Ruuka 20
20
Yeesu ꞉aasoosiisye aaki obhuturo bhwaye
(Mataayo 21:23‑27; Maariko 11:27‑33)
1Rusuku rumwi, omwanya gunu Yeesu aariga ari mu‑rubhuga rwa Riyekaru rya Nyamuwanga ˆneeyigisyaga abhaanu, na okubharaasisya Emisango ja Ekisi, abhakuru bha abhagabhisi, abheeyigisya bha ebhiraagiro bhya Muusa aamwi na abhakuru bha Abhayawudi nibhamuuja‑ko. 2Nibhamubhuusya ati, “Emisango jinu owukora, owujikora ku‑bhuturo ki? Niga unu ꞉aakuyaaye obhuturo bhunu?”
3Yeesu ˆnaabhabhwira ati, “Anye wone siga nibhabhuusye ribhuusyo rimwi, mumbwire, 4angu, obhuturo bhwa Yowana Omubhatiija okubhatiija abhaanu, ꞉bhwasookere aaki? ꞉Bhwasookere ku‑Nyamuwanga unu ari mu‑rwire tere ꞉bhwasookere ku‑bhaanu?”
5Niwo nibhaamba okwayikana abheene kwa abheene ati, “Araabha chikamubhwira ati ꞉bhwasookere ku‑Nyamuwanga, kaja okuchibhuusya ati, ‘Mbe, kurwa ki ꞉mutaamwikirisiisye?’ 6Ka wone, chikaayika ati, obhuturo bhwaye ꞉bhwasookere ku‑bhaanu, abhaanu bhoone bhanu bhari anu, abhaja okuchibhuma na amabhuyi, kwa okubha abheekirisya ati, Yowana aariga ari muragi wa Nyamuwanga.” 7Kurwa ejo, nibhamubhwira ati, “Chitakumenya ati, obhuturo bhwaye ꞉bhwasookere aaki.”
8Yeesu ˆnaabhabhwira ati, “Noorwo anye wone, nitakubhabhwira unu ꞉aanaaye obhuturo bhwa okukora emisango jinu enikora.”
Yeesu keenganyirisya abhakuru bha Abhayawudi na abharimi abhajabhi
(Mataayo 21:33‑46; Maariko 12:1‑12)
9Niwo, Yeesu ˆnaagenderera okubhwira abhaanu echijekekanyo echindi ati, “Aariga ari‑wo omuunu umwi. Omuunu oyo, ꞉aayambire emijabhiibhu mw‑isambu ryaye, ˆnaariweekesya ku‑bharimi abhandi. Neeya, ˆnaajira orugendo rwa okuja mu‑chaaro cha kura, ˆnaamara eyo omwanya omureera. 10Omwanya gwa okugesa gwejire gwakinga, ˆnaatuma omugaya waaye ku‑bharimi abho, korereki bhamugabhire‑ko amatwasyo amarebhe ga emijabhiibhu. Nawe abharimi abho, nibhabhuma omugaya oyo, nibheeya, nibhamubhirimya ngaro nyeru.
11“Ka wone omwene esambu oyo, ˆnaatuma omugaya waaye owundi. Oyo wone nibhamubhuma na okumuswasya, nibheeya nibhamubhirimya ngaro nyeru. 12Ka wone ˆnaatuma omugaya wa kasatu. Oyo wone nibhamubhuma, nibhamuwutaasya muno, nibhamujuguna anja ya risambu.
13“Mbe, omwene esambu oyo, ˆneeganirisya ati, ‘Woori, nikore kutiki? Siga nitume omwana waani omwendwa! Amwi, omwene abhaja okumuyaana echibharo.’ 14Nawe, abharimi bharya bhejire bhaamurora, nibhaayikana ati, ‘Unu niwe aryanjura risambu rinu. Chimwite, omwandu gwaye gunu gubhe gweswe.’ 15Mbe, nibhamusoosya mw‑isambu omwo, nibhamwita.”
Neeya, Yeesu ˆnaabhabhuusya ati, “Woori, omwiganirisya ati, omwene esambu rya emijabhiibhu oyo, omwanya gunu ariija, arikorera ki abharimi abho? 16Ariija abhasingaarisye bhoone, aribha aamara ariweekesya risambu eryo ku‑bharimi abhandi!” Abhaanu bhanu ꞉bhoonguuwe emisango ejo, nibhaayika ati, “Wuri, ejo jaasiga okukorekana siku joone!”#20:16 Abhaanu bhanu bhaariga nibhategeresya ꞉bhaamenyere ati, echijekekanyo cha Yeesu echaayikira abheene ati, abhaja okumwita. Ringira Iisaya 5:1‑7.
17Neeya, Yeesu ˆnaabharingira nekeneke, ˆnaabhabhuusya ati, “Mbe, obhugajuro bhwa Ebhikaame bhinu niki?
‘Ribhuyi rinu abhoombaki ꞉bhaaremere,
niryo ryabha ribhuyi rinene rya orufuka.’
18“Mbe, omuunu woonewoone unu kaja okugwa kw‑ibhuyi eryo, kaja okufunikafunika. Ka wone, omuunu woonewoone unu ririgwira, ririmusya.”
19Abheeyigisya bha ebhiraagiro bhya Muusa na abhakuru bha abhagabhisi, nibhasombookerwa ati, echijekekanyo echo echaayikira abheene. Kurwa ejo nibheenda okumugwata awoawo, nawe nibhoobhaya abhaanu.
Abhaanu abheetegaanira Yeesu
(Mataayo 22:15‑22; Maariko 12:13‑17)
20Kurwa ejo, abhakuru abho, bhaariga nibheetegaanira okugwata Yeesu. Mbe, nibhatuma abhatatirisya bhagende bhamubhuusye amabhuusyo. Abhatatirisya abho, nibheekora wuti ni bhaanu bharengeresi. Nawe, bhaariga nibhayenja injira ya okugwata Yeesu ku‑misango jaaye, korereki bhagende okumusitaaka ku‑mutungi wa Echiruumi.
21Mbe, abhatatirisya abho nibhamubhuusya ati, “Awe Omwiyigisya, chimenyere ati, owaayika na okwiyigisya emisango ja rirenga. Chimenyere ati awe utakuubhaya omuunu woonewoone, noorwo ari na echibharo cha inguru, echo chitari chiinu kw‑awe. Owiyigisya injira ya Nyamuwanga kwa echimari. 22Angu, ebhiraagiro bhya Muusa ebhichiikirisisya okutobha rigooti ku‑Kayisaari, amwi wuri?” 23Nawe, Yeesu ˆnaasombookerwa obhurigerige bhwebhwe, ˆnaabhabhwira ati, 24“Munyeresye idinaari.#20:24 Idinaari. Idinaari yaariga niyingana na omuyeero gwa orusuku rumwi ku‑mukosi umwi wa emirimu. Ka wone niyo bhaatobhaga rigooti. Orususo runu na risiina rinu ni bhyaga?” Abheene nibhamusubhya ati, “Ni bhya Kayisaari.” 25Niwo Yeesu ˆnaabhabhwira ati, “Mbe, ebhiinu bhya Kayisaari, muyaane Kayisaari na ebhya Nyamuwanga, muyaane Nyamuwanga.”
26Bhejire bhoongwa risubhyo rya Yeesu, nibharuguura muno. Nibhajibhira jibhijibhi. Nibhataamibhwa okumukoma ku‑misango jinu ꞉aayikire imbere ya abhaanu.
Emisango inguru ya obhusuuruko bhwa abhafuuwe
(Mataayo 22:23‑33; Maariko 12:18‑27)
27Niwo Abhasadukaayo#20:27 Abhasadukaayo. Ku‑meeresyo amaafu, ringira mu‑Meeresyo inguru ya Emisango Emikomeeye. abharebhe, nibhaaja ku‑Yeesu. Abheene abheeyigisyaga ati, bhutari‑wo obhusuuruko bhwa abhafuuwe. Nibheeya, nibhamubhuusya ati, 28“Omwiyigisya, Muusa ꞉aachiragiriiye mu‑bhiraagiro bhyaye ati, araabha omurume aakafwa ˆnaasiga omugasi waaye atari na omwana, omumura waabho keendwa eengirire omutumbagasi oyo, korereki eebhurire omumura waabho unu ꞉aafuuwe abhaana.#20:28 Ringira Orwichuko rwa Ebhiraagiro 25:5‑6. 29Mbe, bhaariga bhari‑wo abhamura bhataanu na bhabhiri bha inda imwi. Omumura omukuru ˆnaatwara omugasi, neeya omumura oyo ˆnaafwa atasigire‑ko omwana. 30Omumura waabho wa kabhiri, [ˆneengirira omutumbagasi oyo, omumura oyo, wone ˆnaafwa atasigire‑ko omwana]. 31Nyabhuriko ku‑mumura wa kasatu wone nijibha kutyokutyo. Abhamura abho bhoone bhataanu na bhabhiri nibhafwa bhatasigire‑ko omwana wuri. 32Ku‑bhuteero, omutumbagasi oyo wone ˆnaafwa. 33Mbe, nuuchibhwire ku‑rusuku rwa obhusuuruko, bhunu emwe omwayika ati, abhaanu bharisuuruka, omutumbagasi oyo aribha omugasi waaga? Okubha abhamura bhoone bhataanu na bhabhiri, ꞉bhaamutwaye!”
34Yeesu ˆnaabhabhwira ati, “Abhaanu bha ku‑chaaro chinu abhatwara na okutwarwa. 35Nawe, abhaanu bhanu Nyamuwanga ꞉aarorere ati bheeyire okusuuruka na okurama mu‑chaaro echiyaaya chirya, abho bhataritwara, noorwo bhataritwarwa 36na bhatarifwa rindi. Bharibha bhaanga rwa bhamaraayika, na abhaana bha Nyamuwanga, kwa okubha bharisuururwa okusooka mu‑bhafuuwe.
37“Noorwo Muusa ꞉eeresiisye abhaanu abhwerubhweru ati, abhafuuwe abhasuuruka. ꞉Aayikire kutyo mu‑Bhikaame Ebhyeru omwanya gunu ꞉aakaamire inguru ya echisaka chinu chaariga nichaaka omuriro nawe chitarungura wuri. ꞉Aayikire ati, Raatabhugenyi niwe ‘Nyamuwanga wa Bhurayimu, Isaaka na Yakobho.’#20:37 Ringira Okwimuka 3:6. 38Ku‑Nyamuwanga abhafuuwe bhoone na abhaanga, bhoone ni bhaanga imbere yaaye. Kurwa ejo, omwene atari Nyamuwanga wa abhafuuwe, tari ni wa abhaanga.”
39Mbe, abheeyigisya abhandi bha ebhiraagiro bhya Muusa nibhaayika ati, “Omwiyigisya, waayika kisi!” 40Okwambira omwanya ogwo, atari‑wo omuunu noorwo umwi unu ꞉aaregeejere okubhuusya Yeesu amabhuusyo agandi.
Kirisito niwe Omwana wa Dawudi na Raatabhugenyi wa bhoone
(Mataayo 22:41‑46; Maariko 12:35‑37)
41Neeya, Yeesu ˆnaabhuusya abhaanu abho ati, “Kurwa ki abhaanu abhaayika ati, Kirisito ni mwana wa Dawudi? 42Dawudi omwene, ꞉aakaamire mu‑chitabho cha Ijabhuri ati,
‘Raatabhugenyi Nyamuwanga ꞉aabhwiriiye Raatabhugenyi waani ati,
“Inyanja orubhaara rwani rwa ebhuryo,
43okukingira omwanya gunu enija okutuura abhasoko bhaawo emwaro ya amaguru gaawo.”’#20:43 Ringira Ijabhuri 110:1.
44“Woori, araabha Dawudi kaabhirikira Kirisito, Raatabhugenyi, ejibha kutiki Kirisito okubha omwana waaye?”#20:44 Yeesu ꞉eebhuuywe okusookerera mu‑rwibhuro rwa Dawudi, nikwo okukora abhaanu bhaamubhirikiraga ati, Omwana wa Dawudi. Nawe Yeesu omwene aariga ari mu‑rwire okwambira kara, ku‑songa eyo Dawudi wone aariga ˆnaamubhirikira ati Raatabhugenyi.
Yeesu kaakengya abheeyigisibhwa bhaaye
(Mataayo 23:1‑36; Maariko 12:38‑40; Ruuka 11:37‑54)
45Omwanya gunu echise cha abhaanu chaariga nichimutegeresya, Yeesu ˆnaabhwira abheeyigisibhwa bhaaye ati, 46“Mwikengega abheeyigisya bha ebhiraagiro bhya Muusa. Abheene abheenda okuribhata ku‑njira bhafwayega emingiro jeebhwe emireera. Ka wone, abheenda muno bhakeesibhwe na abhaanu kwa echibharo mu‑maguriro. Noorwo mu‑nju ja ameekofyanyo geebhwe abhabhaga nibheenda okwinyanja ku‑bhitebhe bhya imbere bhya echibharo. Mu‑siku ja jichikukuru, abhabhaga nibheenda muno okwinyanja ku‑bhitebhe bhya imbere bhya abhagenyi abha echibharo. 47Abheene ni bheerimaanya, kwa okubha abharandirisya muno risabhwa ryebhwe ku‑Nyamuwanga, korereki bheekondye ku‑bhaanu, nawe abhateesya abhatumbagasi jinju jeebhwe! Mbe, bhamenye ati, ku‑rusuku rwa indamu, chimari bhariramira jimbuma nyafu okusooka ku‑Nyamuwanga!”
Currently Selected:
Ruuka 20: jit
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2023, Wycliffe Bible Translators, Inc. All rights reserved.