Mateu 4
4
Ndamoni ankunninga Yesu
Malukushi 1:12-13; Lukashi 4:1-13
1Napanelo Imumu aníntwala Yesu kumuukanavo kushimbweshe pakulota atubigwe namu Ndamoni. 2Nae akaunga maduva alubaini shilo na mui na ikankola indala. 3Bai nkútubya andímwidila ndamwaulila, “Wako ukava umwanagwe Nnungu, lamulila majanga ala ajalukange ave magung'u!”#4:3 Vanaishilaeli pavaumile ku Mishili, kushimbweshe Nnungu andívapa magung'u pakulota alilodye kenga nae ni Nnungu wave. Lola Kuma 16:12. 4Yesu napane kushidoni, “Um! Indyandikigwa doni, ‘Munu hananama ligung'u gweka kanji andánama kwakula lilove lyúma nkanywa mwa Nnungu.’ ”#4:4 Lola Kumbukumbu 8:3.
5Ndamoni kuntwala Yesu kumuukanavo mpaka kunjini wakwilimyanga nammika panantutuvilo waing'ande ya Nnungu 6kutwala kumwaulila doni, “Wako ukava umwanagwe Nnungu, daloka apa ukagwilile pai mwaa indyandikgwa doni,
“ ‘Nnungu andavalamulila vanjelo vake,
kwamwaa wako wako.
Vanavo vandakudong'a,
pakulota haunalijajede palijanga.’ ”#4:6 Lola Dimu 91:12.
7Yesu napane kushidoni, “Namomo indyandikigwa doni, ‘Haunanninge ntima Umu Nnungu wako.’ ”#4:7 Lola Kumbukumbu 6:16.
8Ndamoni kuntwala kavili Yesu kumuukanavo pashanya lishinga lyakulepa nannodya utawala uti wamushilambo shapai na kunnodya lishangelo lyake 9kumwaulila doni, “Ukanguguguvalila na kulipudya kwangu nangu, uti avi ndakupa.” 10Yesu napane kushidoni, “Kuka apa Shatwani! Mwaa indyandikigwa doni, ‘Lipudye kumwe Umu Nnungu wako na untumikile jojo bai.’ ”#4:10 Lola Kumbukumbu 6:13. 11Bai Ndamoni anínneka. Mwe! Vanjelo kwida nantumika.
Yesu ankutunduvanga shimadengo shake
Malukushi 1:14-15; Lukashi 4:14-15
12Napanelo Yesu paigwite doni Nshuwau andyungwa, nae andyúja kuka ku Galileya. 13Akanyema pa Nashaleti kuka ndaikala ku Kapalanaumu njini uvéle nanyenje litanda kwisemu ya ku Shebuluni namu Naputali 14pakulota liwikile popo lilove litangaléke kwaindila yankúlava Ishaiya kushidoni,
15“Shilambo sha Shebuluni na shilambo sha Naputali,
kulodya nkono wakulitanda,
mwangu unji walundi lwa Yudani,
Galileya shilambo shavamidi,#4:15 Mmidi mana ake ni munu ákavele walikola lyako; apa linkuvamba vanu uti vákavele vayuda.
16Venentete váshinama mushii,
vandyona lilangadyo likumene vila ali,
vanu váshinama mushilambo shashimbedi
shiídanavo kupela,
lindivamulikila lilangadyo.”#4:16 Lola Ishaiya 9:1-2.
17Napanelo kutunduvangila muwakati wowo wo, Yesu andítunduvanga kulaililila aashidoni, “Lijugulange mwaa utawala wakuwa undivandika.”
Yesu ankuvashema vakwoda vatandi
Malukushi 1:16-20; Lukashi 5:1-11
18Napanelo Yesu apita awena nanyenje litanda lya Galileya, andívona vanung'unumunu vavili, Simoni wavanshema Patulu pamo na nkulumunu#4:18 Hainamanyika shinu kenga Andaleya avele nang'olo kwali ndyoko. Andaleya vateja dingau dyave mulitanda. Vovo vo, shimadengo shave shivele shakwaka dyomba. 19Nae kuvaulila kushidoni, “Ngwoda! Nangu nantenda muve mmanu mmakuvaka vanu.” 20Vanavo kulakenneu dingau dyave, kumwoda. 21Paukile mushu padyoko kuvona vanung'unumunu vanji vavili, Tiyagu na nung'unumunu#4:21 Hainamanyika shinu kenga Nshuwau avele nang'olo kwali ndyoko. Nshuwau vanavake Shebedeu vatataliyanga dingau dyave mwingalava pamo na tatagwave, nae kuvashema. 22Vanavo kunnakenneu tatagwave na ingalava yo, kumwoda.
Yesu dinkumwidila dimbumba dyoe
Lukashi 6:17-19
23Napanelo Yesu ashindatanela makaja a ku Galileya apita apundisha muvitala vyave vyakulipudidya avalanganga ntenga wambone wautawala, aponia vilwele na mauvilo uti kwavenentete. 24Nadoni shimbili shake shindyúmanikanga mushilambo uti sha Shiliya, venentete vashindavaidanavo kwake nae vanu vavénavo mauvilo akuvilingananga na malwele, vamajini, vashalala na vakulamala kutwala nae kuvaponia. 25Nae dishindamwoda dimbumba dyoe dya ku Galileya, dya ku Dekapolishi, dya ku Yelusalemu, dya ku Yudeya na dyakumwangu unji wa Yudani.
© 2013, Wycliffe Bible Translators, Inc. All rights reserved.