Mataayo 1
1
Ɨkɨkolo kya Yɨɨsʉ Kɨlɨsiti
(Luuka 3:23-38)
1Aga gwʉ mataawa ga kɨkolo kya Yɨɨsʉ Kɨlɨsiti#1:1 Kɨlɨsiti Ɨlɨ litaawa mu nzovele jya Kɨyunaani, na mu Kɨebulaniya viita Mesiya. Amataawa aga kwʉ kʉta ʉmuunu ʉvɨ ahalilwe nʉ Ngʉlʉve nʉ kʉbakwa amafuta ave Nkʉlʉdeeva. ʉvɨ aahʉmile mu lʉjungu lwa Davʉdi#1:1 Davʉdi Ikulongwi tsa Davʉdi ɨmba kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ʉlwʉ lʉʉlwa lwahʉmile kwa Abulahamu.#1:1 Abulahamu Ikulongwi tsa Abulahamu ɨmba kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ.
2ɄAbulahamu aammolile ʉIsaka,
ʉIsaka aammolile ʉYakobo,
ʉYakobo aammolile ʉYuuda na valʉkololwe.
3ɄYuuda aammolile ʉPelesi nʉ Zela kwa Tamali.
ɄPelesi aammolile ʉHesoloni,
ʉHesoloni aammolile ʉLamu,
4ʉLamu aammolile ʉAminadabu,
ʉAminadabu aammolile ʉNasoni,
ʉNasoni aammolile ʉSalumoni,
5ʉSalumoni aammolile ʉBoazi kwa Lahabu,
ʉBoazi aammolile ʉObedi kwa Luti,
ʉObedi aammolile ʉYese,
6nʉ Yese aammolile ʉnkʉlʉdeeva ʉDavʉdi.
ɄDavʉdi aammolile ʉSolomoni kʉ nʼdala ʉvɨ aale mwehe va Uliya,#1:6 Mwehe va Uliya Ɨlitaawa lya mwene vɨ Batiseba (2 Samweli 12:24-25).
7ʉSolomoni aammolile ʉLehoboamu,
ʉLehoboamu aammolile ʉAbiya,
ʉAbiya aammolile ʉAsa,
8ʉAsa aammolile ʉYehoshafati,
ʉYehoshafati aammolile ʉYolamu,
ʉYolamu aammolile ʉUziya,
9ʉUziya aammolile ʉYotamu,
ʉYotamu aammolile ʉAhazi,
ʉAhazi aammolile ʉHezekiya,
10ʉHezekiya aammolile ʉManasi,
ʉManasi aammolile ʉAmoni,
nʉ Amoni aammolile ʉYosiya.
11ɄYosiya aammolile ʉYekoniya na valʉkololwe pa nsɨkɨ ʉpwʉ avaanu va kʉ Babeli vaaviibiite aVaisilahɨli nʉ kʉhɨlɨka kʉ kɨlʉnga kya veene.
12Ikange, wʉ vahegile navo ʉkʉ,
ʉYekoniya aammolile ʉSalatieli,
ʉSalatieli aammolile ʉZelubabeli,
13ʉZelubabeli aammolile ʉAbihudi,
ʉAbihudi aammolile ʉEliyakimu,
ʉEliyakimu aammolile ʉAzoli,
14ʉAzoli aammolile ʉSadoki,
ʉSadoki aammolile ʉAkimu,
ʉAkimu aammolile ʉEliudi,
15ʉEliudi aammolile ʉEliyazali,
ʉEliyazali aammolile ʉMatani,
nʉ Matani aammolile ʉYakobo.
16ɄYakobo aammolile ʉYusufu ʉnʼgoosi va Maliyamu.
ɄMaliyamu vɨ mwene aammolile ʉYɨɨsʉ ʉvɨ ɨlitaawa lya mwene vɨ Kɨlɨsiti.
17Pwʉ ʉkʉhʉma kwa Abulahamu ʉkʉsika kwa Davʉdi vaalekwo avanyienya va Yɨɨsʉ kɨtsigo na vanni (14), nʉ kʉhʉma kwa Davʉdi ʉkʉsika pa nsɨkɨ ʉpwʉ avaanu va Babeli vaavahaamiitse aVaisilahɨli mu kɨlʉnga kya veene, vaalepwo avanyienya va Yɨɨsʉ kɨtsigo na vanni. Ikange, ʉkʉhʉma vahaamitswe ʉkʉsika ʉkʉholwa kwa Kɨlɨsiti, vaalepwo avanyienya va Yɨɨsʉ kɨtsigo na vanni.
Ʉkʉholwa kwa Yɨɨsʉ Kɨlɨsiti
(Luuka 2:1-7)
18Ʉkʉholwa kwa Yɨɨsʉ Kɨlɨsiti kwale ndee, wʉ ʉvanyina ʉvɨ ɨlitaawa lya mwene vɨ Maliyamu alɨ mu ndagani tsa kʉtoolana nʉ Yusufu, aavoniike ʉkʉta alɨ nʉ vʉtsito ʉwʉ waamwitsye kʉ nzɨla jya Mepo ʉMbalatse. 19Lɨno ʉlwakʉva ʉYusufu, ʉnʼgoosi va mwene aavombaga itsa vʉgolosu pamiiho ga Ngʉlʉve, naanogwe ʉkʉta ankotse isoni ʉMaliyamu. Pwʉ akasaaga ʉkʉta andeke kɨtsila kʉvavʉʉla avaanu avange.#1:19 Ʉkʉkongana ni nyiiho tsa Kɨyahudi, ʉnʼdɨɨmi nʉ mmɨnza wʉ vapʉlɨngʼiine ʉkʉtoolana, vaavalɨlwagwa vatooliine. Lɨno gwalepwo ʉnsɨkɨ gwa mwaka ʉnʼgʉge ʉgwa kʉpʉlɨkɨlanila wʉ kʉkaanale ʉkʉtoolana. Mu nsɨkɨ ʉgwa navaatavʉlɨlwe ʉkʉtaama paninie ʉkʉsikila vitoolana. Ʉkʉndeka ʉvɨ mupeetsiine indagani kwahwaniine nʉ kʉmpa ɨtalaka.
20Mu nsɨkɨ wʉ isaaga ago, ʉnsuungʼwa va Ntwa akamwitsila mu magonasivi, akambʉʉla akata, “Gwe Yusufu, vɨ ʉhʉmile mu kɨkolo kya nkʉlʉdeeva ʉDavʉdi, ʉleke ʉkʉdwada ʉkʉntoola ʉMaliyamu ʉlwakʉva ʉvʉtsito ʉwʉ alɨ nawo vʉmwitsye kʉ maka ga Mepo ʉMbalatse. 21Jiihola ʉmwana ʉnʼdɨɨmi, nʉʉve jʉvukʉmpa ɨlitaawa ɨlɨ Yɨɨsʉ,#1:21 Jʉvukʉmpa ɨlitaawa ɨlɨ Yɨɨsʉ Ɨlitaawa ɨlɨ Yɨɨsʉ kwʉ kʉta ʉNtwa evo ʉNgʉlʉve ipoka. ʉlwakʉva jiikʉvapoka avaanu va mwene mu mbiivi tsa veene.”
22Tsyoni itso tsyavombiike ewo pakʉta ɨlimenyu lɨlya lɨve lɨvombiike ɨlyʉ ʉNtwa aatsovile kʉ nzɨla jya nyamalago va mwene ʉkʉta, 23“Lola! Ʉmmɨnza ʉvɨ nammanyili ʉnʼgoosi, jiiva nʉ vʉtsito. Ikange jiihola ʉmwana ʉnʼdɨɨmi! Jiikʉmpa ʉmwana ʉjwa ɨlitaawa ɨlɨ Imanueli.”#Yesaya 7:14 Ʉvʉlʉvʉlʉ wa litaawa ɨlyo kwʉ kʉta, “ɄNgʉlʉve alɨ paninie nʉʉwe.”
24Ʉnsɨkɨ ʉYusufu asisimwike, aavombile ndʉwʉ ʉnsuungʼwa va Ntwa aambʉʉlile, akantoola ʉMaliyamu ave nʼdala va mwene. 25Lɨno naammanye ʉkʉsika pa nsɨkɨ ʉpwʉ ʉMaliyamu ihola ʉmwana ʉnʼdɨɨmi. ɄYusufu akampa ʉmwana ʉjwa ɨlitaawa ɨlɨ Yɨɨsʉ.
© 2019, Wycliffe Bible Translators, Inc. All rights reserved.