This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.

Karen, Paku

 This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association. 

ဖဲအဆၢကတီၢ် အဝဲနဲၢ်, စီၤပၤဖးဒွိၣ် အီၤကူစတူး ဟ့လီၤ အကလုၢ်လိ တၢ်က ဂ့ၢ် ထံဖွိကီၢ်ဖွိလိ အအိၣ်ဝဲ ဆိ ဝဲ တုၤလိ ရိမ့ၤ အဘီအမုၢ်ပူၤ တလိၣ် ခဲလုၤ ခီဖျိ တၢ်ဆ့းလီၤ အမံၤနဲၢ်လိ. ဖဲတၢ်ဆ့းလီၤမံၤ အဆိကတၢၢ် တဘျီအံၤ အဆၢကတီၢ်နဲၢ်, စီၤကူၤရ့နံ မဲၢ်ဝဲ စူၤရံ အပဒွိၣ်ဖးဒွိၣ်လိ. ဖဲနံၤ, ဘၠီၣ်ကိးဂၤဒ့းလဲၤဝဲ တဂၤလိ အဝ့ၢ်ဒၣ်ဝဲ, တဂၤလိ အဝ့ၢ်ဒၣ်ဝဲ, ဒ်သိး ကဘၣ်တၢ်ဆ့းလီၤအီၣ်နဲၢ်လိ. စီၤယိၤသးဟးထီၣ်ဝဲဖဲ ဝ့ၢ်နစၤရ့း လိ ကီၢ်ကၤလံၤလါ, ဘျီး လဲၤဝဲလိ ဝ့ၢ်ဘ့ၤသလ့ဃ့ၣ် လိ ကီၢ်ယူဒၤဝ့ၢ်1လိ အမဲၢ်ဝဲ စီၤပၤဒၤဝံး အိၣ်ဖျဲၣ်ထီၣ်အလီၢ်လိ. စီၤယိၤသး လဲၤဝဲ ဖဲနံၤ, မဲၢ်လိ အဝဲမဲၢ် စီၤဒၤဝံး အစၢၤ အသွဲၣ် တဂၤအဃိ နဲၢ်လိ. အဝဲဒၣ်လဲၤဘျီး နီၢ်မၤရံလိ အဘၣ်အဲၣ်တီလါအီၤ တဂၤ, ဒ်သိး အဝဲဝီၤ အမံၤကဘၣ်တၢ်ဆ့းလီၤအီၤလိ အဂီၢ်လိ. နီၢ်မါရံ အိၣ်လါ အဟုးအသး ဘျီဖဲ အဝဲဝီၤအိၣ်လိ ဝ့ၢ်ဘ့ၣ်သလ့ဃ့ၣ် အဖၢမုၢ်နဲၢ်, အဆၢကတီၢ်တုၤဂီၤလိ အဝဲဒၣ် ကအိၣ်ဖျဲၣ်ထီၣ်အဖွိလိ. အဝဲဒၣ် အိၣ်ဖျဲၣ်ထီၣ် အဖွိခွါ အဒွိၣ်တဂၤ ဘျီးဘိၣ်ဘံဃၤအီၤလိ တၢ်ကံယၤဘျီး ထွိၣ်မံလီၤအီၤလိ ပွိၢ်အီၣ်ဆၣ် အကျိၤပူၤလိ. တၢ်ဂ့ၢ်မဲၢ်ဒ့းအ့ၤ ဖဲပှၤတမှံၤ အဘျီၣ်ပူၤနဲၢ် ဟံၣ်တအိၣ်ခိလိလိ အဝဲဝီၤ အဂီၢ်နီတဖျၢၣ်ဘၣ်လိ. ဖဲကီၢ် အဝဲနံၤ အပူၤနဲၢ် ဘၠီၣ် ကွၢ်သိ အိၣ်ဝဲဒၣ် တနီၤ လိ အကွၢ် အသိလိ တၢ်ခံးမုၢ်စူၢ်သး တၢ်ပျီၣ်ပူၤနဲၢ်လိ. ယွၤအကလူးတဂၤ အိၣ်ဖျါထီၣ်လိ အဝဲဝီၤ အမံၤညါ, ဘျီး ကစၢ် အလၤကပီၤ ကပီၤထီၣ် သရံးတံၢ်ပိၤ အဝဲဝီၤလိ. အဝဲဝီၤ သးပလ့ၤနီတၢ်, လၢၤဘျီး ကလူးနဲၢ်စံးဘၣ်အီၤ, ‘သးပလံၤတၢ် တဂ့ၤ. ယဟဲဖဲအံၤ အိၣ်လါ တၢ်ကစီၣ်အမူၤလိ သုဂီၢ် လိ အကဟဲစိၤ တၢ်သးခု အဒွိၣ်အအါလိ ဘၠီၣ် ခဲလုၤခဲဆ့ အဂီၢ်လိ. တနံၤအံၤ လိ စီၤဒၤဝံးအဝ့ၢ်1ပူၤနဲၢ် ဘၠီၣ် အုၣ်က့ၤ ခီၣ်က့ၤတၢ် အကစၢ်တဂၤ အိၣ်ဖျဲၣ်ထီၣ်ဝဲလိ သုဂီၢ်လိ. အမဲၢ် ခရံာ်ကစၢ်နဲၢ်လိ. ဘျီးတၢ်လိ အကဟ့သု တၢ်အုၣ်အသးလိ အဂ့ၢ်နဲၢ် မဲၢ်အအံၤလိ. သုက ထ့ၣ်နဲၢ် ဖွိသၣ်တဂၤဘၣ် တၢ်ဘိၣ်ဘံဃၤအီၤလိ တၢ်ကံယၤ ဘျီး အိၣ်မံလီၤလိ ပွိၢ်အီၣ်ဆၣ် အကျိၤပူၤလိ.’ သတူၤကလၣ်, မွိခိၣ်ကလူး အသုးမုၢ်ဖးဒွိၣ်တဖူၣ် ဟဲအိၣ်ဖျါထီၣ်ဝဲလိ ကလူးတဂၤနဲၢ်အသိး ဘျီး သဝံၣ်စံးထီၣ်ပတြၢၤကစၢ်ယွၤ ဘျီးစံး, ‘တၢ်လၤကပီၤ မ်အဘၣ် ကစၢ်ယွၤလိ.
တၢ်လီၢ်အထီကတၢၢ် လိမွိခွိၣ်နဲၢ်တကဲၢ်.
ဘျီး မ်တၢ်ဃူတၢ်ဖှိၣ်အိၣ်ထီၣ်လိ ဟီၣ်ခွိၣ်ချၢ
လိ ဘၠီၣ်လိ အဝဲဒၣ် ဘၣ်အသးတလိၣ်
အသိးအကျၣ်တကဲၢ်.’ ဖဲမွိခွိၣ်ကလူးတလိၣ် ဟးထီၣ်ကွံၤလိ အဝဲဝီၤ အအိၣ် ဘျီး က့ၤထီၣ်ခွိၣ်ခံဂ့ၤလိ မွိခွိၣ်နဲၢ်, ဘၠီၣ်ကွၢ်သိတလိၣ် စံးလိၤအသး တဂၤလါတဂၤ, ‘ မ်ပကလဲၤ ပကိးလိ ဝ့ၢ်ဘ့ၤသလ့ဃ့ၣ် ဘျီး ကွၢ်တၢ် တမံၤအံၤလိ အမၤအသးလိ ကစၢ် ဒုးသံညါ ပၤစၢၤ ဘၠီၣ်လိ အဂ့ၢ်နဲၢ်တကဲၢ်.’ လိတၢ်နံၤအဃိ အဝဲဝီၤ တလိၣ်ဟးထီၣ်ဝဲလိ အချံဘျီ ထ့ၣ်ဘၣ် နီၢ်မၤရံလါ စီၤယိၤသး, ဘျီးထ့ၣ် ဖွိသၣ် အိၣ် မံလီၤလိ ပွိၢ်အကျိၤပူၤနဲၢ်လိ. ဖဲဘၠီၣ်ကွၢ်သိတလိၣ် ထ့ၣ်ဘၣ်အီၤနဲၢ်, အဝဲဝီၤ ဒွိးဟူထီၣ်သါလီၤ တၢ်ဂ့ၢ်လိကလူးစံးဘၣ်ပၤစၢၤ အဝဲဝီၤ ဘၣ်ဃးလါ ဖွိသၣ် တဂၤနဲၢ်လိ. ကယဲၢ်ဘၠီၣ်လိ အနၢ်ဟူဘၣ်တၢ်ဂ့ၢ်တမံၤနဲၢ်, ကမၢကမၣ်ဝဲလိ တၢ်လိ ဘၠီၣ်ကွၢ်သိ တလိၣ် စံးကတိၤဝဲလိ အဂ့ၢ် အဃိနဲၢ်လိ. နီၤမၤရံ တွိၢ်နီၢ်ဃၤ တၢ်ဂ့ၢ်တၢ်ကျိၤ တလိၣ်အံၤခဲလုၤ ဘျီး ဆိကမိၢ်ဝဲလိ အဂ့ၢ်လိ. ဘၠီၣ်ကွၢ်သိ တလိၣ် က့ၤခိၣ်ခံဂ့ၤဝဲ အိၣ်လါ တၢ်သးဝံၣ် စံးထီၣ်ပတြၢၤကစၢ်ယွၤလိ တၢ်လိ အဝဲဝီၤ တလိၣ် အနၢ်ဟူဘၣ် ပၤစၢၤ ဝဲဘျီး ထ့ၣ်ဘၣ် ပၤစၢၤဝဲ ခဲလုၤ အဃိလိ. တၢ်မၤအသးနဲၢ်, မဲၢ်ဝဲဒ် ကလူးတဂၤနဲၢ် စံးဘၣ် ပၤစၢၤအဝဲဝီၤအသိးနဲၢ်လိ. တနွံဝံၤ အလီၢ်ခံ ဖဲတၢ်ဆၢကတီၢ်တုၤဂီၤလိ ဖွိသၣ်ကဘၣ်တၢ်ကူးတရံးအီၤနဲၢ်, အဝဲဘၣ်တၢ် ယုၢ်နဲၢ် အမံၤလိ ယ့ၣ်ရှူး, ဒ်ကလူး ယုၢ်ပၤစၢၤ အီၤအသိး တချုးလိ အဝဲဒၣ် ဘၣ်တၢ်ဟူဖၢကါထီၣ်အီၤ ဒ်ဘၣ်နဲၢ်လိ. တၢ်ဆၢကတီၢ် တုၤဂီၤဝဲဒၣ်လိ စီၤယိၤသးလါ နီၢ်မၤရံ ကအိၣ်ဘျီး တၢ်မၤကဆှီထီၣ်အသးအလုၤအလၢ်1 ဒ်စီၤမိၤရှ့အတၢ်သိၣ်တၢ်သီမါလွိၤဝဲအသိးနဲၢ်လိ. လိတၢ်နံၤအဃိ အဝဲဝီၤ လဲၤစိၤဖွိသၣ်နဲၢ်လိ ဝ့ၢ်ယရူရှလ့ၣ် ဒ်သိး အကပၤဖျါထီၣ်အီၤလိ ကစၢ်အမံၤညါအဂီၢ်, ဒ်တၢ်ကွ့းအသးလိ ကစၢ်ယွၤ အတၢ်သွိၣ်တၢ်သီအပူၤ အိၣ် ဝဲအသိး, ‘ ကယဲၢ် ဖွိအဒွိၣ်ပွိၤခွါ တဂၤလၢ်လၢ်ကဘၣ်တၢ်ပၤစီဆှံအီၤလိ ကစၢ်ယွၤ အမံၤညါနဲၢ်လိ. အဝဲဝီၤ လဲၤနဲၢ်နဲၢ် ဒ်သိး အကလုၢ်ထီၣ် ပၤထီၣ် ထိၣ်လွံၢ် ဘုၣ် ခံဘ့ၣ် မဲၢ်တမဲၢ် ထိၣ်ကးက့းဖွိ ခံဘ့ၣ်, ဒ်ကစၢ်ယွၤ အတၢ်သွိၣ်တၢ်သီ စံးပၤစၢၤဝဲ အသိးနဲၢ်လိ. ဖဲဆၢကတီၢ် အဝဲနံၤဘၠီၣ် အိၣ်ဝဲဒၣ် တဂၤလိ အမ့ၤမဲၢ် စီၤစူၤ မ့းအိၣ်, လိ အအိၣ်ဆိးဝဲဒၣ်ဖဲ ဝ့ၢ်ယရုရှလ့ၣ် နဲၢ်လိ. အဝဲဒၣ်မဲၢ် ဘၠီၣ်ဂ့ၤဘၠီၣ်ဝၣ်, ဘၠီၣ်သးပလံၤကစၢ်ယွၤ အဲၣ်ကစၢ်ယွၤတဂၤ, ဘျီး အိၣ်ခိး ကွၢ်လၢ် အံၣ်စရ့လး ကဘၣ်တၢ် အုၣ်က့ၤခီၣ်က့ၤအီၤလိ. သးစီဆှံအိၣ်လါအီၤ. ဘျီး ဒွိးနဲၣ်အီၤလိ တချုးအဝဲဒၣ် ထ့ၣ်ဘၣ် ခရံာ်လိ ကစၢ်စံးပၤစၢၤလိ အဂ့ၢ်တဂၤ ဒ့းဘၣ်နံၤဘျီး အဝဲ တသ့းဒ့း ဘၣ်နဲၢ်လိ. ယွၤအသးဆှၢအီၤ သတးဘျီး, စီၤစူၤမ့းအိၣ် လဲၤနုလီၤလိ တၢ်လုၢ်ဟံၣ် အပူၤလိ. ဖဲဖွိသၣ် ယ့ၣ်ရှူးအမွိၢ်အပၢ် ဟဲစိၤနု ဖွိသၣ်လိ တၢ်လုၢ်ဟံၣ်အပူၤ, ဒ်သိးအကမၤနဲၢ်တၢ်လိ အဂီၢ် ဒ်တၢ်သိၣ်တၢ်သီ အိၣ်ဝဲ အသိးနဲၢ်. စီၤစူၤမ့းအိၣ်စိၤထီၣ် ဖွိသၣ်လိ အစဒ့လိၤဘျီး စံးထီၣ်ပတြၢၤ ကစၢ်ယွၤ ဒ့းအ့ၤလိ. ‘ခဲနဲအံၤ, ကစၢ်ဧၢ နမၤလိထီၣ်ပှဲၤထီၣ်လ့
နတၢ်အၢၣ်လီၤအီလီၤ သတးဘျီး,
ပျၢ်ကွံၤ နခ့နပှၤမူၤမူၤ တကဲၢ်. လိယမံၤချံဒၣ်ယဲနဲၢ် ယထ့ၣ်ဘၣ်လံ နတၢ်အုၣ်က့ၤခီၣ်က့ၤ, လိနကတဲၤကတီၤပၤစၢၤနဲၢ်လိ
ဘၠီၣ်ကိးကလုၢ်ဒ့းအမံၤညါ, တၢ်ကပီၤ တဖျၢၣ်လိ အကလီၤဖျါထီၣ်
နတၢ်ဘၣ်နသးလိ ဘၠီၣ်ကလုၢ်ဂၤတလိၣ်
ဘျီး ဟဲစိၤ တၢ်လၤကပီၤဆူ
ဘၠီၣ်ထီဖူၣ်ထီခၠၢ
အံၣ်စရ့လးအအိၣ်နဲၢ်လိ. ဖွိသၣ်အပၢ်လါအမွိၢ် ကမၢကမၣ်ဝဲလိ တၢ်လိစီၤစူၤမ့းအိၣ်စံးကတိၤဝဲလိ အဂ့ၢ်အဃိလိ. စီၤစူၤမ့းအိၣ် ဆိၣ်ဂ့ၤ အဝဲဝီၤဘျီးစံးဘၣ်ဖွိသၣ် အမွိၢ် နီၢ်မၤရံ, ‘ဖွိသၣ် အဝဲအံၤ ဘၣ်တၢ်ဃုထၢပၤစၢၤအီၤလိ ကစၢ်ယွၤလိ တၢ်မၤဟါဂီၤဘျီး တၢ်အုၣ်က့ၤခီၣ်က့ၤ ဘၠီၣ်အါဒံအါဂၤလိ အံၣ်စရ့လး အပူၤအဂီၢ်န့ၢ်လိ. အဝဲဒၣ် ကမဲၢ် တၢ်ပနီၢ်တခါလိ ကစၢ်ယွၤ အိၣ်လိ ဘၠီၣ်အါဒံအါဂၤ ကကတိၤ ထီဒါဝဲ, သတးဘျီး ကလီၤဖျါထီၣ်အဝဲဝီၤ အတၢ်ဆိကမိၣ် ကိသုၣ် တလိၣ်လိ. ဘျီး ဒ်နးလိ အကနၣ်အ့ၣ်တဘ့ၣ်အသိနဲၢ် တၢ်သးအုးအဆ့းဖျိနသးဒၣ်နဲနဲၢ်လိ.’ ဝံမုၣ်လိ အသးပှၢ်သဃဲၤအိၣ်ဝဲဖဲန့ၤတဂၤလိ. အဝဲဒၣ် မဲၢ်မုၣ်ကမဲလိ အမံၤမဲၢ် နီၢ်အၣ်နၤ ဘျီးမဲၢ်ဝဲ စီၤဖနူၤအ့လး လိ အဘၣ်ဃးလါ စီၤအၤရှူၢ် အဒူၣ်တဂၤနဲၢ် အဖွိမုၣ်လိ. အဝဲဒၣ် ထီၣ်ပှၢ်ဝံၤ အလီၢ်ခံ အိၣ်ဘၣ်လါ အဝၤထဲ နွံနံၣ်. ဘျီး ခဲကနံၣ်အံၤ အဝဲဒၣ် အသးအိၣ်ဝဲ ဃဆံလွံၢ်နံၣ်လိ. အဝဲတဟးဖးလါ တၢ်လုၢ်ဟံၣ်နီတဘျီဘၣ်. အဝဲဘူၣ်ယွၤဘါယွၤ အိၣ်လါ တၢ်ဒုၣ်တၢ်အီၣ်ဘျီး တၢ်ဃ့ဘါထုကဖၣ်တၢ်လိ မုၢ်ဆါဆဲးလိမုၢ်နၤလိ. ဖဲအနၤရံၤ တကတီၢ်ဃီ အဝဲနဲၢ်, အဝဲဒၣ် ဟဲတုၤဘျီး စံးထီၣ်ပတြၢၤယွၤဘျီး ကတိၤတၢ် ဘၣ်ဃး ဖွိသၣ် တဂၤနဲၢ် အဂ့ၢ်လိ ဘၠီၣ်ကိးဂၤဒ့း လိ အအိၣ်ခိးကစၢ်ယွၤအကဒွိးပူၤဖျဲးထီၣ်ကွံၤ ဝ့ၢ်ယရူရှလ့ၣ်နၢ်လိ. ဖဲစီၤယိၤသးလါ နီၢ်မၤရံ မၤဝံၤတၢ် ခဲလုၤ, ဒ်ကစၢ်အတၢ်သိၣ်တၢ်သီမါလွိၤဝဲ အသွိးလ့နဲၢ်, အဝဲဝီၤ က့ၤခွိၣ်ခံဂ့ၤလိ အလီၢ်အိၣ်လီၢ်ဆိး, ဝ့ၢ်နစၤရ့းအိၣ်လိ ကီၢ်ကၤလံၤလါ အပူၤနဲၣ်လိ. ဖွိသၣ်နဲၢ် ဒွိၣ်ထီၣ်ဘျီး အဂံၢ်အဘါဆူၣ်ထီၣ်ဝဲလိ. အဝဲဒၣ် လိပှဲၤလါ တၢ်ကူၣ်ဘၣ်ဖးသ့ ဘျီးကစၢ်ယွၤ အတၢ်ဆိၣ်ဂ့ၤဆိၣ်ဝါ လီၤဘၣ်လိ အလိၤလိ. ယ့ၣ်ရှူးအမွိၢ်အပၢ်တလိၣ် လဲၤလိ ဝ့ၢ်ယရူရှလ့ၣ်ကိးနံၣ်ဒ့း ဖဲဘူၣ်လဲၤကပၤအဆၢကတီၢ်နဲၢ်လိ. ဖဲယ့ၣ်ရှူးအသးအိၣ် တဆ့ခံနံၣ်နဲၢ်, အဝဲဝီၤ လဲၤလိ ဘူၣ်လဲၤကပာ် ဒ်အညီနုၢ်အသိးလိ. ဖဲဘူၣ်လဲၤကပၤ ဝံၤဝဲနဲၢ်, အဝဲဝီၤက့ၤဝဲ, လၢၤဖွိသၣ်ယ့ၣ်ရှူး အိၣ်တီၢ်ဝဲဖဲ ဝ့ၢ်ယရူရှလ့ၣ်လိ.တၢ်အံၤနဲၢ် အမွိၢ်အပၢ် တသံညါဘၣ်. အဝဲဝီၤ ဆိကမိၢ်လိ အဝဲဒၣ် အိၣ်လိ ဘၠီၣ်လဲၤ ဘူၣ်လဲၤကပာ်တလိၣ် အကျၣ်အဃိ, အဝဲဝီၤလဲၤတၢ် ထီနံၤဝံၤ အလီၢ်ခံ စးထီၣ်ဟးကွၢ်ချုအီၤလိ အဘူးအတံၢ်တလိၣ်လါ အတံၤအသကိးတလိၣ်အကျၣ်လိ. အဝဲဝီၤ တထ့ၣ်အီၤဘၣ်အဃိ က့ၤခွိၣ်ခံဝဲဒၣ်လိ ဝ့ၢ်ယရူရှလ့ၣ်ဘျီး ကွၢ်ချုအီၤလိ. ဖဲသၢသီတသီနဲၢ် အဝဲဝီၤ ထ့ၣ်အီၤလိ တၢ်လုၢ်ဟံၣ်အပူၤ ဆ့နီၤလိ ယူဒၤ သရၣ်သမါတလိၣ်အကျၣ်, ကနၣ် အဝဲဝီ အတၢ်စံးတၢ်ကတိၤဘျီး သ့းကွၢ်တၢ်သ့းကွၢ်တလိၣ်လိ. ကယဲၢ်ဘၠီၣ်လိ အနၢ်ဟူဘၣ် အဝဲ အတၢ် စံးတၢ်ကတိၤတလိၣ်နဲၢ် ကမၢကမၣ်ဝဲလိ အတၢ်စံးဆၢလိအပှဲၤလါ တၢ်ကူၣ်ဘၣ်ကူၣ်သ့, တၢ်သံညါနၢ်ပၢၢ်တလိၣ်အဃိလိ. အဝဲဒၣ် အမွိၢ်အပၢ်တလိၣ် ကမၢကမၣ်ဝဲဖဲ အထ့ၣ်ဘၣ်အီၤဘျီး အမွိၢ်စံးဘၣ်ဝဲ, ‘ဖွိခွါဧိၤ နမၤဘၠီၣ်ဒ်သိးအံၤ ဘၣ်မနီၢ်အဃိလဲၣ်. နပၢ်လါယၤ ပဟးလူၤချုနၤလိတၢ်သူၣ်ကွိၢ်သးဂီၤအပူၤလိ.’ အဝဲဒၣ် စံးဆၢ အဝဲဝီၤ, ‘ဘၣ်မနီၢ်အဃိသုဘၣ်လူၤချုယၤလဲၣ်. မဲၢ်သုတသံညါလိ ယကဘၣ်အိၣ်လိ ယပၢ်အဟံၣ်ပူၤဘၣ်ဧါ.’ လၢၤဘျီး အဝဲဝီၤ တနၢ်ပၢၢ် တၢ်စံးဆၢတထ့ၣ်နဲၢ် အခီပညီဘၣ်. မၤသးဒ့းန့ၤဘျီး ယ့ၣ်ရှူးက့ၤခိၣ်ခံဂ့ၤလါ အဝဲဝီၤလိဝ့ၢ်နစၤရံးဘျီး ဖဲနံၤ အဝဲဒၣ် စူၤအဝဲဝီၤ အကလုၢ်လိ. တၢ်ဂ့ၢ်တၢ်ကျိၤတလိၣ်အံၤခဲလုၤနဲၢ် အဝဲဒၣ်အမွိၢ်တွိၢ်နီၢ်ဃၤဝဲလိ အသးကံၢ်ပူၤလိ. ဘျီး ယ့ၣ်ရှူးဒွိၣ်ထီၣ်လိနီၢ်ခိ, ဘျီးလိ တၢ်ကူၣ်ဘၣ်ကူၣ်သ့ ခံမံၤလုၤဘျီးလိ တၢ်ဘၣ်ကစၢ်ယွၤအသးဘျီး ပှၤကညီအသးအပူၤနဲၢ်လိ.

聆听 Luke 2