Mateo 3
3
Juan kuu mtsowleyy re men mni thib ta yubiz
(Mr. 1:1‑8; Lc. 3:1‑9, 15‑17; Jn.1 :19‑28)
1Ne lee re wiza lee Juan kuu mtsowleyy re men, mzin yubiz chaan yezlyu Judea. 2Ne nzhab Juan:
―¡Btsee goo mod went kuu nak goo, tak lee wiz kuu lee Diox nabee lo goo mzin gaxa!
3Ne Juan ree mteth profet Isaí, leettsa nzhab profet:
Lee thib zha kuu ndo yubiz, dib gan zha kwez zha:
“Thib nali bloo goo leettsoo goo, par kayaa goo Zha Nabee,
ne nali gok goo lo re kuu ntsow goo”. [Is. 40:3]
4Ne lee xab Juan natexkwaa kon yits lad kamey, ne naliib thib sinch yid leeyy Juan; ne kuu nzhow Juan nak ngebeez ne kuu nzhuu Juan nak mzin wan. 5Reta men yez Jerusalén, re men yezlyu chaan Judea, ne re men re yez kuu nzi dita roo yoo Jordán ngwa lo Juan. 6Or ngwalo mbin re zha lee Juan nzhab, ndoblo xoobdol zha re kuu went kuu mtsow zha. Tsa mxoobdol re zha re kuu went kuu mtsow zha, ne lee Juan mtsowleyy zha leen yoo Jordán.
7Per or mwii Juan kwathoz re zha fariseo ne re zha saduceo ndyaad gakleyy lo Juan, tsa nzhab Juan lo re zha:
―¡Goo nak zha kuu nakap nak taxal mbeel! ¿Cho ne lo goo tak laa goo lo yalnayii chaan Diox, kuu yaad leettsa lux yezlyu? 8Ner ban goo thib mod nali, ne bloo goo mtsee goo mod went kuu nak goo, tsaraa yaad goo tsa tsow leyyʼn goo, 9ne rubt goo gab goo: “Zhiinn Abraham nak nee”. Kona tegal ndaa nee falt tekayaa Diox nee, tak wlipaa na nin lo goo, lee Diox tak tsow lo re ke ree roo zhiinn Abraham, kona ndechet Diox goo. 10Tak lista ndo Diox par teti Diox goo, os tseet goo mod went kuu nak goo, ne leey nak, taxal yeba kuu ndoba xann re ya kuu ndaat xle wen, tsa ga zhay ne ko zhay lo ki. 11Tak wlipaa lee na ntsowleyy goo kon nit, tsa tsee goo mod went kuu nak goo; per lee men kuu ndyaadke ditsʼn, tsowleyy goo kon Mbi Nayon ne kon ki, tak masraa nataak zha nake na, kona neeka dits labyid zha ndoblotʼn xakʼn. 12Lee zha nak taxal thib zha kuu lista ndo nzo ya yaa, par koo paj lo nzob xtil, ne kotsow zha nzob xtil leen loo, lee paj teyy zha lo ki kuu thitanax nyuyyt.
Jesús ngokleyy
(Mr. 1:9‑11; Lc. 3:21‑22)
13Tsa ngwa Jesús roo yoo Jordán kuu nzi yezlyu Galilea ta ndo Juan, tsa tsowleyy Juan Jesús. 14Ner mzhyalt Juan, tsa nzhab Juan lo Jesús:
―Lu ndoblo tsowleyyʼn. ¿Chebee leel lu ndyaad gakleyy lon?
15Lee Jesús mkab, ne nzhab:
―Bloo kona yeka nal, tak ropaa ndoblo tsow kuu nlaaz Diox.
Tsaraa mzhyal Juan mtsowleyy Juan Jesús. 16Ne or ngwalo ngokleyy Jesús ne mroo Jesús leen nit, oraaka lee yibaa mzhaal, ne lee Mbi Nayon chaan Diox ndela taxal thib palom mla dits Jesús. 17Tsa mbin re men thib bos kuu mroo yibaa kuu nzhab:
―Zha ree nak xgann na kuu kwathoz nke leettsoon, ne kwathoz wen nzo leettsoon nen zha.
Đang chọn:
Mateo 3: zao
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2007, Wycliffe Bible Translators, Inc. All rights reserved.