Mâreke 2
2
Jezü tchä ngâ köchë ndə̂ tche ngêwele
(Mat 9.1-8; Luk 5.17-26)
1Lə̂ angâ lö la tchêngbâ nə̈, Jezü dôtə̂ yê atə̂ Käpërënäyûmo. Azü âsə̈ dje rə̂ pä tche kä lə̂ manda, 2kpûlû azü nə̂ kə̈ zâ tchô gbɛ̂, ngâ kpîɛ̂kpîɛ̂ tchô wâbo-a, âdəndjë tchô də sûwu tchâtchu manda nə̈-a. Jezü sə̂ lakə̂ mu pö Ndjapä sə̈ andjê. 3Angâ azü nə̂ la ngâ akrə ndə̂ tche ngêwele sə̈ tchë, ndə̂ azü voanə̈ zâ tchë. 4Praâbalë köbo ndə̂kə̂ wutu la tchë ëtchâtchâ Jezü wâbo-a, bëte kpûlû azü nə̈. Andjë â la tchë dəpâ nda, kə̈ krô grʉ̈ kpôsə̂nə̈ ndə̂ Jezü sə̂ tâ, kə̈ jrê tchë la kʉ̈ngrʉ nə̈ kpô tchâtchu Jezü. 5Jezü wûn rə̂ ndə̂ andjë zâ su andjê gbɛ̂ sə̈ tchë, kə̈ tô rə̂ sə̈ akrə ndə̂ tche ngêwele lâme päkëdə̂: «Bechë ndə̂ mê, a kô pö lə̂ küma zə̈ nə̂.» 6Angâ a-earə̂ kə̂ nyisə̂ ndïɛ̈ ndə̂ andjë sə̂ tchâalê nə̈, sə̂ lakə̂ to rə̂ tə̂ su andjê päkëdə̂: 7«Bëte giamâ kä ndə̂ köchë âtə to pö kâkë? Tche sə̈ lakə̂ dro Ndjapä. Tchabâ kä ndə̂ âwâ ndə̂kə̂ ko pö lə̂ küma akrə? Kütû Ndjapä balë.» 8Jezü wûnsə̂ pö lâme tə̂ su andjê gasa-ê, kə̈ tô rə̂ sə̈ andjê päkëdə̂: «Bëte giamâ nyë sə̂ lakə̂ rɨ tchə̂lə̂ nyê käko-ë? 9Ndə̂kə̂ to rə̂ sə̈ ngâ akrə ndə̂ tche ngêwele päkëdə̂: ‹A kô pö lə̂ küma zə̈ nə̂›, âdəndjë ndə̂kə̂ to rə̂ päkëdə̂: ‹Alafô kə̈ zâ kʉ̈ngrʉ ndə̂ zə̈ kə̈ nə̂›, anə̈bâ kä ndə̂ âwâtə̂ mömö nə̈? 10Ndə̂kə̂ mbo rə̂ ânyë nyê wunsə̂ nə̈ pä Modô ndə̂ Akrə kä la gbôgbô ndə̂kə̂ ko pö lə̂ küma azü pâ cho âtə.» Jezü tô rə̂ sə̈ akrə ndə̂ tche ngêwele lâme päkëdə̂: 11«Më tö rə̂ sə̈ mö, alafô kə̈ zä kʉ̈ngrʉ ndə̂ zə̈, kə̈ gû atə̂ndə̂ zə̈.» 12Po tchâme, köchë nə̈ âlafô lə̂ la azü gbɛ̂, kə̈ zâ kʉ̈ngrʉ ndə̂ yê ânyë kə̈ gû gutə̂. Tchə̂lə̂ küma azü nə̈ gbɛ̂ djîngɨli, andjë vôga Ndjapä lakə̂ to rə̂ päkëdə̂: «Azə̈ wûn-âbo ngâ rə kâkë lo balë-a.»
Jezü ë Levï ndə̂kə̂ nə ngbâ yê
(Mat 9.9-13; Luk 5.27-32)
13Jezü kä dôtə̂ yê atə̂ maga gbölö kpakpa ngû ndə̂ Galilë, kpûlû azü nə̈ gbɛ̂ nə̂ pu tchë, ânyë tche sə̂ lakə̂ nyisə̂ rə sə̈ andjê. 14Ndə̂ tche âsə̈ ro, kə̈ wûn Levï modô ndə̂ Alefë ndə̂ tche sə̂ bêche sə̂nə̈ ndə̂ azü yo lapöo tâ. Tche tô rə̂ sə̈ tchë päkëdə̂: «Nə ngbâ mê.» Tche âlafô ânyë kə̈ zâ tchêngbâ yê. 15Pânə̈ Jezü ê ndə̂kə̂ zɨ rə bhâ tchâalê ndə̂ Levï. Angbängbä a-earə̂ kə̂ pala makətche-lapöo la a-earə̂ ngbongbo rə la adjisîpili ndə̂ yê sə̂ lakə̂ zɨ rə la tchë balë, bëte angbängbä azü nə̈ lâme kä ndə̂ âzâ tchêngbâ yê. 16Ndə̂ angâ afarizïɛ̈n ndə̂ andjë nyisə̂ ndïɛ̈ âsə̈ wun rə̂ ndə̂ andjë sə̂ lakə̂ zɨ rə la a-earə̂ ngbongbo rə la a-earə̂ kə̂ pala makətche-lapöo, andjë tô rə̂ sə̈ adjisîpili ndə̂ yê päkëdə̂: «Bëte giamâ kä ndə̂ tche zɨ rə la a-earə̂ kə̂ pala makətche-lapöo la a-earə̂ ngbongbo rə?» 17Jezü djê andjê kə̈ tô rə̂ sə̈ andjê päkëdə̂: «Âdə̂âbo azü ndə̂ tə̂ andjê wâ la sə̂nə̈ kä ndə̂ âe ndə̂kə̂ wun dokotöro-a, praâbalë kütû a-earə̂ tə̂kömbô kä ndə̂ âe ndə̂kə̂ wun tchë. Më nə̂âbo ndə̂kə̂ e adjîrə̂ azü-a, praâbalë më nə̈ ndə̂kə̂ e a-earə̂ ngbongbo rə.»
Pö ndə̂kə̂ kosə̂ kɨ̈zɨ̂ ndə̂kə̂ to pö sə̈ Ndjapä
(Mat 9.14-17; Luk 5.33-39)
18Tə̂ngâlo, adjisîpili ndə̂ Jâan-Batîse la afarizïɛ̈n sə̂ lakə̂ kosə̂ kɨ̈zɨ̂ ndə̂kə̂ to pö sə̈ Ndjapä. Angâ azü nə̂, kə̈ tô rə̂ sə̈ Jezü päkëdə̂: «Bëte giamâ kä ndə̂ adjisîpili ndə̂ Jâan-Batîse la adjisîpili ndə̂ afarizïɛ̈n kosə̂ kɨ̈zɨ̂ ndə̂kə̂ to pö sə̈ Ndjapä, ânyë adjisîpili ndə̂ zə̈ mbôâbô mbô tâ käko-ë?» 19Jezü tô rə̂ sə̈ andjê päkëdə̂: «Azü ndə̂ a e andjê ndə̂ kpülü ndə̂kə̂ totə̂ ndə̂ köchë la ɛ̈chë koadje sə̂ kɨ̈zɨ̂ ndə̂kə̂ to pö sə̈ Ndjapä, ndə̂ gbô köchë nə̈ ndə̂po lə̂ gûtə̂ andjê? Âdə̂âbo käko-a. Âdə gbô köchë nə̈ âsə lə̂ gûtə̂ andjê, andjë wâbo ndə̂kə̂ kosə̂ kɨ̈zɨ̂ ndə̂kə̂ to pö sə̈ Ndjapä-a. 20Praâbalë angâ alö ânəadje ndə̂ a zadje köchë nə̈ lə̂ gûtə̂ andjê, tə̂ lö nə̈ lâme kä ndə̂ andjë kosə̂ kɨ̈zɨ̂ ndə̂kə̂ to pö sə̈ Ndjapä.
21«Akrə srôâbo ndöma täfo lə̂ba ndə̂kə̂ sɨ rə̂ la ku bəndɨ nə̈-a, bëte täfo ndöma lə̂ba nə̈ âsroadje tchə̂lə̂ bəndɨ nə̈, ânyë ku nə̈ ge tə̂ gbölösə̂nə̈. 22Akrə wâbo ndə̂kə̂ su täfo pî lə̂ abəndɨ kədjâ-pî-a, ârə̂ âdəabô də̂ käko, pî nə̈ soadje tchə̂lə̂ kədjâ-pî nə̈ ânyë âtu gbɛ̂ ëbêche. Praâbalë akrə wä kütû ndə̂kə̂ su täfo pî lə̂ atäfo akədjâ-pî!»
Jezü la pö ndə̂ lö sabäa
(Mat 12.1-8; Luk 6.1-5)
23Lə̂ ngâ lö sabäa, Jezü sə̂ lakə̂ ro kulə̂ akɨ̈ndɨ̈ blë. Adjisîpili ndə̂ yê âsə̈ ro, andjë sə̂ lakə̂ krʉa angâ andjî blë nə̈ ndroma köbo. 24Afarizïɛ̈n tô rə̂ sə̈ tchë päkëdə̂: «Wunsaâ, bëte giamâ kä ndə̂ adjisîpili ndə̂ zə̈ mbo rə ndə̂ ndïɛ̈ kôsə̂ nə̈ pä a mbo rə̂ lə̂ lö sabäa?» 25Tche tô rə̂ ndə̂nə̈ sə̈ andjê päkëdə̂: «Rə ndə̂ Davîdi mbô rə̂ alême sə̂nə̈ ndə̂ gʉ nyû tchë la azü ndə̂ yê lâme, nyë dɨ̂âbo rə̂ dämba? 26Sə̂nə̈ ndə̂ Abiatäre wâtə̂ gbölö earə̂ kə̂ wa ngela sə̈ Ndjapä, Davîdi lî bhâlə̂ nda Ndjapä. Tche kʉ̂ amâpa ndə̂ a kʉ̂ rə̂ la ngela sə̈ Ndjapä, ndə̂ ndïɛ̈ zâ köbo kütû sə̈ agbölö a-earə̂ kə̂ wa ngela sə̈ Ndjapä ndə̂kə̂ zɨ rə̂ lâme, tche zɨ̂ rə̂, kə̈ kʉ̂ ndjë rə̂ sə̈ azü ndə̂ andjë zâ tchêngbâ yê.» 27Jezü tô rə̂ sə̈ andjê päkëdə̂: «A mbö lö sabäa bëte akrə, praâbalë a mbôâbo akrə bëte lö sabäa-a. 28Bëte rə̂ kä ndə̂ Modô ndə̂ Akrə wâtə̂ gbölö akrə pâ lö sabäa.»
Currently Selected:
Mâreke 2: lnl
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc.