Vakatekivu Na i Vakamacala Taumada
Na i Vakamacala Taumada
Sa tukuna na i vola oqo Na i Vakatekivu na i tekitekivu ni buli ni vuravura, na i tekitekivu ni tamata, na i tekitekivu ni valavala ca kei na rarawa ena vuravura, kei na nona gaunisala na Kalou ni nona veitaratara kei na tamata. E rawa ni wasei na Vakatekivu me rua na kena i wasewase lelevu: (1) Na buli ni vuravura kei na i tukutuku taumada me baleta na kawa tamata. Oqo na i tukutuku me baleti Atama kei Ivi, o Keni kei Epeli, o Noa kei na waluvu, kei na Vale Cere-i-cake kei Pepeli (Wase 1–11). (2) Na i tukutuku taumada me baleti ira na qase ni Isireli. A kena i matai o Epara-ama, o koya sa kilai ena vuku ni nona vakabauta kei na nona talairawarawa vua na Kalou. E muria o ya na i tukutuku kei Aisake na luvena, kei na makubuna o Jekope (o koya sa vakatokai o Isireli), kei iratou na lewe tinikarua na luve i Jekope. Sai iratou oqo ka tauyavu kina na yavusa e tinikarua e Isireli. A vakabibitaki toka kina na i tukutuku kei Iosefo, e dua vei iratou na lewe tinikarua, kei na veika sa yaco ka vakavuna na nona vakauti o Jekope, o iratou na luvena kei na nodratou dui vuvale me ra sa la'ki tiko mai Ijipita (Wase 12–50).
E dina ga ni talanoataki ena i vola oqo na kedra i tukutuku na tamata, ia na i vola oqo sa tukuna taumada na veika sa vakayacora na Kalou. E tekivu ena kena vakadeitaki ni a bulia na vuravura na Kalou ka la'ki tini ena nona vosa ni yalayala ni na daulomani ira tikoga na nona tamata na Kalou. Na uto ni veika sa tukuni ena i vola oqo sai koya na Kalou, o Koya ka sa dauvakataulewa dodonu vei ira era caka cala, o Koya ka sa dauliutaki ira ka vukei ira na nona tamata, o Koya talega ka sa tuva na veika me baleta na i tukutuku ni nodra bula na Isireli. Na i vola oqo e volai me maroroya na i tukutuku ni nodra vakabauta e dua na kawa tamata kei na kena vukei na vakabauta oqori me caudre tikoga.
Na Lewe ni Vola
Na buli ni vuravura kei na kawa tamata 1.1–2.25
Na i tekivu ni valavala ca kei na rarawa 3.1-24
Mai vei Atama ki vei Noa 4.1–5.32
O Noa kei na waluvu levu 6.1–10.32
Na vale Cecere mai Papiloni 11.1-9
Mai vei Semi me yaco vei Eparama 11.10-32
Nodra Qase na Isireli (Pateriaki): Epara-ama, Aisake, Jekope 12.1–35.29
Na kawa i Iso 36.1-43
O Iosefo kei iratou na tuakana 37.1–45.28
Ira na Isireli e Ijipita 46.1–50.26
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Fijian New Version including Deuterocanonical Books © Bible Society of the South Pacific, 2012.