Lucas 14
14
Jesusũ huni betsa hawẽ yura hene itxai shashani shushawanikiaki, na hãtxarã
1Ana huĩrukũti betsatiã fariseu shanẽ ibũ hiwe anushũ Jesusũ habetã piaya fariseu betsabũ uĩaĩbũ 2Jesusũ besuuri huni betsa hawẽ yura hene itxai shashaima tenei tsauwawẽ taeshũ 3Moisés keneni yusĩnanãmisbu inũ fariseubu unãti wakĩ Jesusũ hatu yukakĩ:
—Haska Deusũ Moisés yusĩni txibãkinã, huĩrukũtitiã shushawati yununimẽ? Yunuama iniraka? Ea yuikãwẽ— 4hatu wabia pes hawa yuiama maniabũ huni hawẽ yura hene itxai shashaima tsauwa metsũshũ shushawatã nitxiã kaya 5fariseubu Jesusũ ana hatu yuikĩ:
—Matubunã, huĩrukũtitiãbiakẽ mĩ bake kasmai mĩ ina awa ũpash biti kini merã kawana uĩsama hawaira kaĩ mĩ nesheismamẽ?— hatu wa
6hatu shabakabi txiteawẽ taea hawa yuiamabumakẽ
Aĩyãwãkĩ hatu ishũ pimatikiri Jesusũ hatu yusĩnikiaki, na hãtxarã
7hanua fariseubũ hiwe anushũ hatu pimakatsi hatu ia betsabu binunũ ika shanẽ ibu dapi bashti ikatsis ikaibu uĩkĩ Jesusũ hatu yusĩkĩ:
8—Ha aĩyãkĩ nawa wai anu mĩ hua pinũ ika shanẽ ibu dapi bashti iyamakãwẽ. Hamẽ mia dukũ shanẽ ibu dapi mĩ bashti ikẽ shanẽ ibu betsa mia binua hukẽ 9hiwe ibuã mia yunukĩ: “Hanu ikama uani iwe. Hau betsa hanu inũ ukeri shekeshũwẽ”, akĩ mia mebĩkiki. Mia haska wa dakehairai benikaĩ hawẽ henei bashti ishũ mĩ pishanaii. 10Hakia mia kayabis iwãshũ hawẽ henei mã bashti ika dakakẽ hiwe ibũ mia uĩkĩ yuikĩ: “Baa, ha shanẽ ibu dapi ikiyuwe”, iwanã, mia yunuikiki. Mia haska watã mibetã piaibu mikiri hatu pe xinãmashanikiki. 11Habiaskari wakĩ tsuara ibubis kẽmis Deusũ dake washanikiki. Hakia tsuara ibubis keĩsma Deusũ kẽwãshanikiki. Nĩkairakãwẽ— iwanã,
12hiwe ibũ pimabiashu hari Jesusũ yuikĩ:
—Mĩ duapawẽ kupikĩ hau mia txipu pimariashanũbũ pimakĩ mĩ haibuaibu inũ, mĩ betsabu inũ, minabu betsa inũ, mabuya mia dapi hiweabu besti hatu iyamakubaĩshãwẽ. 13Hakia nuitapaibu hatu ishũ pimakĩ hawaumabu inũ yura babunibu inũ, pakebu inũ, bekũbu merabewakĩ mĩ hatu duawaya 14haska washũ mia ishũ habũri mia pimatirubumawẽ taeshũ pepabu mawa ana besteaĩtiã mĩ pepawẽ Epa Deusũ mia manakua mĩ benimashanaii— akaya
Piti itxapa itxawaxĩshũ yura itxapa hatu pimatikiri miyuiwẽ yusĩnikiaki, na hãtxarã
(Mt 22.1-10)
15haska wai dakashũ nĩkabaikĩ betsã Jesusbetã pikĩ Jesus yuikĩ:
—Deus shanẽ ibuaitianã, txanima tsuabũra habetã pirã, habe benimahairashãkanikiki— aka
16hanushũ Jesusũ miyuiwẽ yuikĩ:
—Huni betsã nawakĩ piti wakatsis ikĩ itxapabu yubaxina 17ma hanu pia kemaitiã hawẽ tsuma yuikĩ: “Hatu yuibaũtãwẽ, hau ikis berinũbunã”, iwanã, yunua yuikubaunaya 18dasibibu beparamekĩ ha dukũtũ yuikĩ: “Bai wakatsi huni betsã bai ẽ biãshuki. Ẽ ha uĩyui kai ẽ habetã piyuamaki, ea yuishũyutãwẽ”, ikaya 19ha katxu betsãri yuikĩ: “Hawẽ dayati ina awa mekẽ dabeti ẽ dama bishuki. Hatu unãnũ, ishũ iyunũ ika ẽ habetã piyuamaki, ishuki, akĩ ea yuishũtãwẽ”, ikaya 20hanushũ betsãri yuikĩ: “Ẽ dama aĩyãshuki. Haskawẽ taea ẽ yurãwãyuai ea yuishũyutãwẽ”, aka 21nĩkatani txĩtũkirã hawẽ shanẽ ibu haskakãshu dasibi yuia sinatakĩ ana hawẽ tsuma yunukĩ: “Nukũ mae anu hiweabu bai hatiubuma inũ bai ewapabuwẽ benabaũkĩ nuitapaibu inũ, yura babunibu inũ, nia txakabubu inũ, bekũbu hatu itãwẽ, hau ebetã pi benũbunã”, aka 22kashũ hatu itãkĩ hawẽ shanẽ ibu yuikĩ: “Mĩ ea yunua ẽ abiashu mĩ nawati dĩtu merã itxai teshke iriabumaki. Haska wapa?” aka 23“Ẽ hiwe anu hau itxai teshke iki benũbũ nukũ mae dapi hiweabu daya hayabiabũ hatu bikawakĩ hatu ea ishũtãwẽ, hau piyui benũbunã. 24Txanima habu dukũ ẽ yubaxinabũ ẽ piti piabumaki”, akĩ hawẽ tsuma yuiniki. Deus shanẽ ibunũ bariaitianã, Deusũ habiaskari washanikiki— akĩ Jesusũ hatu yusĩnikiaki.
Jesus txibanã bikakiaki, na hãtxarã
(Mt 10.37-38; 5.13; Mc 9.50)
25Hanushũ yura itxapabũ hawẽ hãtxa tapĩkĩ txibaĩbu dabekekawã Jesusũ hatu yusĩkĩ yuikĩ:
26—Tsuara eki txiti ikatsis ikinã, hau ea dukũ abukĩ txibãkubaĩshanũbũwẽ. Hamẽ ha dukũ hawẽ ibubu inũ, hawẽ aĩ inũ, hawẽ bakebu inũ, hawẽ betsabu inũ, hawẽ puibu abukĩ heneama inũ, hawẽ hiwea abukĩ heneamari ea abukĩ binumamarã, ẽ tsuma iturumaki. 27Ha inũ, tsuabũra ea txibanũ ibiai ewẽ bika tenekatsi ikamarã, ẽ tsuma itirumaki. 28Hamẽ betsã ea txibãkatsi ikinã, mã eska xinãtiruki. Matũ bai nemaki hanu mapekea nishũ uĩbaũti keyatapa wakatsis ikĩ, ẽ pei damẽkaĩ? iwanã, hawẽ karu tanakĩ mã xinãmiski. 29Hakia mã haska wama hanu mapekea nishũ uĩbaũti mĩ taewaima mĩ keyutirumawẽ taeshũ huni betsã mia usãkĩ 30yuikĩ: “Haska hawẽ karu xinãriamabia ha unaĩsmapatũ ha dukũ hanu mapekea nishũ uĩbaũti taewaima haska washũ menetirumaki”, mia watirubuki. 31-32Hamẽ betsarã, haki sinatakĩ nawa shanẽ ibu betsã 20.000 soldadobu iweai nemakatsi hawẽ soldadobu yunuriama xinãkĩ yuikĩ: “Ẽ 10.000 soldadobũ hawẽ 20.000 soldadobu maematirumẽ?” ishũ atirubuma unãtã ha dapi beriabuma haska wakĩ daewatiru hau yukatanũbũ hawẽ tsumabu yunumiski. 33Haska keskari wakĩ tsuabũra matũ hamapai tibi ana xinãma hawara dasibi mã haya ana hawẽ nuiama bestibu mã eki txiti ikubaĩtirubuki.
34-35Hamẽ betsarã, tewekiri matu yuinũ nĩkakãwẽ. Tewe hawẽ nue wa peki. Hakia hawẽ bata keyu ka paismakẽ ana haska washũ hawẽ mĩ mibã mĩ pewatirubumawẽ taeshũ putamisbuki. Bestibu mã haskatiruki. Uĩrashãkãwẽ. Mã pabĩkiyabunã, nĩkairakãwẽ— hatu waya
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.