Taa -GP (NT) Drama

Wali yako etu i Yesu pasi yunuNya masua ri raya ngkota Yerikho pei sira ojo daliu polas nja’u ria. Wali nja’u kota etu re’e tau sugi, sanganya i Sakheus. Ia samba’a kepala ntau to pantagi asele. I Sakheus etu rani kojo mangkita i Yesu, bara wimba ta’aNya, pei ia taa maya mangkita apa ia rede kojo pasi tau boros kojo. Wali ia maripo ri tango ntau boros yau mangampago nja’u kaju ara. Tempo ia rata nja’u ria, ia mapone ndate tuwa ngkaju etu. Wali yako ndate ria ia mangampea damangalo’aka i Yesu tempo Ia daliu nja’u ria.
Wali tempo i Yesu rata nja’u pu’u ngkaju etu, Ia matingoa mangalo’aka resi i Sakheus, panewa Ia manganto’o, “Sakheus, pakajoli pana’u apa seo si’i Aku dayau ri banua ngkorom darapalinggona.” Wali i Sakheus majoli mana’u. Ia ndende kojo rayanya mampalinggona i Yesu nja’u banuanya.
Pei samparia tau to mangkita palaong etu, sira sakambumbu mangkonong i Yesu. Sira manganto’o, “Gete, taa matao Ia yau mawali linggona ntau to pantagi asele, tau to madosa kojo! ”
Pei i Yesu Ia yau sinjaya pei i Sakheus rata nja’u banuanya. Tempo sira re’e ri raya banua, i Sakheus makore pei manganto’o, “Ewa si’i Pue, santongo ngaya-ngayangku dakutilaka yau tau to masiasi, pasi dakupowalilika muni resi tau to itipungku opo ngkani kaborosinya pei to itipukaku sira etu.”
Wali i Yesu manganto’oka i Sakheus, Ia manganto’o, “Seo si’i korom rapalaes yako ri huku nu dosa, apa korom re’e mangaya seja Aku ewa naika bue ngkita i Abraham tempo owi. Pasi samparia tau to maroo ri raya banuamu, yako tempo si’i sira damangansani seja jaya darapalaes. Naka pei komi maya rapalaes apa Aku, Wiyaa nto Lino, Aku nama’i damangaliwu pasi damangampalaes tau ewa komi to tamo mangalulu jaya resi i Pue Allah, to raporapaka ewa tau pusa.”


Wali tempo tau nja’u ria tiroo mampodongeka gombo i Yesu, Ia manganto’oka wo’u sira rapa apa Ia rani mampaponsanika resi sira tawa rata temponya Ia mawali Makole ri lino. Naka pei Ia manganto’oka sira rapa etu apa tempo etu sira tamo longko yako ri kota Yerusalem pasi re’e sira to sala mampobuuka ane Ia ratamo ri Yerusalem, Ia mansaka damawali Makole ri lino. Wali see naka Ia manganto’oka sira rapa mangampotundeka sira see sira damadota mangika palaong nsira ri rayanya mangampeas kama’iNya. Wali Ia manganto’o, “Re’e samba’a tau to bae angganya ia dayau njo’u tana to longko danawaika ntau kuasa damawali makole ri lipunya. Roo see ia damawolili muni ri lipunya etu damaporenta. Wali tempo ia tawa yau ia mampokio to papolaonginya sampuyu mba’a pei mangawaika resi sira sangkomba doi weyawa samba’a pei samba’a. Ia manganto’o, ‘Pake doi si’i mangoli pasi mampobalu naka datidugang wo’u kaborosinya. Ika palaong etu sampe rata temponya aku darata muni.’
“Roo see tau etu mayoko dayau njo’u tana to longko. Pei tau to maroo ri lipu to si ia, sira maja’a nakita ia. See naka sira mampokau tau yau mangalulu ri payunya panewa ojo karata nsira nja’u tana to longko etu sira damampotango seja tau to damangawaika ia kuasanya. Sira damanganto’oka tau etu, ‘Kami taa rani tau si’i mawali makole mami!’ Wali pomakau nsira etu yau mangika ewa wimba nato’o nsira etu.
“Pei nempo ewa see, tau to bae angganya etu tiroo rawaika kuasa mawali makole nsira. Wali ia mawolili muni njo’u lipunya. Ojo karatanya nja’u banuanya, ia mampokio wo’u to papolaonginya to isarumakakanya doi seore etu. Ia rani mampotanaka resi sira bara sawei wo’u doi to narata nsira tempo sira mangoli pasi mampobalu.
“Wali rata to papolaong to uyunya pei manganto’oka tau puenya etu, ‘Pue, doimu to sangkomba to nusarumakaka ngkomi resi aku roomo tidugang wo’u mawali sampuyu ngkomba.’
“Wali tau puenya manganto’o, ‘Gete, matao kojo! Korom to papolaong to matao. Wali apa saba korom masipato rasarumaka mampasilonga palaong to kodi etu, see naka aku damangokotaka korom damangkuasang sampuyu kota.’
“Wali roo see ma’i wo’u to papolaong to kadua. Ia manganto’o, ‘Pue, doimu roomo tidugang wo’u mawali lima ngkomba.’
“Wali tau puenya manganto’oka ia, ‘Aku damangokotaka korom damangkuasang lima kota.’
“Wali yako etu ma’i wo’u samba’a to papolaong. Tau etu rani mangika anto, see naka ia mawuti mampakasala tau puenya, ia manganto’o, ‘Pue, aku kunsani komi tau to maroso kojo porentamu. Komi mangoko anu to si’a komi puenya pasi komi mamota nja’u tampa to si’a komi mampomuya. Wali aku meka mampobuuka danuhuku ngkomi ane bara tibute yau doi ngkomi etu, see naka aku ojo mangawungusika kain pei mangkalisoka yau. Wali si’i muni doi to komi puenya etu.’
“Wali tau puenya manganto’o, ‘Gete korom to papolaong to maja’a! Yako ri gombo ngkorom etu semo aku damangahuku korom. Apa korom manganto’o aku tau to maroso kojo porentangku pasi korom manganto’o aku mangoko anu to si’a aku puenya pasi mamota nja’u tampa to si’a aku mampomuya. Wali ane monso pu’u lengkongku ewa to nuto’o ngkorom etu, maka pei korom taa mangkeni doingku etu pei mamposaka nja’u bang see tempo aku rata muni aku maya mangantima muni doi etu pasi bunganya?’
“Wali roo see, tau pue nto papolaong etu manganto’oka tau to makore ri awenya, ia manganto’o, ‘Oko yau doi etu yako resi ia pei waika wo’u resi tau to re’e doinya sampuyu ngkomba.
“Pei tau etu manganto’o, ‘Gete Pue, maka pei mangawaika resi tau etu? Ia re’emo sampuyu ngkomba!’
“Wali tau puenya mangansono, to’onya, ‘Aku manganto’oka komi, i sema-sema to masipato rasarumaka, tau etu darawaika wo’u. Pei tau to taa masipato rasarumaka, tau etu nempo re’e sangkodi to rasarumakaka resi ia, to etu daraoko yau see ia tamo re’e bara kesaa. Wali ane mangkonong balingku to taa rani aku mawali makole nsira etu, keni mai sira pei pate yau ri tangongku.’” Wali etu semo rapa to nato’o i Yesu see anaguruNya mangansani mampakadota mangika palaong nsira ri rayanya mangampeas tempo ngkama’iNya. Pasi Ia mampatiendoka seja baliNya to taa rani Ia mawali Makole.


Wali ojo karoonya i Yesu manganto’o rapa etu Ia polas wo’u yau ndeku Yerusalem. Pei tempo Ia yau etu, Ia semo to malinja ri tangonya. Tau to yusa mangalulu ri payuNya. Wali ri raya mpalinjanya etu, sira mosu ri kampu Betpage pasi Betania to re’e ri pantana to rato’oka Tongku Saitun. Tempo sira mosu ri kampu etu i Yesu mampokau dua mba’a anaguruNya matiruyu. Ia manganto’oka sira, “Intamo njo’u kampu to uyu rata etu. Tempo komi rata nja’u ria, komi mansaka damangkita samba’a ana ngkeledai to rataka. Ana ngkeledai etu tawa re’e tau mampolea. Wali lede yau taka nu ana ngkeledai etu pei kenika Aku. Pei ane re’e tau mampotanaka, ‘Maka pei komi dua mangalede yau taka ngkeledai etu?’ to’oka tau etu, ‘I Pue rani mangampake.’
Wali anaguru dua mba’a to rapokau etu, sira yau. Pasi tempo sira rata nja’u kampu etu, sira mangarata ana ngkeledai singkonong ewa nato’oka i Yesu sira. Wali sira mangalede yau takanya pei tempo sira mangalede yau takanya etu re’e tau puenya mampotanaka resi sira, sira manganto’o, “Maka pei komi dua mangalede yau taka nu ana ngkeledai etu?”
Wali sira dua mangansono, “I Pue rani mangampake.”
Wali yako etu sira mangkenika i Yesu ana ngkeledai etu. Wali tempo sira rata muni resi i Yesu sira mangalandasika yau bengo ngkeledai juba nsira, roo see sira mangampapopone i Yesu ri wawo bengo ngkeledai etu. Wali yako etu sira polasimo ndeku Yerusalem. Tempo sira polas etu, re’e tau to mangkambaraka juba nsira mangangalis jaya apa ewa see ada nto Yahudi manga’angga tau.
Wali ri raya mpalinja nsira, tempo i Yesu mosumo damalonso yako ndate Tongku Saitun, tempo etu anaguru i Yesu to boros kojo ndende rayanya pasi sira mula sakaboo mangabarong i Pue Allah apa saba samparia palaong to taa rapobiasa to roomo nakita nsira i Yesu mangika. Sira manganto’o,
“Tau si’i semo Makole to ma’i napokau i mPue! Wali barong Ia! Kita masingkatao pei i Pue Allah ndate saruga si’i-si’i! Barong i Pue Allah anu to bae kojo kuasaNya!”
Etu semo to nato’o ntau boros.
Pei ri oyo ntau boros etu re’e bara sawei mba’a to Yahudi to aliran Parisi. Sira masusa rayanya mangandonge tau boros etu manganto’o i Yesu Ia Makole. Wali sira manganto’oka i Yesu, “Guru, seko anaguruMu!”
Pei i Yesu manganto’oka sira, “Aku manganto’oka komi, ane tau etu damaroti yau, roo see watu mayunu damamoni mangabarong Aku mangabolos sira.”

Wali yako etu i Yesu mosu rata ri kota Yerusalem. Ia mangkita kota etu panewa Ia mula tumangi apa mamporayang tau to maroo nda’a ria. Ia manganto’o, “O komi to Yerusalem! Masanang rayangKu ane seo si’i komi mangansani jaya see maya mawali masingkatao pei i Pue Allah. Pei komi taa rani mampodongeka Aku, wali see naka tempo si’i jaya etu ewa rawuni yako resi komi. Wali komi damasiasi kojo ri tempo to darata apa bali ngkomi darata resi komi. Sira damangalibu kota ngkomi pei damangika pampa to bae maroso tiku ri kota see komi tamore jaya damiyai. Balimu etu damampakaja’aka yau kota ngkomi pasi komi to maroo ri rayanya. Wali watu ri kota ngkomi dararantamaka yau samparia. Tare pasi songu to taa darayali yau. Wali palaong etu damawali resi komi apa ratamo temponya i Pue Allah ma’i damampalaes komi pei komi taa mangalinga tempo etu.”


Wali yako etu i Yesu yau ri banua i mPue Allah. Tempo Ia masua ri tongonatanya Ia mangkita tau to mampobalu binatang pasi to yusa-yusanya to danapake ntau mangika pampue resi i Pue Allah. Wali sira mampobalu nja’u tongonata banua etu, pei sira ojo mangantipu tau to rata. Wali tempo i Yesu mangkita etu Ia mangarubak yau samparia tau etu yako ri tongonata banua i mPue Allah. Ri rayanya Ia mangarubak tau etu Ia manganto’oka sira, “Re’e gombo i mPue Allah to ratulis ri raya ntuntuNya, gomboNya etu manganto’o,
‘BanuangKu darato’oka banua danapokai-kai ntau.’

Ewa see to nato’o i mPue Allah, pei komi room mangampake yau banua si’i mawali tampa nto pantipu.”
Wali yako etu, ponto eo i Yesu mampotundeka tau ri banua i mPue Allah. Pasi tempo etu kepala-kepala nto pampue pasi tau to mampoguru porenta i Musa pasi tau tu’a nto Yahudi sira mangaliwu jaya damampopate yau i Yesu. Pei sira taa mangarata jaya apa to Yahudi to boros mampodongeka kojo samparia gombo to Ia manganto’o.

Phulaphula i Lukas 19