Matiu 3
3
Diyon Babasito ena Guguya
Matiu 3:1-12
(Maleko 1:1-8; Luka 3:1-18; Diyon 1:19-28)
1Fuyandi yai Diyon Babasito ya laoma Diudeya Nuꞌuna pitapitalina yai be ya fatubu ya lauguguya, iyen,
2 Nuwamiu au buidi, paꞌana Galewa Aba Baꞌisa Nuꞌuna mate, haꞌa ya sigima!
3Diyon logenana Peloweta Isaiya ya libalibaen iyen,
Doga hesa nuꞌu pitapitalina yai ya yogayoga, iyen,
<<Guyau ena edaꞌeda au abi nonohai; ena edaꞌeda au fadudulai haba ya lau watan!>> (Isaiya 40:3)
4Diyon ena leli ya liꞌodi mate kamela olodi yai sa ginauli na ana bwaꞌulu mate yosiyosi ꞌwapina. Na ana kalahe mate digolele yo amoꞌamo.
5Yelusalem yai dodoga sa laoma yo Diudeya Nuꞌuna mahudoꞌidi yai, yo Diyodan Hoꞌowana mahudoꞌina sadaina yai sa laoma lisina.
6Edi heyaya sa liba famahatadi, na Diyon ya fababasitodi Diyodan yai.
7Fuyanna Falesiya yo Sadusi boludi ya itadi sa laoma bena ya fababasitodi, ya falibadi, iyen,
Umi weso! Emi nuwatuhu bena Yaubada panisi ya fatamalidima ami anfaleꞌedi?! 8Bena ginaulidi ni ami ginaulidi haba sa fawananaha mate, bena haga haꞌa ami nuwabui.
9Emi nuwatuhu bena haba panisi ami anfaleꞌen fuyana ami liba, auwen, <<Abelaham mate wahamiu.>> E falibamiu mate Yaubada gonowana umeꞌehu te ya abidi be Abelaham wahawahana ya ginaulidi! 10Ilama haꞌa ya nonoha bena oyagi ma lamdi ya oi fabui suludi. Oyagi tausom hige i fuwa loholoho haba oi fagulina be gabu goluna.
11Ai hoꞌowa E fababasitomiu be dodoga haba sa ita mate, umi haꞌa ami nuwabui, inmoho doga muligu yai ya laoma haba ai Yaluwa Tabuna yo oyagi alaꞌalana yai ya fababasitomiu. In ya gigibwali, na habahim yau. Yau hige ya loholoho haba ana ahe sumasuma ya bahei. 12Ena sabolo#3:12 Uliꞌuli haisa tiyen, <<ena tapitapi nimana yai.>> ya lawelawen haba witi ya abilisi. Haba ena witi ya pei gogonidi, ena ai aba peipei gogo lumadi, na haba wenudi mate, oyagi alaꞌalana hige gonowana i peꞌi, ainiya ya gabu goludi.
Diyon Yesu ya Fababasito
Matiu 3:13-17
(Maleko 1:9-11; Luka 3:21-22)
13Lahaina yai, Yesu Galili ya lau afulen be ya laoma Diyon lisina, be haba ai Diyodan Hoꞌowana ya fababasito. 14Inmoho, Diyon hige i fanuha. Yofede Diyon iyebom,
Yesu, um bena wa fababasitogu, na sidohana be wa laoma lisigu?
15Alinana Yesu ya bui, iyen,
Aꞌai! Haba doha wa ginauli. Be haba laulauna te Yaubada ena nuwatuhu mahudoꞌina te falau watan.
Yofede, Diyon ya tauꞌulu.
16Yesu ya babasito, na hoꞌowa yai ya pohema. Galewa ya tasoꞌe. Yaubada Yaluwana ya lidima ya ita, nenena doha waliliya, be hewana yai ya taꞌai. 17Habahim alina galewa yai ya libama, iyen,
Itete Natugu Wananahana. E gadosisiyen yo nuwagu ya faꞌamna wananahai. (2 Pita 1:17)
Currently Selected:
Matiu 3: Buhutu
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2024, SIL Global. All Rights Reserved.