Matie 16

Falizɩɛwa ‑nyɛ Sadwisɩɛwa 'sɔ lɛ Zezwii nɩ 'pänɩ ‑lɛ wa 'yila 'klʋ zɩzɛ

(Maakö 8.11-13; Lwiikö 12.54-56)

1'Ylɩ ‑bhlʋ 'mö, Falizɩɛwaa ‑nyɛ Sadwisɩɛwaa 'sɔ, wa gla'mö a ‑nʋä ‑mumuë, mʋa ghlɩɛ ‑mä Zezwii. Wa yɩbhä wa 'kɔ ‑mä 'pä zaa, wa lɛ naa: «‑N ‑kä ‑tiamö nɩɩ Lagɔ mɔɔ tiamöä nʋʋ, 'pänɩɛ ‑ka dɛ'ɛ ‑aa 'yila 'klʋ zɩzɛ, ‑a ‑kamö 'ylɩmö.» 2Zezwii lɛ naa: «[Ylʋʋ ‑kä bhlie mö, zlɩ ‑kä gbɛɛ ‑wʋ, a lɛ zlɩ a ‑zlɩɩ 'kää 'zɩgblɛ zɩ. 3'Zɔkpɔylʋʋ ‑kä zɩla'a 'wlʋʋ, 'n zlɩ ‑kä ‑zɛ 'wë, ɛ ‑kä'ɛ 'klʋ yuluu, a lɛ naa: 'Nyizakwëë 'kää zɩ'ɛ lɩbhä. A yɩbhlɩnɩ ylʋʋ ‑nyɛ 'nyizakwëa 'sɔ 'a 'tɛnyɩɩ, ‑maa ‑lii 'wuë ‑yɩ ‑wʋanyɩɛ 'tɛnyɩ nɩ 'mö 'yila 'klʋ 'plɩnɩ dɔ'wʋʋ, sɛ yɩ sɛɛ zɛmöö, a'aa bhɛnɩ a 'kä ‑sɩbhä yɩbhlɩnɩ.] 4‑Sɩkaa a nɩkpaa, nyɛlɩklɛwa wa glɩnɩɛ. Wa yɛa Lagɔ ‑gömö panɩ 'wë, 'n wa tɛlɩ'ɛɛ ‑bhlɛ zɩzɛ a ‑mɛɛ 'bhöönɔɔ kä'mö sɛ. Nyɩasɛli wa nʋä! Zɩzɛ ‑mɛmɛɛ 'nɩa'a ‑bhölɩ wa 'kää 'ylɩmö 'n ɛ 'nɩ ‑bhö Zonasɩ a ‑nɛɛ mɛ.» Sa'a Zezwii 'nyʋää 'dɩ 'wë, 'n ɔ yuëë ‑gömö panɩ 'n ɔ yiɛ mö.

Falizɩɛwaa ‑nyɛ Sadwisɩɛwaa 'sɔ 'a 'cɩawɛlɩɩ

(Maakö 8.14-21; Lwiikö 12.1-6)

5Zezwii ‑nyɛ 'ɔ ‑gänɩwaa 'sɔ, wa 'kää gɔlʋʋ 'mö gbälɛɛ yi wa 'kä ‑mä nyuu a kïkë ‑mä'la ‑gömö möö, 'ɔ ‑gänɩwaa dlʋ wa dlʋä, wa'aa 'fɔlɔ 'wʋ 'libhï. 6'N Zezwii yuëë 'dɩ 'mö 'zʋ, ɔ lɛ naa: «Falizɩɛwaa ‑nyɛ Sadwisɩɛwaa 'sɔ, a nɩ 'nɛmanɩ 'wa levii 'wʋ.» 7'Ɔ ‑gänɩwaa, sɛ wa pää dlɩ a dɔ'wʋ, wa'aa 'fɔlɔ ‑su a za Zezwii gbää ‑sɩbhä. 8Zezwii yɩbhlɩnɩɛ 'wa dlɩpäsaa, 'n ɔ yuëë nimï 'yɩbhä, ɔ lɛ naa: «'Saa bhä 'n a pä bhä dlɩ nɩɩ, a'aa 'fɔlɔ 'wʋ 'libhï a za n gbä sa'aa nɩ? 'A Lagɔ a dlɩtɛɛnɩtɛnɛɛ 'nɩɛ ‑zu lɛɛ! 9A'aa ɔ ‑bhlɛ 'mö 'nʋ ‑a? 'Fɔlɔbhï ngbï ‑kpɔ n dilanɩ a‑a nɩkpaa a 'dwi kʋgbä'sɔ, nɩkpaa gwlɩ kʋgbä ‑kpɔ (5.000), 'n wa li a‑a 'wë a ‑käkö a yiee 'fɔlɔkïbhï wa sɩɛnɩɛ 'wʋʋ, yɩ da, 'a dilaa 'nɩ bhä ‑lɛ pö ‑a? 10'N 'fɔlɔbhï ngbi'sɔ ‑kpɔ, n dilanɩ a 'yɛɛ nɩkpa a 'dwi kʋgbä ‑kpɔ (4.000), 'n wa li a‑a 'wë a ‑käkö a yiee 'fɔlɔkïbhï wa sɩɛnɩɛ 'wʋʋ, a kɩ bhä 'wʋ dlʋ ‑a? 11Zaa, n 'nyanyɩɛ 'dɩ nɩɩ, Falizɩɛwaa ‑nyɛ Sadwisɩɛwaa 'sɔ a nɩ 'nɛmanɩ 'wa levii 'wʋʋ, sɛ yɩ ‑wʋ ɔ 'mö, 'n a 'nɩ bhä sɛ yɩbhlɩnɩ nɩɩ, ‑tiamö a 'fɔlɔ a gbʋ n'n‑ä bhïla 'nɩ?» 12Zezwii gbää sa'aa, 'n wa yia'aa sɛ yɩbhlɩmanɩ nɩɩ, ‑tiamö a levii a gbʋ ɔ'ɔɔ bhïla, ‑maa Falizɩɛwaa ‑nyɛ Sadwisɩɛwaa 'sɔ, 'wa 'cɩacʋʋ, 'mö ɔ pälɩɛ levii 'wʋ, 'mö ɔ gbää wa nɩ 'nɛmanɩ 'wʋ.

Piɛlɩ lɛ Zezwii mɔɔ glɩnɩɛ Puënyɔɔ

(Maakö 8.27-30; Lwiikö 9.18-21; Zaa 6.67-71)

13Zezwii ‑nyɛ 'ɔ ‑gänɩwaa 'sɔ, wa 'tʋä nyuu 'wëë, bhlɩɩ 'mö mää ‑glɔ wa laa Filipö a Sezalee ‑wʋä, 'n wa yiɛ ‑mä ghlɛ. Wa ‑wʋ ‑mä, 'n Zezwii yuëë nimï 'yɩbhä, ɔ lɛ naa: «‑Amö Nɩkpɛ a 'Yu, nɩkpa lɛ ‑mɔ n glɩnɩ bhä 'nɩ?» 14Wa lɛ naa: «Nɩkpa ‑mumuë lɛ naa, Zaa Batisɩ mö ‑n glɩnɩɛ. ‑Mumuë lɛ naa, Elii mö ‑n glɩnɩɛ, ‑mumuë lɛ naa Zelemii mö ‑n glɩnɩɛ. ‑Mumuë lɛ naa, Lagɔ a bhla'mö a 'möbhïlanɩwaa a gla'mö a ‑nɔ ‑bhlʋ ‑n glɩnɩɛ.» 15Zezwii lɛ naa: «Miɛ abhlɩ, ‑maa a'bhï, a dɔ'wʋ ‑mɔ n glɩnɩ bhä 'nɩ?» 16Ɔ 'yɩbhʋää sa'a nimïï, 'n Simɔɔ Piɛlɩ yiɛ gbʋ ‑dɩ, ɔ lɛ naa: «Kliisɩ, Puënyɔɔ Lagɔ ‑sɛɛ ‑lɛ, Lagɔ ‑ɔ ‑bhölɩ a Yowli, mö ‑n glɩnɩɛ.» 17Ɔ gbää sa'a, Zezwii lɛ naa: «Zonasɩ ‑yowli Simɔɔ, 'mäna nɩ lɩbhamö. Ɛ'ɛ ‑bhö nyɩasɛ, ‑maa wɛlɩɩ ‑n bhïlaa dɛ'ɛɛ, nɩkpɛɛ ‑nɩmiɛ kɛ 'klʋ kälɩnɩ, ‑maa na dɩba ‑ɔ ‑wʋä ‑mä zlɩ 'möö, mɔɔ kälɩnɩmiɛ kɛ 'klʋ. 18Sɛ'ɛ n nyamöä 'dɩ nɩɩ, n laamöä Piɛlɩ, mɩɩ sɛɛ zɛmö nɩɩ kpayi. ‑Nmö kpayi, ‑nmö n 'kää na ‑nʋa 'klʋ 'wlu 'titanɩ. 'Kwie a'bhë 'naa 'kʋä ‑gömö bhɛnɩ. 19'Pɩwʋ mää Lagɔ 'kämanɩɛ a laklɩɩ, ‑nmö Piɛlɩ, ‑nmö n 'kɛ yowʋ 'nyɛ. 'Saa ‑n 'kää mä'ä dʋdʋ'wʋ gwaa, wʋ yi ‑mä zlɩ 'mö ‑gwa. 'Saa ‑n 'kää mä'ä dʋdʋ 'wʋ bulonɩɩ, 'wʋ yi ‑mä ghäyɩ 'wʋ ‑bulonɩ.» 20Zezwii gbää sa'a 'wëë, 'n ɔ yuëë wa 'wuë 'dɩ 'nyɛ nɩɩ: «Sɛ n glɩnɩɛ Kliisɩ, ‑lɛ a wɛlɩɩ, a nɩ ti nɩkpɛ 'nyɛ.»

Zezwii yɛ 'ɔ 'kwiea ‑nyɛ 'ɔ gluwlʋwlɛɛ 'sɔ a dɛ bhïla

(Maakö 8.31–9.1; Lwiikö 9.22-27)

21'Bhöönɩa'a da'a, Zezwii, 'saa 'kɔɔ ghlɩ a 'dɩ, gbëaa ɔ nyɩa'aa 'ɔ ‑gänɩwaa 'yize, ɔ lɛ naa: «'Saa Lagɔ yɩbhää ‑yɩ ‑kaaa ghlɩɩ miɛ nɩɩ: ‑Mä Zeluzalɛɛmö, ‑mä n 'kää mö. Zwiiföwaa 'a 'kädɩ 'wuë, ‑mä wa ‑kaaa 'zwɩ a ‑bɛ zianɩ. 'Wa 'nɛɛnɩwa 'kädɩɩ muë, 'wa Lagɔbʋbɔwaa a 'kifiea muë, 'n Moyizɩ 'a Gböö a 'cɩawaa, wa 'wuë, wa yi 'nglɩ ‑kä, wa ‑yii 'lɩbhä n yi 'ku. ‑Maa n ‑kä 'ku 'wë a ylɩɩ a tanɛɛ 'mö, n yi glu 'wlʋ.» 22Zezwii gbää sa'aa, Piɛlɩ 'nɩɛ ‑wa, 'n ɔ ‑nyɔɔ yiɛ zigbanɩ, 'n ɔ yoo 'dɩ 'nyɛ nɩɩ: «‑Alowli, Lagɔ nɩ 'dianɩmö sa'a a ‑li gwë, yɩ'ɩɛ ‑kä yɩ ‑kamö ghlɩ 'lɩlɩlɩ.» 23Piɛlɩ gbää sa'aa, 'n Zezwii yoo ‑gömö panɩ, ɔ lɛ naa: «Sataa, 'dionɩɩ gwë! ‑Nmö Piɛlɩ, ‑na'a dlɩpäsaa 'nɩɛ Lagɔsɛ ‑wʋ 'lɩlɩlɩ, ‑maa nɩkpɛsɛ ‑n pää dlɩ. Sɛ ‑n gbää da'a a dɔ'wʋ, ‑n yɩbhä n nɩ ‑sɛ Lagɔ 'klʋkpamö.»

Sɛ ‑a kää ‑a 'kä Zezwii ‑gänɩɩ

(Maakö 8.34–9.1; Lwiikö 9.23-27)

24'N Zezwii yiɛ 'ɔ ‑gänɩwaa 'dɩ 'nyɛ nɩɩ: «‑Ɔ ‑kä ɔ ‑kaa ‑gänɩɩ, ɔ nɩ ‑sɛ ɔnyɩ dlɩ. Ɔ nɩ ‑su 'ɔ 'klʋkʋnɩsuu ɔ ‑kaa ‑gänɩ. 25Ɛ'ɛ ‑bhö nyɩasɛ, ‑maa ‑ɔ ‑kä 'ɔ pɩwʋʋ 'wʋ gwɩ ɔ 'käa 'pʋ a za‑a, mɔɔ 'kää 'yli bhɩɛ. ‑Maa ‑ɔ ‑kä ɔnyɩ dlɩ ‑sɛ ɔ 'kä na gbʋ 'mö 'kuu, ɛ nɩkpɛ 'la, mɔɔ 'kää 'pʋ. 26Sɛ'ɛ n gbää nɩɩ, ‑n ‑kä mä'ä 'pɩwʋ a ‑lii 'wuë ghlɩ, n‑n ‑käa'a 'ku 'wëë, ‑lɛ a ‑li 'la, yɩ'ɩa'a dɛsɛ ‑kä ‑na dɔ'wʋ. 'Saa nɩkpɛ 'kää 'wäla ɔ tɩa 'ku a za‑a, wʋ'ʋä ‑bhölɩ. 27'Dɩ n nyanyɩɛ dɛ'ɛ nɩɩ, zɩla'a ‑kä yii, Nɩkpɛ a 'Yu, ɔ yi ‑mä ɔ dɩba Lagɔ yɔwʋ 'bhöö, ɔ yi mä'ä dʋdʋ 'wʋ yi, ɔ ‑nyɛ 'ɔ Lagɔzuzukuu 'sɔ. ‑Lɛ a dɔ'wʋ, Lagɔ 'a 'ghïlinɔɔ mʋʋ 'kɔɔ ‑gömö ‑wʋ ɔ 'kä yi. ‑Lɛ a zlɩ 'la 'mö, nɩkpaa 'wuë, bhʋlʋbhlʋ, Lagɔ 'kʋä 'wa 'saa wa nʋä a 'pɛna 'nyɛ. 28Tiamö n nyanyɩɛ dɛ'ɛ 'dɩ nɩɩ, Nɩkpɛ a 'Yu, 'ɔ 'kämanɔɔ ‑wʋ 'kää 'yli 'wlʋnɩɩ, a gla'mö a ‑mumuë ‑wa glɩɛ dɛ'ɛ wa 'naa 'kää ‑bhlɛ 'ku, 'n wa 'nuä 'ylɩmö 'wëë.»

Currently Selected:

Matie 16: bet

Qaqambisa

Copy