Luka 21
21
KuneꞋe ku vuka
(Mar. 12:41-44)
1Yesu punu a̱ A̱Ꞌisa̱ a Gbayin a biꞋi, ɗa u ka̱na̱i kinda aza a uciyi a̱ ka̱na̱i kuzuwa kuneꞋe ku le a̱ ubuta̱ u kuzuwa. 2Ɗa kagapa ka vuka ko yoku ku uta̱i ɗe, vuza vu unambi, ɗa u zuwai iyum i re.#21:2 La̱na̱ a kaci ku udani “Ikebe”, punu ɗe ka̱ta̱ vu la̱na̱ “Lapta” a̱ Ubuta̱ wi ili i Kuyeve. 3Ɗa Yesu u danai le, “Mi ta̱ a kudana ɗa̱ mayun, kagapa ka vuka vuza vu unambi vu nam pa u neke ta̱ ili i na i lazai uma a nan lo dem. 4Adama a na ele ta punu e nekei kenu a̱ ka̱tsuma̱ ki ili n a̱bunda̱i i na i n i ɗa. Amma n yali i ni dem u neke ta̱ ili i na wi n i ɗa dem a wuma u ni dem.”
Yesu u yaꞋin kene
(Mat. 24:1-2; Mar. 13:1-2)
5Mukumitoni n ni n yoku mi a kadanshi ka̱ A̱Ꞌisa̱ a Gbayin. Uteku u na i n tsuloboi ci kinda n atali n ili i tsuloboi i na uma e nekei Ka̱shile, n uteku u na i ukali. Ɗa Yesu u danai le, 6“Ili i na ye enei na dem, ayin i ta̱ lo a̱ kuta̱wa̱ a na ko katali ke te ki lo a kushamgba umatyamgbani gaɗi vu vutoku ba. Ra̱ka̱ vi le i ta̱ a̱ kufa̱da̱ le.”
Atakaci n kutakacika ku uma
(Mat. 24:3-14; Mar. 13:3-13)
7Ɗa e ecei ni, “Malum, wana ɗai ili i nam pa ya i kugita̱? Yi ɗa̱i kpamu ce kene ayin a na baci ili ya i gita̱i kuta̱wa̱ adama a na ci yeve?”
8Ɗa Yesu wu ushuki, “Yongoi ufoɓushi, ka̱ta̱ vuza u doro ɗa̱ ba. Uma n a̱bunda̱i i ta̱ a kuyaꞋan kadanshi adanshi ele ɗa Kishi. Ka̱ta̱ a dana, ‘Mpa ɗa Kirisiti Kishi ka,’ kpamu, ‘Ayin a yawa ta̱.’ Ka̱ta̱ yu ushuku ba. 9Ka̱ta̱ i pana wovon ba, ayin a na baci i ka̱na̱i kupana arabali o kuvon n vishili. Ili i nan lo i ɗa i kugita̱ kuta̱wa̱ biꞋi, amma nan lo dem, ka̱ta̱ uteku u yawa ba.”
10Ɗa u lyaꞋi kelime n kadanshi tsu nam pa, “Iɗika yi ta̱ o kuyongo vishili n iɗika i yoku. Tsugono kpamu nannai. 11Iɗika yi ta̱ a̱ kugita̱ kugba̱ɗa̱sa̱ uteku u ni. Kambulu ka gbayin ki ta̱ a̱ kuta̱wa̱ koɓolo m ma̱dukpa̱ a̱ ubuta̱ kakau dem. Ili i wovon n a̱bunda̱i yi ta̱ a̱ kuta̱wa̱ n urotu wi ili i gaɗi.
12“Kafu ili i nam pa ra̱ka̱ i ta̱wa̱, uma i ta̱ a̱ kuka̱na̱ ɗa̱ ka̱ta̱ a takacika ɗa̱. I ta̱ e kuneke ɗa̱ adama a na a yaꞋanka ɗa̱ afada a̱ unu a avasa, ka̱ta̱ a zuwa ɗa̱ a̱ unu a ugbashi. I ta̱ a kubanka ɗa̱ o ngono n anan gomuna adama a kula ku va̱. 13Ayin a nan lo a a ɗaɗa a gaꞋin i dana uma uteku u na uneki u ka̱ɗu u ɗa̱ wi. 14Ka̱ta̱ yo oꞋuso ka̱ci ka̱ ɗa̱ adama a ili i na i kudansa a̱ ubuta̱ wa afada ba. 15Adama a na mi ta̱ e kuneke ɗa̱ ili i na i kudansa, ka̱ta̱ kpamu n neke ɗa̱ kuyeve, adama a na irala i ɗa i kufuɗa ya lyaꞋa ɗa̱ n kadanshi ke le ba. 16Aza a̱ ɗa̱ i ta̱ e kuneke ɗa̱ we le. Ali n isheku i ɗa̱, ko nkoshi n ɗa̱, ali a̱ja̱Ꞌa̱ a̱ ɗa̱ a kuyaꞋanka ɗa̱ ta̱ nannai. A̱ ka̱tsuma̱ ka̱ ɗa̱, i ta̱ a kuna aza o yoku. 17Uma ra̱ka̱ i ta̱ a kuꞋiwan ɗa̱, adama a̱ va̱. 18Amma ko ka̱nji ke te a kaci ka̱ ɗa̱ ki lo a̱ kupuwa̱nka̱ ba. 19Shamgbai n utsura adama a na i ciya̱ wuma u ɗa̱.
Uteku u na a̱ kufa̱da̱ Urishelima
(Mat. 24:15-21; Mar. 13:14-19)
20“Ayin a na baci ye enei a kanzai Urishelima adama a kuvon, ka̱ta̱ i yeve i ta̱ a kuciga kufa̱da̱ a ɗa. 21Ayin a nan lo uma a na i Yahuda a suma a kubana a nsasan. Aza a na i punu a̱ likuci kpamu. Aza a na i ɗe kpamu a̱ ubuta̱ u yoku, ka̱ta̱ a suma o kubono a̱ likuci ba. 22Ayin a nan lo ayin a katsupu ka awuya kaꞋa a kubana a̱ ubuta̱ u uma, adama a na ili i na yi uɗani i shana.#Hos. 9:7. 23Ayin a nan lo a̱ma̱ci a na i n a̱tsuma̱ o kusoꞋo ta̱ atakaci, n aza a na i o kuwoꞋo nreɓu. Ili i wuya yi ta̱ a̱ kuta̱wa̱ a̱ ubuta̱ u uma, adama a na wupa u Ka̱shile wi ta̱ a̱ kucipa̱ gaɗi. 24Aza o yoku a kuyaꞋan ta̱ wuni n otokobi. Aza o yoku kpamu i ta̱ a kubanka le ugbashi a kubana iɗika kakau. Aza̱ka̱yimbi i ta̱ a kuna Urishelima, sai ayin a na ayin e le a shanai.
Kubono ku Maku ma Vuma
(Mat. 24:29-31; Mar. 13:24-27)
25“Ili kakau i savu yi ta̱ a̱ kugita̱ kuyaꞋan tsu urotu a̱ ubuta̱ u kanna, n wotoi, n azangata. Aduniyan dem i ta̱ o kokpo n atakaci n udamishi adama a̱ kura̱ n aɓau a mala. 26Uma a̱ kulima̱ ta̱ adama o wovon, adama ili i na i e kene n i na i a kuvana i na yi lo a̱ kuta̱wa̱. Ili i na yi gaɗi dem yu utsura i ɗa yi ta̱ a kugba̱ɗa̱sa̱. 27Ayin a nan lo a Maku ma Vuma mi ta̱ a̱ kuta̱ ɗe gaɗi n eleshu n utsura n tsugbayin dem. 28Ili i nam pa i gita̱ baci kuyawa, ɗenga̱i ka̱ta̱ i ɗengusa̱ a̱shi a̱ ɗa̱, adama a na ayin a na a kisa ɗa̱ a ɗa a yawa ta̱ ɗevu.”
YaꞋin cicoꞋo m ma̱biri
(Mat. 24:32-35; Mar. 13:28-31)
29Ɗa Yesu u danai le agisana a kadanshi a nam pa: “YaꞋin cicoꞋo m maɗanga ma̱ ma̱biri nu nɗanga n na m buwai. 30Ayin a na baci ye enei a̱vuku e le a̱ gita̱i kutopo, i yeve ta̱ lyushi i gita̱ ta̱ kuyawa. 31Ili i te kpamu ye ene baci ili i nam pa i gita̱i kuyawa, i yeve tsugono tsu Ka̱shile ci yawa ta̱ ɗevu.
32“Ciɓai ili i nam pa ya, dem i ɗa yi ta̱ a̱ kuta̱wa̱ kafu uma a anana o kotso. 33Gaɗi n iɗika i kupuwa̱nka̱ ta̱, amma kadanshi ka̱ va̱ ko ke te ki lo a kulaza ba.
U gaꞋan ta̱ ci yaꞋan cicoꞋo
34“Yongoi ufoɓushi ka̱ta̱ i shatangu ka̱ci ka̱ ɗa̱ n ka̱ɗiva̱ ko n ilyashi, ko n isoshi, koɓolo n udami wi ili ya aduniyan ba. Ta baci nannai ba ko n ka nan lo ka ki ta̱ a kuta̱wa̱ ka cina ɗa̱ babu ofoɓuso. 35Ki ta̱ a kuyaꞋan an maza ma na ma̱ kuta̱wa̱ a̱ ubuta̱ u uma wa aduniyan dem. 36Yongoi ufoɓushi n i yaꞋin kavasa ayin tutu, adama a na i ciya̱ utsura uteku u na i kuta̱ punu a̱ ka̱tsuma̱ ki ili dem, ka̱ta̱ kpamu i shamgba a̱ ubuta̱ u Maku ma Vuma.”
37Yesu u yaꞋan ta̱ ayin a nan lo dem o kuyotsongusu uma punu a̱ A̱Ꞌisa̱ a Gbayin. Amma kayin ka yaꞋan baci, u tsu uta̱ ta̱ ka̱ta̱ u bana a Kusan ku Zaitun. 38N usana ka̱lika̱li, uma a tsu bana ta̱ a̱ A̱Ꞌisa̱ a, adama a na a panaka yi, uteku u na wi o kuyotsongusu.
Currently Selected:
Luka 21: asgNT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2012 Wycliffe Bible Translators, Inc. All rights reserved