Markus 8
8
Nopookan si Yisus nu lobuw opat noribu
(Mat 15:32-39)
1Dai po olaid kiat nu iri, minuimpug-o ongo lobuw dii. Nosiou-o po ni Yisus nu d'ado ingkookan nosiro, paawo yo Niyo mompomaid Niyo ri om tongaro yo nu, 2“Oluluudan Aku nu kolobuwan iitu no so' kotoluan-o nosiro maid-waid so Aku, om kosiono noowi'an-o nu ingkookan. 3Dai su moingin pouli' so nosiro ong dai po kookan. Lumaa' Aku nu oodan nosiro so lolanon-o, so' kuwai so nosiro orawu' uli'an,” koo.
4Sumombuto yo mompomaid Niyo ri nu, “Siombo ka podiuman so padang pantai iitu no nu ingkookan muuma' so nosiro?” koo.
5Mongoduato yo si Yisus so nosiro nu, “Komuro po ka nowatu baang-baang muyu?” koo.
“Turu po,” koo nosiro.
6Suuo yo sono Niyo lobuw suang-i poogom so tana' ri. Olapo yo Niyo turu nowatu baang-baang-i om mongunsopoto yo so Kinoringan. Nopupus iri, kobi-kobio yo Niyo om taaki yo Niyo so mompomaid Niyo ri, nu toyad-toyadon so lobuw-i. 7Kuwai ya tinu-tinu nokayu pait nosiro. Mongunsopoto yo Iyo nu iri so Kinoringan om suuo yo Niyo mompomaid Niyo ri poponayad nu pait-i. 8Mongokano yo sono nosiro sampai nowasug om impugo yo nu mompomaid Niyo ri olu'-olu' ri, turu po nopodaka suang. 9Koosampuw nu lobuw minongokan iiri kiro-kiro opat noribu. 10Nopupus iri, suuo yo Niyo kolobuwan-i pouli', om sumokoyo yo sono Iyo so alud mian so wonuo nu Dalmanuta.
Pinopomaal si Yisus nu nu koiran-iran
(Mat 16:1-4)
11Tinu-tinu lobuw Parisi minian dii si Yisus mokimusiwal so Iyo monginam-nginam. Sinuu' Iyo nosiro momaal nu koiran-iran pongilaan nu kikuasa Iyo kiat so Kinoringan.#Mat 12:38; Luk 11:16 12Muinowoo yo Iyo kaayo tanda' nu notopodan nu indomoon nosiro dadan om sumombuto yo nu, “Nokuro ka lobuw iitu no su moingin ong momaal Aku nu koiran-iran? Dai ya su momaal suat so nosiro,” koo.#Mat 12:39; Luk 11:29
13Laiwi yo Niyo nosiro om sumokoyo yo so alud muripau so liu' ri.
Pongombang nu lobuw Parisi om Irudis
(Mat 16:5-12)
14Nokolupo mompomaid ni Yisus mongowit nu baang-baang muuma' so nosiro. Sombatu yo noowit nosiro. 15Mutongaro yo Iyo so nosiro nu, “Otago muyu yo! Mingat-ingat kou yo nu pongombang#8:15: pongombang: Siowan Kamus Kitab. nu lobuw Parisi om ni Irudis,” koo.#Luk 12:1
16Norongou-o po nosiro tinangar Niyo ri, mutotongar-tongaro yo nosiro nu, “Ono yo ko' mutangar Iyo nu soko ono so' dai toko nokopongowit nu baang-baang,” koo.
17Noilaan-a ni Yisus pinutongar-tongaran nosiro ri, mutongaro yo sono Iyo nu, “Nokuro su umogutan kou nu d'ado baang-baang muyu no? Dai kou po ka koorati ong isai Aku? Okosog sobana inawo muyu. 18Kimato om kitolingo kou ya nga dai kou kosiou om korongou!#Yir 5:21; Ijik 12:2; Mrk 4:12 19Kakal kou po dai koorati! Dai muyu ka oondoman limo yo nowatu baang-baang kinobi-kobi Ku ri om tinayad-tayad so lobuw limo noribu sampuw, om komuro po kosuang olu'-olu' inimpug muyu?” koo. Sumombuto yo nosiro nu,
“Oo, opulu om duo nopodaka,” koo.
20Mongoduato po si Yisus nu, “Om tinu po podaka noimpug muyu nu olu'-olu' nu pinookanan Ku nu lobuw nu turu yo nowatu baang-baang-i?” koo.
Sumombuto yo nosiro nu, “Turu nopodaka,” koo.
21Mutongaro yo Iyo nu, “Indadi nokuro su kakal kou po dai koorati?” koo.
Minomali' si Yisus nu lobuw bolou
22Nokologa' po nosiro so Baitsaida, owito yo nu lobuw suang dii si Yisus lobuw bolou, om minindamo nu ipoingkam so Iyo. 23Kuyuti yo ni Yisus longon nu lobuw bolou iiri om tonudo yo lumabus kiat so bandar-i. Durai yo Niyo mato nu lobuw bolou iiri, topopo yo Niyo om mongoduato yo nu, “Kosiou ko yo ka?” koo.
24Monomburorowo yo lobuw iiri om mutongaro yo nu, “Oo, kosiou aku yo nu lobuw sompanou-panou, nga soko puun nai' nu kayu kosiowan ku,” koo.
25Topopi po ni Yisus palad Niyo ri so mato nu lobuw iiri, om sonduun-duun-a nopali' om kowawai-o sono. 26Tongaro yo iyo ni Yisus nu, “Uli' yo om ikod-o kipululi' so bandar oono,” koo.
Pongokunan ni Pitrus ong isai si Yisus
(Mat 16:13-20; Luk 9:18-21)
27Miano yo si Yisus so ongo kampung orani so bandar Kaisaria Pilipi. Nokologa' dii, tongaro yo Niyo mompomaid Niyo ri nu, “Ponokod nu lobuw, isai Aku ka itu?” koo.
28Sumombuto yo nosiro nu, “Kuwai mutangar nu si Yuanis Moongodiu', kuwai ya nu si Ilia, om wokon po mutangar nu poo'abar nu Kinoringan gulu ri,” koo.#Mrk 6:14-15; Luk 9:7-8
29“Nga ponokod muyu, isai Aku ka?” koo si Yisus.#Yns 6:68-69
Sumombuto yo si Simun Pitrus nu, “Ikau-o su Raja Nijanji nu Kinoringan,” koo.
30Tongaro yo ni Yisus nosiro nu dai ipotuturan so isai-isai ya ong isai Iyo.
Nopotuturan si Yisus suat nu kosonsora'an om kopotoyan Niyo
(Mat 16:21-28; Luk 9:22-27)
31Tumugulo yo si Yisus montuduk nu mompomaid Niyo ri nu, “Aku yo Anak nu Riniba om subai osuang kosonsora'an oirosaan Ku kiat so kotutuaan, wowaidon nu imam, om moomontuduk nu Ukum. Potoyon Aku, nga oluli'an-a so kotolu no,” koo. 32Binontol-a ni Yisus potuturan ono so mompomaid Niyo ri, nga pudiko yo Iyo ni Pitrus, om tongaro yo nu dai otoop ong ourug soko ono. 33Kumowiio yo sono si Yisus om tongaro yo si Pitrus nu, “Pulaiw-o su moinat! Pikiran mu no, pikiran-a nu lobuw okon ko pikiran nu Kinoringan,” koo.
34Soginaa yo ni Yisus lobuw suang dii ri om mompomaid Niyo ri om mutongaro yo nu, “Lobuw mokiwowaid so Aku, subai lupaan onu yo po koinginan niyo kondiri, om soko monimban nu salib, orati maid so Aku sumonsara' musingkopatoi.#Mat 10:38; Luk 14:27 35Isai landu momikir nu kowiawan niyo kondiri, oliongan nai' nu kowiawan. Nga isai dai landu momikir nu kowiawan niyo kondiri so' osulut so Aku, om Abar Owarong nituturan Ku no, kikowiawan iyo musingkolaid maid so Kinoringan.#Mat 10:39; Luk 17:33; Yns 12:25 36D'ado kosudaan nu lobuw kosongapan nu kiawi' so wonuo tu ong oraag-a kowiawan niyo insaadan nu Kinoringan musingkolaid. 37D'ado onu-onu otoop pongoganti' niyo nu kowiawan niyo. 38Om isai moiyu'an so Aku, Anak nu Riniba om pontudukan Ku, Aku nga moiyu'an-a so lobuw oono, iya nu kologa'an Ku mogkuasa soko raja. Iya oono kuwai po binaang kiat so Kinoringan maid nu ongo susuu'on Niyo kiat so surga,” koo si Yisus.
Currently Selected:
Markus 8: TomPWPgLgPn
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2023 (Active), Wycliffe Bible Translators, Inc. All rights reserved.