मत्ती 4
4
येशूदा फसब लबारी म्हाइबा
मर्कूस १:१२-१३; लूका ४:१-१३
1जमाहेन्से परमेश्वरला आत्मासे शैतानग्याम सेम च्याबारी येशूदा तोङतोङबा ग्लारी भोर्जी।#हिब्रू २:१८; ४:१५ 2थेरी बोगल न्ही धिनधोना येशूसे धिन म्हुननोन तिगै आसोल्नी। थेतबासेलमा थेदा ल्हानान फोख्रेन्जी। 3जमाहेन्से शैतान येशू मुबा ग्लारी खसी “ह्राङ परमेश्वरला झा हिन्सम चु युङबागदेदा गेङ दोगो भिसी सुङ्गो” भिसी भिजी।
4तर येशूसे “गेङसे जे म्हि आसो, तर परमेश्वरला सुङग्याम थोन्बा जम्मान बचनसे सोबारी खम्ला भिसी परमेश्वरला बचनरी भ्रिबा मुला” भिसी सुङ्जी।#व्यव ८:३
5जमाहेन्से शैतानसे येशूदा परमेश्वरला शहर यरूशलेमरी भोर्सी परमेश्वरला मन्दिरला थोबोरी राप्पुङ्जी। 6ओच्छे थेसे येशूदा “ह्राङ परमेश्वरला झा हिन्सम चुग्याम मार छ्योङ्गो। तिग्दा भिसम बचनरी चुह्रङ् भिसी भ्रिबा मुला,
‘परमेश्वरसे ह्राङदा चुङ्बाला लागिरी ह्राङला स्वर्गदूतगदेदा कुल्ला।
ओच्छे एला काङ युङबारी थाठोक्गै भिसी एदा
थेनीगदेसे या यारीन ताला’ भिसी भिजी।”#भजन ९१:११-१२
7येशूसे थेदा “बचनरी चुह्रङ् लसी भ्रिबा मुला, ‘एसे ह्राङला परमप्रभु परमेश्वरला सेम च्याबा गे तिगै थालउ’” भिसी सुङ्जी।#व्यव ६:१६
8दोःसी शैतानसे येशूदा नोबा गङ गिकरी भोर्सी जम्बुलिङला जम्मान य्हुल्सागदेदेन जम्मान ज्यबा स्हेगदे उन्जी। 9ओच्छे “ह्राङसे ङादा फ्या लसी तेन्जी भिसम चु जम्मान य्हुल्सा ङाइ ह्राङदा पिन्ना” भिसी भिजी।
10जमाहेन्से येशूसे थेदा “शैतान, ए चुग्याम तुरुन्तन निउ! तिग्दा भिसम बचनरी ‘एसे ह्राङला परमप्रभु परमेश्वरदा फ्या लउ, ओच्छे थेदा जे तेन्गो’ भिसी भ्रिबा मुला” भिसी सुङ्जी।#व्यव ६:१३
11जमाहेन्से शैतानसे येशूदा ख्लासी निजी ओच्छे स्वर्गदूतगदे खसी येशूदा क्योङ्जी।
येशूसे परमेश्वरला य्हुल्साला समाचार थेःना लबा
मर्कूस १:१४-१५; लूका ४:१४-१५
12यूहन्ना झ्याल्खानरी परब तजी भिबा थेःसी येशू दोःसी गालील अञ्चलरी फेप्जी।#मत्ती १४:३; मर्कू ६:१७; लूका ३:१९-२० 13ओच्छे नासरत भिबा ग्लारी आफेप्ना कफर्नहुम शहररी धन्छ्याबारी फेप्जी। चु शहर गालील समुन्द्रला कुनीरी मुबा, चु शहर चा जबूलूनदेन नप्ताली भिबा य्हुलला म्हिगदे चिबा जिल्लारी परब तमुबा।#यूह २:१२ 14चुह्रङ् लसी यशैया अगमवक्तासे पाङ्बा ताम पूरा तजी,
15“जबूलूनदेन नप्तालीला जिल्लारी यर्दन क्याम्सङ,
समुन्द्रला कुनीरी, यर्दन क्याम्सङ, गालीलरी चिबा अर्गु य्हुलला म्हिगदे
16ओच्छे धोपधोपरी चिबा म्हिगदेसे घ्रेन य्हालदा म्राङ्बा मुला।#यशै ९:१-२
थेह्रङ् लसीन कालला धोपधोपरी मुबा म्हिगदेला गुङरी थे य्हाल फेःबा मुला।”
17थे धुइहेन्से येशूसे “एनीगदेसे ह्राङ ह्राङला पाप ख्लासी परमेश्वरपट्टि दोःगो, तिग्दा भिसम स्वर्गला य्हुल्सा खसी जिन्बा मुला” भिसी म्हिगदेदा सुङ्बारी छ्याइजी।
येशूसे ङाच्छा स्होबा चेलागदे
मर्कूस १:१६-२०; लूका ५:१-११
18येशू गालील समुन्द्रला कुनीन कुनी फेप्बान लमा पत्रुस भिबा सिमोनदेन थेला आले अन्द्रियासदा तार्ङा साइबारी समुन्द्ररी घ्याङ क्लाङ्बान लबा म्राङ्जी। तिग्दा भिसम थेनीगदे तार्ङा साइबा म्हिगदे मुबा। 19येशूसे थेनीगदेदा “ङादेन छ्याम भ्रउ, दाहेन्से ङाइ एनीगदेदा तार्ङा चुङ्बा म्हि आहिन, तर म्हिगदेदा परमेश्वर मुबा ग्लारी भबा म्हि स्होला” भिसी सुङ्जी। 20येशूसे थेह्रङ् सुङ्मैछ्याम, ह्राङला घ्याङ ख्लासी थेनीगदे येशूदेन छ्याम भ्रजी।
21थेग्याम फेप्बान लमा येशूसे जब्दियाला झागदे याकूबदेन थेला आले यूहन्नादा म्राङ्जी। थेनीगदे ह्राङला आबादेन छ्याम दोँगारी घ्याङ राबान मुबा। येशूसे थेनीगदेदाएनोन ङ्योइजी। 22येशूसे चुह्रङ् सुङ्मैछ्याम थेनीगदे दोँगादेन आबादा ख्लासी येशूदेन छ्याम भ्रजी।
येशूसे आखम्बा म्हिगदेदा खम्ना लबा
लूका ६:१७-१९
23येशू गालील अञ्चलला जम्मान ग्लारी फेप्सी यहूदीगदे ह्रुप तबा दिमरी म्हिगदेदा लोप्बान परमेश्वरला य्हुल्साला समाचार थेःना लजी। ओच्छे ल्हानान थरीला रोगसे स्याप्बादेन आखम्बा म्हिगदेदा खम्ना लजी।#मत्ती ९:३५; मर्कू १:३९ 24जमाहेन्से सिरिया य्हुल्सा नाङनोन येशूला बारेरी थेःजी। ओच्छे म्हिगदेसे ल्हानान थरीला रोगसे स्याप्सी दुख याङ्बागदे, म्हङसे स्याप्बागदे, स्ह म्हङसे स्याप्बागदेदेन काङ या चलब आतबा कुज्या म्हिगदेदा येशू मुबा ग्लारी भजी। जमाहेन्से येशूसे थेनीगदेदा खम्ना लजी। 25ओच्छे गालील, डेकापोलिस, यरूशलेम, यहूदियादेन यर्दन क्याम्सङहेन्सेला ल्हानान म्हिगदे येशूदेन छ्याम भ्रजी।
Currently Selected:
मत्ती 4: tajNT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2011, Wycliffe Bible Translators, Inc. and Eastern Tamang Language Team.