Text: © L'Alliance Biblique du Tchad 2006 Audio: ℗ 2008 Hosanna

Sar - 2008 Edition (NT)

Gō tə́ anī, Jeju əda ngé ndóō yá̰a̰ yān gə̄ na:
Loo kadə̄ de kə́rēý gə̄ kə tə́sōn̄ kə gō hál madə̄də́ gə̄ ō, najə̄ kə́ tadə́ tə́ ō, aĺ ní gətóo i kə́ bátə́ gə̄ tə́, ba rɔ̄ tō ndoō i kə nge ń madə̄n gə̄ tə́sōn̄ sɔɔ̄ ń gō hálən kə́ majaĺ ō, gō najə̄ kə́ tan tə́ ō ní. I só tə́ ngá̰ý tām̄ yān tə́ kadə̄ do̰ō̰n̄ mbal̄ riī yá̰á̰ kə́ bo míndən tə́, ba bḭ́ḭ̄ ənīnən̄ kum bā bo tə́ kɔ̄ɔ́, tɔȳ kadə̄ ni-rāā adə̄ de kə́ kógə̄ḿ beē kə́ dan de kə́ dūú gə̄ ń toō tə́ əsō sɔɔ̄ ń dɔ hálən ō, najə̄ kə́ tan tə́ ō. Sḭḭ̄ kɔ́ gə̄ ī-ndiī dɔ rɔ̄sí tə́ majə.
Ré ngōkó̰ó̰í rāā yá̰á̰ kə́ majaĺ seí anī ī-ɓārə́n ba ɔ́jən kum ba ré ni-gḛy tūr̄ hálən anī, ī-māȳ rɔ̄í dɔn tə́. Ba ré ni-rāā yá̰á̰ kə́ majaĺ seí nja sīrí ndɔ̄ mbang kógə̄ḿ tə́, ba tél reē ədaī nja sīrí ədaī na n-gḛy tūr̄ hálən anī, ī-māȳ rɔ̄í dɔn tə́.

Ngámbang kəla gə̄ ədan̄ Kɔ́ɔ̄ɓē na:
Ādə̄jí taā kem dɔ madə̄ tə́ ɓáý to̰!
Kɔ́ɔ̄ɓē tél ədadə́ na:
Ré taā kem yāsí bo asə kə kum mutardə gə̄gē anī, sḭḭ̄ ə́daī kāgə̄ kótə̄ ń ra noó najə̄, ə́daniī na kə ī-ɓə̄ngā kə gír ngəraí ba āw̄ ī-ra kum bā bo tə́ nú anī, a oō tasí.

I náā dansí tə́ n, ré aw̄ kə nge kəla kə́ a ndɔr̄ adə̄n, aláa a ngɔ̄m̄ yá̰a̰ kul̄ yān gə̄, ba tél ndɔrɔ́ anī, a əda nge kəla ní na kə aw̄ láẃ, kə ndi nang tə́, kə əsa yá̰á̰ ní? Najə̄ ń a ədan ní i kadə̄ rāā loo yá̰a̰ kəsa adə̄n ō, kə əla kūbə̄ kəla yān rɔ̄n tə́ ō, ba kə ətō yá̰a̰ kəsa kə̄ rɔ̄n tə́ bátə́ kadə̄ kə n-əsań yá̰a̰ ō, kə n-a̰ȳń ō oy tá, gogə́ anī kə nge kəla ní kə əsa yān ō a̰ȳ yān ō ɓáý aĺ a? Ké ni-ndadə̄ nge kəla ń toō tām̄ yá̰a̰ gə̄ ń əndā dɔn tə́ kadə̄ rāā á rāā malang toó wa? Yāsí sḭḭ̄ i tītə̄ ń noō ō, adə̄ dan ń ī-rāāī yá̰a̰ gə̄ ń Nə́ɓā əndā dɔsí tə́ kadə̄ ī-rāāī ní malang oy anī, majə kadə̄ ə́daī tītə̄ ń toō na: Jḭḭ̄ i ngáń ngé kəla gə̄ karī, adə̄ jə-rāāī i yá̰á̰ ń sɔɔ̄ kadə̄ jə-rāāī ní ngóy.

Dan ń noō tə́ ní Jeju a un róbə mbā yān ta kaw̄ *Jerusalem, aw̄ mān̄ dɔ nin̄ nang kə́ Samari nin̄ kə Galile tə́. Ni a udə kə̄ kem ɓē kógə̄ḿ tə́ anī, ngé bānjə̄ gə̄ kutə teē a ɔjən̄ non. Nin̄-ndan̄ sa̰y, ba ədan̄ Jeju najə̄ kə ndūdə́ kə́ boó na:
Jeju, ngoljí, á̰a̰ kum tō ndoō yājí!
Dan ń Jeju a̰a̰də́ tītə̄ ń noō ní a, tél ədadə́ na:
Āw̄ ɔ́jiī rɔ̄sí *ngé tun̄ yá̰a̰ gə̄.
Ba dan ń nin̄-aw̄n̄ ɓáý á a njə̄rān̄ róbó ní a, bānjə̄ kə́ rɔ̄də́ tə́ ur̄ kɔ̄ɔ́. Dan ń nge kógə̄ḿ dandə́ tə́ a̰a̰ kadə̄ bānjə̄ ur̄ rɔ̄n tə́ kɔ̄ɔ́ anī, tél dɔ njan tə́, a ɔsə gɔn Nə́ɓā dɔɔ́ dɔɔ́ kə ndūn kə́ boó, reē ɔsə non nang tə́ nja Jeju tə́ ba ndadə̄n, ba deē ngeé ń noō i de kə́ Samari. Anī Jeju un najə̄ əda na:
Adə̄ ngé bānjə̄ kə́ kutə gə̄ ní, bānjə̄ ur̄ rɔ̄də́ tə́ kɔ̄ɔ́ malang aĺ i mbée a? Ngé kə́ ndōhó gə̄ ní, nin̄ i rá? Deē a̰a̰ de kə́ rang sḛ́ý kə́ tél dɔ njan tə́ reē ɔsəń gɔn Nə́ɓā aĺ ní, ba i nge kə́ tə̄rā ń toō tá ngóy a?
Gō tə́ anī ədan na:
Ḭ́ḭ dɔɔ́ ba āw̄ loo yāí, taā kem yāí ajiī.


*Parijiyḛ gə̄ dəjen̄ Jeju najə̄ dɔ ndɔ̄ ń *Ɓē ko̰o̰ yā Nə́ɓā a reēń tə́ ní anī, ni-tél ədadə́ na:
Ta reē *Ɓē ko̰o̰ yā Nə́ɓā i yá̰á̰ kə́ to kadə̄ á̰a̰ī kə kumsí njóý njóý alé, tá ā ásiī kəda na i ni n to toó aláa i ni n to nú noō alé. Tɔdɔ̄ á̰a̰ī, *Ɓē ko̰o̰ yā Nə́ɓā i dɔ dáńsí tə́ kɔ̄ɔ́ ɓá.
Ni-əda ngé ndóō yá̰a̰ yān gə̄ ɓáý to̰ na:
Ndɔ̄ gə̄ a reēn̄ noó kadə̄ sḭḭ̄ ā ī-ndə̄ngāī ka̰a̰ ndɔ̄ kə́ kal kógə̄ḿ beē dan ndɔ̄ gə̄ yā Ngōn̄ Deē tə́, ba ā á̰a̰ī ndɔ̄ ní alé. A ədan̄sí na i ni n toó, aláa ni n nú noō. Ba ī-lōōī kaw̄ sōn̄g gō. Tɔdɔ̄ tītə̄ ń man̄ tel̄ dām̄ dɔ rā̰ kógə̄ḿ tə́ a a unjə̄ loo bátə́ yā gān̄g dāmə̄n kə́ rang tə́ ní, ndɔ̄ reē Ngōn̄ Deē tə́ a to i tītə̄ ń noō ō. Banī i gáŕ kadə̄ ni a a̰a̰ tápə̄ ngá̰ý ō, kadə̄ de kə́ ɓāl̄ ń toō tə́ gə̄ a mbātə́nən̄ ō pá tá. Ndɔ̄ gə̄ yā Ngōn̄ Deē tə́ anī, a to i tītə̄ nəkɔ́ kə́ ndɔ̄ gə̄ yā Noe tə́ ō. De gə̄ əsan̄ yá̰a̰ ō, a̰ȳn̄ ō, táān̄ naā ō, bátə́ kadə̄ ugə̄ń ndɔ̄ ń Noe udəń kem to bo tə́ á man̄ kaw̄ tɔ̄l̄ńdə́ malang kɔ̄ɔ́ ní. A to i tītə̄ kə́ ndɔ̄ gə̄ yā Lot tə́ ō. De gə̄ əsan̄ ō, a̰ȳn̄ ō, mangən̄ yá̰a̰ gə̄ ō, igən̄ yá̰a̰ gə̄ ō, əndān̄ kāgə̄ gə̄ ō, rāān̄ kújə gə̄ ō. Ba ndɔ̄ ń Lot teēń kem ɓē kə́ Sodom tə́ ní, Nə́ɓā rāā adə̄ hor ō, hor bursu ō ḭḭn̄ dɔ rā̰ tə́ edən̄ man̄ tə́ kə̄ dɔdə́ tə́, adə̄ nin̄ malang oyn̄ kɔ̄ɔ́. Ndɔ̄ ń kadə̄ Ngōn̄ Deē a teēń hɔy tə́ ní a to i tītə̄ ń noō ō.
Ndɔ̄ ń noō tə́ ní, deē ń ndi dɔ kújú dɔɔ́ ba yá̰a̰ yān gə̄ i kem kújú ní, ādə̄ kɔ́ɔ̄ risə yā kɔydə́ alé, deē ń ndi ndɔrɔ́ ní, ādə̄ kɔ́ɔ̄ tél reē ɓēé gogə́ aĺ ō. Ādə̄ əga kemsí dɔ nə̄yá̰ Lot tə́. Deē ń o̰o̰n ta rɔ̄n ngá̰ý kadə̄ kə n-tḭ̄ḭ̄ ta aĺ ní a tḭ̄ḭ̄ ta rɔ̄n. Ba deē ń tḭ̄ḭ̄ ta rɔ̄n ní kɔ́ɔ̄ a ajə rɔ̄n. Ādə̄ m-ə́dásí, dan ndɔ̄ɔ́ ndɔ̄ ń noō tə́ ní, ré de gə̄ i jōó n ton̄ dɔ tə̄rá kə́ kógə̄ḿ beē tə́ anī, a unən̄ nge kə́ kógə̄ḿ, ba a əya̰n̄ nge kə́rēý kɔ̄ɔ́. Ré de kə́ dəyá̰ gə̄ jōó ra a urən̄ yá̰a̰ anī, a unən̄ nge kógə̄ḿ ba əya̰n̄ nge kə́rēý. Ré de kə́ dəngam gə̄ jōó ran̄ ta ndɔr̄ tə́ anī, a unən̄ nge kə́ kógə̄ḿ ba a əya̰n̄ nge kə́rēý.
Anī loo ń noō tə́ ngé ndóō yá̰a̰ yān gə̄ dəjenən̄ ədan na:
Ba i rá bang Kɔ́ɔ̄ɓē? Anī ədadə́ na:
Loo ń nīń i tū tə́ ní, māl̄ gə̄ a kánə̄n̄ naā tū tə́ ō.

Phulaphula i Najə̄ kə́ Majə yā Jeju ń Luk ndang ní 17