Mattaayo 3
3
Yoohanahi Enenyet Baattissiyo Kiriisto jit ihara
(Marko 1:1-8, Luuka 3:1-18, Yoohana 1:19-28)
1Inkoo guꞌhassoo kuteen ka, Yoohanahi Enenyet Baattissiyo yimiyye, hidaaddi boroofenhi Yaꞌhuudiya ka Yeedi Waakh cheeke. 2Wihi us yidah, “Uskeeliin kasoonokhda, iꞌdi tahe dakhi goobi Waakh a soodowwaatee.” 3Yoohana a eti goorat eti Waákh íyeyyeedo Isaaya layadeeh ka lacheeke,
“Etoo hidaad ka a rirriira,
‘Kamur jit imujjummoocha,
jiti us leeyamiit ficcha,’” iche essa.#3:3 Isaaya 40:3.
4Yoohana la gaaddiis tinti gaale lakahaaggiche, saabi us dabar kakhabe la niibe lakahaaggiche, gololiis la a gubaal ichoow malab. 5Enenyet ilkerengeetti weene Yeerusaleem ichoow boroofenhi Yaꞌhuudiya tuumman ichoow ilkerengeetohi hawti Yoordane ꞌdusso idow tuumman kasoobahe, Yoohana iyimiyye, wihi us essi dagansate. 6Eti tuummane uskeeliis Waakh icheekte la, Yoohana hawti Yoordane ꞌdusso ka baattissiye.
7Iꞌdaasenyi Yoohana maanti us rabitti Farissaayo ichoow ti Sadukaayo ittaawenye iche laka baattissiyo timiy arge ka, wihi us iyidah, “Dessi toof! Ayyo atin tootooche ꞌdee holi Waakh dowwanoha ka keeno kafiriddaan? 8Taba gurnaanki saggi rumanka atin uskeel ikasoonokhatteen tuso dela. 9Taba la iisekkeysanna, ‘Aburaaham a aacchihaanya,’ eelanna. Wihi an atin icheeko, Waakh a geeddi us dagahta urgiyicho us nyaakhut nyaakhut Aburaaham#3:9 Nyaakhut nyaakhut Aburaaham waha mehe itoolla ya ꞌdooꞌdi iꞌdi Aburaaham u Waakh kakhuufo. kayeelo. 10Toolla laka Waakh iꞌdi eti uroti geeyo hiiyyay khabaani goosso dahan kakhabuu, geeyohi gurnaanki haaggan idelin tuumman a goocha ꞌdab goya iseya.”
11Yoohana toro wihi us yidah, “Ani atinhi tuummane uskeeliin kasoonokhatteen, bicche atin kabaattissiya. Iꞌdaasenyi etoo ꞌdubeey ka yamiit weyti ikaweenyahe, ortiis ka walah an ahe mele, kobtiis laka sinnaan ma muꞌdan. Us Rubeyti Munyee ka ichoow ꞌdab ka a atin baattissiya. 12Birtiisti gurnaan lakahafaricho, dahane kakhaba. Inti gurnaan lakatumo hara, ꞌdargaayyetiis koondi kichiba, urfo la ꞌdabi jirtuu ijitin goya kichiba.”#3:12 Chiirnaanka a geeddi iꞌda liikhaato. Ulla weeli enenyet tuummane hukkuma, ꞌdooꞌd seley saaha. Saggi orran golol koondi liikachibuu, ꞌdooꞌd gaasoo goobi Waakhe gessa. Saggi orran urfo liisaaho ꞌdab ka liigubuu la, ꞌdooꞌdi addan ꞌdabi armaanjireene goya kachiba.
Yeesso labaattissiya toro Rubeyti Munyee isooyegta
(Marko 1:9-11, Luuka 3:21-22)
13Saahka Yeesso boroofenhi Gaalilaaya kayimiyye, hawti Yoordane ꞌdusso ka Yoohana iyimiy, ꞌdee Yoohana usu baattissiya. 14Iꞌdaasenyi Yoohana usuhi Yeessó jeycho ꞌdoona wihi us iyidah, “Ati kootte incheenka ani ibaattissita, a iꞌdoh ani ikatamiit?”
15Iꞌdaasenyi Yeesso wihi us ilaabe, “Toolla iꞌda on a titaahe. A mujjum chiꞌinno iꞌda yeello, ꞌdee mali fissane Waakh buuhinno.” Yoohana ꞌdeerka wihi Yeesso iyidah ayyiche, baattissiye.
16Yeesso uus labaattissiye, chirraas on bicche goya kasoobahe. Chirraas on sereye bakkaahte, ulla Rubeyti Waakhe iꞌdi kutukuurrug u sooyegto sartiis koorrommatti arge. 17Hooyoo la serey kasooyeede, wihi us yidah, “Waha a Weeleeyki an weyti ꞌdoono, weyti ikahamaadicho.”
Currently Selected:
Mattaayo 3: rel
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2018, Wycliffe Bible Translators, Inc. All rights reserved.