MATYOO 21

Yeesus à ɗiŋii a Yorisalɛm

(Mk. 11:1-11; Lk. 19:28-40; Zŋ. 12:12-19)

1Yɛ̀ɛ ɓɛ ɓaghà di ɓɛ ti jàŋbog rì Yorisalɛm, di ɓaa kpaŋ a Bɛtfazee, nunùg rì dòn ì ɓɛ̀òlìvyee, Yeesus à romgà ɓɛ̀yilàg ɓɛɓɛɛ̀. 2À kpaa ɓɔ lɛ: Kɛ̀ɛna ɓi kìlɔ̀ŋ ki ki riì mìni kinii asu, ɓì ɓiì ghàsi ki tanɛɛ jɛɛ à jàɗki, rì man ɓɛ̀ suŋɛn, ɓi fumiì yɔ, ɓi yu mɛ̀ rì yɔ. 3I ŋwaà tɔɔgh mìni com, ɓi ɓàg nyi lɛ: Kan yɛɛ̀ kɔ̀ngi lɛ ti kɛǹ nyi rì yɔ, fɔɔnnɛ à rì mìni ɓiì càri lɛ, ɓi yuiy rì yɔ.

4Wɔ̀lɛ kìɓan kiǹ ki kilɛ̀ngà lɛ kɛɛ ɓa lɔŋ yɛ̀ɛ ǹkpaŋzì-ɓìɓan a kalìghà lɛ: 5Kaliina gɔ̀n ì giɓ inɛ a Siyon lɛ: Ghɛna yɛ̀ɛ rìfòm ɗyɔɔ ɗi yuu a lɔ̀ŋkɔɔ, rì coo risɛɛ̀dɛ̀n ɗi nɗem, ɗi ɓɔg yì ɓi jɛɛ à jàɗki, rì ɓi kìɓɔɔ̀ghɓɔɔgh ki jàɗki, man à jàɗki.

6Nni ɓɛ̀yilàg ɓɛ kɛngà, ɓɛ ki lɔŋ yɛ̀ɛ Yeesus à kpaaghà ɓɔ lɛ ɓɛɛ ki. 7Fɔɔnnɛ ɓɛ sugtìghày lɛ: rì jɛɛ à jàɗki rì man wiì, ɓɛ ghay ɓìlàà ɓyaa ɓi jàɗki yìn, ɓɛ kɔɔ̀sì Yeesus miì aɗyòò. 8Ɓìtuu ɓi ɓum ɓi ghaghàlà ɓìlàà ɓyaa ɓi bee; ɓɛ̀ro ɓɛmbog ɓɛ rendèn yì maŋ mɛ mɛtɛn di ɓɛɛ̀ ɓwààɓwaa ɓi bee. 9Ɓìtuu ɓi ɓum ɓi ɓi syoŋsyòŋgà Yeesus bee rì ɓi ɓi nɔɔ̀nɔ̀ɔ̀tìghày nyi ajɛ̀m ɓi kpaàkpàgsɛ̀ngà lɛ, Ozana! Rìkem ɗyɛ ɓa rì Man à Davit, Bɛ̀ll a maŋ̀ roànɛ à yùu yì ɓi ɗii ɗi Kan; Ozana, rìkem ɗyɛ ɓa rì Bɛ̀ll ɓi ɗyoo ɓi ɗùm.

10Yɛ̀ɛ Yeesus à ɗiŋìghà a Yorisalɛm, ban bimiɗ ì nyɛ̀ŋɗɛ̀ngà ɓum ɓɛ tɔtɔg lɛ: Rìkuu ɗi mum aɗi ɗyɛɛ ri lɛ? 11Ɓìtuu ɓi ɓum ɓìn ɓi ɓaàg lɛ: Yeesus nnyɛɛ ri; à rì ǹkpaŋzì-ɓìɓan anɛ a Naazarɛt ɓi ziì Galile.

Yeesus à nàɓi ɓɛ̀kìì-fyèè ɓi naà-Bɛ̀ll

(Mk. 11:15-19; Lk. 19:45-48; Zŋ. 2:13-22)

12Fɔɔnnɛ Yeesus à ɗiŋìghà ɓi naà-Bɛ̀ll, à nàɓ ɓum ɓɛ̀cèm ɓɛ ɓɛ kakàɓkà ɓyom rì ɓɛ̀roɓɛ ɓɛ lalàkà ɓyom ɓi naà-Bɛ̀ll, à tyɔkì lɛ, rì ɓɛ̀teɓèrè ɓɛ ɓumɓɛ ɓɛ ceècènɗìghà ɓum mɔ̀ɔ̀ni, rì mɛ̀kɔ̀ɔ̀ mɛ ɓumɓɛ ɓɛ kakàɓkà ɓɛ̀kuùkuù. 13À ki kpaa ɓɔ lɛ: Ki ri kì kànɛn lɛ: Naa yɛ̀m ì rì ɓiì ɓaa naa ì bɔ̀ŋzɛ̀n, kìɓan kifog mìnii ghaasii yɔ̀ naa ì ɓɛ̀wiiwìì.

14Ɓɛ̀ɗyaŋɗyaŋ rì ɓɛ̀lɛnlɛm ɓɛ yughà nyi jàŋbog, ɓi naà-Bɛ̀ll, à wɔ̀ɔ̀zì ɓɔ. 15Kìɓan kifog, ɓɛ̀pìrɛɛtìrɛ̀ ɓɛgwey rì ɓɛ̀rèsàg-ɓìdɔ̀gsɛna ɓɛ wokà bim yɛ̀ɛ ɓɛ ghɛngà dàm yi à kìghà, rì yɛ̀ɛ ɓɔɓti ɓɛsàg ɓɛ kpaàkpàgsɛ̀ngà jɛ̀ɛ̀ aɗyoo ɓi naà-Bɛ̀ll lɛ: Ozana, rìkem ɗyɛ ɓa rì Man à Davit. 16Nni ɓɛ tɔkà Yeesus lɛ: Ù woogh com ki ɓɛɛ̀ kpaakpàà? Yeesus à ɓàg lɛ: Ɛ̀ɛ̀! mìnii ka ɓalà ɓi yɛ̀ɛ ki ri kì kànɛn lɛ: Ù tekà rìkem ɓi ŋwɔm wu ɓɔɓti ɓɛsàg, ri a ɓɔn ɓɛ ɓɛ kaka ɓi mɛlì?

17Yeesus à càɗkà ɓɔ, à pɛ̀sɛ̀n ɓi bàn, à kɛ̀n kì lalì a Bɛtanii.

Yeesus à cɛ̀mi fìgyee

(Mk. 11:12-14, 20-24)

18Yɛ̀ɛ à suùsùgtìghà ɓi bàn ɗì sariwa, nni zày ì kɔ̀ngà nyi. 19Fɔɔnnɛ à ghɛngà ǹɗyèm wu fìgyee ɓi bee, à kɛ̀n wɔɔ; kìɓan kifog, à tanɛ̀n wɔ tyɛn ɗì tyɛn, à kpaa rì fìgyee ànɛn lɛ: Wàa wumdii gɛ ɓi kiɗùn nsoò kìfog. Lɔŋ ɓi cààmɛ̀n kɔm̀ kiǹ, ǹɗyèm wu fìgyee wu ghaskà kì wiì. 20Yɛ̀ɛ ɓɛ̀yilàg ɓii ɓɛ ghɛngà fɔlɔɔ, ɓɛ kuuràg; ɓɛ tɔg lɛ: Lannɛ ǹɗyèm wu fìgyee wu wu wii fɛlɛ cààmɛ̀n kɛ̀ kɛɛ ghaagh? 21Yeesus à bàg ɓɔ lɛ: Ǹkpaa mìni saaɗ lɛ, i ɓì rì rì rìgherɛ̀n, ɓì ki ɓa kɛ̀ɛ̀ nyoey ɓi nɗem, ɓì rì lɛ, ɓì kì kìɓan ki ǹkìi fìgyee ànɛ ki, ɓì ki ɓa ti kɔm̀ rì ìtèɗ wulɛ, i ɓì kpaa dòn ìnɛ lɛ, yɛ̀ɛ pɛsɛn yɛ̀ɛ kɛǹ kì kpìi ɓi rìɓày, ki kilɛ̀n fɔlɔɔ. 22Com kìcèm ki ɓì ɓiì tɔɔ̀gh rì rìgherɛ̀n ɓi bɔ̀ŋzɛ̀n, ɓi ɓiì ɓaà rì kɔ.

Ɓɛ tɔɔgh Yeesus jàŋ inɛ ìtèɗ wu a kìki ɓiɓan miì wu riì nyi

(Mk. 11:27-33; Lk. 20:1-8)

23Yeesus à kɛ̀ngà ɓi naà-Bɛ̀ll, nni yɛ̀ɛ à rèèrèsàkà ɓum ɓìɓan, nni ɓɛ̀pìrɛɛtìrɛ̀ ɓɛgwey rì ɓɛ̀sɛ̀ɛ̀mɛn ɓɛ kilɔ̀ŋ ɓɛ yughà nyi kì tɔɔ̀gh lɛ: U kìki ɓiɓan ɓi rì ìtèɗ wu ghɛn? Ghɛn yɛɛ ki faa wɔ̀ ìtèɗ wiǹ? Yeesus à ɓàg lɛ: 24Mɛ̀ɛ ǹtɔg ɓà girig mìni ǹtɔɔ̀tɔɔgh wufog, i ɓì ɓàagh mɛ̀ wɔ, fɔɔnnɛ ǹkpaa min mini jàŋ inɛ ìtèɗ wu nkìki ɓiɓan miì wu riì mɛ̀. 25Bàɓtis ì Zyaŋ ì ɓaghà nya kìɓan ki Bɛ̀ll yɛɛ fekà gìn ì ɓaghà kìɓan ki ɓum ɓɛɛ fekà? Wɔ̀lɛ ɓumɓɛ̀n ɓɛ fiɓìghà ǹtɔɔ̀tɔɔgh wiǹ wɔɔ ɓɔ rì ɓɔ, ɓɛ kpaa lɛ: I tì ɓàagh nyi lɛ bàɓtis ìnɛ̀n ì ɓaghà kìɓan ki Bɛ̀ll yɛɛ fekày, à rì ɓìsi ɓiì tɔɔ̀gh lɛ, nni ɓisuucɛ nnɛ ɓì gherɛ̀ngà ɓi yɔ̀? 26I tì ki ɓàagh lɛ: Ì rì kìɓan kì ɓum ɓɛɛ fekà, tì ghɛ̀ɛ̀sɛɛ kì risii gwìy ìnɛ, ɓisuulɛ ɓumɓɛ ɓɛ̀cèm ɓɛ gherɛɛ lɛ Zyaŋ à rì ǹkpaŋzì-ɓìɓan. 27Fɔɔnnɛ ɓɛ ɓakà Yeesus lɛ: Ɓìsii yii ɓi ǹkòo bàɓtis ìnɛ̀n ì ɓaghà rìfèg ɗi Bɛ̀ll, ǹkòo rìfèg ɗi ɓum. Yeesus à kpaa ɓɔ lɛ: Mɛ̀ girig mɛ̀ ǹkpaa ɓi mini ɓi-tèɗ aɗi nnɛ nkìki ɓiɓan ɓi.

Dàɗkì ì ŋwaànɛ à romgà ɓɛ̀dɛlì ɓii ɓɛɓɛɛ̀

28Mìnii ghɛɛ kìɓan ki là? Lɛ, ŋwaàdɛŋ yɛɛ ɓaghà rì ɓɛ̀dɛlì ɓii ɓɛɓɛɛ̀, nni à reŋìghà roàntonto, à kpaa nyi lɛ: Man, kɛ̀na mɛ̀ kìsay a dɛm gɛɛ̀nɛ. 29Man à ɓàg lɛ: Ǹ-yin ɓiì kɛ̀nkɛni. Wɔ̀lɛ ajɛ̀m ìnɛn, à ghɛngà rìnàn ɗii à ki kɛ̀n a dɛm. 30Fɔɔnnɛ ŋwaànɛ̀n à reŋìghà man à kìɓɛ̀ɛ̀, à rom girig nyi a dɛm yɛ̀ɛ à romgà roàntonto, ŋwɔɓti à ɓàg lɛ: Tààta, ǹɗì ɓiì kɛ̀ɛ, wɔ̀lɛ kɛ̀ɛ ki kɛ̀n. 31Nni ɓi kìɓɛ̀ɛ̀ ki ɓɔɓti kiǹ, roàbe yɛɛ kighà rìkɔ̀n ɗi seŋì? Ɓum ɓɛ Yeesus à tekà dàɗkì ìnɛn ɓɛ ɓaàg lɛ: Man à ǹtonto yɛɛ kighà rìkɔ̀n ɗi seŋì. Yeesus à ki kpaa ɓɔ lɛ: Ǹkalii mìni saaɗ à rìkpaa lɛ, ɓɛ̀terì-làmpoŋ̀ rì ɓɛ̀yiɓ ɓɛ riɓàmɓà ɓɛ loogh gɛ kì kpaŋì ɓi kìlɔ̀ŋ ki Bɛ̀ll rì mìni. 32Ɓisuulɛ, Zyaŋ à yùghà a lɔ̀ŋkin, à rèsì mìni bee ì saaɗ, kɛ̀ ɓi gherɛn nyi, kìɓan kifog ɓɛ̀terì-làmpoŋ̀ rì ɓɛ̀yiɓ ɓɛ riɓàmɓà ɓɛ gherɛ̀ngà nyi. Nni nsoò yɛ̀ɛ ɓì ghɛngà fɔlɔɔ, ɓì ki lɔ̀ɔ̀ghrɛ̀ngà ɓi mɛrem lɛ ɓi gherɛn nyi.

Dàɗkì ì ŋwaànɛ à faghà dɛm yiì rì ɓum

(Mk. 12:1-12; Lk. 20:9-19)

33Wooghna dàɗkì idɛŋ yɛ̀ɛnɛ: Ŋwaàdɛŋ yɛɛ salà dɛm yiì, à ɓɛ̀y viìnyɛ̀ miì, à cèŋzɛ̀n dɛm inɛ̀n rì gari, à kì wayɗ ɓi dɛm inɛ̀n, à ki toŋ ɓyoo mɛɛ wɔɔ. Fɔɔnnɛ à faghà yɔ̀ ɓi rɛŋtì rì ɓɛ̀kìì-ɓìsay, à kɛ̀n rìkɛ̀ɛ̀. 34Yɛ̀ɛ viìnyɛ̀ ì ɓàgà lɛ ɓɛɛ kɛs, nni à pɛ̀sìghà ɓum, à rom yì a ɓɛ̀kìì-ɓìsay ɓɛ à càɗkà dɛm rì ɓɔ lɛ ɓɛɛ rom gàɓ yìì i ɓìɗilàg. 35Fɔɔnnɛ ɓɛ̀kìì-ɓìsay ɓɛǹ ɓɛ ɓangàkà ɓumɓɛ a romgày ɓɛǹ, ɓɛ ki lɛ, ɓɛ ɓog roànɛ kìtòn, ɓɛ wey roàmbog, ɓɛ ki rogi roàkìraa gɔ̀g. 36Nni ŋwaàdɛm a pɛ̀sìghày tì ɓum ɓɛdɛŋ, ɓɛ ɓɛ ceeghà ɓɛ ǹtonto ɓi bàlì, à romdì lɔŋ ɓɔ a ɓɛ̀kìì-ɓìsay ɓɛ a dɛm, wɔ̀lɛ ɓɛ̀roɓɛ̀n ɓɛ ki tì rì ɓumɓɛ̀n yɛ̀ɛ ɓɛ ka kìghà ɓɛ̀ro ɓɛ ǹtonto. 37Fɔɔnnɛ à siitɛ̀ngà min ki pɛ̀sii man wiì, à rom nyi a ɓɛ̀kìì-ɓìsay ɓɛǹ, rì fèg ànɛ lɛ, ɓɛ ri ɓiì nìŋi man wiì. 38Wɔ̀lɛ yɛ̀ɛ ɓɛ̀kìì-ɓìsay ɓɛǹ ɓɛ mɛɛ ghɛngày man à ŋwaànɛ̀n, ɓɛ kpaa wɔɔ ɓɔ rì ɓɔ lɛ: Nnyɛɛ ghɛɛ̀sɛɛ kì rɔ̀ɓi ri dɛm i seŋì, yùuna ti wey nyi, di fɔɔnnɛ dɛm yɛ̀ɛ woòghrɛn rì ɓìsi. 39Fɔɔnnɛ ɓɛ ɓangà min man ànɛ̀n, ɓɛ pig nyi jɛ̀m ì gari, ɓɛ wey. 40Nni yɛ̀ɛ ŋwaàdɛm a rì ɓiì yùu, cɛ kɛɛ̀ki à rì ɓiì kìi ri ɓɛ̀kìì-ɓìsay ɓɛ à reɓsɛ̀ngà dɛm ɓɛǹ rì ɓɔ? 41Nni ɓɛ ɓakà Yeesus lɛ: À ɓiì cuusii ɓìɓeɓtàg ɓi ɓɛ̀kìì-ɓìsay ɓiǹ kɛ̀ɛ̀ rìrɔ̀ɓ, à ki teɗ dɛm yiì, à fa yɔ̀ ɓi rɛntì rì ɓɛ̀kìì-ɓìsay ɓɛdɛŋ ɓɛ ɓɛ rì nyi ɓiì falaagh gàɓ yìì i ɓìɗilàg di bèg ì kpaŋi. 42Nni Yeesus à tɔkà ɓɔ lɛ: Ɓi ka ɓalà ɓi yɛ̀ɛ ki ri kì kànɛn lɛ: Gɔ̀g ìnɛ ɓɛ̀toŋì-mɛɛ ɓɛ makà, yɛ̀ɛ ki ghalà gɔ̀g ìnɛ yɛ̀ɛ konag kì lèmi ǹtɔn à mɛɛ? Kìɓan kiǹ ki ɓaghày yɛ̀ɛ Kan, ki ki rì dàm ì kìɓan inɛ ì kìlɛɛ ɓìsi ɓi mis.

43Kìɓan kiǹ kɛɛ̀ki ǹkalii mìni lɛ, ɓɛ ri ɓiì pisii kilɔ̀ŋ ki Bɛ̀ll a lɔ̀ŋkin, ɓɛ fa kɔ rì kìlɔ̀ŋ ki ki ri ɓiì wumì ɓìɗùn ɓi ɓi ghɛɛ̀sɛɛ rì kìlɔ̀ŋ ki Bɛ̀ll. 44Mum ǹcèm ànɛ à ɓiì kpìi ɓi gɔ̀g ìnɛ, à ɓiì ɓumɓuni miì, ŋwaànɛ ì kpìi ɓi nyoo, ì turì nyi.

45Yɛ̀ɛ ɓɛ̀pìrɛɛtìrɛ̀ ɓɛgwey rì Ɓɛ̀fàrìzyɛŋ ɓɛ wokà dàɗkì yin, nnɛ ɓɛ yighà min lɛ ɓɔɔ̀ɓɛ Yeesus à kpaakpààghà. 46Fɔɔnnɛ ɓɛ kaakààghà bee inɛ ɓɛɛ ɓan nyi; wɔ̀lɛ ɓɛ rirìsìghà ɓìtuu ɓi ɓum ɓi ɓi ɓaghà wɔɔ, lɛ ɓumɓɛ̀n ɓɛ gherɛ̀ngà lɛ Yeesus à rì ǹkpaŋzì-ɓìɓan.

Đang chọn:

MATYOO 21: BAFNT

Tô màu

Chia sẻ

Sao chép

Bạn muốn lưu những tô màu trên tất cả các thiết bị của mình? Đăng ký hoặc đăng nhập

Tìm hiểu thêm về Bafia Nouveau Testament

MATYOO 21

Những câu Kinh Thánh phổ biến từ
MATYOO 21

Nghe MATYOO 21

Kinh Thánh:

Bafia

Bản dịch: Bafia Nouveau Testament - BAFNT

MATYOO 21

MATYOO 21

Những câu Kinh Thánh phổ biến từ MATYOO 21

Nghe MATYOO 21

Kinh Thánh:

Bafia

Bản dịch: Bafia Nouveau Testament - BAFNT

MATYOO 21

Những câu Kinh Thánh phổ biến từ
MATYOO 21