Mateo 11
11
Si Jesus wey si Juan Megbebewtismu
(Mateo 11:1-19; Lucas 7:18-35)
1Ne hein nepasad ni Jesus heini is kedseyseya zin te menge sug̵ù din dutun te sepulù wey zezuwa he sumusundan din, mid-awà sikandin dutun ne midhipanew su ibpenurù din wey ibpesavut din is Lalag te Megbevayà diyà te menge siringan dutun he inged.
2Ne ziyà te pirisuwan midtudtulan si Juan Megbebewtismu mehitenged te menge egkein-inuwan he mibeelan ni Jesu Kristu, ne midsug̵ù ni Juan is menge sumusundan din wey zan meinsai si Jesus. 3“Keleduwi key,” egkag̵i haazà is menge sug̵ù ni Juan diyà te ki Jesus, “ke iyan ke ve kes migkag̵i ni Juan he netagnà is kebpekeuma zin dini te kelibutan wey ke zuen pe be ebpeebuten dey.” 4-6Ne midtavak si Jesus te, “Likù kew en ziyà te ki Juan ne tudtula niw ziyà te kandin is nengeehè niw he mid-ulaula ku wey is nengezineg niw he egkeg̵iyen te menge etew. Iyan niw tudtula kandin he tenged kedì ebpemekeehè en is menge lakap, ne ebpemekehipanew en is menge piang, nengeulian en is menge it-iten wey ebpemekezineg en is menge vengel. Mibanhew ku is nemematey wey impesavut ku ziyà te menge egkengeayuayu is Meupiya he Tudtulanen. Utew deyzey is etew he kenà eduwazuwa he iyan a sikan is midsug̵ù te Megbevayà.”
7Ne hein nekeg̵enat en haazà is menge sumusundan ni Juan, migkag̵i si Jesus diyà te mezakel he nengetig̵um he menge etew, ke sikandin te, “Hein midhilesung niw si Juan diyà te tanà he wazà duen ed-ubpà he etew, hengkey is inhilesunga niw kandin? Iyan be ed-ahaan niw is etew he iring te sagbet he egkengewaleng te keramag? Kenà iyan haazà su kenà egkehalinhalin is gehinawa ni Juan. 8Midhilesung niw ve is etew he utew meupiya is bisti zin? Kenà daan, su is menge etew he iring dutun, diyè dà egkaahà te turug̵an te hadì. 9Ne hengkey is inhilesunga niw? Ed-ehè kew ve te etew he ebpeneuven te Megbevayà? Iyan haazà tutuu he ed-ahaan niw su ebpeneuven iyan si Juan. Iyan, kenà te ebpeneuven dà 10su pinaag̵i ki Juan netuman en kes netagnà diyà te insurat he Lalag te Megbevayà su migkag̵i zutun is Megbevayà te, ‘Iyan heini kes etew he edsug̵uen ku. Ibpehuna ku sikandin kenikew wey zin mehig̵ewani is ibayè nu.’ ” 11Ne mid-uman megkag̵i si Jesus te, “Tentenuzi niw he si Juan Megbebewtismu, wazè pa etew he nekelavew kandin, iyan, ke edhadì keuzemà is Megbevayà he ziyà te langit, is minsan hentei he etew zutun he ebpezumazuma te Megbevayà, minsan utew minus is pid-etawan din, ne lavew pa kenà si Juan guntaan. 12Puun pa zutun te kebpesavut ni Juan taman en guntaan, is Megbevayà he ziyà te langit, edteg̵el he mekehadì, ne edteg̵el zaan is menge etew wey zan mekepehadì kandin. 13Su is kedhadì te Megbevayà, netagnà dengan te langun he ebpeneuven te Megbevayà wey netagnà daan ni Moises su egkeehè ta ziyà te kesug̵uan he imbilinbilin din. Ne netagnà daan ni Juan. 14Ne emun edtuu kew te impesavut dan, egketuenan niw he iyan en si Juan si Elias su midtagnè dan is kebpekelikù ni Elias. 15Heini is nezineg niw, sevuta niw.
16Sikiyu is menge etew g̵untaan, iyan ebpetug-iringan ku keniyu is menge vatà. Su is menge vatà, ne ebpememimpinuu zan diyà te tiyenggiyan is ebevaleyvaley. Ne ebpeum-umawè dan is egkag̵i te, 17‘Edtemburan dey sikiyu ne kenè kew edsayew, ne edlelendag key ne kenè kew zaan edtampu.’ 18Su hein neehè niw si Juan is edsalang egkaan ne kenà daan ed-inum te vinu, ne migkag̵i niw he midsuukan sikandin te mezaat he mulin-ulin. 19Ne siak is Kakey te Menusiyà, wazà a medsalang megkaan ne mid-inum a mulà te vinu ne neinuinu kew ne migkag̵i niw he vuleg̵uk a wey pereinum te vinu. Ne ke sikiyu zaan he emig̵u a te menge lalung he etew iring te menunukut te vuhis wey menge mesinupaken. Iyan,” ke si Jesus, “egketuusan ta he utew metau is Megbevayà pinaag̵i te egkeveelan din.”
Is Kedhukumi te Kenà Edtuu
(Mateo 11:20-24; Lucas 10:13-15)
20Ne zutun, is menge meg̵inged kayi te menge inged he mibpaahaan ni Jesus te mezakel he egkengein-inuwan, midsawey zin su wazè dan iniyug̵i is memezaat he ulaula. 21Ne ke sikandin te, “Mekehizuhizu kew is menge tigKurasin! Mekehizuhizu kew zaan is menge tigBitsayda. Su is menge egkein-inuwan he impeehè ku ziyan te inged niw te menge Hudiyu, angin ke midhimu ku heini ziyà te menge inged he Tiru wey Sidun he kenà menge Hudiyu is meg̵inged dutun, su nekekukumbalè dan en pezem te saku ne nepen-evuwan dan is ulu zan he tuus te ed-iniyug̵an dan en is memezaat he ulaula. 22Kenè niw lipati he zutun keuzemà te andew te kedsusi te Megbevayà te menusiyà, lavew is idsilut din keniyu kenà te menge etew ziyà te Tiru wey Sidun. 23Ne sikiyu zaan,” ke si Jesus, “is menge tigKepirnaum, iyan egkesuatan niw pezem is delig̵a kew te minsan hentei, iyan, igketimbag kew ziyà te Impirnu. Su is egkengein-inuwan he impeehè ku ziyan te inged niw, angin ke ingkepaahà dengan diyà te menge tigSuduma su kenà egkezezeetan te Megbevayà is inged dan, ne kemulu pa pezem guntaan. 24Kenè niw lipati he keuzemà te andew te kedsusi te Megbevayà te menusiyà, lavew is silut din keniyu kenà te menge tigSuduma.”
Is Kebpengumew ni Jesus
(Mateo 11:25-30; Lucas 10:21,22)
25Ne zutun mid-ampù si Jesus he egkag̵i te, “Amey ku he Nengazen te langit wey tanà, dekelà is kebpeselemati ku kenikew su is in-eles nu wey kenà mesavut te menge uluwanen wey uvag en memetau, impesavut nu en diyà te menge etew he wazè dan menge hanew. 26Umba ebpeselematan ku su midhimu nu heini te iring kayi tenged te iyan egkesuatan nu tenged te g̵ag̵ew nu.”
27Ne mid-uman megkag̵i si Jesus diyà te menge etew te, “Is minsan hengkey, insarig kediey te Amey ku he Megbevayà. Wazà nesayud kedì te Anak te Megbevayà, kekenà, iyan dà is Amey ku he Megbevayà. Ne wazà daan nesayud te Amey ku he Megbevayà, kekenà, iyan e zà is Anak din wey sikan is menge etew he mibpengelinteuwan ku he mesayud dan kandin.
28Hendini kew te kediey, sikiyu is langun he nengeveley tenged te ked-uwit te menge meveg̵at he ulaula su ibpehimeley ku sikiyu. 29Beeli niw is idsug̵ù ku keniyu ne pepenurù kew kedì ne ebpekehimeley kew su kenà a eengeren ne kenà a ebpenlupig te minsan hentei. 30Is kedì he idsug̵ù keniyu, melemu; ne kenà mereg̵en is ebpeveelan ku keniyu.”
Currently Selected:
Mateo 11: mbbNT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2001, Wycliffe Bible Translators, Inc., All rights reserved.