Koroŋ Ta Boozomen Un 1
1
Anutu iur saamba mi toono mi koroŋ ta boozomen
1Indeeŋe ta matapopoten kat na, Anutu iur saamba mi toono mi koroŋ ta boozomen.#Yo 1:1,3; Kol 1:16; Ibr 11:3
2Mazwaana tana koroŋ sa ipet zen. Yok men ta imbotmbot. Mi ilala ma imarmar. Mi zugut ta izukkaala. Mi Anutu Bubuŋana tamen ta iwwa se yok tana.
3Mi Anutu iso: “Mat sa be iyaara!” To mat iyaara.#2Kor 4:6 4Mi Anutu ire mat tana ma ndabok, mi iut pa zugut ma imbot ndel. 5Mat tana, ni ipaata be aigule, mi zugut be mbeŋ. Mbeŋ imar ila, mi mankwoono na, iwe aigule mataana kana.
6To Anutu iso: “Koroŋ mbolŋana sa be ipet mi iyembut yok ma iwe ru.” 7Tana iur koroŋ mbolŋana ta ma iyembut yok ta imbot kor na ma imbot ndel pa yok ta imbot meleebe. Tana uraata tana ipet, ito ni kwoono. 8Koroŋ mbolŋana tana, ni ipaata be saamba. Mbeŋ imar ila, mi mankwoono mini na, aigule iwe ru pa.
9Mi Anutu iso: “Yok ta imbot meleebe na, be ilup la lele tamen, bekena lele raraazaŋana ipet.” To uraata tana ipet, ito ni kwoono. 10Lele raraazaŋana tana, ni ipaata be toono. Mi yok ta ilup la mbata na, ni ipaata be tai. Mi Anutu ire ma ndabok.
11Mi Anutu iso: “Zeere, mbutmbuutu, mi ke ŋononŋan matakiŋa be tindom ma tise pa toono, mi tipiyotyooto pwon mi ŋonon.” 12To koroŋ tana tindom ma tise, tito ni kwoono. Mi Anutu ire ma ndabok. 13Mbeŋ imar ila, mi mankwoono mini na, aigule iwe tel pa.
14-15Mi Anutu iso: “Koroŋ pakan be tipet sala saamba mi tiur mat pa toono, mi tiur mbut pa aigule mi mbeŋ, mi tiur seŋgaaŋa pa aigule, ndaama, mi gorgor pakan tomini.” 16Tana ni iur koroŋ bibip ru raama zin pitik. Koroŋ zazaŋana iyaara pa aigule, mi koroŋ raurauŋana na, iyaara pa mbeŋ. 17-18Ni iur koroŋ boozomen tana sala saamba, be tiur mat pa toono, mibe tiur mbut pa aigule mi mbeŋ. Mi Anutu ire ma ndabok. 19Mbeŋ imar ila, mi mankwoono mini na, aigule iwe paŋ pa.
20To Anutu iso: “Koroŋ kalaŋan matakiŋa be tipet ma tipepen yok mi tai leleene. Mi man matakiŋa be tipet ma tirie pa maŋaanaŋana.” 21Tana ni iur zin buzur zazaŋan ta timbot tai leleene, ramaki koroŋ matakiŋa ta timbot pa yok mi tai na, mi iur zin man tomini. Mi Anutu ire ma ndabok. 22To ipombol zin mi iso: “Kepeebe mi kamasak ma kepepen tai, yok, mi toono.” 23Mbeŋ imar ila, mi mankwoono mini na, aigule iwe lamata pa.
24To Anutu iso: “Koroŋ kalaŋan matakiŋa be tipet pa toono. Koroŋ ta kembei: Mbili kar kan, mi koroŋ su kan, mi koroŋ boozomen ta tikarra pa toono na.” 25Tana Anutu iur zin koroŋ tana, mi ire ma ndabok.
26Tona Anutu iso: “Iti ko tuur tomtom sa ma kembei ta iti. Ito itundu ruŋgundu. Mi ni ko imboro toono, mi ye, man, mbili, mi koroŋ boozomen ta tikarra pa toono na.”#Mbo 8:5; 1Kor 11:7; Ep 4:24
27Tana Anutu iur tomtom ma kembei itunu ruŋguunu.
Ni iuri ma irao kat itunu ruŋguunu.
Iur tomooto mi moori.#Mt 19:4
28Mi Anutu ipombol zin ma iso: “Kepeebe ma kamasak, mi karao pa toono ta boozomen. Mi komboro ye, man, mi koroŋ kalaŋan boozomen ta timbotmbot pa toono na, mi motoyom pa.
29Mi keleŋ, nio aŋur zeere, kini, mi mba ta boozomen piom be kakan. 30Mi koroŋ kalaŋan matakiŋa boozomen ta timbotmbot pa toono na, ina nio aŋur mbutmbuutu mi ke runrun pizin be tikan.” Anutu iso ta kembei, mi uraata tana ipet, ito ni kwoono.
31Anutu ire koroŋ boozomen ta iur zin na mi iso: “Wai! Iŋgi ambai komboono.” Mbeŋ imar ila, mi mankwoono mini na, aigule iwe lamata mi ta.#1Tim 4:4
Currently Selected:
Koroŋ Ta Boozomen Un 1: mnaNT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 1996, Wycliffe Bible Translators, Inc. All rights reserved.