Luk. 15
15
Yesu ka ŋikasecak
1Tocunun ŋikerirak ocur ka ŋikasecak akiirar ŋakiro a Yesu. 2Tolomakis Ŋiparisayon ka ŋiketatamak a Ŋikisila akiŋuruŋura ebasi, “Okoe! Abe erukito bo ituŋanan en ka ŋikasecak, nabo imujete ka ikes!”
Amesek ŋina aolit
(Mat. 18:12-14)
3Tolimok Yesu ikes akitadapet na tema, 4“Ani alokidiŋ kus keyakar ituŋanan ŋamesekin amiat, tooli apei, ikokini iŋes ai? Nyimyekini iŋes ŋuna tomonikanikaomwon ka ŋakanikaomwon anadakar, tolot kiwara ŋina eolit tari neni eryamunia a? 5Ani eryamuni, elelyani iŋes nooi, toryoŋak amesek ŋin loseket keŋ. 6Apaki ŋina edolyo iŋes lore keŋ, enyarauni ŋikeekonei kaapei ka ŋikidunyet tema, ‘Olelyana kaapei, anerae aryamu ayoŋ amesek kaŋ ŋina aolit.’ 7Ikwaŋinapei, akalimokini ayoŋ iyes atemar, eyakaun alelyan nakuj aŋuna ke ekasecan a epei a ŋolo ekii ŋasecisya keŋ, akilo ŋuluce ŋulu tomonikanikaomwon ka ŋikanikaomwon ŋulu ajokak, ŋulu nyiitanito akiki ŋasecisya kec.
Esilipa ŋolo acakara
8“Kori ikokini ai aberu ŋina eyakar ŋisilipae ŋitomon, ido tocakar epei? Emam mono nyinokakini iŋes etaa, topyeu akai, kiwar ŋiwaetin ka akai daadaŋ tari ŋina eryamunia a? 9Ani eryamuni, enyarauni ŋakeekonei ka ŋikidunyet iwapei tema, ‘Olelyana kaapei ka ayoŋ, anerae aryamu ayoŋ esilipa kaŋ ŋolo acakara!’ 10Ikwaŋinapei, akalimokini ayoŋ iyes atemar, elelyanete ŋimalaikan ŋulu ka Akuj ikotere epeikasecan ŋolo ekii ŋasecisya keŋ.”
Edya ŋolo aolit
11Tolimu Yesu tema, “Ayai ekile ŋolo aya ŋidwe ŋulusapa ŋiarei. 12Abu ŋolo cici tolimok iŋes tema, ‘Papa, totyakakinae ayoŋ ŋiboro ŋulu ebeunito neni kaŋ anabaru kon.’ Totyakaki nai papa keŋ edya ŋol ŋiboro keŋ. 13Ani eriŋa nyelunyara ŋirwa ŋulu alalak, abu edya ŋol tocunak ŋiboro ŋulu ayakar daadaŋ, towot lobuku ece ŋolo alwanan; kirika iŋes aina ŋiboro keŋ alopite a ŋolo aronon. 14Kedau iŋes akielielaar ikes daadaŋ, bu eron nakwap ŋin, toŋopik iŋes ibore imuji. 15Tolot nai iŋes toruwor epito aneni a icetuŋanan anakwap a ŋin, a ŋini abu kiwuak iŋes akiyok ŋipegei. 16Emuit iŋes akimor ka ŋipegei ŋapoco, nai amam ipei daŋ ŋini apedori ainakin iŋes tari ŋadi. 17Ani ekaku, kiito iŋes ekecere tema, ‘Imujete ŋiketiyak a papa kaŋ akimuj kimwoko topiyanut, nai okaarite ayoŋ akoro a ne! 18Anyouni ayoŋ oboŋo neni a papa kaŋ, olimok iŋes otema, “Papa, asec ayoŋ alokiŋaren Akuj ka alokiŋaren kon; 19nyitemokino nabo ayoŋ okanyarae lokoku kon, kitusubunae ayoŋ eketiyan kon.” ’ 20Tonyou nai iŋes, tolot neni a papa keŋ.
“Ani eriŋa iŋes elwana, towuat papa keŋ iŋes ebunit kisyoni iŋes, kikomak kisiryamia, totunakin, tonu iŋes. 21Tolimok edya ŋol papa keŋ tema, ‘Papa, asec ayoŋ alokiŋaren Akuj ka alokiŋaren kon; nyitemokino nabo ayoŋ okanyarae lokoku kon.’ 22Nai tolimok papa keŋ ŋiketiyak keŋ tema, ‘Apesi atipei yautu elou ŋolo ajokan kitanapa. Kiwuakisi ekaboboot lokimoin keŋ ka kitanapa ŋamuk. 23Toramutu itaok ŋini atuman toarakis, onyama olakaros! 24Anerae lokoku kaŋ lo, atwanit, nai tokona ayaru; aolit, nai tokona atakanu.’ Ido kisyakis ikes akimuj ka akimomwor.
25“Apaki ŋin ayai lokoku keŋ ŋolo apolon lomanikor. Ani eboŋuni iŋes eapuuni lore, kiira ŋituŋa ikareyete ka idoŋaete. 26Tonyara iŋes eketiyan epei, kiŋit iŋes tema, ‘Anukiro nu?’ 27Toboŋok eketiyan ŋol iŋes tema, ‘Lokaato kon aboŋu lore, ido abu papa kon tema toara itaok ŋini atuman, anerae aboŋu iŋes neni ajokan emam ŋace.’
28“Toŋo edya ŋolo apolon nooi, towou alomar tooma lore; tosodi tolomu papa keŋ kiŋa, kimaima iŋes tema, ‘Tolomu tooma.’ 29Toboŋok iŋes papa keŋ tema, ‘Kiŋolik, etiya ayoŋ ekonitic ŋikaru ŋulu alalak emam nyeŋero ŋakonikiro; nai emam tari idiokale daŋ ŋini ibu iyoŋ ikiinak ayoŋ olakarotor ka ŋikonei kaŋ. 30Nai abu lokoku kon logo kisunyak ŋiboro kon daadaŋ namalaae, ani tokona eboŋuni iŋes lore, iarak iyoŋ iŋes itaok ŋini atuman!’ 31Toboŋok papa keŋ iŋes tema, ‘Lokoku, ikirukit iwon ŋirwa daadaŋ, nabo ibore daadaŋ ŋini ikiyakar ayoŋ erae ŋini kon. 32Nai itemokino iwon olakaros; anerae lokaato kon lo, atwanit, nai tokona ayaru; aolit, nai tokona atakanu!’ ”
Ngakarimojong Interconfessional Bible © Bible Society of Uganda, 2008.
Luk. 15
15
Yesu ka ŋikasecak
1Tocunun ŋikerirak ocur ka ŋikasecak akiirar ŋakiro a Yesu. 2Tolomakis Ŋiparisayon ka ŋiketatamak a Ŋikisila akiŋuruŋura ebasi, “Okoe! Abe erukito bo ituŋanan en ka ŋikasecak, nabo imujete ka ikes!”
Amesek ŋina aolit
(Mat. 18:12-14)
3Tolimok Yesu ikes akitadapet na tema, 4“Ani alokidiŋ kus keyakar ituŋanan ŋamesekin amiat, tooli apei, ikokini iŋes ai? Nyimyekini iŋes ŋuna tomonikanikaomwon ka ŋakanikaomwon anadakar, tolot kiwara ŋina eolit tari neni eryamunia a? 5Ani eryamuni, elelyani iŋes nooi, toryoŋak amesek ŋin loseket keŋ. 6Apaki ŋina edolyo iŋes lore keŋ, enyarauni ŋikeekonei kaapei ka ŋikidunyet tema, ‘Olelyana kaapei, anerae aryamu ayoŋ amesek kaŋ ŋina aolit.’ 7Ikwaŋinapei, akalimokini ayoŋ iyes atemar, eyakaun alelyan nakuj aŋuna ke ekasecan a epei a ŋolo ekii ŋasecisya keŋ, akilo ŋuluce ŋulu tomonikanikaomwon ka ŋikanikaomwon ŋulu ajokak, ŋulu nyiitanito akiki ŋasecisya kec.
Esilipa ŋolo acakara
8“Kori ikokini ai aberu ŋina eyakar ŋisilipae ŋitomon, ido tocakar epei? Emam mono nyinokakini iŋes etaa, topyeu akai, kiwar ŋiwaetin ka akai daadaŋ tari ŋina eryamunia a? 9Ani eryamuni, enyarauni ŋakeekonei ka ŋikidunyet iwapei tema, ‘Olelyana kaapei ka ayoŋ, anerae aryamu ayoŋ esilipa kaŋ ŋolo acakara!’ 10Ikwaŋinapei, akalimokini ayoŋ iyes atemar, elelyanete ŋimalaikan ŋulu ka Akuj ikotere epeikasecan ŋolo ekii ŋasecisya keŋ.”
Edya ŋolo aolit
11Tolimu Yesu tema, “Ayai ekile ŋolo aya ŋidwe ŋulusapa ŋiarei. 12Abu ŋolo cici tolimok iŋes tema, ‘Papa, totyakakinae ayoŋ ŋiboro ŋulu ebeunito neni kaŋ anabaru kon.’ Totyakaki nai papa keŋ edya ŋol ŋiboro keŋ. 13Ani eriŋa nyelunyara ŋirwa ŋulu alalak, abu edya ŋol tocunak ŋiboro ŋulu ayakar daadaŋ, towot lobuku ece ŋolo alwanan; kirika iŋes aina ŋiboro keŋ alopite a ŋolo aronon. 14Kedau iŋes akielielaar ikes daadaŋ, bu eron nakwap ŋin, toŋopik iŋes ibore imuji. 15Tolot nai iŋes toruwor epito aneni a icetuŋanan anakwap a ŋin, a ŋini abu kiwuak iŋes akiyok ŋipegei. 16Emuit iŋes akimor ka ŋipegei ŋapoco, nai amam ipei daŋ ŋini apedori ainakin iŋes tari ŋadi. 17Ani ekaku, kiito iŋes ekecere tema, ‘Imujete ŋiketiyak a papa kaŋ akimuj kimwoko topiyanut, nai okaarite ayoŋ akoro a ne! 18Anyouni ayoŋ oboŋo neni a papa kaŋ, olimok iŋes otema, “Papa, asec ayoŋ alokiŋaren Akuj ka alokiŋaren kon; 19nyitemokino nabo ayoŋ okanyarae lokoku kon, kitusubunae ayoŋ eketiyan kon.” ’ 20Tonyou nai iŋes, tolot neni a papa keŋ.
“Ani eriŋa iŋes elwana, towuat papa keŋ iŋes ebunit kisyoni iŋes, kikomak kisiryamia, totunakin, tonu iŋes. 21Tolimok edya ŋol papa keŋ tema, ‘Papa, asec ayoŋ alokiŋaren Akuj ka alokiŋaren kon; nyitemokino nabo ayoŋ okanyarae lokoku kon.’ 22Nai tolimok papa keŋ ŋiketiyak keŋ tema, ‘Apesi atipei yautu elou ŋolo ajokan kitanapa. Kiwuakisi ekaboboot lokimoin keŋ ka kitanapa ŋamuk. 23Toramutu itaok ŋini atuman toarakis, onyama olakaros! 24Anerae lokoku kaŋ lo, atwanit, nai tokona ayaru; aolit, nai tokona atakanu.’ Ido kisyakis ikes akimuj ka akimomwor.
25“Apaki ŋin ayai lokoku keŋ ŋolo apolon lomanikor. Ani eboŋuni iŋes eapuuni lore, kiira ŋituŋa ikareyete ka idoŋaete. 26Tonyara iŋes eketiyan epei, kiŋit iŋes tema, ‘Anukiro nu?’ 27Toboŋok eketiyan ŋol iŋes tema, ‘Lokaato kon aboŋu lore, ido abu papa kon tema toara itaok ŋini atuman, anerae aboŋu iŋes neni ajokan emam ŋace.’
28“Toŋo edya ŋolo apolon nooi, towou alomar tooma lore; tosodi tolomu papa keŋ kiŋa, kimaima iŋes tema, ‘Tolomu tooma.’ 29Toboŋok iŋes papa keŋ tema, ‘Kiŋolik, etiya ayoŋ ekonitic ŋikaru ŋulu alalak emam nyeŋero ŋakonikiro; nai emam tari idiokale daŋ ŋini ibu iyoŋ ikiinak ayoŋ olakarotor ka ŋikonei kaŋ. 30Nai abu lokoku kon logo kisunyak ŋiboro kon daadaŋ namalaae, ani tokona eboŋuni iŋes lore, iarak iyoŋ iŋes itaok ŋini atuman!’ 31Toboŋok papa keŋ iŋes tema, ‘Lokoku, ikirukit iwon ŋirwa daadaŋ, nabo ibore daadaŋ ŋini ikiyakar ayoŋ erae ŋini kon. 32Nai itemokino iwon olakaros; anerae lokaato kon lo, atwanit, nai tokona ayaru; aolit, nai tokona atakanu!’ ”
Ngakarimojong Interconfessional Bible © Bible Society of Uganda, 2008.