लूका 12
12
कपट करणे बारे यीशु चेतावनी
1ई हेरते हेरते हजारों मेह्णु कठे भोई गे कि खुर रखुंण जे बि जगाह ना रेही। त यीशु खास कइ अपु चेली जे बोलुण लगा, “फरीसी के कपटी सभाव केआं तुस बचे, जे कि टकेणे ईं असा।#मत्ती 16:6; मरकुस 8:15 2ईं कुछ ढकिये नेईं, जे सामणि ना एईयेल, ना कुछ नियको नेईं जे बाहर न निस्तु।#मरकुस 4:22; लूका 8:17 3तोउं त, जे बि तुसी अकेले अन्तर बोलो असु, से सोबी के सामणि शुणतु; त जे तुसी कनपत बुलो असी, से लहाड़ केईआं जोरी जोई बोली घेन्ति।”
केस केआं डरुं?
मत्ती 10:26-31
4“में मितरों! अउं तुसी जे बोता कि जे सद जिसम मार सकता, पर तस केआं ज्यादा होरु कुछ ना कइ सकता, तस हेर ना डरे। 5अउं बतान्ता कि तुसी केस हेर डरुण चहिए। जे मार कइ तोउ नर्क अन्तर छइ सकता तस हेर डरे। आं, अउं तुसी जे बोता कि तसे हेर डरे। 6कि किछ रुपेई बइ पंज चड़ी न बेचीन्ति ना? फि बि परमेश्वरे तेन्हि यक जेईं बि ना बिसरीन्ता। 7तुं मगरे छते बि सोब गणो असी। तोउं त डरे नउ, किस कि तुं कीमत सुआ चड़ी केआं बि बध कइ असी।”
यीशु मनण या ना मनण
8“अउं तुसी जे बोता कि जे कोउं मेह्णु के सम्हाणि मोउं मनाल त से मनखे कुआ बि परमेश्वरे स्वर्गेदूती के सम्हाणि मानता। 9पर जे मेह्णु के सम्हाणि मोउं ना मनाल त तेसे अउं बि परमेश्वरे स्वर्गेदूती के सम्हाणि ना मानता। 10जे कोउं मनखे कोईये बुराई कता, तसे से पाप माफ भोई सकता, पर जे शुची आत्माई बुराई कता, तसे से पाप कदी माफ ना भुन्ते।#मत्ती 12:32; मरकुस 3:29 11जपल मेह्णु में बझई जुए तोउ जब्बरदस्ती टजोट त अफसरे त होरे अधिकारी सम्हाणि जे नियेल त तु इ चिन्ता ना कर कि कीं बोलुण त कीं जवाब देण।#मत्ती 10:19,20; मरकुस 13:11; लूका 21:14,15 12किस कि शुची आत्मा तोउ तपले शिचालती कि तोउ की बोलुण असु।”
यक अमीर मुर्खे कथा
13फि हुसुड़ा केआं यक केनि यीशु जे बोलु, “ए गुरु, में भाई जे बोल कि बोउए जे धन असा, तसे हेस्से करे।” 14त तेन तस जे बोलु, “ए मनखा, अउं ना तुं केनि पंच बणओ असा, होर ना तुं हेस्सा पाणि केहेरणे बाड़ा बणओ असा।” 15त तेन तेन्हि जे बोलु, “हेरी बिश, त सोबी लालच केआं अपफ बचाई रख; किस कि धने बेलि केसेरी जिन्दगी लम्मी या छोटी ना भुन्ति।” 16त तेन तेन्हि जे यक कथा शुणाई। “केसे जिमदारे जिमि अन्तर सुआ अनाज भुओ। 17त से अपु मन अन्तर सोचुण लगा, ‘अब मोउं की करुण? किस कि मोउं केईं एती जगाह नेईं कि अउं अपु अनाज रख सकुं।’ 18तेन अपफ जे बोलु, ‘अउं ई कता। अउं अपु पुराणे केंचार टोड़ कइ तठि नोउआं मोटा केंचार बणान्ता त तठि अपु सोब अनाज छता 19त अपफ जे बोता कि मेईं अपफ जे केहि साले लिए अनाज कुठु कइ छो असु, त अभेईं अउं खांता, पीन्ता त सुखी बिश्ता।’ 20पर परमेश्वरे तस जे बोलु, ‘ए मुर्खा! आज रात तें प्राण तोउ केआं नी घेण असे। त जे कुछ तेईं कुठु किओ असु, से केसे?’ 21इरुही से मेह्णु असा जे सद अपफ जे धन किठेरता, पर परमेश्वरे सम्हाणि से गरीब असा।”
परमेश्वरे पुठ यकीन रखे
22फि यीशु अपु चेली जे बोलु, “तोउं त, अउं तुसी जे बोता कि अपु प्राणी चिन्ता ना करे कि ‘की खाण असु’, त अपु जिसमे चिन्ता ना करे कि ‘की डबुण असु।’ 23किस कि रौठि केईआं प्राण त झिणे केईआं जिसम बध कइ असा। 24कागी कें धे हेरे; से ना त बांते होर ना लुणते; होर ना तेन्हि केंचार रखो असे; फिर बि परमेश्वर तेन्हि पाड़ता। त कि तुस तेन्हि चड़ी चखुरु केआं बि बध नेईं ना? 25तुसी अन्तर कि कोउं ईं असा ना जे चिन्ता कर कइ यक पल बि अपु उमर बधाई सकता? 26त अगर तुस सोच सोच कइ अपु जीवन यक म्नट बधाई ना सकते त होरे चीजी लिए किस सोचते रेहन्ते? 27धारे फियुड़ हेरे! से कीं अब्बल अब्बल झिणे डबते। से ना अपु झिणे सिआन्ते, होर ना कमान्ते। अउं त बोता कि तोउं बि राजा सुलैमाने अपु सम्हाई अमीरी जुए बि एन्हि धारे फियुड़ के ईं अब्बल झिणे लाई ना बटे। 28तोउं त, परमेश्वर घास जे, जे आज असु त शुई फुकी घेन्तु अगर अतु अब्बल सजान्ता त ए कमजोर विश्वासी! त से तुसी तढ़िया बध कइ किस ना लवान्ता? 29त तुस इन्हि बोकी के बारे ना सोचे कि की खाण, त की पीण असु, होर ना चिन्ता करे। 30किस कि मतोके अविश्वासी मेह्णु ईं अस चीजी तलाश अन्तर रेहन्ते। पर तुं बोउ जाणता कि तुसी इन्हि सोब चीजी के जरूरत असी। 31त तुस पेहले परमेश्वरे राज्य तोपे। तोउं ए चीज बि तुसी मेई घेन्ति।”
स्वर्गे धन
32“में ट्यारे मितरों! ना डरे; किस कि तुं बोउ ई पसंद असु कि तुन्धे अपु राज्ये सम्हाई धन दिए।#रोमी 8:32 33अपु धन बेच कइ दान करे; त अपफ जे यक इ बटुआ बणा, जे कि कदी पुराणा ना भुन्ता, मतलब स्वर्ग अन्तर ई धन कठेरे, जे कि ना घटता, ना तस चोर नेन्ते, होर ना तस कुण लगते। 34किस कि जेठि तुं धन असा, तठि तुं मन बि लग घेन्ता।”#12:34 अउं ए तोउं बोता किस कि तुस अपु मन अन्तर जे सोचते, से तुसी जे बोडु कीमति असु। अगर तुस स्वर्गे बारे सोचियेल त तीं तुस बरतान्ते बि।
चौकाने बिशे
35तोउं यीशु बोलु “अपु मझीन बन्हि कइ सेवा करण जे तेयार भोई कइ खड़ खड़ बिशे।#मत्ती 25:1-13 36तुसी तेन्हि नौखरी के ईं बणुण जे अपु मालिक भाड़ बिशो भुन्ते कि तेसे मालिक ब्याह केआं कपल एई कइ दुआ घमकान्ता त तस जे झट दुआ उघाड़ुं।#मरकुस 13:34-36 37तेस नौखरे मज्जा असा, जेसे मालिक एई कइ से खड़ खड़ मेता। अउं तुसी जे सच्चु बोता कि से तेस नौखर सेवा करण जे त रौठि खिलाण जे तेयार भोई घेन्ता। 38अगर से नौखर तसे मालिक राति भइ खड़ खड़ मेईंयाल त तसे मालिक तसे धे सुआ ईनाम देन्ता।”
39चौकाने बिशुणे बारे यीशु ईं बोक बि लाई “तुस इ समझे कि अगर गीहे मालिक जाणताथ कि चोर रात कपल एन्ता, त से अपु गी कदी चोरुण ना देन्ता।#मत्ती 24:43,44 40त, तुस बि तेयार बिशे, किस कि जेस घड़ी बारे तुस सोचते बि नउ, तेस घड़ी मनखे कुआ एन्ता।”
41तोउं पतरसे बोलु, “ए प्रभु, कि इस कथा तु असी जे बोता ना कि सोबी जे बोता?” 42त प्रभु बोलु, “से यकीन लेएक त ज्ञानी लिखणार कोउं भो, जेसे मालिक दूर देश घेण केईआं पेहले अपु नौखरी के सरदार बणाल कि से तेन्के धे टेम पुठ रौठि दियेल? 43धन्य असा से नौखर, जेस तसे मालिक ईं कता हेरियाल। 44अउं तुसी जे बोता कि से मालिक अपु पूरी घरबार जिम्मेबारी तसे धे देन्ता। 45पर, अगर से नौखर अपफ ई सोच कइ कि ‘में मालिक चेरे एन्ता’, अपु साथी नौखरी नौखराणि मडण लगियाल, त खाई पी कइ प्याकड़ भोई घियाल 46त तेस नौखरे मालिक ईं रोज त ईं घड़ी एन्ता जपल तसे कोई उम्मीद ना भोल, होर ना तेन सोचो भोल। तोउं से तस भयंकर सज्जा देन्ता, त तस बेपरवाह नौखरी के जगाई छता। 47जे नौखर अपु मालिके इच्छा जाणता, पर तेयार ना बिश्ता, होर ना तसे इच्छाई हिसाब जुए चलता, से सुआ मार खांता। 48पर जेन अणजाणे अन्तर मार खाणे बाड़ु कम किओ असु, से धिखुभई मार खांता। तोउं त जेसे धे सुआ दुतो असु, तस केआं सुआ नी छाण असु, त जेस केईं सुआ छो असु, तस केईआं हउ बि सुआ मगीन्तु।”
यीशु एणे फल
मत्ती 10:34-36
49तोउं यीशु बोलु, “अउं धरती पुठ मेह्णु बुच आग जाण जे अओ असा; त चहता कि अभेईंए ईं भोई घियेल।#लूका 3:16-17 50पर पेहले मोउं यक भयंकर कष्ट अन्तर चुसीण असु। त जपल तकर से भोई ना घियेल, मोउं सुआ कष्ट सीढ़ण एन्ता!#मरकुस 10:38 51तुस कि समझते ना कि अउं धरती पुठ मेह्णु मेल मिलाप कराण जे अओ असा? अउं तुसी जे बोता कि ना, बल्कि अउं मेह्णु झगड़ाण जे अओ असा। 52किस कि अभेईं केआं खड़ यक गी अन्तर पंज मेह्णु अपफ बुच बैर रखते, टाई दुई जुए त दुई टाई जुए, 53बोउ अपु कुआ जोई, त कुआ अपु बोउ जोई बैर कता; ई अपु कुई जोई त कुई अपु ईया जोई, होर बेउठी अपु राणी जोई त राणी अपु बेउठी जोई बैर कती।”
परमेश्वर जुए मीणे टेम पिछाण
मत्ती 16:2-3
54त यीशु हुसुड़े जे बि बोलु, “जपल तुस बदेए पश्चिम दिशा केआं उडरते हेरते त तपले ईं बोते कि मेघे लगणे बाड़ी असी, त तीं भुन्तु बि; 55त जपल दखण दिशाई कनारा ब्यार लगती त बोते, गरमी एण बाड़ी असी, त तीं भुन्तु बि। 56त ए कपटियो, तुस धरती त अम्बरे निशाण हेर कइ पता लाई बटते कि की भुण लगो असु। त फि तुस इस जुगे निशाण हेर कइ किस पता लाई ना बटते?”
अपु दुश्माण जुए नेहरा-केहरा करण
57“तुस किस ना हेर बटते कि तुसी अभेईं की करुण सही असु?#12:57 अभेईं परमेश्वरे पंची एणे बाड़ी असी, त यक सही कम असु जेस करुण लौतु। से भो “परमेश्वर जुए मीण”। किस कि से न्यायी परमेश्वर भो। 58शुणे, जपल तु अपु दुश्माण जुए पंच केईं घेण लगो असा त बते ईं नेहरा-केहरा करण जे तेयार बिश। किस कि ईं ना भोल कि से तोउ पंचे धे दी छड़ियेल, त पंच तोउ ठाणेदारे धे दी छड़ियेल। त ठाणेदार तोउ जेहेल अन्तर छइ छड़ियेल। 59अउं तुसी जे बोता कि जपल तकर तु यक यक टके हिसाब ना दियाल, तोउं तकर तुं तठिआ बाहर एई ना सकता।”
Currently Selected:
लूका 12: pgg
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2023 (Active) Wycliffe Bible Translators, Inc. All rights reserved.