℗ Audio 2019 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

Hakka - (Han) Today's Taiwanese Hakka Bible (Drama NT)

有一擺，好多稅棍㧯壞人來聽耶穌講道。 法利賽人㧯經學教師發怨言講：「這個人樣會接待壞人，又同佢等共下食飯！」 因為恁樣，耶穌講一個比喻給佢等聽；佢講：
「若係你等中間某人有一百隻羊，失落其中一隻，佢敢毋會將其他个九十九隻放在草埔，去尋該隻失落个，直到尋到嗎？ 尋到以後，佢盡歡喜，就將羊仔放在肩頭頂， 轉屋下去，然後請朋友㧯鄰舍來，對佢等講：『𠊎還歡喜噢！𠊎失落个羊仔尋到了！你等來同𠊎𢯭歡喜！』 像恁樣，𠊎㧯你等講，一個罪人悔改，在天頂也愛為到佢歡喜；該種个歡喜，贏過九十九個毋使悔改个義人！

「若係一個婦人家有十隻銀錢 ，失落一隻，姖敢毋會點燈來拚屋，逐所在詳細尋，直到尋到嗎？ 尋到以後，姖就會請朋友㧯鄰舍來，對姖等講：『𠊎還歡喜噢！𠊎失落个銀錢尋到了！你等來同𠊎𢯭歡喜！』 像恁樣，𠊎㧯你等講，上帝个天使也愛為到一個罪人个悔改來歡喜。」

耶穌繼續講：「某人有兩個孻仔。 細个孻仔對阿爸講：『阿爸，求你這下就將𠊎應得个產業分給𠊎。』阿爸就將產業分給佢兩個孻仔。 過幾日，細个孻仔就將所分到个產業賣掉，帶等錢離開屋下。佢去到盡遠个地方，在該位浪費錢財，過放蕩个生活。 佢將所有个一切花淨淨後，又堵到該位大飢荒，佢就苦到講毋得。 所以，佢去求當地一個人給佢事做；該人喊佢去農場畜豬仔。 佢餓到連豬仔食个豆筴也想愛拿來食；還係無人拿麼介東西給佢食。 最後，佢分醒過來，講：『吾爸有請恁多工人，佢等糧食充足又有賸，𠊎反轉在這位餓死！ 𠊎愛䟘起來，轉去吾爸該位，對佢講：阿爸，𠊎得罪天，也得罪你。 𠊎已經無資格稱做若孻仔；求你看𠊎做你請來个工人。』 佢就起身轉厥爸該位去。
「離屋下還盡遠，厥爸看到佢，就憐憫佢，走等過去，揇等佢个頸筋，緊唚佢。 孻仔講：『阿爸，𠊎得罪天，也得罪你；已經無資格做若孻仔！』 總係該阿爸喊僕人講：『遽遽拿最好个長袍來給佢著，拿禁指給佢戴，拿鞋給佢著， 然後將該隻肥个細牛牯牽來㓾。𠊎等來辦桌，歡歡喜喜來慶祝！ 因為𠊎這個孻仔係死掉又復活、失落又尋到个。』大家就開始慶祝。
「該時，大个孻仔還在田項做事；到佢轉來，離屋下無幾遠个時，聽到音樂㧯跳舞个聲， 就喊一個僕人過來，問佢發生麼介事情。 僕人應講：『若老弟轉來了！若爸因為佢平安勇健轉來，就㓾該隻肥个細牛牯。』
「無想到，大孻仔卻發譴，毋肯入去；厥爸就出來勸佢。 總係佢對厥爸講：『你看，恁多年來，𠊎像奴才恁樣服事你，毋識違背你个命令，你識給𠊎麼介哪？連一隻細山羊也毋識給𠊎同朋友共下歡喜。 總係你這隻孻仔，佢將你个財產亂用在妓女个身上；這下佢轉來，你就為佢㓾該隻肥个細牛牯！』 厥爸就對佢講：『細子啊，你常常同𠊎共下，𠊎一切所有个，全係你个。 總係你這個老弟係死掉又復活、失落又尋到个；所以，𠊎等應當歡喜慶祝。』」

Phulaphula i 路加 15