संत.जोहन 10
10
चरवाहा आउर भेंड़ा आला गाम
1“ईङ आपे के नोःआँ कंहड़ीओ-दिपीईंग जे दुवार तरअः भेंड़ा गुदड़ी रे काय बोला बकिर एटाअ होरा तरअः रकाःब केते हिजोआय हुनी चोर आउर डाकु हेके। 2बकिर जे दुवार तरअः बोलाय हिनी भेंड़ा आलकु चरवाहा हेके। 3आउर हुंकू लःअय ओड़ाअ होरहोई सिनिङ जिजेआय भेंड़ा हुनी आला सबद पड़ीआकु, हुनी नुमू इदी-इदी अपन भेंड़ा के बाहरी इदी कुआय। 4अपन भेंड़ा के उडुंग चबा केते हुनी हुंकू मड़ांग-मड़ांग सेनाय, आउर हुंकू तयोम-तयोम सेनाकु, एता लःअय ची हुंकू हुनी आला आवाज के पड़ीआकु। 5हुंकू अन-चिनहार के एरकु ओतोङिया, बकिर हुनी तरअः नीर कोआकु एता लःअय ची अन-चिनहार आला आवाज काकु पड़ीआ।” 6ईसु हुंकू के नोःआँ गाम सुनाओ-लिकुआय, बकिर हुंकू तरअः हुनी, एतान कंहड़ीः दाय सेके काकु बुझाव नेना।
ईसु बेस चरवाहा
7तब ईसु फिन हुंकू के बेता लिकुआय, “ईङ आपे के सचे बेताअः दिपीईंग भेंड़ा गुदड़ी रेनअः दुवार ईङ हेके। 8जेतना ईङ तरअः पहिल हीःग नेनाकु हुंकू जामा चोर आउर डाकु हेके, बकिर भेंड़ा हुंकू आला काकु आयुम लअः। 9ईङ गी दुवार हेके जदि जाहें ईङ तरअः हुई केते बोलाकु, दो हुंकू उधार नाम केआकु आउर भीतरी-बाहरी हीःग सेन कोआकु, आउर हुंकू चारागन नाम केआकु। 10चोर चोचोर, गोगोएःग, नानास लःअय भाईर हिजोआय, ईङ निआँ लःअय हीःग निनिंग ची हुंकू जिनगी नामेकु आउर भरल-पुराल जिनगी नामेकु। 11बेस चरवाहा ईङ हेके बेस चरवाहा अपन भेंड़ाकु लःअय अपन जीव एमा गुल ताकुआय। 12बनहींयार जे ना चरवाहा हेके आउर ना भेंड़ा आलकु मुंवार, हुंर्ड़रा के हिजोअ नेल केते भेंड़ा के बाई केते नीर जुनोआय, आउर हुंर्ड़रा हुंकू के सःब कुआय तेकर छिती-छान गुलताकुआय। 13बनहींयार नीर जुनोआय एता लःअय ची हुनी बंनिहार हेके, आउर भेंड़ा रेनअः एतान फिकिर होः कनोआँ। 14-15#सं.मत्ती 11:27; सं.लुका 10:22बेस चरवाहा ईङ हेके, जे लकान आपा ईङ के पड़ीआय, आउर ईङ आपा के पड़ीईंग, अपन भेंड़ा के पड़ीईंग आउर ईङ आलकु भेंड़ा ईङ के पड़ीआकु, आउर ईङ अपन भेंड़ा लःअय अपन जीव एमा कुईंग। 16ईङ आलकु आउरो भेंड़ा एदान कुआ, जे नोःआँ गुदड़ी रे कनिकुआ। ईङ के हुंकू के होः आअगु दरकार एदनाआ, हुंकू ईङ आला सबद आयुम केआकु, तब मियांड ठुका गोहड़ा आउर मियांड ठुका चरवाहा हुयाव कोआय। 17आपा ईङ के नोःआँ लःअय दुलारीङाय ची ईङ अपन जीव एमेईंग, जेकर से ची ईङ होना के फिन गरहन किईंग। 18जाहें ईङ तरअः ईङ आला जिनगी एरकु रेःग दड़ीआ, बकिर ईङ होना के खुदे एमेईंग, ईङ के अपन जिनगी एमोअ रअः हक आउर होना के फिन इईदी रअः हाक होः एदनाआ, नोःआँ हुकूम बाबातिङ तरअः ईङ के भेटाव ताना।”
19नोःआँ बात चलते जाहुदीकु रे फिन छिट-फुट हुयाव ना। 20ढेर होड़ कंहड़ी केनाकु “हुनी के मुवाँ आतमा सःब तदियाय आउर हुनी बाऊड़ाहा हेके, हुनी आला एता लःअय आयुमेआपे।”
21एटाअ होड़ कंहड़ी केनाकु “नोःआँ कंहड़ी नोकान होड़ आला नलागे जेकर रे मुवाँ आतमा एदनाअ, मुवाँ आतमा अंधराकु के मेःड एमा सकाव किकुआय?”
ईसु के का गरहन
22हिना बेरा जिरोसलेम रे असथापना परब मनाय केनाकु, आउर राबांग बेरा रअः दिन ताहिना। 23ईसु बड़े बिनती ओड़ाअ रे सुलेमान नुमू रेनअः ओसरा रे दंड़ान केनाय। 24तब जाहुदीकु हुनी के हीःग केते घेराव किदयाकु आउर कुली लियाकु “आम आले आला मन के ओका हिला जगुत दुबिधा रे दोहो केआम? जदि आम ख्रीस्त हेके दो आले के सफा-सफा कंहड़ी गुलतामे।”
25ईसु हुंकू के कंहड़ी रूवाड़ोः लिकुआय “ईङ आपे के उदूः लेपेईंग आउर आपे कापे बिसवासेआ जे काम ईङ अपन आपा आला नुमू रे कामीयींग हुनी गी ईङ आली गोवाह हेके। 26बकिर आपे कापे बिसवासेआ एता लःअय ची ईङ आलकु भेंड़ा आपे नलागे। 27ईङ आलकु भेंड़ा ईङ आला सबद आयुमेआकु, ईङ हुंकू के पड़ीईंग आउर हुंकू ईङ तयोम-तयोम सेनाकु। 28आउर ईङ हुंकू के का-अन्तोः जिनगी एमाकुईंग, हुंकू हिरगीस इरकु नठाआ आउर जाहें हुंकू के ईङ आला तीः तरअः इरकु रेःग कुआ। 29हुंकू के बाबातिङ ईङ के एमा तदिङाय, हुनी जामा तरअः बड़ेआय, आउर जाहें हुंकू के आपा आला तीः तरअः इरकु रेःग दड़ीआ। 30ईङ आउर आपा मियां-डालिङ।”
31जाहुदीकु ईसु के गोगोएःग लःअय फिन टुकू हलांग लअकु। 32नोःआँ रे ईसु हुंकू के बेता लिकुआय “ईङ आपे के बाबा तिंग पखा तरअः ढेर बेस काम उदूः लाईङ होना मेसे ओका काम लःअय ईङ के टुकू रे छेछोम गोगोएःग नाम तनापे?”
33 #
लेवी 24:16
जाहुदीकु कंहड़ी रूवाड़ोः लियाकु “जहान बेस काम लःअय कोवान बकिर परमेसर आला नि-निन्दा लःअय, आले आम के टुकू रे छेछोम गोगोएःग नाम तनाले, एता लःअय ची आम मनवा हुयाव कोअते अपन गी परमेसर बनाअः तनाम।”
34 #
सिरिंग 82:6
ईसु हुंकू के कंहड़ी रूवाड़ोः लिकुआय, “आपे आला मुसा आला कनहुन रे लिखा लअः कनोआँ एतान? ‘ईङ कंहड़ी लाईङ आपे जामा ईसवर हेके?’ 35हुनी जामा के परमेसर कंहड़ी थिलाआय। जेके परमेसर अपन संदेस एम ताही लःअय, धरम पुथी रअः बात एरे टगाव सकाआ। 36दो जेके आपा पबितर ठहराव केते दुनिया रे कुलगोःड लिङाय, आपे हुनी के ‘आम परमेसर आला निन्दायाम,’ कंहड़ीयापे, निआँ लःअय ची ईङ कंहड़ी लाईङ, ‘ईङ, परमेसर आली होपोन हेके?’ 37जदि ईङ अपन आपा आला काईंग कामीङा दो ईङ रे आलपे बिसवासे। 38बकिर जदि ईङ कामीयींग दो, ईङ रे आलपे बिसवासे बकिर होना काम रे दो बिसवासेपे, जेकर से आपे पड़ीपे आउर समझाअपे ची आपा ईङ रे एदानिया आउर ईङ आपा रे एदानिया।”
39नोःआँ चलते हुंकू फिन ईसु के सस:ब रअः फिकिर रे थिनाकु, बकिर हुनी हुंकू दुबाःड़े तरअः ओचोअ नाय।
40 #
सं.जोह 1:28
ईसु जरदन नाई रेनअः होना पखी होना ठाँव रे सेन नेनाय जे एड़े पहिल जोहन बतिस्मा एमा कु केनाय, आउर हिनाःड़े ताही नेनाय। 41ढेर होड़ हुनी दुबाःड़े हीःग केते कंहड़ी केनाकु, “जोहन दो जहान चिनहा काय देखाव लअः, बकिर जे कुछ जोहन नुई रअः बारे कंहड़ी थिलाआय होना सचे ताहिना।” 42आउर होनाःड़े ढेर होड़ ईसु रे बिसवास लअकु।
Đang chọn:
संत.जोहन 10: ASR
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2023 NLCI CC BY-NC-ND 4.0