Luke 4
4
1ကျီးကအိမ် ကိုယ်တော်ယေရှုနာ ဉာဏ်အလင်းတော်အိမ်မက်တာငါ့ကို ဂျော်ဒန်မြစ်အာဘင်း ပြန့်ဗန်(ဖ်)ကို ဉာဏ်အလင်းတော်ကဦးဆောင်မူအိမ် မလိမ်းကန္တာရအတာဟုန်းငါ လင်လင်ကဟေ။ 2အိမ်မနေရာနာ မာရ်နတ်ကဖျားယောင်းသွေးဆောင်ဟေက ရက်ပေါင်းလေးဆယ့်ကြားမနီး ဟင်းတုန်းလင်ကဟေ။ မှရယက်အာ အမာစာ ဆူးယဲ့အဆာအူထမ်း အိမ်မားရယက်ရက် ကုန်ဆုံးလင်ဂါခါ ပုတ်ရုန်ယိုးဝိုင်းဂါဟေ။ 3မာရ်နတ်နာ ကိုယ်တော်ယေရှုယင် "နနိန်ရက်နာ ဘုရားရှင်းဂါးအဆာမှန်နဲ့ မှတလုံအင် ပေါင်းမုန့်ဖြစ်ဇီးငင်" ငါးဂို့ ငှားလင်ကဟေ။ 4အိမ်မာကရပ် ကိုယ်တော်နာ "လူရက်နာ ဆာဂါးအူဂါး ဆူးဝါတည်းကအတွက် အဆက်ဆီးတုန်းဟေကားအရိပါ(လ်) ငါးဂို့ ကျမ်းစာယာ ဆနပ်ပီဟေ" ငါးဂို့ ငါလင်ကဟေ။ 5ကျီးကအိမ် မာရ်နတ်နာ ကိုယ်တော်ယင် စောက်ဟေကတဂိုးဖုံးဝါ အော်လားကလင်ဂို့ ကမ္ဘာပေါ်ကငါဟေကား နိုင်ငံဆန်စူရက်အင် နာရာဆာအိမ် ဆနပ်လင်ကဟေ။ 6မာရ်နတ်နာ ကိုယ်တော်ယင် "ငါဇိစ် အီပီဒက်ကား တန်ခိုးအာဏာဆန်စူအိမ် ဘုန်းတန်ခိုး စည်းစိမ်ရက်အင် ငါအီကက်ကားလူးဇိစ် အီလူကအတွက် နင်ဇိစ် ငါအီကား။ 7ငါယင်ရှိခိုးကိုးကွယ်နဲ့က(လ်) မှအူဇာစုတ်ရက်အင် နင်ဇိစ်အီကား"ငါ့ကို င့လင်ကဟေ။ 8ညီးငါ့ဒင့်ယဲ့ ကိုယ်တော်ယေရှုနာ "နင်ကရှင်သခင်ဖြိုက်ဟေကား ဘုရားရှင်တစ်ပါးတည်းယင်မယ် ဆာဗာ(ဖ်)ပေါ်ကား၊ အမှာဂါးအမှုတော်ယင်မယ် ထမ်းဆောင် ပိုဂါးငါးဂို့ ကျမ်းစာဖော်ဆနက်တက်ဟေ" ငါ့ကို မာရ်နတ်အင် ပြန်ဂို ဖြေလင်ကဟေ။ 9အယောက်ဟက်တာ မာရ်နတ်မင်းနာ ကိုယ်တော်ငင် ဂျေရုဆလင်မြို့ယာက ဗိမာန်တော်က အမြင့်ဆုံးနေရာထနဲ့ အော်လားလင်ကဟေ "နင်နာ ဘုရားရှင်ဂါးအဆာမှန်နဲ့ မှနေရာဘင်း ခုန်နက်အင်။ 10ဘုရားရှင်နာ နင်ငင်စောင့်ရှောက်ကဇီး ဟမန်းဒေဝါရက်အင် ငှားပီးဒက်ဟေငါ့ကို ကျမ်းစာယာ ဆနပ်ပီဒက်ကအတွက် နင် ကနာလင်ကားအရိ(လ်)ပါ(လ်)။ 11နင်ဂါးအတာရက်အင် တလုံရက်အိမ်တိုးဇရိုးဂို အကာနာဇာရောက်မှ အမှာရက်ကားတူးဟူးအိမ် ကဘယ်ပီးယိုင်ဂါး" ငါးဂို့ ငှားလင်ကဟေ။ 12မှအခါ ကိုယ်တော်ယေရှုယဲ့ "နင်ကား ဘုရားရှင်ငင် အစမ်းသပ်ပိုပါ(လ်)ကငါးဂို့ ကျမ်းစာယာ ညွှန်ပြပီးဟေ" ငါးဂို့ ငှားလင်ကဟေ။ 13မာရ်နတ်ယေ့ ကိုယ်တော်ယင် အမှာဂါစမ်းသပ်မှု အမျိုးမျိုးလုပ်ကျီးကရပ် ကိုယ်တော်ယေရှုကမှဘင်း ပြုကလင်ဂို့ အယိုးကားအခွင့်ရေးမီဂါး စောင့်တုန်း လင်ကဟေ။ 14မှနောက်အာ ကိုယ်တော်ယေရှုနာ ဂါလိလဲယာ ပြန်ဂို့လင်လင်ကရပ် ဘုရားဝိညာဥ်တော်နာ ကိုယ်တော်အိမ်မက်တာငါးလင်ကဟေ။ အမှာဂါး သတင်းတူးရက်အ(လ်) အရပ်ဒေသအနှံ့ငါ ပျံ့နှံ့ဂို ငါလင်ကဟေ။ 15ကိုယ်တော်နာ အစ္စရေးလူမျိုးရက်ကားဓမ္မာရုံငါ ဆုံးမဩဝါဒအီးဟေကား လူထူးပရိသတ်ပြောင်နာ အထူးဝမ်းသာဂို့ ချီကျူးဂို့ငါ့လင်ကဟေ။ 16ကျီးကအိမ် ကိုယ်တော်ယေရူစာ အမာပြာယိုးဂါအရပ်ဖြစ်ဟေက နာဇရက်မြို့ဝါ ပြန့်ဂို့ ထုပ်ဗာ(ဖ်)ကဟေ။ ဥပုသ်နေ့ရက်ယက်အာ ကိုယ်တော်စာ ဓမ္မာရုံငါ လင်တုန်းကအတိုင်းလင်ကို အိမ်မာနေရာယာ အမာစာ ကျမ်းစာဖတ်ကဇိစ် စက်လင်ကဟေ။ 17ကိုယ်တော်ယင် အရိယာသူတော်စင်ဟေရှာယဂါး ကျမ်းစာအုပ်အင် အီးနက်ကို ဖွင့်ကိုဖတ်လင်ကဟေ။ 18"ဆင်းရဲဆာရက်အင် ကယ်တင်ကဇိစ် သတင်းတူးယင် ဖြန့်ဝေကဇိစ် ငါယင် ဘုရားရှင်နာ ရွေးကော်ကဖြစ်ဟေ။ အကျဉ်းဟြန်တုန်းကလူးရက်အင် လွတ်ငြိမ်းချမ်းသာခွင့် လှုကဇိစ်၊ အမိတ်အပေါ်ကလူးရက် အလင်းလှုဇိစ်ကအိမ် ဒုက္ခဆင်းရဲခံစားတုန်းကလူးရက် လွတ်မြောက်အန်က ဖြစ်ကြောင်းယင် ကြေငြာကအတွက် ဘုရားရှင်စာ ငင်ဖြောက်နက်အန်ဟေ။ 19မှကာလအချိန်နာ ဘုရားရှင်နာ အမာကမဟာဂရုဏာတော်ယင် ဆနပ်ဟေကား အချိန်အခါဖြစ်ဟေ။ 20ကျီးကအိမ် ကိုယ်တော်စာ ကျမ်းစာယင်လိပ်ကို ဓမ္မာရုံတာဝန်ခံယင် လှမ်းအီးကျီးကရပ် တုန်းဂါးအချိန်ငါ ဓမ္မာရုံငါက လူအပေါင်းရက်အ(လ်) ကိုယ်တော်ယေရှုဝါးစိုက်ဂို့ယူတုန်းလင်ဂါဟေ။ 21နီးကတောင် ကိုယ်တော်နာ အမာရက်အင် "နနိန်ရက် တတ်ဟေကကျမ်းပိုဒ်ရက်နာ ယက်မယ်အမှန်တကယ်ဖြစ်ယောဝန်နန်း ငါ့ကို ငါ့လင်ကဟေ။ 22ကိုယ်တော်ယေရှုငါဟေကား တတ်ပေါ်ဟေကား လူအပေါင်းရက်အ(လ်) အံ့ဩဂို့ "မှလူးနာ ယောသပ်ကအဆာ အရီလဲ" ငါးဂို့ ဟူးဝါအိမ်ဟူးဝါ ငါ့တုန်းလင်ကဟေ။ 23ကိုယ်တော်ယဲ့ "ဆရာဝန်နာ အပါးနာကိုယ်တိုင်း ပထမဆုံးဆေကုကစိုးဟေ ဆိုရိုးအတိုင်း ကပေရနောင်မြို့ဝါ ငါလိစ်တာဟေ့ကား အမူအရာရက်အင် အပါနာကတုန်းဟေကမြို့ဝါယဲ့ ဆောင်ရွက်အင် ငါ့ကို နနိန်ရက်နာ ငင် အဒင့်ငါ့လင်ကား။ 24ညီးင့ဒင့်ယဲ့ ငါအမှန်ငါ့နဲ့က(လ်) ရိ(လ်)ကက်ကာ အရိယာသူတော်စင်ရိ(လ်)ယင့် အပါနာတုန်းဟေကားမြို့ဝါ လက်အခံပါ(လ်)။ 25ငါအယောက်ဟက်တာ အမှန်ငါ့နဲ့က(လ်) အရိယာသူတော်စင် ဧလိယခေတ်အာ သုံးနှစ်ခွဲတိုင်တိုင် ဟြင်အဗဲဒက်ကအတွက် ငတ်မွတ်ခေါင်းပါးက ဒဏ်ယင် ဟင်းဒက်ပေါ်ကရပ် အစ္စရေးပြည်ယာ မုဆိုးမရက်မွတ်မွတ်ငါဟေ။ 26ဘုရားရှင်နာ ဧလိယယင် အစ္စရေးပြည်ယာငါဟေကား မုဆိုးမရက်ကမား ကူညီကဇိစ် အဖြောက်ထမ်း ဇိဒုန်မြို့နားက ဇရတ္တမြို့ယာငါဟေကား မုဆိုးမဟူးဝါကမားမယ် ကူညီကဇိစ် ဖြောက်တက်ဟေ။ 27အရိယာသူတော်စင်ဧလိယခေတ်အာ အစ္စရေးလူရက်ကထဲယာ အမန်ပြောင်ရောဂါဆေ မွတ်မွတ်ငါးလင်ကဟေ။ ဆိုဆော် အမှာရက်ကထဲယာ ဆီးရီးယားပြည်သား ဖြစ်ဟေက နေမန်ငါ့ကိုအော်ဟေက ဟူးဝါလွှဲဂို့ ဟူးဝါးယဲ့ အမီလင်ငဲ့" ငါးဂို့ ငှားလင်ကဟေ။ 28ကိုယ်တော်ယေရှု ငှားဟေကတူးအင် တပ်ဟေကားအချိန်ငါ ဓမ္မာရုံအတာဟုန်းယာက လူထုပရိသတ်ရက်စာ တဗျင်မှန်ချီကလင်ဂို 29စက်ကိုး ကိုယ်တော်ယင် မြို့အပြင်းငါ ကတောက်ကျီးကရပ် ချောက်ကမ်းပါးဖုံးငါ အဟြန်ကဇိစ် မြို့တည်ဟေကား တဂုန်းထိပ်အစွန်းငါ အော်လားလင်ကဟေ။ 30ဆိုဆော် ကိုယ်တော်ယေရှုနာ လူးအုပ်ကြားငါဘင်း ဖြတ်လျှောက်ကို ကြွလင်ကဟေ။ 31ကျီးကအိမ် ကိုယ်တော်နာ ဂါလိလဲဒေသယာဂါး ကပေရနောင်မြို့အင် ထုန်ကလင်ဂို့ ဥပုသ်နေ့ရက်အင် ဓမ္မာရုံငါ လူထုပရိသတ်ရက်အင် ဟောပြောသွန်သင်ဂိုးငှားလင်ကဟေ။ 32ကိုယ်တော်ယေရှုနာ အခွင့်အဏာအိမ် ဟောပြောသွန်းသင်ကို လူးရက်စာ အမာက ဆနိန်အီဟေကား အံ့ဩဂို့ငါလင်ကဟေ။ 33အိမ်မားဓမ္မာရုံထဲယာ အမှီးကမိစ္ဆာပူးကပ်တုန်းဟေကား လူးဟူးဝါ ငါ့လင်ကဟေ။ အိမ်မာလူးနာ ကိုယ်တော်ယင် 34" နာဇရပ်မြို့ဆားယေရှု၊ နင်စာ ငါရက်အင် အဇာရိ(လ်)ကယား။ ငါရက်အင် ဖျက်ဆီးကဇိစ်ဗန်(ဖ်)ကလဲ။ နင်အယူဝါးငါဟေက ငါချေးဟေ။ နင်စာ ဘုရားရှင်ကမားဘင်း ကြွဗန်(ဖ်)က မြင့်မြတ်ကလူးဖြိုက်ဟေ"ငါ့ကို ဟိုဟေကအကြားအိမ် ဟိုဂို့ င့ါလင်ကဟေ။ 35မှအခါ ကိုယ်တော်ယေရှုနာ မိစ္ဆာရက်အင် "တိတ်တိတ်တုန်းငင်၊ အမာထနဲဘင်း ပြူလင်" ငါကို အမိန့်အီနက်ကအိမ် တပြိုင်နက် မိစ္ဆာနာ အိမ်မားလူးယင် လူရက်ကရှေးယာ မြေပြင်ငါလဲချကို အကနာထိုင် အမာကဘင်း ပြူလင်ကဟေ။ 36ဓမ္မာရုံယာက လူးစုတ်ရက်ယဲ့ အံ့ဩကလင်ကို "အမာ အဆီမီကတူးယား၊ အမာကတောက်နက်ကအိမ် အမီးကဟမန်းပြုကလင်ပေါ်က အခွင့်အာဏာ အမှာထဲငါးတုန်းဟေ" ငါးဂို့ ဟူးဝါအိမ်ဟူးဝါ ငှားတုန်းလင်ကဟေ။ 37မှနောက်အာ ကိုယ်တော်က ဂုဏ်သတင်းရက်စာ ပတ်ဝန်ကျင်ဒေသတခွင်လုံးငါ ပျံ့နှံ့ဂိုငါလင်ကဟေ။ 38ကိုယ်တော်ယေရှုနာ ဓမ္မာရုံငါဘင်းပြူဂို့ ရှိမုန်ကကိန်းငါ ကြွတော်မူလင်ကအချိန်ငါ ရှိမုန်ဂါး အယိုးဟုန်မာနာ တင်းတင်ဆား အဆန်ကနာတုန်းကို လူးရက်နာ အမာယင် ကုအီကဇိစ် ကိုယ်တော်ယင် စိန်လင်ကဟေ။ 39မှအကြောင့် ကိုယ်တော်နာ အမှာကအနားဆာလင်ကို အဖျားရောဂါ ပျောက်စိမ်းကဇိစ် အမိန့်အီနက်ကအိမ် အမာစာ ကျန်းမာကန်းကို ချက်ချင်းရိပ်ကို အမာရက်အင် ဧည့်ခံလင်ကဟေ။ 40စမိတ်ဆင်ဂါးအချိန်ငါ ရောဂါဝေဒနာ အမျိုးမျိုးစွဲကပ်တုန်းဟေကား လူးနာမွတ်မွတ်ရက်အင် ကိုယ်တော်ကမားအော်လားကန်ကရပ် အမာစာ အိမ်မားလူနာဟူးဝါက ကိုယ်ပေါ်ဝါ တာဟူးယင်တင်ကို ရောဂါဝေဒနာရက်အင် ပျောက်စိမ်းလင်ကဟေ။ 41မိစ္ဆာရက်နာ လူနာကမှာဘင်း ပြုလင်ဂို့ "နင်နာ ဘုရားဂါးအဆာဖြစ်ဟေ" ငါးဂို ဟော်ဂို့ ငှားလင်ကဟေ။ ကိုယ်တော်ယေရှုနာ "ကယ်တင်မေရှိယ" ဖြစ်ဟေကကြောင်းငင် အမာရက် ချေးတုန်းကကြောင်း ကိုယ်တော်နာ အမှားရက်အင် မှဒက်လေအဟော်ဝေး ငါးဂို့ ငှားလင်ကဟေ။ 42အယိုးကဂါးဟင်ချီးကရက် ကိုယ်တော်နာ လူးရက်ကင်းဝေဟေကား အရပ်အာ ပြုလင်ဂါဟေ။ ညီးင့ဒင့်ယဲ့ လူထုနာ ရာနက်ဆုံးကို ပေါ်လင်ကို အပါနာရက်ကမားဘင်း အလင်ဇာရောက်မှ တောင်းပန်လင်ကဟေ။ 43ဆိုဆော် ကိုယ်တော်နာ "ငါနာ အယောက်ကမြို့ရက်အာယဲ့ မင်္ဂလာသတင်းကောင်းဖြိုက်ဟေက ဘုရားရှင်က သာသနာတော်အကြောင်းယင် ဟောပြောအီးပိုဂါး။ မှဒေဟောပြောကအတွက် ဘုရားရှင်နာ ငင်ဖြောက်နင်အန်ဂါးဖြိုက်ဟေ" ငါးဂို့ င့လင်ကဟေ။ 44နီးကတောင် ကိုယ်တော်ယေရှုနာ ယုဒပြည်ဂါး ဓမ္မာရုံရက်အာ ဆက်လက်ဂို့ ဟောဆနပ်လင်ကဟေ။
Currently Selected:
Luke 4: ttpv-rv
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
This translation of the Thet Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.