛ, a 'yɛ -ma a 'wʋ mö. 35-Wʋʋ yɛ-a, ngɔmʋ wʋ'ʋ-a 'lɩbha 'le, abha nyɛ'ɛ-a lilie, 'nyutʋ wʋ'ʋ-a 'lɩbha 'le, abha nyɛ'ɛ-a 'nyu, n mö-a lowlu'u, abha nyɛ'ɛ-a 'bhle. 36N'n-a 'möpalu -ka, abha nyɛ'ɛ-a 'möpalu. Gu wʋ'ʋ-a 'lɩbha 'le, abha -dɩdɩ'ɩ-a 'wʋ, n -wʋ-a -die 'mö, abha mö'ö-a yɩlɩ kwla'a.
37Ɔ -yɛ sa'a wa de gba, 'n -wa nʋ-a -Lagɔɔ dlɩyawʋnanɩli 'kɔ-a ngli 'jɩbha naa: Nyininyɔ, -zlɩmɩ ngɔmʋ -wʋmö-a 'lɩbha 'le, 'n -a -jimö-a lilie 'nyɛ 'nɩ? -Zlɩmɩ 'nyutʋ -wʋmö-a 'lɩbha 'le, 'n -a -jimö-a 'nyu 'nyɛ 'nɩ? 38-N mö-a lowlu'u 'n -a -jimö-a 'bhle 'nyɛ 'nɩ? -Nn-a 'möpalu -ka 'n -a -jimö-a 'möpalu 'nyɛ 'nɩ? 39-Zlɩmɩ gu -wʋmö-a 'lɩbha 'le, 'n -n -wʋ 'yɛ-a -die 'mö, 'n -a jimö-a 'wʋ -dɩdɩɛ mö 'nɩ? 40'N dʋdʋnyininyɔ 'yɛ-a wa de gba naa: 'Dɩɛ -dɩ n 'nyɛya-a sa'a naa: La a nʋ-a 'mɩ -ɩ la'a na 'wʋbhlinɩngwa gla'aa 'kikeyi -bhlʋɔ 'bhë 'ji-e, -amö a nʋɩ-a 'ji.
41'N ɔ 'yɛ-ɛ -bha -wa -wʋ-ɔ -ma ɔ kɔpɛsɔ pɩa 'bɩɛ de gba naa: A 'pa ajɩ -bha na yawʋ nimï, abha -Lagɔ bhlɩ-a, 'kɔgwlɛkosu la'a -Lagɔ zʋ-ɔ -bha Sata -yɛ a zuzuku 'sɔɔ yɛ yɛ-ɛ, a mö -ma ʋ 'mö. 42-Wʋʋ yɛ-a, ngɔmʋ wʋ'ʋ-a 'lɩbha 'le a nɩ'ɩ-ɛ lilie 'nyɛ, 'nyutʋ wʋ'ʋ-a 'lɩbha 'le, a nɩ'ɩ-ɛ 'nyu 'nyɛ. 43N mö-a lowlu'u, a nɩ'ɩ-ɛ 'bhle 'nyɛ, n'n-a 'möpalu -ka a nɩ'ɩ-ɛ 'möpalu 'nyɛ, gu wʋ'ʋ-a 'lɩbha 'le, n -wʋ 'yɛ-a -die 'mö, a nɩ'ɩ-ɛ 'wʋ -dɩdɩɛ mö.
44'N wa 'kɔ 'yɛ-a -nɩ ngli 'jɩbha naa: Nyininyɔ, -zlɩmɩ -a -yɩlɩmö-a ngɔmʋlɩbhalɩ'ɩ, 'n -a -nɩmö-a lilie 'nyɛ 'nɩ? -Zlɩmɩ 'nyutʋ -wʋmö-a 'lɩbha 'le, 'n -a -nɩmö-a 'nyu 'nyɛ 'nɩ? -N mö-a lowlu'u, -nn-a 'möpalu -ka, gu -wʋmö 'yɛ-a 'lɩbha 'le, -n -wʋ-a -die 'mö, 'n -a -nɩmö-a 'wʋ mö 'nɩ? 45'N ɔ 'yɛ-ɛ -bha wa de gba naa: 'Dɩɛ -dɩ n nyɛya-a sa'a naa: La a'a-a na 'wʋbhlinɩngwaa gla'aa 'kikeyie 'fʋ 'mɩ -ɩ la'a 'ji nʋ-ɔ, -amö a 'nɩ-a 'ji nʋ.
46'N -mʋa la'a 'yɛ-ɛ -ma 'kɔgwlɛyʋlɔyʋlʋɛ 'mö mö, -wa nʋ-a -Lagɔɔ dlɩyawʋnanɩli, 'n wa 'yɛ-ɛ -ma 'kɔgwlɛpɩ 'wʋ mö.”
Đang chọn:
MATIEE 'BƆGƲ 25: BNT96
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Bete New Testament © Bible Society of Côte d'Ivoire 1996
