Matiye 5
5
Iisa garkayyay giimi min kayaati jappiti
1Maa ga Iisa elliɗiy giimi ku maani kotti, gaa kalpiɗe jappiti ga nuntiɗe. Guu jobookeetee asiɗe saripti.
Giimi ku baarikenta
(Elloŋ Lik 6.20-26)
2Gaa Iisa diiliɗe ga garawɗiyo beneyti Mellayi gaa:
3«Baarikenta ay giimi ma ibina kadar gu arakke ɗa maatiki unti Mellayi,
asan ga Mella oyay gu un̰n̰iɗo mulunniti.
4Baarikenta ay giimi ma erecca,
asan ga Mella akkiy daddiba.
5Baarikenta ay giimi ku detta,
asan gu akkica gassa kiɗa maa ga Mella beneyye gaa ga beraaca.
6Baarikenta ay giimi ma aŋka gu nuntiɗo nunto tee ta ɗayaŋ unti Mellayi,
aleŋ giimi ku mayyeeta ma aŋka tiyaw o aleŋ ku ibinta ma aŋka aar̰o ammi
asan ga Mella akkiyooca oyya nunto taata maa gu deyekke.
7Baarikenta ay giimi ma kawayyayo oko gicco,
asan ga Mella akkiyoo kawiya kulla oko guta.
8Baarikenta ay giimi maa gu galbigeeco purta,
asan gu akkiya ella Mella.
9Baarikenta ay giimi ma lobokka ku maa gu giimi paracco nuntiɗo daana ka
asan ga Mella akkiy kolla gaa gu rontee.
10Baarikenta ay giimi maa gu deegeyyiy asan gu leewa gaari ma ɗayaŋ unti Mellayi.
Mella oyay gu un̰n̰iɗo mulunniti.
11Ku baarikenta guu giimi n̰elekkatoŋ o gu deegeyyatoŋ o gu bowokkatoŋ asan ku ay jobookeetaw. 12Kaaka pa ku parhinoŋ ta tirta o gu galbigeetoŋ oolu, asan ga Mella akkitoŋ bira haggane ta samaane ta tirta teete gonek samaani. Ay goŋŋa appe gu nabiinigee kulla ma ase omma min oko kuŋ gu diigiyɗiy.»
Deeme o deyyane
(Elloŋ Mark 9.50, 4.21, Lik 14.34-35)
13Gaa Iisa beneyɗiyo missa gaa: «Ay kuŋ ma ay deeme ka dunuuniti. A gaa belbeluwti deemi oole ku leewa pe kuu me ga deeɗo payya belbel? Gata gayee ɗa payya maatiki, illa gu soƴaa maaƴi renta, guu giimi waariyyee.
14«Kuŋ ay deyyane ta dunuuniti. Geegar ka geewenta kayaatí jappiti gederra ɗa ga deeɗo kiilenta. 15Gimu zegaa ɗa lampa maa ga zobokkati daakuwayyi, innasoopa ga zegaa maa ga gagiyya uwwa jeɗeŋ ku maa ga dawwayɗiyo oko giimi paracco ma aaye giiri. 16Ay goŋŋa appe gi deyyantoŋ deeɗo dawwiyenta unco giimo ku maa gu elliɗiy gaartoŋ ku samaane maa ku leewa guu logiyya Tattoŋ ma aaye samaani.»
Giraaniti Iisa ma gaari ku hukumnigeyyo
17Gaa Iisa beneyɗiyo payya gaa: «Aɗoŋ mooya ɗa kuu walaŋ na asee na asiɗiy misila hukumnigeetee Muusa o beneyyiŋgeeco nabiinigeyyo. Naa asee ɗa misilco, innasoo na ase ku maa gi Kitamniti Muusa o kutubgeeco nabiinigeyyo asiɗo butulco. 18Na beneyyatoŋca seene: Gaa samaane o kiɗa aaye aɗe goŋŋa, ga lekekka ɗa ya maatiki ka girrenta rootta n̰ekeɗes min Kitamniti Mellayi ma masalla, namma gu gaari paracco asiɗo butulco. 19Ay ɗakko appe ga gimu ma jobokkaca ɗa hukumne ta rommata ka kulla o ga garaayo oko giimo gaa gu leewu aleŋ tanti taata dewɗo koyyenta ƴiila mulunniti Mellayi. A gimu soopa ma jobokkay hukumnigee o ga garaayo oko giimo gaa gu leewu aleŋ tanti taata, akka dee tattuwe mulunniti Mellayi. 20A gata pa, na beneyyatoŋ, gii nuntitoŋ ta ɗayaŋ unti Mellayi ƴiilica ɗa ta aalimnigee ku Kitamniti Muusa o ta Pariziyennigeyyo, ku on̰aa ɗa mulunniti Mellayi.»
Giraaniti Iisa ma gaari ku boŋsiti
(Elloŋ Mark 11.25, Lik 12.57-59)
21Gaa Iisa beneyyiɗo missa gaa: «Ku giyye kadar ga Mella beneyyiyoo oko kookuweetine gaa: “Addo dee ɗa gimu ma aaniyo#5.21 Elloŋ Oomiti min Masir 20.13.!” Gimu ma deewa ma aaniyo pa gu katawki were ka caaɗiti parlanti. 22A naa pa beneyyatoŋ naa ga kulla gimu aɗe ma boŋossee oko giiti gu katawki were ka caaɗiti parlanti, o ma n̰elekka giiti gaa ga ay awaaka, gu katawki unco taattuwee ku parlanti, o ma n̰elekka giiti gaa ga ay kakkamu, ay tirta gu uwwiyya oko okko ma batakka ɗa ta kaw. 23A kii asaa ki asiɗo bira saɗikane oko Mellayi were ka sooƴiti saɗikaŋgeyyo, kii mooyiɗe kadar ga giicum lekkam gaari, 24ki duwca saɗikancum iŋaa unti were ka sooƴiti saɗikaŋgeyyo, kii deeɗiya diyya ƴa omma giicum ku maa gi aɗaɗɗitoŋ ku taaciɗo, hatta kii asicca bira ka pe saɗikancum oko Mellayi. 25Gaa gimu lekkam gaari, kuu katawɗo sawa were ka caaɗiti parlanti, ku taacoŋ koɗok ma gata maa ku alɗo missa butuuli, goneka kee ga gimu kaaka katawkum oko caɗaawa ka parlanti. Gaa caɗaawa kaaka pa birɗum picco asaakargeyyo. Guu guta pa issiɗum daŋayi. 26Naa pa beneyyamca seene, min iŋaa ki okomma ɗa namma ki pilkiyya ƴa omma tamanne paratti maa gu caɗawwiyam.»
Giraaniti Iisa ma gaari ku diyyiti daacco miɗaayo
(Elloŋ Matiye 18.8-9, Mark 9.43,47-48)
27Gaa Iisa gaayiɗe payya gaa: «Ku giyye kadar ga Mella beneyye gaa: “Ga miiɗi addo un̰n̰a ɗa oko daatti giiti o daate pa kulla gi addo issa ɗa mitti gattí#5.27 Elloŋ Oomiti min Masir 20.14..” 28A naa pa beneyyatoŋ, naa ga kulla miiɗi aɗe ma ellica daate ello ta aŋkiti, ooƴikiti paaɗe ɗakko galbanti. 29A gii iɗiicum ta tiyaawa esekkam zunubgeyyo, ki cimmica ki uwwicca maaƴi arro, asan gi samaane ƴiila ki misilɗo latta kaƴi min ziicum, min maa ga ziicum paratti gu uwwiyya okko ma batakka ɗa ta kaw. 30A gaa piccum ka tiyaawa esekkam zunubgeyyo, ki reepiya ki uwwiyya arro minnancum asan gi samaane ƴiila ki misilɗo latta kaƴi min ziicum min maa ki kaatiɗo paraccum oko okko ma batakka ɗa ta kaw.»
Giraaniti Iisa ma gaari ku cappiti oko daatti
(Elloŋ Matiye 19.7-9, Mark 10.4-5,10-12, Lik 16.18)
31Gaa Iisa beneyɗo missa gaa: «Ku giyye kadar gu beneyye kulla goo: “Gaa gimu capakkati oko daatti, ay tirta ga biritti katkat ta cappiti#5.31 Elloŋ Ɗillico Hukumnigeyyo 24.1..” 32A naa pa beneyyatoŋ, naa ga kulla miiɗi aɗe ma cappiti oko daatti o gi esekke ɗa miiɗi, n̰amakkaca gi issiɗo miiɗi gii icceero payya kaƴi, o gaa miiɗi icceero daate maa gu capakkiti ga gata kaaka kulla un̰n̰iti.»
Giraaniti Iisa ma gaari ku halpiyti
33Gaa Iisa beneyyiɗe payya gaa: «Ku giyye payya kadar ga Mella beneyyiyoo oko kookuweetine goo: “Aɗica ɗiima ɗa haliipincum, innasoo ki timmiyya maa ki halpayyiki unti Miltine kii ki leewa#5.33 Elloŋ Soƴoowee ku Saɗikaŋgeyyo 19.12 o Gemmico Giimi ku Isirayel 30.3 o Ɗillico Hukumnigeyyo 23.22-24..” 34A naa pa beneyyatoŋ, naa ku aɗoŋ halpiya ɗa ta waŋ, bala ga ma samaane asan ga were maa ga Mella nowoɗɗe, 35o bala ga ma kiɗa asan gi ay were ka gagaawi asintee, o bala ga ma seme ku Zerizalem asan gi geegarti oko sultan ka tatta. 36Addo halpiya ɗa ma kayaacum asan ki gederra ɗa ki leeɗiya laawu kaƴi ka kayaacum ga deeɗo purta e baŋ pa namta. 37Kuu oyaa ɗe ku oyyoŋ, kuu pocaa pa ku poocoŋ, maa ku gayaa kaaka pa, asaa min Seetanni, gata ma ay miltí miɗɗati.»
Giraaniti Iisa ma gaari ku eesiti
(Elloŋ Lik 6.29-30)
38Gaa Iisa gaayiɗe payya gaa: «Ku giyye kadar gu beneyye goo: “Kuu aŋka eeso, ku eesoŋ iɗe ma iɗe o saanu ma saanu#5.38 Elloŋ Oomiti min Masir 21.24 o Soƴoowee ku Saɗikaŋgeyyo 24.20 o Ɗillico Hukumnigeyyo 19.21..” 39A naa pa beneyyatoŋ, naa ku aɗoŋ eesa ɗa oko giimi ma laatoŋ miɗɗa. Gaa gimu ɗaacum gaamcum ta tiyaawa, ki ribileeca kulla gatti ta n̰ugila ga ɗaaciɗum. 40Gaa gimu aŋka ga kaatikkikum were ka parlanti ku maa ga icciyya kaɗiyyicum ka rootta, ki duwee kulla ga icciyya ka tatta. 41Gaa gimu asarrum gaa ki icce lawwi ki tan̰n̰iɗo ma alip asin, ga kii pa icceegu ki sarikki alpaŋgee seera asin. 42Gimu ma innum maatiki, ki biree o ma aŋka atallo maatikicum ki aɗe toɗɗa ɗa.»
Giraaniti Iisa ma gaari ku ƴekkiti giimi ma aŋkitoŋ ɗa
(Elloŋ Lik 6.27-36)
43Gaa Iisa beneyɗo missa gaa: «Ku giyye kadar gu beneyye goo ki ƴekkiya giicum#5.43 Elloŋ Soƴoowee ku Saɗikaŋgeyyo 19.18. o gimu ma aŋkum ɗa pa ki ɗakitiya. 44A naa pa beneyyatoŋ, naa ku ƴekkoŋgu giimi ma aŋkitoŋ ɗa o ku enewwaniyo Mella oko giimi ma deegeyyitoŋ. 45Ay goŋŋa appe ku deeɗo rontee Tattoŋ ma aaye samaani, asan ga gata en̰aayo paato oko giimi ma gidaani ɗa o oko giimi ma gidaani, o ga n̰akaayo ammi oko giimi ku ɗayaŋ o oko giimi ma ɗayaŋ ɗa. 46A kuu ƴekkay giimi ma ƴekkatoŋ ka pa, gi ay ini me pe hagganta maa ku gasakka? A sokookee ku miiri pa kulla maa gu giimi ɗakatte, leewa pe aleŋ taata aɗe. 47A kuu salamma seneetoŋ ka pa, ga ay ini me pe maa ku leewa ka samaane pile? A giimi ma aabadda ɗa Mella kulla, leewa pe aleŋ taata aɗe. 48Deyyoŋ ɗayaŋ aleŋ Tattoŋ ka samaani ma ɗayaŋ ta kaw.»
Currently Selected:
Matiye 5: mmy
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2019, Wycliffe Bible Translators, Inc. All rights reserved.