Ambrym, North - WBT (Genesis & Mark) Non Drama

Iyesu te lngi ōrr ge le, te te la mōl bya bsaō ne nge, te mwenan vanten nyer err rrō rrutōn.
Ran Wobungkon mwenan ta Isrrel nyer, nge te rrō whur lon imkon kakae ne tamtamyaōan. Vanten te e lol err ho le, te bone ge err rongtane ha ge te rrō fe, err non metenen. Te err rrō whu ge, “Ge nyer, vanten ge a ma rrya rrinrrinan ge a be? Ma ktu yekyaan ge a mwi yi be? Mwi yi be nge rrō rrwene bagō?
“Vanten ge a fon, te e vanten ne ōmne im an nga rru. Te nge be teere mleng mwena Merri nga, a taalan nge Jemes, Joses, Jutas te Saemon. Te iunyen nyer, em ho nga li mōn.” Te lor te e fri ne, te lor te lōn jeene.
Ngate, Iyesu te fe byane nyer ge, “Brrofet mwena Yafukon, vanten nyer em rrō tengne nge. Te besaō ne vanten ge a, tahan te man buluim nyer, err rrlō rrō tengne nge.”
Nge telōn e ngrengre ne rrwene bagō mwena Yafukon en ōrr ge le, a te nga wrene veran ran mesean worhu nga, te err wu mōl.
Iyesu te non metenen tebyan ge vanten ge nyer a, ete lhe bagō worhu ge te rrwene, te mwenar rrinketean te rranga ho ra Iyesu. Ngate Iyesu te yel metenen mwenan vere, te a rrō whur besaō ge err ho tiliuti mwenan vere.

Bone ge le nga, Iyesu te je krukru mwenan vanten te e 12, te te hutamne nyer err ve ru ru. Nge te sene helan byane nyer ge te saavi helan mwenan sōnhal nyer, ge efe korku sōnhal nyer ran vanten nyer.
Te teemō nge te hutamne nyer, te fe byane nyer ge, “Mi lōne ktu sese te hu krine gimi lon mwenami yeyelan. Mi lōne ktu betamyee, arrbol, buverr te hu lon mwenami atotoō.
“Emi rrya mwenami arrwun nga, te emi kro mwenami fyarrbala, te emi lōne rrya ul te ru mōn krine gimi.”
Iyesu te fe mōn ge, “Ōrr ge be ge efe je gimi an en bya besaō te lon mar im, emi ho le eb tongve ge emi nga lngilngi ōrr nan.
“He he mi vya bsaō hu ge vanten nan nyer efe lōn je gimi bya bsaō, o efe lōn rongta byane gimi, mi lngilngi ōrr nan. Te mi tataō mweree metenen yemi en ōrr ge le. Ge le eve myarrmyarr hu ge rrō hubsine ge mwenar rruan hakbe mo ho.”
Ngate mwenan vanten nyer err vya te vya rrō jefne byanen vanten nyer, ge efe kilhi nyer metenen mwenar rruan hakbe.
Err korkuku sōnhal te e lol, te err rrō liune ōl fyaa ran bweten vanten ge ete mse ho. Te err rongtane te wu mōl.

Ngate King Herrot ge te rru fyan limhian mwena Sisa te rongtane ha ge Iyesu te rrō rrwene, tebyan ge sa Iyesu te roō en ōrr bonga. Worhu err rrō fe, “Jon Babtaes myu myur mōl mōn lon myarran. Ma rrwene ge ma ktu helan ge rrō rrwene bagō ge nyer a.”
Te vanten worhu err rrō fe he, “Elaeja nge a.” A worhu mōn err rrō fe, “Mwe yen brrofet hu en ge nyer myarin.”
Bone ge King Herrot te rongtane ha ge Iyesu te rrō rrwene, nge te fe, “Jon Babtaes, vanten ge a nge, narr takote myurr nan, te myu myur mōl mōn rru!”
King Herrot te rrō sur te yi le rrbyan ge myarin taalan, ge san nge Filib, te yene vehen hu san nge Herrotias. King Herrot te gurrku vehen ge a metenen, te te yene. Ngate Jon te rrō sur mōlmōle byane King Herrot te rrō fe, “Neng ōm gurrku vehen mwena taalam te ōm yene. Rruan ge le tōlō knon tengamri.” Tebyan ge Herrotias te rongtane te hakbe tebyan rral ge le, King Herrot te hutamne vanten worhu err vya laōktekte Jon, te ete lngi bya lon im ne jenjenan.
Herrotias lon te mang rrō fri ne Jon nga bwe. Lon te jeene he ne toō kabnu nge.
Te nge telōn yekya tebyan ge king te rrō wowor goro, tebyan ge lun te rrō myorr ne Jon, tebyan ge te yekya rru ge Jon te e vanten kon hu. Te te e vanten ge mwenan rruan te knon. King te rrō rrmelole ge ne rrō rongtane ha ge Jon te rrō fe, a mwenan rrinrrinan fona, te rrō bal ngamto nga bone ge te rrō rongtane mwenan sarōan.
Ngate ran wobung hu vehen ge a Herrotias te lhe te knon ge ne kilhi rrinrrinan mwena king. Wobung ge le, te e wobung ne hoter an mwena King Herrot. Te bone ge le, te rrwene yenyenan ge rrlam, te te je krukru mwenan yafu lamlam nyer, mwenan yafu lamlam ne vanten ne balan nyer, te yafu lamlam ne ōrr Kalili worhu mōn.
Teere vehen mwena Herrotias te vya lon im ne yenyenan, te te a rrō wil. Bone ge king krinen mwenan byulbyulan nyer err rrō liliifon, ete lhe te wu ten lon metar. Ngate, tebyan ge king ge a te rrmelole wilan ge a te lam ten, te fe byanen vehen ge a ge, “Neng ōm temelole ha? Ena sene sese ha ge neng ōm temelole.”
Ngate te rrwene surketean hu ge te hel. Te fe, “Ena sene sese ha ge fō whu. Ge he fō whu sese ge e vya tongve rru hilnging bonga, te ena sene.”
Ngate vehen ge a te vya, te whu rahen ge, “Ena whu ha?” Te rahen te fe, “Fō whu bwete Jon Babtaes.”
Byaho nga vehen ge a te la mōl byane king, te te fe, “Long mwe jeene fō sene bwete Jon Babtaes me ne ni nga nge a nga, lon bwelaye te hu.”
Susuran ge le te rrwene king te rongtane te hakbe ge te hakbe. Te lon telōn jeene he ne kbwiti mwenan surketean lon metan mwenan vanten nyer.
Ngate, byaho nga te sene mwenan vanten ne balan hu ge ne a takote myurr ne Jon, te ne ktu me. Ngate vanten ge a te vya. Te te a takote myurr ne Jon lon im ne jenjenan.
Te te lngi bya lon bwelaye hu, te te me sene byanen vehen ge a. Te vehen ge a, te a sene byane rahen.
Bone ge vanten mwena Jon, err rongtane rral e Jon ge te myarr, err me ktu tablin, te err vya lngi lon bulubul hu lon verr.

Ngate, abosol nyer, ge Iyesu te sene nyer ge err vya rrō suuto, err la mōl me ne nge. Te err me fe byanen ha ge err rrō rrwene, te err rrō whure vanten nyer.
Te bone ge le, err rrlōn yekya he en saarō sene ha ge ete rrwene, tebyan ge vanten nyer err ve lol ge err ve lol, te err rrō me ne Iyesu, a err rrō vya. Te rrwene Iyesu te mwenan vanten nyer err rrlōne ktu liyal rronrron te mri ge he en yen. Ngate, Iyesu te fe byane nyer ge, “Eyi roō te yi a en ōrr te hu ge eve ken nga bho, te yi ngangaō te mri.”
Ngate, Iyesu krinen mwenan vanten nyer, err yel metenen ōrr ge le ran afloo kakae hu. Err vya ran vere hu ge nyer hobōr nga err ho en.
Bone ge err rrō vya, vanten te e lol, ete lhe nyer te err yekya nyer. Byaho nga, vanten nyer err yel metenen mwenar besaō nyer, ete mku rrutōn fya we, te err vya tamtee teemō en ōrr ge Iyesu krinen mwenan vanten nyer err rrō vya en.
Bone ge Iyesu te rrōrr bya senōrr, nge te lhe vanten te e lol ge te e lol ete kru ho. Te te lol hane nyer, tebyan ge err yen sibsib nyer ge vanten ne terfor an te rranga rru. Ngate te rrō whure nyer ne sese te e lol.
En tarariu ten, mwenan vanten nyer err me biirin, te err fe ge, “Lonle ge a fyaasi bung eba mleng, te yim ho en ōrr ge sese mwe rranga rru en.
“Mu wu ne ge fō hutamne vanten ge nyer a, te efe vya ran vere ge nyer ge em ho tiliuti ōrr ge a, te efe a gye ar meyee tebyan ge efe nga ngne.”
Ngate, Iyesu te fe byane nyer ge, “Mu wu ne ge gimi nga emi sene meyee byane nyer ge efe ngne.” Te ete whu Iyesu ge, “Ehee, neng lom mwe jeene ge emya gye betamyee ne 200,000 vatu tebyan ge eyi byane ge nyer a ne?”
Ngate, Iyesu te fe byane nyer ge, “Mim teya betamyee be vii? Mi a lhekya.” Bone ge err vya lhe, err fe byanen ge, “Betamyee be lim nga ho, a myaalo be ru.”
Ngate, Iyesu te fe byane nyer ge efe tataa lon wor bya fyan ran barrnye.
Err tataa lon wor nyer, wor worhu te e 100, a wor worhu lo te e 50.
Ngate, Iyesu te rrya betamyee ge te e lim le krinen myaalo ge te e ru le. Te te ter bya mre lon tōngtōng, te te jeene siba byane Yafukon tebyan meyee ge nyer le. Te te kbwikbwiti betamyee nan nyer, te te sene byanen mwenan vanten nyer ge efe fifine byanen vanten nyer. Mōl mōn te fifine myaalo e nyer bonga.
Nge bonga err yen tam sum.
Ngate, vanten ne ōman mwena Iyesu, err hone rru betamyee te rru myaalo ge te mang ho; arrbol te e 12.
Yafu nyer ge err yen err ve 5,000.

Bone ge err mang rrō yen bwe, Iyesu te hutamne mwenan vanten nyer err vya ran afloo kakae, te err rrō rrumō bya Betsaeta en tahi tee kakre. Te te hutamne wor vanten lam ge nyer le, err yeyel hōhōō.
Bone ge te sulingi nyer te nong, te a ran wau hu ge ne a tamtamyaō.
Bone ge bung te rrō mleng, afloo kakae te a rru lon tobol e tee kakre. Bone ge le, Iyesu te rru nga hbōn bwe senōrr.
Nge te lhe ge mwenan vanten nyer err rrō helhel ne nyer tebyan foloan, tebyan ge barrling te hel rru ge te rrō uu mōle nyer. Lon wowobung, bone ge ōrr te rrō mtataō, Iyesu te rrō yel ran we me biiri nyer. Mwenan yeyelan ge le, te yen he ne yel tam e nyer.
Bone ge ete lhe ge te rrō yel ran tee, err ululgorr bya mre, te err rrō rrinrrine he, “Vehenru hu nge a.”
Bone ge ete lhe nge, lur te myorr tam. Byaho nga, Iyesu te sur byane nyer te fe, “Lumi eb lon myorr. Ni nga nge a. Lolomi eb hel.”
Ngate Iyesu te a ran afloo kakae ge a krine nyer, te barrling te mlol. Mwenan vanten nyer err non metenen ha ge te rrwe,
tebyan ge err rrlōn rrinfyaara bagō mwena Yafukon ge Iyesu te rrwene tere betamyee. Te lolor te hel ten rru ge he en rrinkeya.
Ngate err la kote tee kakre, te err vya senōrr Kenesaret. En ōrr ge le err fokte afloo kakae.
Te ete mra bya senōrr ran afloo kakae, byaho nga, vanten nyer err yekya Iyesu.
Te err rrō mku bya en ōrr bonga ran vere nyer ne ōrr Kenesaret. Te bone ge err rongtane ōrr ge be nge Iyesu te rru en, err rrō rrya mesean nyer ran tōnyōr byane Iyesu.
Ōrr bonga ge Iyesu te rrō vya en: besaō kakae nyer, te besaō lamlam nyer, te besaō ge err ho tiliuti, nyer err rrō rrya mesean bya en ōrr ne fofooan nyer. Te err rrō wuu vetune ge he ne rrmane ge en hubri giri mwenan arrlirrli nga. Te vanten bonga ge err tongve mwenan giri arrlirrli, ete ktu konean.

Phulaphula i Mark 6