ၥ မိ 28
28
28
1စအံစၭကိၭန့စယၫကူၭနီၪ, ဆိၪဂ့ၩဝ့ၫတၭ,မၪလူၬ ဆၧ,စံၭအဝ့ၫ, ထီးမၩန့နမၫ လၧၦကၫနအၫ့ဖိၪအဖိၪ 2မုၪလဂ့ၩ.- ဂဲထုၪ့လ့ၩလၧခးပၫဒၫ့အၫရၫ့, လၧနမိအဖါ စဘၥူၫအ့လၭအဂံၪ့ဖၧၩ့တၭ, န့နမၫလၧနမိအထၧၫ့ဖု 3ဝဲခွၫစလၫဘၫ့ အဖိၪမုၪအကျၩထီးနီၪဆံၭ.- ယွၩလၧ အၥ့ၪဆၧလူၬနီၪ, မွဲအဆိၪဂ့ၩနၧၩ, ဒဲဒုၭၥၪထၪ့နၧၩ, ဒဲမၩအၪ့ထၪ့နၧၩ, ဘဲၫၥိၭနမိကဲၪထၪ့ လၧၦအဆၨၩ 4လဖၪအီၪကီၪ့လဒီၪ့, ဒဲဖ့ၪလၫ့ဆၧဆိၪဂ့ၩ ဘၪဆဲၫ့လၧ စအၫဘြဟၫ့လၧနၧၩ, ဒဲနချံၫနၥၪလၧနၥိၭဆ့, ဘဲၫၥိၭ နမိန့ၥၫခးလၧနအီၪမွံၩ လၧအဖၧၩ့ လၧယွၩဖ့ၪလၫ့ 5စအၫဘြဟၫ့နီၪလီၫ.- စအံစၭအၪ့မၧၫ့စယၫကူၭလ့ၩ ဆၧတၭ, အဝ့ၫဒၪလ့ၩစိၩဝ့ၫ လၧပၫဒၫ့အၫရၫ့,လၧၦအၫ ရၫ့ဖိၪစယၫကူၭဒဲစအံစီၫအမိ နးရဘ့ၭကၫအထၧၫ့ဖုဝဲ စဘၥူၫအ့လၭအဖိၪခွၫ စလၫဘၫ့အအီၪနီၪလီၫ.
စအံစီၫမၩန့ဒီၭအမၫလၧခဲၫ့လဂၩ.
6စအံစီၫဒၪဘၪဝ့ၫ လၧစအံစၭဆိၪဂ့ၩစယၫကူၭနီၪ, အၪ့မၧၫ့အလ့ၩ လၧပၫဒၫ့အၫရၫ့, လၧအမိန့မၫထီးနီၪ တၭ,ဆိၪဂ့ၩဝ့ၫအဘိၩ့ဘၭနီၪ မၪလူၬဝ့ၫတၭ, စံၭဝ့ၫ ဒၪ,ထီးမၩန့နမၫ လၧၦကၫနအၫ့ဖိၪ အဖိၪမုၪလဂ့ၩ 7နီၪ,- စယၫကူၭ ခိၭနၪအမိအဖါအလူတၭ, လ့ၩဝ့ၫ 8လၧပၫဒၫ့အၫရၫ့လီၫ.- တၭစအံစီၫဒၪဘၪ လၧၦကၫ နအၫ့ဖိၪအဖိၪမုၪ လဘၪဘၪအဖါ စအံစၭအၥၭနီၪ, 9စအံစီၫလ့ၩလၧစအံၡမၫအ့လၭ အအီၪတၭ, မၩန့အၪ ထၪ့အမၫ လၧအအီၪဝဲၩလဖၪ လၧစအၫဘြဟၫ့အဖိၪ ခွၫစအံၡမၫအ့လၭအဖိၪမုၪ, စနဘ့ယီၭ အထၧၫ့ဖုဝဲ မုၪ,နးမဟၫလၫလီၫ.
စယၫကူၭအဆၧမံၫမးထီးဘ့ၫၥလၭ.
10စယၫကူၭစဲၪ့ထၪ့ခွံၬ လၧဘံအၧၫၡံၫဘၫတၭ, လ့ၩ 11စိၩဝ့ၫလၧဟၫရၫ့လီၫ.- ဘၪလၧဆၧအလးလစီၪ့တၭ, အီၪဝ့ၫထီးနီၪၥၫ့နၩချီၩ့လီၫ. အဂဲးဘဲၫယီၩမုလၩ့နုၬဝ့ၫ ယူၭ, မၩန့လိးလဖျိၪ့ လၧအလးလစီၪ့နီၪတၭ, မၩအ ခိၪခုၪ့တၭ, မံၫနၩ့လၧဆၧအလး လစီၪ့နီၪလီၫ.
12အဝ့ၫနီၪမံၫမးဆၧတၭ, ယိခွါ, ဎၫ့လဘီၩ့အီၪဆၧၫ့ ထုၪ့လၧဂၪ့ခိၪချိၫ့တၭ, အခံၫထိၭထၪ့ဘၭ လၧမူၭခိၪ လီၫ.တၭယိခွါ, ယွၩအၥီၫ့လဖၪ လ့ၩထၪ့ဂဲၫထဲၩ့လၩ့ 13လၧအလီၩ့လီၫ.- ယိခွါ, ယဟိဝၩအီၪဆၧၫ့ထုၪ့လၧ အဖၫ့ခိၪနီၪ, စံၭဝ့ၫဒၪ, ယဝ့ၫဒၪယီၩ, ယမွဲယဟိဝၩ, နဖါစအၫဘြဟၫ့အယွၩ, ဒဲစအံစၭအယွၩလီၫ. ခးလၧ နမံၫလၧအဖၧၩ့လဘံၪ့ယီၩ, ယမိဖ့ၪလၫ့နၧၩဒဲနချံၫနၥၪ 14လီၫ.- နချံၫနၥၪလဖၪနီၪ မိမၩအၥၭဘဲၫဂၪ့ခိၪမုၬအၥိၭ နီၪတၭ, နမိလၩ့မုလၩ့ဖၭလၧမုနုၬ, ဒဲလၧမုထၪ့,ဒဲလၧ မုဖၩ, ဒဲလၧမုခံၫ့တၭ, ကယဲၦဂၪ့ခိၪအဂံၪ့ဒီၪ့လဖၪမိ ဘၪဆၧဆိၪဂ့ၩလၧနၧၩ, ဒဲလၧနချံၫနၥၪအဖၧၩ့ထီးအ 15လူၬလီၫ.- တၭယိခွါ, ယအီၪလၧနၥိၭ, ထီးဒၪနလ့ၩ ဆၧလစီၪ့လါလါနီၪ, ယမိယိထဲၩ့ခွါထဲၩ့နၧၩတၭ,ယ မိဒုၭဂဲၫထဲၩ့ထဲၩ့နၧၩ လၧခးလဘံၪ့ယီၩလီၫ. အဂဲး ဘဲၫယီၩဆၧလၧယလီၩဘၪနၧၩနီၪ, ထီးယအ့ၪလမၩ ဂီၩ့ဒံၭဘၪတၭ, ယစဲၪ့ဒၪနၧၩနးစီၪ့အ့ၬ.
16စယၫကူၭနၪ့ထၪ့အၥၭတၭ, စံၭဝ့ၫဒၪ, မွဲမၬယဟိ ဝၩအီၪဝ့ၫလၧဆၧအလး လစီၪ့ယီၩတၭ, ယၥ့ၪယၫ 17ဘၪယဝ့ၫဆ့အ့ၬ.- ၥၭမဲၪဆၧတၭ, စံၭဝ့ၫဒၪ, ဆၧအ လးလစီၪ့ယီၩ, မွဲဆၧၥၭမဲၪအလးဆံၭဒိၪလဲၪၬ အယီၩ လမွဲဘၪဆၧဂူၫဂၩလမံၩ့နီၪ, မွဲယွၩအဂံၪ့တၭ, အယီၩ 18မွဲမူၭခိၪအတရၫ့လီၫ.- ဆၧဖၩ့ထၪ့နီၪ စယၫကူၭဂဲထုၪ့ ဂီၩဂီၩတၭ, မၩန့လိးလဖျိၪ့ လၧအမၩခိၪခုၪ့နီၪ, ဘဲၫ ၥိၭအမိကဲၪထၪ့ ဆၧအထုၪ့နီၪ ဘိၭဆၧၫ့ထုၪ့ဝ့ၫတၭ, 19လူၫလၩ့ၥိၪလၧအလီၩ့လီၫ.- ဆၧအလးလစီၪ့နီၪကိၭ ဝ့ၫအမံၩ့ ဘ့ၫၥလၭလီၫ. မွဲလါနၫ့တၭ, ဒိၩ့လဖျိၪ့နီၪ အမံၩ့လၧအခၪ့ထံၭ, မွဲလုဇၭလီၫ.
20စယၫကူၭဆိၪလၩ့အၥၭတၭ, စံၭဝ့ၫဒၪ,ယွၩအ့ၪအီၪ လၧယၥိၭ, ဒဲယိထဲၩ့ခွါထဲၩ့ယၧၩ လၧယဖၧၩ့ၥၭယ ဖိၬလဘီၩ့ယီၩတၭ, အ့ၪဖ့ၪလၫ့ယၧၩ ဆၧအၪ့လၧယ 21မိအၪ့, ဒဲဆၧကီၩ့ဆၧၥိၭ, လၧယမိကီၩ့နီၪ,- ဒဲယဂဲၫ ထဲၩ့ထဲၩ့မုၬမုၬ ထီၩ့လၧယဖါအဂံၪ့ဖၧၩ့တၭ, ထီးနီၪ 22လဖၧၫ့ယဟိဝၩ မိကဲၪထၪ့ယယွၩလီၫ. တၭလိးလဖျိၪ့ လၧယမၩထၪ့ထုၪ့လထုၪ့ယီၩ, မိကဲၪထၪ့ယွၩအဂံၪ့, ဒဲကယဲဆၧလၧနဖ့ၪလၫ့ယၧၩ လမံၩ့လါလါနီၪ, ယမိ ဖ့ၪလၫ့နၧၩဆံၫပိၩ့လပိၩ့တၡါဆ့လီၫ.
Pwo Kayin Bible © Bible Society of Myanmar, 1883.